Lagani 2015 Tiokratik Haroro Sikuli ese Ita Ia Durua Eda Hadibaia Karana Ita Hanamoa

1 Salamo torea tauna, Davida ia gwau: “Lohiabada e, oi be lauegu Nadi Gini Gabuna, bona egu Hamauria Tauna. Mani lau do oi durua, vadaeni lauegu uduna ena hereva, bona lauegu kudouna ena laloa, be do idia namo, oiemu vairana dekenai.” (Sal. 19:14) Danu, ita ura eda hereva amo Iehova ita hanamoa, badina eda kongrigeisen bona haroro gaukara ai hereva momokani herevalaia karana ita laloa bada. Tiokratik Haroro Sikuli be Iehova ese ita ia hadibaia dalana ta, unai amo haroro daladia ita dibaia. Tanobada hegegemadai kongrigeisen 111,000 ese wiki ta ta ai unai sikuli idia karaia. Unai ese tadikaka taihu ibounai ia durua sivarai namona harorolaia taudia namodia ai idia lao, unai amo lalona veria dalanai, hemataurai bona mai gari lasi ida haida idia hadibaia.​—Kara 19:8; Kol. 4:6.

² Lagani 2015 ena sikuli sediual ai do ita gaukaralaia gauna be inai: Baibel amo Dahaka Do Ita Dibaia? buklet. Danu, Baibel hereva badadia bona Tok namba 1 ena nega idia haidaua. Unai senisi haida bona sikuli ai tok henia dalana be henunai paragraf ese do idia hahedinaraia.

³ Baibel Hereva Badadia: Inai kahana do idia karaia tadikaka ese miniti rua lalonai wiki ena Baibel duahiduahi ena point tamona do ia herevalaia. Bema ia hegaegae namonamo idia makaia nega lalonai, mai anina bada point be kongrigeisen ida do ia herevalaia. Bena miniti siks be helai taudia ese Baibel duahiduahi ai idia davaria point do idia herevalaia, to edia haere ena lata be sekeni 30 ia hanaia lasi. Ita hegaegae namonamo neganai, iseda haere be sekeni 30 lalonai ita henia diba. Danu, nega ia noho haida be edia tahua karana amo idia davaria point namodia idia herevalaia totona.

⁴ Tok Namba 1: Baibel duahiduahi ena nega idia hakwadogia miniti toi bona siri haida sibona do ia duahia. Unai kahana do idia karaia taudia ese edia duahiduahi idia tohoa loulou, duahia badabada, bona hereva idia gwauraia namonamo, unai amo idia duahia sivarai do idia lalopararalaia. Namona be Iehova ena taunimanima do idia hekwarahi idia duahiduahi namonamo totona, badina iseda tomadiho karana lalonai unai be mai anina bada. Ita moale badina iseda natudia momo idia duahiduahi namonamo! Tama sina ita hanamoa badina idia hekwarahi edia natudia idia durua edia duahiduahi karana idia hanamoa totona.

⁵ Tok Namba 2: Inai tok be taihu ese miniti faiv lalonai do ia karaia. Stiuden be ia abia sinado ia gaukaralaia be namo. Bema tok be Baibel amo Dahaka Do Ita Dibaia? buklet amo, namona be teritori ai idia karaia haroro dalana ia gaukaralaia. Bema tok be Baibel ese ia sivarailaia tauna ta ia herevalaia, vadaeni stiuden ese unai tauna ena sivarai ia stadilaia o research amo Baibel siri maorodia ia abia hidi, bona unai tauna ena sivarai amo ita dibaia gaudia ia herevalaia. Unai sinado ia durua Baibel siri haida ia gaukaralaia diba. Sikuli naria tauna ese durua tauna do ia abia hidi.

⁶ Tok Namba 3: Inai tok be tadikaka o taihu ese miniti faiv lalonai do ia karaia. Taihu ese ia karaia neganai, Tok Namba 2 bamona ia karaia be namo. Tadikaka ese inai kahana ia abia neganai, ena tok be helai taudia vairanai ia gini bena pablik tok bamona ia henia. Stiuden ese tok ena sinado bona Baibel siri maorodia ia abia hidi, bona unai sivarai amo ita dibaia gaudia ia herevalaia.

⁷ Tok Namba 3 Ena Kahana Matamata Tadikaka Totona: Bema tok be Baibel amo Dahaka Do Ita Dibaia? buklet amo, namona be ruma bese tomadiho o haroro dalanai do ia karaia. Sikuli naria tauna ese durua tauna bona karaia dalana do ia abia hidi. Namona be durua tauna be tok ia henia tadikaka ena famili taudia ta, o kongrigeisen tadikaka ta. Danu, tok ena sinado ia durua siri ma haida idia gaukaralaia diba. Nega ta ta ai, reana elda ese unai kahana do ia karaia. Elda taudia ese edia durua tauna bona karaia dalana idia abia hidi diba. Momokani, elda taudia ese hadibaia namonamo dalana be ena famili o tadikaka ta ida idia haheitalaia karana amo kongrigeisen ia hagoadaia.

⁸ Sisiba: Tok ta ta murinai sikuli naria tauna ese miniti rua do ia gaukaralaia stiuden ia hanamoa, bona Tiokratik Haroro Sikuli amo Heduru Oi Abia bukana amo stiuden ese do ia hanamoa gaudia ia herevalaia. Sikuli naria tauna ese stiuden ena kahana ia gwauraia neganai, namona be stiuden ese do ia karaia sisiba ia gwauraia lasi. Tok ta ta murinai, sikuli naria tauna ese stiuden ia hanamoa, bona ia karaia sisiba ia herevalaia bona stiuden ese tok ia karaia namonamo ena badinaia ia hahedinaraia, eiava mai hemataurai ida stiuden ese unai sisiba ia laloa bada ena namo ia herevalaia.

⁹ Stiuden ena sisiba pepana be Haroro Sikuli bukana ena rau 79 ia lao 81 ai ia noho. Stiuden ese tok ia karaia murinai, sikuli naria tauna ese stiuden ena buka dekenai maka ia atoa bona do ia nanadaia bema unai sisiba ena eksasais ia karaia. Hebou o nega ma ta ai stiuden dekenai hanamoa bona heduru herevadia ia gwauraia diba. Stiuden ta ta ese sikuli lalonai idia abia heduru herevadia idia laloa bada be namo, unai ese idia do ia durua idia goada idia lao totona.​—1 Tim. 4:15.

¹⁰ Bema stiuden ena nega ia hanaia, sikuli naria tauna o durua tauna ese saini ta amo unai ia hahedinaraia. Hegeregere, hemataurai dalanai rege ta amo do ia hahedinaraia stiuden ena nega ia hanaia. Stiuden ese unai ia kamonai neganai, namona be ena hereva ia hakwadogia bona platfom ia rakatania.​—Haroro Sikuli bukana rau 282, par. 4 itaia.

¹¹ Unai hakaua herevadia idia badinaia taudia oi hagoadaia Tiokratik Haroro Sikuli ai idia vareai totona. (Haroro Sikuli bukana, rau 282, par. 6 itaia.) Unai sikuli ese Iehova ena taunimanima ia durua mai lalogoada, hemataurai bona lalokau ida Basileia ena Sivarai namona idia hadibaia bona harorolaia totona. Tiokratik edukeisen amo heduru bada ita abia dainai, Iehova ita hanamoa be gau badana!​—Sal. 148:12, 13; Isa. 50:4.