Iseda Tamana, Iehova, Ita Lalokau Henia Bada

1-2. Dahaka dainai bona edena dala ai Iehova ese dala ia kehoa iena ruma bese lalonai ita vareai totona?

IEHOVA ese ita ia boiria mai iena ruma bese lalonai ia ita tomadiho henia totona. Unai be hahenamo hereadaena ani! Iseda ruma bese lalonai Dirava dekenai edia mauri idia gwauhamatalaia bona iena Natuna ena boubou gauna idia abidadama henia taudia idia noho. Unai ruma bese lalonai ita noho dainai ita moale. Mauri namona ita moalelaia noho, bona vaira negai mauri hanaihanai do ita abia​—⁠guba ai eiava tanobada Paradaisona ai.

² Iehova ese ita ia lalokau henia dainai, dava bada gauna ia henia unai amo dala ia kehoa iena ruma bese lalonai ita vareai totona. (Ioa. 3:16) Ia ese ‘dava bada gauna amo ita ia hoia.’ (1 Kor. 6:20) Unai mauri davana amo, Iehova ese dala ia kehoa ia kahirakahira ita lao totona. Ita moale badina inai iunives ai Tau hereadaena ita gwauraia iseda Tamana. Bona stadi atikol 6 ai ita herevalaia bamona, Iehova be Tamana namona.

3. Ita sibona dekenai edena henanadai haida ita henia diba? (Danu maua ladana “Iehova be Lau Ia Laloa, A?” itaia)

³ Baibel torea tauna ta bamona, reana do ita henanadai: “[Iehova] dekenai dahaka do lau henia, iena hariharibada ibounai lau dekenai ena davana?” (Sal. 116:12) Haere be inai, iseda guba Tamana dekenai davana ita haloua diba lasi. To, ia ita lalokau henia noho be namo. Aposetolo Ioane ia gwau: “Ita ese lalokau ita hahedinaraia badina ia ese ita ia lalokau henia guna.” (1 Ioa. 4:19) Edena dala haida ai ita hahedinaraia diba iseda guba Tamana ita lalokau henia?

IEHOVA KAHIRAKAHIRA OI NOHO

4. Iamesi 4:8 ena hereva bamona, dahaka dainai Iehova kahirakahira ita lao be namo?

⁴ Iehova ia ura ia kahirakahira ita lao bona ia ita hereva henia. (Iamesi 4:8 duahia.) Ita ia hadibaia “guriguri [ita] hadokoa lasi,” bona ia be hanaihanai ia noho hegaegae ita ia kamonai henia totona. (Roma 12:12) Ia be ia hesiku haraga lasi ita ia kamonai henia totona. Unai dainai ia ita kamonai henia totona, Baibel bona pablikeisen idauidau ita duahia unai amo iena hereva ita lalopararalaia. Danu, Keristani heboudia ai ita kamonai namonamo. Herevahereva namonamo karana ese natudia bona tama sina edia hetura karana ia hagoadaia hegeregerena, hanaihanai Iehova ita guriguri henia karana ese ita ia durua ia kahirakahira ita lao totona.

5. Edena bamona guriguri be Iehova ese ia abia dae?

⁵ Iehova dekenai oi gwauraia guriguri mani oi laloa. Iehova ia ura guriguri karana amo ia dekenai iseda lalohekwarahi gaudia ibounai ita gwauraia. (Sal. 62:8) Namona be ita sibona ita nanadaia: ‘Lau be mai kudouna ibounai ida lau guriguri, a?’ To momokani, Iehova oi lalokau henia bada bona oi ura emu hetura karana ia ida ia goada noho. Unai bamona oi karaia totona, namona be hanaihanai guriguri amo ia oi hereva henia. Emu hemami ibounai be ia dekenai oi gwauraia hedinarai. Oi moalelaia gaudia bona oi lalohisihisilaia gaudia danu. Bona oi abia dae momokani heduru totona ia oi noia diba.

