Guriguri Karana ese Oi Ia Durua Diba
Pamela be kensa gorere badana ia abia, unai dainai medikol heduru namona ia tahua. Danu, Dirava dekenai ia guriguri, goada ia abia totona unai amo ena hekwakwanai ia haheaukalaia diba. Guriguri amo heduru ia abia, a?
Pamela ia gwau: “Egu kensa treatment lalonai, nega momo lau gari.” To, “Iehova Dirava dekenai lau guriguri neganai, lau mamia lalomaino lau abia bona lau haheauka. Nega ta ta ai hisihisi lau mamia, to guriguri karana ese lau ia durua unai amo abia hidi namodia lau karaia diba. Haida be egu hemami totona lau idia nanadaia neganai, lau gwau, ‘egu hemami ia namo momokani’ lasi, to lau moale!’”
To ita guriguri be namo, ita naria lasi ela bona hekwakwanai badadia idia vara. Ita ibounai ese hekwakwanai idauidau ita davaria, bona heduru ita ura unai ita haheaukalaia totona. Guriguri karana ese oi ia durua diba, a?
Baibel ia gwau: “Emu metau be Iehova dekenai oi negea lao, Bona ia ese oi do ia durua. Ia ese kara maoromaoro tauna do ia rakatania lasi ia moru totona.” (Salamo 55:22) Unai be hagoadaia herevana, ani? Unai dainai guriguri karana ese edena dala ai oi ia durua diba? Bema dala maorona ai Dirava oi guriguri henia, ia ese oi ia durua diba emu hekwakwanai oi haheaukalaia totona.—“Guriguri amo Dahaka Heduru Oi Abia Diba?” ena maua itaia.