Iesu Ena Kara Dainai Oi Dadaraia, A?

1. Hereva momokani be ma haida dekenai oi harorolaia neganai, dahaka ia vara?

HEREVA MOMOKANI oi dibaia nega ginigunana oi laloatao, a? Unai negai Baibel amo oi dibaia hahediba herevadia idia hedinarai namonamo, bona ia auka lasi oi lalopararalaia totona! Reana oi laloa taunimanima ibounai ese oi dibaia gaudia do idia abia dae. Bona oi abia dae, hari Baibel ena hereva ese edia mauri do ia hanamoa, bona vaira nega totona helaro namona do ia henia. (Sal. 119:105) Unai dainai, mai ura ida emu turadia bona varavara dekenai hereva momokani oi herevalaia. To, dahaka ia vara? Oi hoa badina momo ese emu hereva idia dadaraia.

2-3. Taunimanima momo ese Iesu be edena bamona idia laloa?

² Ita hoa lasi bema haida ese ita harorolaia sivaraina idia dadaraia. Iesu ena negai danu, ena be Dirava ena siahu amo hoa karadia ia karaia, to momo ese ia idia dadaraia. Hegeregere, Iesu ese Lasaro ia hatorea isi lou neganai, ena inai taudia ese unai hoa karana idia itaia danu. To, Iuda gunalaia taudia idia abia dae lasi Iesu be Mesia. Danu, idia ura Iesu bona Lasaro idia hamasea!​—Ioa. 11:47, 48, 53; 12:9-11.

³ Iesu ia diba momo do idia abia dae lasi ia be Mesia. (Ioa. 5:39-44) Ia ese Ioane Bapatiso ena hahediba taudia ia hamaoroa: “Lau karaia gaudia dainai ia moru lasi tauna be ia moale.” (Mat. 11:2, 3, 6) Dahaka dainai momo ese Iesu idia dadaraia?

4. Inai atikol lalonai dahaka do ita herevalaia?

⁴ Inai atikol bona atikol 19 lalonai, Iesu ena negai momo ese ia idia abidadama henia lasi ena badina haida do ita herevalaia. Danu, do ita itaia dahaka dainai hari momo be ita harorolaia sivaraina idia dadaraia. Bona do ita itaia, dahaka dainai Iesu ita abidadama henia karana be mai anina bada.

(1) ENA MAURI DALANA

5. Dahaka dainai haida idia laloa Iesu be Mesia lasi?

⁵ Iesu ena mauri dalana dainai momo ese idia dadaraia. Ena be ena hadibaia dalana bona ia karaia hoa gaudia idia itaia, to idia gwau ia be ogogami kapenta tauna ena natuna sibona. Danu ia be momo ese idia laloa bada lasi siti, Nasareta, amo ia mai. Natanaela, gabeai Iesu ena hahediba tauna ai ia lao be matamanai ia henanadai: “Gau namona ta be Nasareta amo ia mai diba, a?” (Ioa. 1:46) Reana, Natanaela be Nasareta siti ia ura henia lasi. Eiava ia be Mika 5:2 ena peroveta herevana ia laloa, unai siri ia gwau Mesia be Nasareta ai do ia vara lasi, to Betelehema dekenai do ia vara.

6. Dahaka ese taunimanima do ia durua unai amo idia abia dae Iesu be Mesia?

⁶ Baibel be dahaka ia gwau? Peroveta tauna Isaia ia hahedinaraia, Iesu idia inai henia taudia be “iena mauri dalana” ena sivarai do idia tahua namonamo lasi. (Isa. 53:8, ftn.) Bema nega idia atoa Iesu ena mauri dalana idia tahua namonamo, bona Mesia idia perovetalaia herevadia ida idia hahegeregerea, do idia diba Iesu be Betelehema ai ia vara bona ia be King Davida ena bese tauna. (Luka 2:4-7) Oibe, Mika 5:2 ena peroveta hereva hegeregerena Iesu be Betelehema ai ia vara. To dahaka hekwakwanai ia vara? Taunimanima be hahemaoro idia karaia haraga bona hamomokania gaudia ibounai idia tahua namonamo lasi dainai, Iesu idia dadaraia.

