Iseda Gunalaia Tauna Iesu Ita Durua

1. Iehova ena ura be dahaka?

DIRAVA ia ura Basileia ena sivarai namona be tanobada ibounai dekenai ita harorolaia. (Mar. 13:10; 1 Tim. 2:3, 4) Unai be Iehova ena gaukara, bona iena Natuna ese unai gaukara ia hakaua be mai anina bada. Ita diba Iesu be haroro gaukara ia hakaua dainai, Iehova ena ura hegeregerena dokona ia do ginidae lasi neganai unai gaukara do ita hagugurua diba.​—Mat. 24:14.

2. Inai atikol ai dahaka do ita herevalaia?

² Inai atikol ai, do ita itaia edena dala ai Iesu ese “hesiai tauna mai ena kamonai bona mai ena aonega” ia gaukaralaia Baibel amo hakaua daladia ia henia, bona iena murinai idia raka taudia ia durua haroro gaukara badana idia karaia totona. (Mat. 24:45) Danu, do ita itaia ita ta ta be dahaka do ita karaia Iesu bona hesiai tauna mai kamonai ita durua totona.

IESU ESE HARORO GAUKARA IA GUNALAIA

3. Iesu be siahu ia abia dahaka ia karaia totona?

³ Iesu be haroro gaukara ia gunalaia. Edena dala ai unai ita diba? Ia be guba dekenai ia do daekau lasi neganai, ena murinai idia raka taudia haida ida Galilea ororona dekenai idia hebou. Idia ia hamaoroa: “Dirava ese lau dekenai siahu ia henia, guba bona tanobada gaudia ibounai lau biagua totona.” Unai murinai ia herevalaia gauna mani ita itaia, ia gwau: “Unai dainai umui lao, bese ibounai taudia be hahediba taudia ai umui halaoa.” (Mat. 28:18, 19) Unai ese ia hahedinaraia, Dirava be Iesu dekenai siahu ia henia haroro gaukara ia gunalaia totona.

4. Dahaka dainai ita diba Iesu be haroro gaukara ia gunalaia noho?

⁴ Iesu ia gwau iena murinai idia raka taudia ese “bese ibounai” dekenai haroro bona hahediba taudia halaoa gaukarana do idia karaia bona ia be ‘dina iboudiai idia ida do ia noho ela bona inai nega oromana ena dokona.’ (Mat. 28:20) Unai ese ia hahedinaraia Iesu be haroro gaukara ia gunalaia noho ema bona hari.

5. Edena dala ai Salamo 110:3 ena guguru karana ita durua?

⁵ Inai nega oromana ena dokonai gaukara taudia momo do idia noho eiava lasi karana be Iesu ese ia lalohekwarahilaia lasi. Badina ia diba, salamo ai ia noho peroveta herevana do ia guguru: “Emu tuari dinana ai, emu taunimanima be mai moale ida oi danu do idia lao.” (Sal. 110:3) Bema sivarai namona oi harorolaia, oi be Iesu bona hesiai tauna mai ena kamonai ida oi gaukara hebou bona unai peroveta herevana ena guguru karana oi durua. Oibe, gaukara be ia heau noho, to hekwakwanai idia vara danu.

6. Basileia harorolaia taudia ese idia davaria hekwakwanai ta be dahaka?

⁶ Basileia harorolaia taudia ese idia davaria hekwakwanai ta be, dagedage karana. Aposteit, tomadiho gunalaia taudia, bona politikol oreadia ese taunimanima momo dekenai iseda gaukara idia sivarailaia koikoi. Bema iseda varavara, ita diba taudia, bona gaukara turadia be unai sivarai koikoidia ese ia hakaua kerere, idia ese ita do idia doria Iehova hesiai henia karana bona haroro gaukara ita hadokoa totona. Tano haida ai, iseda tadikaka taihu idia dagedage henia, hagaria, arest bona dibura ruma ai idia atodia. Unai kara dekenai ita hoa lasi. Iesu ia peroveta, ia gwau: “Egu ladana dainai bese ibounai ese umui do idia inai henia.” (Mat. 24:9) Ita idia inai henia karana ese ia hamomokania Iehova be ita ia lalonamo henia. (Mat. 5:11, 12) Diabolo ese unai dagedage karadia ia havaraia noho. To Iesu ena siahu be bada! Iesu ena heduru dainai bese ibounai ese sivarai namona idia kamonai noho.

