Peroveta Taudia Tohotohoa—Habakuku
1. Peroveta tauna Habakuku ena hemami be edena bamona ita laloa?
1 Inai tanobada dekenai kara dika ia bada noho lalonai, reana iseda hemami be Habakuku ena bamona, ia ese Iehova ia nanadaia ia gwau: “Lau ese taunimanima edia metau bona hisihisi bada lau itaia noho. Badina dahaka inai bamona hisihisi oi koua lasi? Badina dahaka oi ese inai hisihisi bona metau oi itaia noho, to hanamoa kara ta oi karaia lasi?” (Hab. 1:3; 2 Tim. 3:1, 13) Iehova ena kota badana dinana ita naria noho lalonai, Habakuku ena hereva bona haheitalai namona laloa dobu karana ese ita do ia durua ita haheauka totona.—2 Pet. 3:7.
2. Edena dala ai ita hahedinaraia ita be Dirava ita abidadama henia?
2 Dirava Abidadama Henia: Habakuku ia ura lasi idia vara gaudia ia laloa momo to ia ese ena hetura karana Iehova ida ia gimaia bona ia gini goada. (Hab. 2:1) Iehova ese peroveta tauna Habakuku ia hamaoroa Iena hereva be nega korikori ai do ia guguru bona “kara maoromaoro tauna be do ia mauri, ia ese Dirava ia abidadama henia dainai.” (Hab. 2:2-4) Inai nega dokona ai idia noho Keristani taudia ese dahaka idia karaia be namo? Dokona be edena nega ai do ia mai ita diba be gau badana lasi, to namona be ita abia dae momokani do ia mai. Dirava abidadama henia karana ese ita do ia durua ita gima noho bona eda hesiai gaukara ita atoa guna.—Heb. 10:38, 39.
3. Dahaka dainai mai moale ida Iehova ita hesiai henia noho be namo?
3 Iehova Dainai Moale: Magoga tauna Goga ese Iehova ena taunimanima ia tuari henia neganai, iseda abidadama do ia tohoa danu. (Ese. 38:2, 10-12) Tuari ese hisihisi bona dika ia havaraia, bona tuari amo idia kwalimu taudia ese unai idia mamia danu. Reana aniani be momo lasi, taunimanima ese edia ruma o kohu idia haboioa bona mauri ia dika. Unai bamona nega aukadia ai dahaka do ita karaia? Habakuku ia diba mauri do ia auka, unai dainai ena lalona ia hadaia mai moale ida Iehova ia hesiai henia noho totona. (Hab. 3:16-19) “Lohiabada dainai ita moale” karana ese ita do ia hagoadaia gabeai do idia vara hahetoho idauidau ita haheaukalaia totona.—Neh. 8:10; Heb. 12:2.
4. Hari bona nega vaira ai dahaka gaudia dainai ita moale?
4 Iehova ese hahemaoro dinana amo idia roho mauri taudia dekenai mauri dalana namona do ia hadibaia noho. (Hab. 2:14) Toreisi lou taudia ese Iehova do idia dibaia danu. Unai dainai, namona be dala idauidau ai Iehova bona do ia karaia hoa karadia be ma haida dekenai ita herevalaia.—Sal. 34:1; 71:17.