7. Dahaka dainai hari, momo ese Iehova ena taunimanima idia dadaraia?

⁷ Hari unai ia vara danu, a? Oibe. Iehova ena taunimanima momo be ogogami taudia bona momo idia gwau idia be “sikuli bada lasi bona dagi lasi taudia.” (Kara 4:13) Haida idia laloa Iehova ena taunimanima ese Baibel idia hadibaia lasi be namo, badina idia be tomadiho sikuli badadia dekenai idia lao lasi. Ma haida idia gwau, Iehova ena Witnes taudia be “America ena tomadiho” oreana ta, to Iehova ena Witnes taudia 14 pesen sibona be America dekenai idia noho. Ma haida idia gwau, Witnes taudia be Iesu idia abia dae lasi. Lagani momo lalonai idia gwau Iehova ena taunimanima be “kara dika taudia,” “famili idia hapararaia,” bona “Dirava ena Hereva idia hakoikoia” taudia. Unai sivarai idia kamonai bona Iehova ena taunimanima idia diba namonamo lasi dainai, momo idia ura lasi Iehova ena Witnes taudia ai idia lao.

8. Kara 17:11 hegeregerena, taunimanima be dahaka idia karaia diba Dirava ena hesiai taudia idia diba namonamo totona?

⁸ Edena dala ai iseda abidadama ita hagoadaia noho diba? Taunimanima ese hamomokania gaudia idia tahua be namo. Evanelia bukana ia torea tauna Luka be unai bamona ia ura karaia. Ia be ‘matamana amo idia vara gaudia ibounai ia tahua namonamo.’ Ia ura ena buka idia duahia taudia do idia abia dae, Iesu dainai idia kamonai “herevadia be momokani.” (Luka 1:1-4) Guna Berea dekenai Iuda taudia be Luka ena kara idia tohotohoa. Matamanai Iesu ena sivarai idia kamonai neganai, Heberu Toretoredia idia tahua, unai sivarai idia hamomokania totona. (Kara 17:11 duahia.) Unai hegeregerena, hari taunimanima ese hamomokania gaudia idia tahua be namo. Dirava ena taunimanima ese idia dekenai idia hadibaia gaudia be Baibel ida idia hahegeregerea be namo. Danu, idia ese hari Iehova ena taunimanima edia histori idia tahua be namo. Bema unai idia karaia, Dirava ena taunimanima do idia inai henia lasi eiava haida edia koikoi herevadia do idia kamonai lasi.

(2) MAI HEKOKOROKU IDA TOA IA KARAIA LASI

9. Iesu be guba amo toa ta ia karaia lasi neganai, dahaka ia vara?

⁹ Iesu ena negai, haida be iena hadibaia hereva namodia idia laloa bada lasi. To, idia ura “guba amo toa ta do ia hahedinaraia” unai amo do ia hamomokania ia be Mesia. (Mat. 16:1) Reana, unai bamona idia hereva badina, Daniela 7:13, 14 ena peroveta herevana idia lalopararalaia lasi. To unai be nega maorona lasi Iehova ese unai siri ia hagugurua totona. Iesu ena hahediba herevadia amo idia hamomokania diba ia be Mesia. To, Iesu ese idia gwauraia toa ia karaia lasi neganai idia dadaraia.​—Mat. 16:4.

10. Edena dala ai Iesu ese Isaia ena peroveta herevana ia hagugurua?

¹⁰ Baibel be dahaka ia gwau? Peroveta tauna Isaia ese Mesia ia herevalaia, ia gwau: “Do ia boiboi lasi eiava iena gadona do ia habadaia lasi, bona dala ai ena gadona do idia kamonai lasi.” (Isa. 42:1, 2) Iesu be mai manau ida ena haroro gaukara ia karaia bona ia ura lasi taunimanima ese ena ladana idia abia isi. Ia be dubu badadia ia haginia lasi, tomadiho dabua idauna ta ia hahedokilaia lasi bona ia ura lasi dagi ladana ta amo ia idia boiria. Iesu be kota dekenai ia gini neganai, ia ura lasi King Heroda ena lalona hanamoa totona toa ta ia karaia. (Luka 23:8-11) Momokani, Iesu be toa haida ia karaia danu, to ena gaukara badana be sivarai namona ia harorolaia. Iena hahediba taudia ia hamaoroa: “Lau mai ena badina be unai.”​—Mar. 1:38.

