Dahaka Dainai Dirava be Guriguri Ibounai Ia Kamonai Henia Lasi?

Iseda guba Tamana, Iehova Dirava be mai moale ida ia ura iseda guriguri ia kamonai henia. To kara haida dainai Dirava be iseda guriguri do ia haerelaia lasi. Unai kara haida be dahaka, bona ita guriguri neganai dahaka ita laloatao be namo? Hari Baibel ena hakaua herevadia do ita itaia.

Dubu lalonai grup ta be guriguri bukana amo edia guriguri idia duahia noho.

“Oi guriguri neganai, gau tamona oi gwauraia loulou lasi.”—Mataio 6:7.

Iehova ia ura lasi iseda guriguri ita gwauraia loulou eiava buka ta amo ita duahia. To, ia ura iseda kudouna amo ita gwauraia. Inai oi laloa, do oi hesiku bema emu turana ta be dina ibounai hereva tamona ia gwauraia loulou. Tura namodia be mai momokani ida idia hereva. Bema iseda lalona amo ita guriguri, iseda guba Tamana dekenai ita laloa bada gaudia ita herevalaia.

Tau ta be lotto tiket ta ia kakasia lalonai, guba ia raraia noho.

“Umui noinoi neganai, umui abia lasi badina umui be ura kererena totona umui noinoi.”—Iamesi 4:3.

Ita diba Dirava be iseda guriguri do ia haerelaia lasi bema ita noia gauna o karana be ia ura henia lasi. Hegeregere, kasi gadara ia karaia tauna be ia kwalimu totona ia guriguri, oi laloa Iehova ese ena noinoi do ia kamonai henia, a? Iehova ese ita ia hadibaia mataganigani karana bona laki amo idia vara gaudia ita abia dae lasi. (Isaia 65:11; Luka 12:15) Ita diba momokani Iehova be unai bamona guriguri do ia abia dae lasi! Dirava ese iseda guriguri ia kamonai totona, namona be ita noia gauna be iena hereva Baibel ai ia noho hegeregerena.

Pasto ta be ami taudia totona ia guriguri.

“Bema tau ta ia ura lasi taravatu ia badinaia—iena guriguri be gau dika hereana.”—Aonega Herevadia 28:9.

Baibel negadia ai, Dirava ese iena kara maoromaoro taravatudia idia dadaraia taudia ia kamonai henia lasi. (Isaia 1:15, 16) Ena kara ia haidaua lasi. (Malaki 3:6) Bema ita ura Dirava ese iseda guriguri ia kamonai henia, namona be ita gaukara goada iena taravatu ita badinaia. Edena bamona bema guna iseda mauri ai kara dika ita karaia? Iehova be ita do ia kamonai henia lasi, a? Unai bamona lasi! Dirava ese mai lalokau ida iseda kara dika do ia gwauatao bema ita helalo-kerehai bona ita gaukara goada ia ita hamoalea totona.—Kara 3:19.