7. Apokalupo 14:6, 7 be edena dala ai ia guguru?

⁷ Basileia harorolaia taudia ese idia davaria hekwakwanai ma ta be, gado idauidau taudia haroro henia karana. Iesu ese aposetolo Ioane dekenai ia henia matahanai lalonai, ia peroveta sivarai namona be gado idauidau taudia ese do idia kamonai. (Apokalupo 14:6, 7 duahia.) Edena dala ai? Ita ese taunimanima momo dekenai Basileia sivaraina ita harorolaia noho. Hari, iseda websait jw.org ai gado ibounai 1,000 mai kahana idia noho dainai, tanobada hegegemadai taunimanima ese Baibel ia herevalaia pablikeisen idauidau idia duahia diba! Hakaua Oreana ese gwaumaoro ia henia Mauri Moalelaia Hanaihanai! bukana be gado 700 mai kahana ai idia hahanaia totona. Unai buka be hahediba taudia halaoa gaukarana dekenai ita gaukaralaia noho! Danu Baibel ia herevalaia gaudia haida, hegeregere taia kudima taudia totona vidio idia karaia bona matakepulu taudia totona braille pablikeisen idia halasia. Ita itaia Baibel ena peroveta herevadia idia guguru. “Bese idauidau edia gado ibounai” amo taunimanima be Baibel ena hereva momokani ena “gado goevadaena” idia dibaia noho. (Sek. 8:23; Sef. 3:9) Iesu Keriso ena hakaua dalana henunai unai gaukara ibounai ia guguru noho.

8. Iseda haroro gaukara dainai dahaka ia vara noho?

⁸ Hari, tano 240 dekenai taunimanima 8 milioni mai kahana be Iehova ena orea idia bamoa noho, bona lagani ta ta ai taunimanima tausen momo idia bapatiso! Namba be gau badana lasi, to unai hahediba taudia matamatadia ese Keristani karadia eiava “mauri matamata” idia hahedinaraia be mai anina bada. (Kol. 3:8-10) Momo ese matabodaga maurina, dagedage, inai heheni, bona bese abia isi karadia idia rakatania vadaeni. Unai ese Isaia 2:4 ena peroveta herevana ia hagugurua, idia be ‘tuari idia dibaia lou lasi.’ Ita gaukara goada mauri matamata ita hahedinaraia dainai, taunimanima ita durua Dirava ena orea dekenai idia vareai totona, bona ita hamomokania ita ese iseda gunalaia tauna Keriso Iesu ita badinaia. (Ioa. 13:35; 1 Pet. 2:12) Dahaka dainai unai ia vara? Badina Iesu ese ita ia durua noho.

IESU ESE HESIAI TAUNA IA ABIA HIDI

9. Mataio 24:45-47 hegeregerena, Iesu ia gwau nega dokona ai dahaka do ia vara?

⁹ Mataio 24:45-47 duahia. Iesu ia peroveta nega dokona ai, ia ese “hesiai tauna mai ena kamonai bona mai ena aonega” do ia abia hidi, Baibel amo hakaua daladia ia henia totona. Unai dainai, iseda nega ai unai hesiai tauna be ia gaukara goada noho. Bona unai be momokani. Iseda gunalaia tauna, Iesu, ese horoa tatau haida ia gaukaralaia, Iehova amo idia mai gaudia be “nega korikori ai” Dirava ena taunimanima bona kamonai taudia dekenai ia henia. Unai tatau ese ma haida edia abidadama idia biagua lasi. (2 Kor. 1:24) To, idia laloparara Iesu Keriso be ena taunimanima edia “hakaua tauna bona lohia tauna.”​—Isa. 55:4.