11. Haida edia lalohadai kereredia be dahaka?

¹¹ Hari unai ia vara danu, a? Oibe. Hari, momo be dubu badadia mai edia hairai idia laloa bada, bona dubu gunalaia taudia mai edia dagi ladadia idia matauraia bada. Bona dubu ena sene karadia idia laloa bada, to idia laloaboio unai be tomadiho koikoi amo idia mai. Unai dubu idia lao taudia be Dirava bona ena ura idia dibaia lasi. To, iseda Keristani heboudia idia mai taudia be Iehova ena taravatu bona iena ura badinaia dalana idia dibaia. Iseda Kingdom Hall idia goeva bona dava bada kohudia idia noho lasi. Ita idia gunalaia taudia be tomadiho dabua idauna ta idia hahedokilaia lasi bona dagi ladana ta idia abia lasi. Iseda hahediba herevadia bona ita abidadama henia gaudia be Baibel amo. Hari, momo be iseda tomadiho idia dadaraia, badina dubu ena sene karadia ita karaia lasi, bona iseda hahediba herevadia be edia ura hegeregerena lasi.

12. Heberu 11:1, 6 hegeregerena, edena dala ai iseda abidadama ita hagoadaia diba?

¹² Edena dala ai iseda abidadama ita hagoadaia noho diba? Aposetolo Paulo ese Roma ai idia noho Keristani taudia ia hamaoroa: “Taunimanima be hereva idia kamonai murinai, idia abidadama. Bona idia ese unai hereva idia kamonai, bema ta ese idia dekenai Keriso ia herevalaia.” (Roma 10:17) Oibe, iseda abidadama ita hagoadaia totona, namona be Baibel ita stadilaia. To, dubu edia sene karadia lalonai ita vareai karana ese eda abidadama do ia hagoadaia lasi, badina idia be Baibel ena hahediba herevadia lasi. Namona be diba maoromaoro amo iseda abidadama ita hagoadaia, badina “bema tau ta be abidadama lasi, ia ese Dirava ia hamoalea diba lasi.” (Heberu 11:1, 6 duahia.) Unai dainai, namo lasi ita laloa guba amo toa ta ita itaia bena ita hamomokania inai be hereva momokani. To, Baibel stadilaia namonamo karana amo unai ita hamomokania diba bona do ita daradara lasi.

(3) IUDA TAUDIA EDIA SENE KARADIA MOMO IA DADARAIA

13. Dahaka dainai momo be Iesu dekenai idia badu?

¹³ Ioane Bapatiso ena hahediba taudia idia hoa badina Iesu ena hahediba taudia be aniani lasi ena taravatu idia badinaia lasi. Iesu ia ese ia hamaorodia, ia mauri noho lalonai, ena hahediba taudia ese aniani lasi taravatu idia badinaia be anina lasi. (Mat. 9:14-17) To, Iesu idia inai henia taudia ma haida bona Farisea taudia be Iesu dekenai idia badu badina edia sene karadia ia badinaia lasi. Bona Sabati dinana ai gorere taudia ia hanamoa neganai idia badu dikadika. (Mar. 3:1-6; Ioa. 9:16) Ena be dubu gunalaia taudia idia gwau idia be Sabati idia badinaia, to dubu lalonai bisinesi idia karaia. Iesu ese idia ia lulua neganai idia badu dikadika. (Mat. 21:12, 13, 15) Bona Nasareta ena sinagoga ai Iesu ese ia haroro henia taudia idia badu, badina Iesu ese edia abidadama lasi bona sibona laloa bada karana be idaunegai Israela besena edia kara ida ia hahegeregerea. (Luka 4:16, 25-30) Iesu ena kara dainai momo ese idia dadaraia.​—Mat. 11:16-19.

14. Dahaka dainai Iesu be Baibel ia hadibaia lasi sene karadia ia gwauraia dika?

¹⁴ Baibel be dahaka ia gwau? Iehova be peroveta tauna Isaia amo ia gwau: “Inai taunimanima be edia uduna amo lau idia hereva henia bona edia uduna amo lau idia hanamoa, to edia kudouna be lau amo ia daudau momokani. Bona idia dibaia taunimanima edia taravatu dainai lau idia gari henia.” (Isa. 29:13) Iesu be taunimanima edia sene karadia ia gwauraia dika be maoro, badina Baibel ese unai ia hadibaia lasi. Taunimanima idia atoa taravatu bona Baibel ese ia hadibaia lasi sene karadia idia badinaia taudia, be Iehova bona ia siaia tauna Mesia idia dadaraia.