6. Dahaka ita karaia diba iseda guba Tamana kahirakahira ita noho totona?

⁶ Iseda guba Tamana kahirakahira ita noho totona, namona be ia ita kamonai henia noho. Salamo torea tauna ena hereva ita abia dae, ia gwau: “[Iehova] e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi. Lau ese oiemu kara, bona oiemu laloa, be taunimanima dekenai lau ura gwauraia, to lau be hegeregere lasi momokani. Badina oiemu kara bona laloa be momo herea, duahia diba lasi.” (Sal. 40:5) Iehova ita kamonai henia sibona lasi; to namona be iseda hereva bona kara amo Ia dekenai iseda tanikiu karana ita hahedinaraia. Unai bamona ita karaia neganai ita hahedinaraia ita be inai tanobada taudia amo ita idau. Inai tanobada ai, taunimanima momo be Dirava ese idia totona ia karaia gaudia idia laloa bada lasi. Momokani, ita be “dina gabediai” ita noho, badina taunimanima be tanikiu karana idia hahedinaraia lasi. (2 Tim. 3:1, 2) Namo lasi unai bamona ita karaia!

7. Iehova ia ura dahaka ita karaia, bona dahaka dainai?

⁷ Tama sina idia ura lasi edia natudia idia heai, to idia ura tura namodia ai do idia lao. Unai hegeregerena, Iehova ia ura iena natudia ibounai be ta ta do idia kara namo henia. Oibe, ta ta ita lalokau henia karana ese ia hahedinaraia ita be Keristani taudia momokanidia. (Ioa. 13:35) Salamo torea tauna ena hereva ita abia dae, ia gwau: “Dirava ena taudia do idia noho hebou, mai edia laloa tamona neganai, unai kara be namo, bona mai ena moale danu.” (Sal. 133:1) Iseda tadikaka bona taihu ita lalokau henidia neganai, ita hahedinaraia goevagoeva Iehova ita lalokau henia. (1 Ioa. 4:20) Idia “kara namo heheni bona hebogahisi heheni” ruma bese lalonai tadikaka bona taihu ida ita noho be hahenamo badana!​—Efe. 4:32.

KAMONAI KARANA AMO EMU LALOKAU OI HAHEDINARAIA

8. Ioane Ginigunana 5:3 ena hereva bamona, dahaka badina dainai Iehova ita kamonai henia?

⁸ Iehova ia ura natudia ese edia tama sina idia kamonai henia, bona ia ura ita ese ia ita kamonai henia. (Efe. 6:1) Ia ura ia ita kamonai henia badina ia be iseda Havaraia Tauna, iseda mauri ena Badina, bona iena aonega ese tama ibounai edia aonega ia hereaia. To, Iehova ita kamonai henia ena badina korikori be ia ita lalokau henia. (1 Ioane 5:3 duahia.) Ena be badina momo dainai Iehova ita kamonai henia be namo, to ia be ita ia doria lasi. Iehova ese ita dekenai harihari gauna ura kwalimu ia henia, unai dainai ia moale bema ia ita lalokau henia dainai ita kamonai henia.

9-10. Dahaka dainai Dirava ena hakaua herevadia ita dibaia bona badinaia be mai anina bada?

⁹ Tama sina idia ura edia natudia edia noho be do ia namo. Unai dainai edia natudia edia namo totona, taravatu haida idia atoa. Bema natudia ese unai hakaua herevadia idia badinaia, idia hahedinaraia edia tama sina idia abidadama henia bona matauraia. Unai dainai iseda guba Tamana ena hakaua herevadia ita diba bona badinaia be mai anina bada. Unai bamona ita karaia neganai, ita hahedinaraia Iehova ita lalokau henia bona matauraia, bona iseda mauri be do ia namo. (Isa. 48:17, 18) To, Iehova bona ena hakaua herevadia idia dadaraia taudia be dika idia davaria.​—Gal. 6:7, 8.

¹⁰ Iehova ese ia moalelaia mauri dalana ita badinaia neganai, iseda helt ia hadikaia gaudia amo ita ia gimaia, ita lalohisihisi lasi, bona iseda hetura karana Iehova ida ia goada. Iehova ia diba dahaka be namo ita totona. United States ai ia noho hahine ta ladana, Aurora ia gwau: “Lau diba hanaihanai Iehova badinaia karana ese mauri namona ia henia.” Unai hereva be momokani. Iehova ena hakaua herevadia oi badinaia dainai, dahaka namo oi davaria?

11. Edena dala ai guriguri karana ese ita ia durua?

¹¹ Guriguri karana ese ita ia durua kamonai karana ita hahedinaraia totona, ena be nega haida ia auka. Ita be goevadae lasi dainai nega haida ia auka Iehova ita kamonai henia totona, to namona be ita hekwarahi. Salamo torea tauna be Dirava ia noia, ia gwau: “Egu lalona do oi kehoa, bona lau ese oiemu taravatu do lau badinaia. Lau ese mai egu kudouna ibounai danu, oiemu taravatu do lau naria.” (Sal. 119:34) Regula painia ta, ladana Denise, ia gwau: “Bema Iehova ena taravatu ta lau badinaia totona lau hekwarahi, lau guriguri unai amo goada lau abia kara maorona lau karaia totona.” Ita diba momokani Iehova ese unai bamona guriguri do ia haerelaia.​—Luka 11:9-13.