10. Laulau ai edena pablikeisen ese oi ia durua Iehova oi hesiai henia matamaia totona?

¹⁰ Lagani 1919 amo hesiai tauna mai ena kamonai ese pablikeisen idauidau ia halasia, unai ese kamonai matamata taudia ia durua Baibel amo hereva momokani idia dibaia totona. Lagani 1921 ai, unai hesiai tauna ese buka ladana The Harp of God ia hegaegaelaia, kamonai taudia ia durua Baibel ena hahediba hereva badadia idia dibaia totona. Nega ia hanaia lalonai, hesiai tauna ese pablikeisen ma haida ia halasia. Edena pablikeisen ese oi ia durua iseda guba Tamana oi diba bona lalokau henia totona? Inai buka haida ese oi ia durua, ani? Hegeregere, “Let God Be True,” Mauri Ia lao Henia Hereva Momokanina, Mauri Hanaihanai Paradaiso Lalonai, Diba ese Mauri Dekenai Ita Ia Hakaua Lao, Baibel be Dahaka Ia Hadibaia?, What Can the Bible Teach Us?, eiava iseda pablikeisen matamata, Mauri Moalelaia Hanaihanai! Hesiai tauna mai ena kamonai ese unai pablikeisen ta ta be nega korikori ai ia halasia dainai, ita ia durua hahediba taudia ai ita lao totona.

11. Dahaka dainai ita ibounai ese Iehova ita dibaia bona Baibel ita stadilaia noho be gau badana?

¹¹ Kamonai matamata taudia ese Iehova idia dibaia bona Baibel ena hereva dobudia idia stadilaia noho. Idia sibona lasi, to ita danu be unai bamona ita karaia be gau badana. Aposetolo Paulo ia gwau: “Aniani korikori be taunimanima badadia totona.” Danu ia gwau Baibel amo ita dibaia gaudia ita badinaia neganai, ita ia durua ‘maoro bona kerere edia idau ita dibaia’ totona. (Heb. 5:14) Iehova ena taravatu ita badinaia be auka, badina taunimanima edia kara be dika momokani. To Iesu ia diba hakaua dala maorodia ese iseda abidadama ia hagoadaia noho be namo. Bona unai be Dirava ena Hereva, Baibel, amo ita abia. Hesiai tauna mai ena kamonai ese Iesu ena hakaua dalana henunai unai aniani ia hegaegaelaia bona halasia.

12. Iesu bamona, edena dala ai Dirava ena ladana ita matauraia?

¹² Iesu bamona, ita ese Dirava ena ladana ita matauraia. (Ioa. 17:6, 26) Hegeregere, lagani 1931 ai inai ladana Iehova ena Witnes taudia be Baibel amo ita abia, unai amo ita hahedinaraia ita dekenai Dirava ena ladana be mai anina bada, bona ita ura iseda guba Tamana ena ladana ita dogoatao. (Isa. 43:10-12) Bona unai lagani ena October hua amo, Gima Kohorona ta ta ena vairana kahanai Dirava ena ladana ia hedinarai. Danu, Nega Matamata Trensleisen Ena Buka Helaga dekenai Dirava ena ladana be ena gabu korikori ai ita atoa lou. To Kerisendom ena dubu ese Iehova ena ladana be edia Baibel momo amo idia kokia!

