KERISTANI TAUDIA EDIA MAURI DALANA

Iehova Ena Kara Maoromaoro Taravatudia Badinaia

Iehova Dirava ese taunimanima totona kara maoromaoro taravatudia ia atoa. Hegeregere, ia gwau tau bona hahine edia headava be do ia noho daudau gauna. (Mt 19:4-6, 9) Ia ese matabodaga karadia idauidau ibounai ia inai henia. (1 Ko 6:9, 10) Danu, ia ese iseda dabua bona tauanina ena toana naria karana dekenai hakaua herevadia ia henia, unai amo ita be ma haida amo ita idau.—⁠De 22:5; 1 Ti 2:9, 10.

Hari inai tanobada ai, momo ese Iehova ena taravatu idia dadaraia. (Ro 1:18-32) Idia ese taunimanima momo edia lalohadai dabua, tauanina ena toana bona kara dekenai idia badinaia. Momo be edia kara dikadia idia hemarailaia lasi bona bema haida be mauri dala idauna idia badinaia edia kara idia maumauraia.—⁠1 Pe 4:3, 4.

Ita be Iehova ena Witnes taudia dainai, namona be mai gari lasi ida Dirava ena kara maoromaoro taravatudia ita badinaia. (Ro 12:9) Edena dala ai? Namona be mai aonega ida ita hahedinaraia Iehova be edena bamona karadia ia abia dae. Bona iseda mauri lalonai danu unai kara maoromaoro taravatudia ita badinaia. Hegeregere, dabua ita abia hidi neganai, namona be sibona ita henanadai: ‘Lauegu abia hidi ese Iehova ena kara maoromaoro taravatudia ia hahedinaraia eiava inai tanobada ena lalohadai ia hahedinaraia? Egu dabua bona tauanina ena toana ese ia hahedinaraia lau be Dirava gari henia Keristani tauna, a? Eiava program o muvi ta ita abia hidi neganai, namona be sibona ita nanadaia: Lau abia hidi program be Iehova ese ia abia dae, a? Daika ena kara maoromaoro taravatudia ia hahedinaraia? Lau abia hidi moale karadia dainai, kara maoromaoro taravatudia lau badinaia be auka, a? (Sa 101:3) Unai ese egu ruma bese taudia eiava ma haida ia hahekwakwanaia, a?’—⁠1 Ko 10:31-33.

Dahaka dainai Iehova ena kara maoromaoro taravatudia ita badinaia be gau badana? Kahirakahira Iesu Keriso ese bese idauidau bona kara dikadia ibounai do ia haorea. (Ese 9:4-7) To Dirava ena ura idia karaia noho taudia sibona do idia mauri. (1 Io 2:15-17 ) Unai dainai, namona be Iehova ena kara maoromaoro taravatudia ita badinaia, unai amo iseda kara namo idia itaia taudia ese Dirava idia hanamoa diba.—⁠1 Pe 2:11, 12.

Hahine ta ese dabua ia abia hidi — Lau abia hidi dabua bona egu tauanina toana ese ia hahedinaraia lau be kara maoromaoro taravatudia lau badinaia, a?

VIDIO LADANA IEHOVA ENA TURANA AI LAO—TAU TAMONA, HAHINE TAMONA ITAIA MURINAI, HENUNAI IDIA NOHO HENANADAI HAERELAIA:

Dahaka dainai Iehova ena taravatu hegeregerena ita noho be aonega karana?
Natudia idia do maragi neganai, dahaka dainai tama sina ese idia dekenai Iehova ena kara maoromaoro taravatudia idia hadibaia be namo?
Matamata bona buruka taudia ese edena bamona taunimanima idia durua diba Dirava ena kara namodia amo namo idia abia totona?