MA HAIDA DURUA ISEDA TAMANA IDIA LALOKAU HENIA TOTONA

12. Efeso 5:1 ena hereva bamona, dahaka ita karaia be namo?

¹² Efeso 5:1 duahia. Ita be Iehova ena “lalokau natudia” dainai, namona be ita hekwarahi ia ita tohotohoa totona. Iena kara do ita tohotohoa bema lalokau bona hebogahisi ita hahedinaraia, bona ma haida edia dika ita gwauatao. Bena Dirava idia diba lasi taudia ese iseda kara namodia idia itaia neganai, do idia ura Ia idia dibaia. (1 Pet. 2:12) Keristani tama sina ese edia natudia idia kara henia neganai, Iehova ena kara idia tohotohoa be namo. Unai bamona idia karaia neganai, reana edia natudia do idia ura iseda lalokau Tamana idia tura henia.

13. Dahaka gaudia laloa karana ese ita do ia durua ita gari lasi totona?

¹³ Natu maragina ta be ena tamana dainai ia moale bona ia ura ena tamana ia herevalaia. Unai hegeregerena, iseda guba Tamana dainai ita moale, bona ita ura ma haida ese ia do idia dibaia danu. Iseda hemami be King Davida ena bamona, ia gwau: “[Iehova] . . . lau hanamoa bada.” (Sal. 34:2) To, dahaka ia vara diba bema ita gari? Edena dala ai gari lasi karana ita hahedinaraia diba? Bema ita diba ita karaia gauna be Iehova ia hamoalea bona ma haida be ia dibaia karana amo namo idia abia, do ita gari lasi. Iehova ese ita dekenai goada do ia henia. Ia ese Keristani taudia ginigunadia ia durua idia gari lasi totona, bona ita do ia durua danu.​—1 Tes. 2:2.

14. Dahaka badina haida dainai sivarai namona ita harorolaia be namo?

¹⁴ Iehova be taunimanima edia toana ia laloa lasi, bona ia moale bema haida dekenai lalokau ita hahedinaraia, herevana edia noho daladia be idauidau. (Kara 10:34, 35) Bona lalokau ita hahedinaraia dala hereadaena ta be, ma haida dekenai sivarai namona ita harorolaia. (Mat. 28:19, 20) Unai gaukara ese dahaka namo ia havaraia diba? Ita idia kamonai henia taudia ese edia mauri idia haidaua diba, bona vaira negai mauri hanaihanai ena helaro do idia moalelaia.​—1 Tim. 4:16.

ISEDA TAMANA ITA LALOKAU HENIA BONA ITA MOALE

15-16. Dahaka badina haida dainai ita moale be namo?

¹⁵ Iehova be lalokau tamana dainai, ia ura iena ruma bese taudia idia moale. (Isa. 65:14) Ena be hekwakwanai idauidau ita davaria, to badina momo dainai ita moale diba. Hegeregere, ita diba momokani iseda guba Tamana ese ita ia lalokau henia bada. Danu, Dirava ena Hereva, Baibel amo diba maoromaoro ita abia. (Ier. 15:16) Bona ita be Iehova idia lalokau henia, iena kara maoromaoro taravatudia idia badinaia, bona ta ta idia lalokau henia ruma bese lalonai ita noho.​—Sal. 106:4, 5.

¹⁶ Ita moale noho badina ita diba momokani vaira negai mauri namona do ita moalelaia. Ita diba kahirakahira Iehova ese kara dika ibounai do ia haorea, bona iena Basileia amo tanobada be Paradaiso ai do ia halaoa. Iseda helaro namona ta be mase taudia be do idia toreisi lou bona edia lalokau taudia ida do idia hedavari lou. (Ioa. 5:28, 29) Unai be moale gauna! Bona mai anina bada gauna be, ita diba momokani kahirakahira guba bona tanobada ai idia noho taudia ibounai ese iseda lalokau Tamana dekenai hemataurai bona hanamoa do idia henia, bona ia do idia tomadiho henia.