Hekwakwanai Lalonai Maino Ita Davaria Diba

1. “Dirava ena maino” be dahaka bona edena dala ai ita ia durua diba? (Filipi 4:6, 7)

MAINO idauna ta ia noho bona tanobada taudia be unai idia diba lasi. Ia be “Dirava ena maino,” iseda guba Tamana ita tura henia karana amo unai maino ita abia. Dirava ena maino ita abia neganai, ita gari lasi. (Filipi 4:6, 7 duahia.) Ia idia lalokau henia taudia ma haida ida ita hetura namonamo. Bona “maino Diravana” ida eda hetura karana namona ita moalelaia. (1 Tes. 5:23) Iseda Tamana ita diba, abidadama henia bona badinaia neganai, hekwakwanai lalonai Dirava ena maino ese ita dekenai lalomaino ia henia.

2. Dahaka dainai ita diba momokani Dirava ena maino ita abia diba?

² Hekwakwanai, hegeregere gorere, disasta, tuari o dagedage idia vara neganai, Dirava ena maino ita davaria diba, a? Unai hekwakwanai dainai ita gari diba. To, Iesu ese iena murinai idia raka taudia ia hagoadadia: “Namo lasi emui lalona idia hekwarahi bona umui gari.” (Ioa. 14:27) Tadikaka taihu be mai moale ida Iesu ena sisiba idia badinaia. Iehova ena heduru dainai, hekwakwanai badadia idia davaria negadiai lalomaino idia abia.

GORERE NEGADIAI MAINO AI ITA NOHO

3. Daihanai gorere ta ia vara neganai, edena dala ai iseda maino ia hadikaia diba?

³ Iseda gabu o tanobada hegegemadai daihanai gorere ia vara neganai, mauri ia haidaua diba. Hegeregere, COVID-19 ese taunimanima momo edia mauri ia haidaua dalana mani ita laloa. Tahua gaukara ta amo idia davaria, unai pandemic negana ai taunimanima momo be idia mahuta namonamo lasi. Unai nega ai taunimanima be idia lalohekwarahi, lalometau, idia kekero momo, drag dikadia idia abia, bona danu hahine botaia bona sibona hamasea toho karadia idia bada idia lao. Bema emu gabu ai daihanai gorere ta ia vara, edena dala ai emu lalohekwarahi karana oi biagua diba bona Dirava ena maino do oi moalelaia?

4. Dahaka dainai Iesu ena peroveta herevana dibaia karana ese ita dekenai maino ia henia?

⁴ Iesu ia gwau nega dokona ai, daihanai gorere idauidau be “gabu idauidau ai” do idia vara. (Luka 21:11) Unai ita dibaia karana ese edena dala ai ita dekenai maino ia henia? Daihanai gorere idia vara neganai ita hoa lasi. Ita laloparara Iesu ena hereva hegeregerena unai gaudia idia vara noho. Unai dainai Iesu ese nega dokona ai idia noho taudia dekenai ia henia sisiba ita badinaia be namo: “Umui gari lasi.”​—Mat. 24:6.

5. (a) Filipi 4:8, 9 hegeregerena, daihanai gorere idia vara neganai, dahaka totona ita guriguri be namo? (b) Baibel duahiduahi edia rekodin oi kamonai karana ese edena dala ai oi ia durua diba?

⁵ Daihanai gorere ia vara neganai, ita lalohekwarahi bona gari danu. Taihu ta ladana Desi dekenai unai ia vara.b Ena vavana, kasin bona doketa be COVID-19 gorere amo idia mase neganai, ia gari badina ia laloa ia be unai gorere do ia abia bena ena sinana buruka dekenai do ia henia. Unai gorere dainai ia laloa ena moni gaukara do ia haboioa, bona ia lalohekwarahi edena bamona aniani bona ruma davana do ia karaia. Unai gaudia dainai ia lalohekwarahi bona hanuaboi ai ia mahuta namonamo lasi. To Desi be lalomaino ia davaria. Edena dala ai? Iehova ia guriguri henia bona ia noia do ia durua gaudia namodia do ia laloa bona ia gari lasi totona. (Filipi 4:8, 9 duahia.) Baibel duahiduahi edia rekodin ia kamonai bona ia mamia unai be Iehova ese ia “hereva” henia bamona. Ia gwau: “Unai duahia taudia edia gadona regena ese lau dekenai lalomaino ia henia, Iehova ena hebogahisi karana lau laloatao bona lau laloa momo lasi.”​—Sal. 94:19.

