“Dirava kahirakahira umui lao, bona ia be umui kahirakahira do ia mai.”—Iamesi 4:8.

Dirava ese Iseda Guriguri Ia Kamonai, A?

Nega haida oi laloa, Dirava ese emu guriguri ia kamonai eiava lasi? Bema oibe, oi sibona lasi. Momo be hekwakwanai idia davaria dainai Dirava idia guriguri henia, to edia hekwakwanai ia ore lasi. Unai ena anina be Dirava ese iseda guriguri ia kamonai henia lasi, a? Lasi! Baibel ese ita ia hagoadaia bema dala maorona ai Dirava ita guriguri henia, iseda guriguri do ia kamonai. Mani Baibel ena hereva ita itaia.

DIRAVA BE IA KAMONAI.

“Guriguri kamonai Diravana e, taunimanima idauidau be oi dekenai do idia mai.”—Salamo 65:2.

Taunimanima momo idia guriguri badina idia gwau unai ese edia hemami ia hanamoa, ena be idia abia dae ta ese idia ia kamonai henia lasi. To guriguri karana be iseda hemami do ia hanamoa sibona lasi, ita ia durua iseda hekwakwanai ita haheaukalaia totona. Baibel ese ita ia hagoadaia, “Iehovaa be ia dekenai idia boiboi taudia kahirakahira ia noho, mai momokani ida ia dekenai idia boiboi taudia. . . . Heduru totona ia dekenai idia taitai neganai ia kamonai.”—Salamo 145:18, 19.

Unai dainai ita abia dae momokani, Iehova Dirava be ia idia tomadiho henia taudia edia guriguri ia kamonai. Ia be mai lalokau ida ia gwau: “Umui be lau dekenai do umui boiboi bona do umui mai bona umui guriguri, bona lau be umui do lau kamonai henia.”—⁠Ieremia 29:12.

**DIRAVA IA URA IA OI GURIGURI HENIA.**

Natuna kekeni maragina be toy haida ia gadara neganai ena tamana be ia badinai ia helai.

“Guriguri umui hadokoa lasi.”—Roma 12:12.

Baibel ese ita ia hagoadaia, ita “guriguri noho” bona “nega ibounai . . . guriguri.” Oibe, Iehova Dirava ia ura ia ita guriguri henia.—Mataio 26:41; Efeso 6:18.

Dahaka dainai Dirava ia ura ia ita guriguri henia? Mani oi laloa: Bema natu ta be ena tamana dekenai ia gwau “Tamana e, mani lau oi durua”? Oi laloa ena tamana do ia kamonai, a? Oibe, tamana be iena natuna ena ura bona hemami ia diba dainai mai moale ida do ia durua, to ena natuna ena hereva ia kamonai neganai ia diba ena natuna ese ia abidadama henia bona ia ura ia kahirakahira ia noho. Unai hegeregerena, Iehova Dirava ita guriguri henia neganai, ita hahedinaraia ia ita abidadama henia bona ita ura ia kahirakahira ita noho.—Aonega Herevadia 15:8; Iamesi 4:8.

DIRAVA ESE OI IA LALOA BADA

Ia badu bisinesi tauna be bildin ta ena step latanai ia helai. Ia badinai be maua ta mai ena ofesi gaudia idia noho.

“Emui lalohekwarahi ibounai be ia dekenai umui negea lao, badina ia be umui ia laloa bada.”—1 Petero 5:7.

Dirava ese ita ia lalokau henia bona laloa bada dainai, ia ura ia ita guriguri henia. Ia be iseda hekwakwanai bona lalohekwarahi ia diba, bona ia ura ita ia durua.

King Davida be ena mauri ibounai lalonai, Iehova Dirava dekenai ia guriguri bona ia laloa gaudia bona ena hemami ia gwauraia. (Salamo 23:1-6) Dirava be edena bamona Davida ia laloa? Dirava ese Davida ia lalokau henia bona ena guriguri ibounai ia kamonai. (Kara 13:22) Unai hegeregerena, Dirava ese iseda guriguri ia kamonai badina ita ia laloa bada.

“IEHOVA LAU LALOKAU HENIA BADINA . . . EGU GADONA IA KAMONAI”

Salamo torea tauna ta ese Baibel lalonai inai hereva ia torea. Ia abia dae momokani Dirava ese ena guriguri ibounai ia kamonai, bona unai ese ia durua bada. Ia mamia Dirava be ia kahirakahira ia noho, unai amo goada ia abia mauri ena lalohekwarahi bona lalohisihisi ia haheaukalaia.—Salamo. 116:1-9.

Bema ita diba Dirava be iseda guriguri ia kamonai, ia do ita hereva henia loulou. Mani Spain ena not kahana ai ia noho tauna ladana Pedro ena ekspiriens oi laloa. Ena natuna mero ena mauri lagani 19 be motuka aksiden ai ia mase. Pedro ena lalohisihisi neganai, guriguri amo Dirava dekenai ena lalohadai ia gwauraia loulou, lalogoada bona heduru ia abia totona. Dahaka ia vara? Pedro ia gwau, “Iehova ese egu adavana bona Keristani tadikaka edia hagoadaia herevadia bona heduru amo egu guriguri ia haerelaia.”

Ia daradoko tauna be laulau ta ia dogoatao bena ena turadia ese ia idia hagoadaia noho. — Nega momo ita idia laloa bada tura namodia edia hagoadaia herevadia bona idia henia heduru amo iseda guriguri ena haere ita abia.

Ena be guriguri karana ese Pedro ena natuna ia hamauria lasi, to dala idauidau ai Pedro bona ena famili be heduru idia abia. Ena adavana María Carmen ia gwau: “Guriguri karana ese lau ia durua egu lalohisihisi lau haheaukalaia totona. Lau diba Iehova Dirava ese lau ia lalopararalaia badina ia lau guriguri henia neganai, lalomaino lau mamia.”

Baibel ena hereva bona haida edia ekspiriens ese ia hahedinaraia Dirava be guriguri ia kamonai. To, ia hahedinaraia danu guriguri haida ia haerelaia lasi. Dahaka dainai Dirava be guriguri haida ia haerelaia to ma haida be lasi?

a Dirava ena ladana be Iehova.—Salamo 83:18.