IESU BE ENA MURINAI IDIA RAKA TAUDIA IA NARIA

13. Dahaka dainai oi abia dae Iesu ese “hesiai tauna mai ena kamonai bona mai ena aonega” ia gaukaralaia noho? (Ioane 6:68)

¹³ Iesu be “hesiai tauna mai ena kamonai bona mai ena aonega” ia gaukaralaia, tanobada ai ia noho oreana amo tomadiho goevana ia durua totona. Unai orea be edena bamona oi laloa? Reana oi be aposetolo Petero ena hereva oi laloa, ia be Iesu dekenai ia gwau: “Daika dekenai do ai lao? Mauri hanaihanai herevadia be oi amo idia mai.” (Ioa. 6:68) Bema Iehova ena orea ita diba lasi, iseda mauri be edena bamona? Unai orea amo, Keriso be ita ia durua Dirava ita abidadama henia noho totona. Danu ita dekenai treinini ia henia, iseda hesiai gaukara ita karaia namonamo totona. Bona ita ia durua “kara matamata” ita hahedinaraia, unai amo Iehova ita hamoalea diba.​—Efe. 4:24.

14. COVID-19 negana lalonai, Iehova ena orea amo dahaka namo oi itaia?

¹⁴ Nega aukadia ai Iesu be hakaua dala namodia ia henia. Bona COVID-19 ia matamaia neganai, unai hakaua daladia ita badinaia ena namo ita itaia. Ena be momo idia diba lasi dahaka do idia karaia, to Iesu be ita ia gimaia totona hakaua dala namodia ia henia. Iehova ena orea ese ita ia hagoadaia pablik gabudia ai mask ita atoa bona social distancing ita badinaia totona. Bona orea ese elda taudia ia hadibaia tadikaka taihu idia durua, unai amo sibona idia gimaia, edia helt idia naria namonamo, bona edia hetura karana Iehova ida idia hagoadaia. (Isa. 32:1, 2) Bona Hakaua Oreana ena ripoti amo hakaua daladia bona hagoadaia herevadia ita abia danu.

15. Pandemic lalonai hebou bona haroro gaukara totona dahaka hakaua herevadia ita abia, bona dahaka namo ia vara?

¹⁵ Inai pandemic lalonai, ita ese kongrigeisen heboudia bona haroro gaukara totona hakaua herevadia ita abia danu. Bona karaharaga kongrigeisen heboudia, sekit, bona rijinol hebouhebou be intanet amo ita karaia matamaia. Danu telefon bona revareva amo haroro gaukara ita karaia matamaia. Iehova ese iseda hekwarahi ia hanamoa. Brens momo ese pablisa ena namba ia bada daekau ena ripoti idia henia. Momokani, pandemic lalonai momo be ekspiriens namodia idia davaria.​—Maua ladana, “Iehova ese Iseda Haroro Gaukara Ia Hanamoa” itaia.

16. Ita diba Iehova bona Iesu be dahaka do idia karaia?

¹⁶ Reana haida idia laloa inai pandemic lalonai Iehova ena orea be ita ia gimaia totona taravatu momo ia atoa. To gabeai ita laloparara, hakaua herevadia ita badinaia karana be aonega dalana. (Mat. 11:19) Bona Iesu ese mai lalokau ida ena taunimanima ia hakaua dalana ita laloa dobu neganai, ita diba ena be vaira nega ai dahaka do ia vara, to Iehova bona ena lalokau Natuna be ita do idia rakatania lasi.​—Heberu 13:5, 6 duahia.

17. Iesu ena hakaua dalana henunai oi gaukara dainai, emu hemami be edena bamona?

¹⁷ Iesu ena hakaua dalana henunai ita gaukara dainai ita moale! Iseda orea be kastom karadia, bese, bona gado idauidau ese ia hapararaia lasi. Haroro gaukara ita karaia totona, Baibel amo hakaua herevadia bona treinini ita abia. Ita idia durua kara matamata ita hahedinaraia dalana ita dibaia, bona ta ta dekenai lalokau ita hahedinaraia dalana ita dibaia. Oibe, badina momo dainai iseda Gunalaia Tauna Iesu ita heagilaia!