Duahia Taudia Edia Henanadai
Salamo 61:8 ai Davida ia gwau Dirava ena ladana dekenai ane do ia abia “ela bona hanaihanai” neganai, ia be ia hereva kava, a?
Lasi. Davida ia torea herevana be momokani.
Mani unai siri bona unai bamona siri haida dekenai ia torea herevadia ita itaia: “Dina ta ta ai egu gwauhamata lau hamomokania lalonai, lau ese emu ladana dekenai ane do lau abia ela bona hanaihanai.” “Iehova egu Dirava e, mai kudouna ibounai ida oi lau hanamoa, bona emu ladana do lau abia isi ela bona hanaihanai.” “Emu ladana do lau hanamoa ela bona hanaihanai.”—Sal. 61:8; 86:12; 145:1, 2.
Davida be unai ia torea neganai, ia laloa lasi do ia mase lasi. To ia diba, Iehova ia gwau taunimanima do idia mase badina idia be mai edia kara dika, bona ia abia dae ia be kara dika tauna. (Gen. 3:3, 17-19; Sal. 51:4, 5) Ia diba Dirava ese ia lalonamo henia taudia hegeregere Aberahamo, Isako bona Iakobo be idia mase vadaeni. Bona Davida ia diba gabeai ia danu be do ia mase. (Sal. 37:25; 39:4) To, Salamo 61:8 ena hereva amo ia hahedinaraia ia ura ena mauri dinadia ibounai lalonai, Dirava ena ladana do ia anelaia ela bona hanaihanai.—2 Sam. 7:12.
Nega haida Davida be ena mauri ai idia vara gaudia ia torea, Salamo 18, 51 bona 52 edia supaskripsen ai ia hedinarai bamona. Salamo 23 ai, Davida ese Iehova be mamoe naria tauna bamona ia gwauraia. Ia ese Davida ia hakaua, hagoadaia bona gimaia. Davida danu be unai bamona mamoe naria tauna. Bona ia ura “ena mauri dinadia ibounai lalonai” Dirava do ia hesiai henia.—Sal. 23:6.
Do ita laloatao danu, Iehova ese Davida dekenai siahu ia henia unai hereva ia torea totona. Ia ese gabeai do idia vara gaudia edia peroveta herevadia ia torea danu. Hegeregere, Salamo 110 ai, Davida ia gwau nega ta ena Lohiabada be guba ai “[Dirava] imana idiba kahanai” do ia helai bona siahu bada do ia abia. Dahaka do ia karaia? Tanobada ai Dirava ena inai taudia do ia hadikaia orea bona “bese idauidau do ia hahemaoro henidia. Iesu be Davida ena tubuna, ia be Mesia, guba amo do ia lohia bona “hahelaga tauna ela bona hanaihanai.” (Sal. 110:1-6) Iesu ia hamomokania Salamo 110 ena peroveta herevana be ia ia herevalaia, bona unai be nega vaira ai do ia guguru.—Mat. 22:41-45.
Oibe, Dirava ese siahu ia henia Davida dekenai, guna ia noho negana bona vaira nega ai ia toreisi lou neganai, Iehova do ia hanamoa ela bona hanaihanai herevadia ia torea totona. Davida ese Salamo 37:10, 11, 29 ia torea neganai, ia be iena nega bona vaira negana ia herevalaia. Unai siri be idaunegai Israela tanona ai ia vara momokani bona vaira negai Dirava ese iena gwauhamata ia hagugurua neganai do ia vara danu.—Inai magasin lalonai atikol ladana “Oi be Lau Ida Paradaiso Ai do Ita Noho” ena paragraf 8 itaia.
Salamo 61:8 bona siri ma haida ai ia hahedinaraia Davida ia ura idaunegai Israela tanona ai, Iehova do ia hanamoa ela bona ia mase. Bona Iehova ese vaira nega ai Davida do ia hamauria lou neganai do ia karaia momokani gaudia idia hahedinaraia namonamo.