Tau O Hahine Namona Ai Oi Lao Neganai, Emu Vaira Nega Do Ia Namo, A?

Lagani momo lalonai, momo idia laloa bema kara namo idia karaia edia vaira nega do ia namo. Hegeregere, Asia taudia be aonega bada tauna, Confucius ena hereva idia laloa bada (551-479 B.C.E.), ia gwau: “Dahaka oi ura lasi oi dekenai ia vara, ma haida dekenai oi karaia lasi.”

MOMO IDIA URA KARA NAMO IDIA KARAIA

Momo idia abia dae bema kara namo idia karaia, vaira nega namona do idia abia. Unai dainai idia gaukara goada ma haida idia matauraia, kara namodia idia hahedinaraia, ta ta edia maduna idauidau idia lalopararalaia bona hagugurua, bona lalomamina namona idia abia. Vietnam hahine ladana Lin, ia gwau: “Nega momo lau abia dae bema mai momokani ida lau kara, haida ese lau do idia hanamoa.”

Unai hahine be ogogami bona ruma lasi taudia totona aniani ia henia.

Haida be edia tomadiho ena hadibaia herevadia dainai kara namodia idia karaia. Taiwan tauna ladana, Hsu-Yun ia gwau: “Lau dibaia gauna be, bema tau ta be kara namo ia karaia, ia mase murinai do ia moale, to bema kara dika ia karaia, do ia hisihisi.”

KARA NAMO DAINAI DAHAKA IA VARA?

Adorahi ai unai hahine ena toana be ia moale lasi bona ia hesiku bada, bona natuna ia rosia.

Momokani, ma haida ita kara namo henia neganai, gau momo ita moalelaia. To, momo be mai kudouna ibounai ida ma haida idia kara namo henia, to idia itaia nega momo idia kara namo henia taudia be idia dekenai unai idia karaia lasi. Hong Kong hahine ladana, Shiu Ping ia gwau: “Lau dibaia gauna be, kara namo idia karaia taudia be nega momo idia hanamoa lasi. Lau gaukara goada egu famili lau naria bona kara namodia lau karaia totona. To egu adavana ese lau bona egu natuna mero ia rakatania.”

Momo idia itaia dubu idia lao taudia be nega momo taunimanima idia kara namo henia lasi. Japan hahine, Etsuko ia gwau, “Tomadiho ta lau bamoa bona edia matamata taudia totona gau haida lau karaia matamaia. To lau hoa badina lau itaia dubu lalonai haida be matabodaga taudia, dagi abia totona idia kara helulu, bona dubu ena moni idia gaukaralaia kerere.”

“Lau gaukara goada egu famili lau naria bona kara namodia lau karaia totona. To egu adavana ese lau bona egu natuna mero ia rakatania.” —⁠SHIU PING, HONG KONG

Haida be tomadiho idia goadalaia bona idia gaukara goada kara namo idia hahedinaraia totona, to idia dekenai dika ia vara neganai idia lalohisihisi. Vietnam hahine, Van ena hemami be unai bamona. Ia gwau: “Dina ta ta ai fruit, flaoaflaoa, bona aniani lau hoia bona egu sene taudia edia gara gabunai lau atoa, lau laloa unai ese egu vaira nega do ia hanamoa. Ena be lagani momo lalonai kara namodia lau karaia bona tomadiho kastom karadia lau karaia, to egu adavana be gorere badana ia abia. Unai sibona lasi, to egu natuna kekeni be tano ma ta ai ia sikuli noho lalonai ia mase.”

TAU O HAHINE NAMONA AI OI LAO SIBONA BE HEGEREGERE LASI

Tau o hahine namona ai oi lao be gau badana, to unai ese ta dekenai vaira nega namona ia henia lasi. Dahaka dainai? Mani Toretore Helagadia ita itaia.

MOMO BE KARA NAMO IDIA KARAIA LASI

“Kara dika tauna tamona sibona ese kara namodia ibounai ia hadikaia diba.” —HADIBAIA TAUNA 9:18.

Ena be oi gaukara goada tau o hahine namona ai oi lao totona, to haida edia kara kereredia dainai dika oi davaria diba. Hegeregere, COVID-19 gorerena dainai oi ura siahu taudia edia sisiba oi badinaia bona haida oi bamoa lasi. To bema haida idia kamonai lasi be edena bamona? Edia kara dainai idia ura kara maorona idia badinaia taudia be idia gorere danu.

MOMO BE NAMO O DIKA EDIA IDAU IDIA DIBA LASI

“Tau ta ia laloa ia lao henia dalana be maoro, to unai dala ena dokona be mase.”—AONEGA HEREVADIA 14:12.

Momo idia laloa idia be kara maorona idia karaia, to gabeai idia laloparara idia be kerere. Ena be idia laloa idia karaia karana be maoro, to edia abia hidi kererena dainai idia lalohisihisi.

MAURI IA IDAU DIBA

“Kerukeru umui dekenai dahaka do ia vara be umui diba lasi.”—IAMESI 4:14.

Idia vara kava gaudia dainai tau o hahine namona ia mase diba. Hegeregere, COVID-19 gorerena lalonai, haida durua totona idia gaukara goada taudia momo idia mase. Danu China hahinena, Liting mani ita laloa, ena tamana be motuka aksiden amo ia mase. Ia gwau: “Lau laloparara lasi dahaka dainai unai bamona tau namona ia mase. Egu tamana be gaukara goada, manau, bona kara momokani tauna. Motuka aksiden dekenai ia sibona ia mase.”

Bema tau o hahine namona ai oi lao karana ese vaira nega namona ia henia lasi, vadaeni dahaka ese ia henia diba? Unai henanadai ita haerelaia totona, hakaua dala namona ta ia noho bona unai ese ita ia durua diba haere ibounai ita davaria bona vaira nega namona ia hahedinaraia. Edeseniai unai hakaua daladia ita davaria diba?