“Dirava ese Ia Hakapua Taudia . . . ”

Mose ena Taravatu lalonai bema tau ta be ena headava hadokoa lalohadai ia abia, namona be headava hadokoa pepana ia hegaegaelaia. Unai ese headava taudia ia gimaia edia headava do idia hadokoa kava lasi totona. To, Iesu ena nega ai, tomadiho gunalaia taudia be headava hadokoa daladia idia gwauraia. Tatau be badina idauidau dainai edia hahine idia rakatania diba. (nwtsty stadi nouti be Mar 10:4, 11) Iesu ia gwau headava be Iehova ese ia hamatamaia bona ia abia dae. (Mareko 10:2-12) Tau bona hahine be “tauanina tamona” ai do idia lao bona do idia noho hebou hanaihanai. Baibel ia gwau headava hadokoa ena badina tamona be Mataio ena hereva hegeregerena, unai be “matabodaga” karadia.​—⁠Mat 19:9.

Hari, taunimanima momo ese headava idia laloa dalana, be Iesu ia laloa dalana hegeregerena lasi, to Farisea taudia bamona. Hekwakwanai idia vara neganai, tanobada taudia be headava idia hadokoa haraga. To, Keristani headava taudia be edia headava ena gwauhamata idia laloa bada bona idia gaukara goada Baibel ena hakaua herevadia idia badinai unai amo edia hekwakwanai idia hamaoromaoroa diba. Vidio ladana Lalokau Bona Hemataurai Karana ese Famili Ia Hatamonaia itaia murinai, inai henanadai oi henia:

• 

  Edena dala ai Aonega Herevadia 15:1 be emu headava lalonai oi badinaia diba, bona dahaka dainai ia be mai anina bada?

• Aonega Herevadia 19:11 oi badinaia neganai, edena dala ai hekwakwanai oi hanaia diba?

• Bema emu headava be kahirakahira do ia doko, namo lasi oi laloa ‘Egu headava lau hadokoa be namo?’ dahaka henanadai do oi laloa?

• Mataio 7:12 oi badinaia neganai, edena dala ai tau o hahine namona ai oi lao diba?