15. Dahaka dainai momo be Iehova ena Witnes taudia idia inai henia?

¹⁵ Hari unai ia vara danu, a? Oibe. Iehova ena Witnes taudia be sene karadia, hegeregere vara dinana bona krismas idia moalelaia lasi dainai, edia inai taudia ese idia badu henidia. Danu idia be bese abia isi karana bona Dirava ese ia abia dae lasi fineral kastom idauidau idia karaia lasi dainai, idia badu henidia. Iseda inai taudia idia laloa edia kara be maoro bona Dirava ese edia tomadiho dalana ia abia dae. To Baibel ese ia hadibaia lasi tanobada ena sene karadia idia badinaia noho dainai, Dirava be idia dekenai ia moale lasi.​—Mar. 7:7-9.

16. Salamo 119:97, 113, 163-165 hegeregerena, dahaka do ita karaia bona dahaka do ita dadaraia?

¹⁶ Dahaka ita karaia diba iseda abidadama ia goada totona? Namona be Iehova ena taravatu bona ena hakaua herevadia ita badinaia goadagoada. (Salamo 119:97, 113, 163-165 duahia.) Bema Iehova ita lalokau henia, ia inai henia sene karadia ibounai do ita dadaraia. Namo lasi gau ta ese iseda lalokau Iehova dekenai ia hadikaia.

(4) POLITIKOL KARADIA LALONAI IA VAREAI LASI

17. Momo idia laloa Iesu be dahaka do ia karaia?

¹⁷ Iesu ena negai haida idia ura gavamani idia haidaua. Idia ura Mesia ese Roma gavamani amo idia ia ruhaia. To, idia ura Iesu be edia king ai idia halaoa neganai, unai ia dadaraia. (Ioa. 6:14, 15) Hahelaga taudia bona ma haida idia gari, badina idia laloa bema Iesu be gavamani ia haidaua, Roma taudia do idia badu bona hahelaga taudia be edia dagi amo do idia kokia. Unai dainai idia ese Iesu idia dadaraia.

18. Iesu ena negai, momo ese edena peroveta herevadia idia laloa bada lasi?

¹⁸ Baibel be dahaka ia gwau? Peroveta herevadia momo ese idia hahedinaraia Mesia be tuari tauna goadana ai do ia lao. To, peroveta herevadia ma haida ese idia hahedinaraia ia be iseda kara dika totona do ia mase guna. (Isa. 53:9, 12) Dahaka dainai Iesu ena negai taunimanima be lalohadai kereredia idia abia? Badina momo be edia hekwakwanai do ia hamaoromaoroa haraga lasi peroveta herevadia idia laloa bada lasi.​—Ioa. 6:26, 27.

19. Dahaka dainai momo be sivarai namona idia dadaraia?

¹⁹ Hari unai ia vara danu, a? Oibe. Hari momo be ita idia dadaraia badina politikol karadia lalonai ita vareai lasi. Idia ura eleksen neganai do ita vouti. To, bema tanobada tauna ta totona ita vouti, ita be Iehova ita dadaraia unai. (1 Sam. 8:4-7) Ma danu, taunimanima idia ura sikuli bona hospital ita haginia bona komiuniti durua gaukaradia ita karaia. To ita be haroro gaukara ita goadalaia, bona idia vara hekwakwanai ita hamaoromaoroa lasi dainai ita idia dadaraia.

20. Mataio 7:21-23 hegeregerena, dahaka gaukara ita goadalaia be namo?

²⁰ Edena dala ai iseda abidadama ita hagoadaia noho diba? (Mataio 7:21-23 duahia.) Namona be Iesu ese ita dekenai ia henia gaukarana ita goadalaia. (Mat. 28:19, 20) Namo lasi nega bada ita haorea politikol bona komiuniti lalonai idia vara hekwakwanai ita hamaoromaoroa. Momokani taunimanima ita lalokau henidia bona ita ura durudia. To, ita diba unai ita karaia dala namona be idia dekenai Basileia ena sivarai ita harorolaia, bona ita durudia Iehova idia tura henia.

21. Iseda lalona do ita hadaia dahaka ita karaia totona?

²¹ Iesu ena negai momo ese ia idia dadaraia, bona hari iena murinai idia raka taudia idia dadaraia ena badina 4 ita herevalaia vadaeni. Stadi atikol 19 ai, ma gau 4 do ita herevalaia. Namona be iseda lalona ita hadaia Iesu do ita abia dae bona iseda abidadama do ita hagoadaia noho!