6. Sibona emu stadi karana bona kongrigeisen heboudia ese edena dala ai oi do idia durua?

⁶ Daihanai gorerena ese vaia oi karaia gaudia haida do ia hadikaia diba, to namo lasi unai ese sibona emu stadi bona kongrigeisen hebou lao henia karana ia koua. Iseda magasin bona vidio ai idia noho mauri sivaraidia amo do oi diba iseda tadikaka bona taihu be unai bamona hekwakwanai idia davaria, to Iehova idia hesiai henia noho. (1 Pet. 5:9) Hebou lao henia karana ese oi do ia durua Baibel ena hagoadaia herevadia oi laloa totona. Hebou ai ma haida do oi hagoadaia bona idia ese oi idia hagoadaia danu. (Roma 1:11, 12) Iehova ese iena hesiai taudia idia gorere, gari eiava sibona idia noho negana ai idia ia durua dalana oi laloa neganai, unai ese emu abidadama do ia hagoadaia bona do oi diba momokani ia ese oi do ia durua danu.

7. Aposetolo Ioane ena haheitalai amo dahaka oi dibaia?

⁷ Dala oi karaia emu tadikaka bona taihu ida oi herevahereva totona. Daihanai gorerena dainai iseda tadikaka taihu amo do ita noho daudau danu. Unai bamona negadiai, reana aposetolo Ioane bamona do oi lalohekwarahi. Ia ura ena turana Gaio do ia itaia. (3 Ioa. 13, 14) To, Ioane ia laloparara nega sisina lalonai Gaio do ia itaia lasi. Unai dainai Ioane be ia karaia diba gauna ia karaia, bona Gaio dekenai revareva ia torea. Bema emu tadikaka taihu oi vadivadi henidia diba lasi, telefon o vidio kol amo oi hereva henidia, o teks mesiji oi siaia diba. Tadikaka taihu ida oi herevahereva neganai, emu hemami do ia namo bona maino ai do oi noho. Bema oi lalohekwarahi, elda taudia oi hereva henidia bona edia hahegoada herevana oi abia dae.​—Isa. 32:1, 2.

DISASTA NEGADIAI MAINO AI ITA NOHO

8. Edena dala ai disasta idauidau ese emu maino ia hadikaia diba?

⁸ Bema emu gabu ai abata, tano mareremarere o lahi ia vara, reana nega daudau lalonai do oi lalohisihisi noho. Bema emu lalokau taudia idia mase eiava emu kohu oi haboioa, reana do oi taitai, lalometau o badu diba. Unai ia hahedinaraia lasi oi be kohu oi laloa momo eiava emu abidadama be ia manoka. Unai hahetoho oi davaria neganai, haida idia laloa do oi badu eiava Dirava do oi rakatania. (Iobu 1:11) To herevana unai hekwakwanai idia vara, maino oi davaria diba. Edena dala ai?

9. Iesu ena peroveta herevana ese edena dala ai ita ia durua ita hegaegae totona?

⁹ Iesu ena peroveta herevana mani ita laloa. Taunimanima haida idia laloa disasta ta ese idia do ia hadikaia lasi, to ita diba disasta momo do idia vara bona idia haida ese ita do idia hadikaia danu. Iesu ese ena murinai idia raka taudia ia hamaorodia dokona be do lasi neganai, “tano mareremarere badadia” bona disasta ma haida do idia vara. (Luka 21:11) Ia peroveta danu “kara dika be do ia bada,” bona hari ita itaia kara dika, dagedage bona terorist karadia idia vara noho. (Mat. 24:12) Iesu ia gwau lasi unai disasta be Iehova idia rakatania taudia dekenai sibona do ia vara. Momokani, Iehova ena abidadama hesiai taudia momo danu be dika idia davaria. (Isa. 57:1; 2 Kor. 11:25) Iehova be hoa dalanai disasta idauidau amo ita do ia gimaia lasi, to ia ese ita do ia durua unai amo do ita gari lasi bona lalomaino do ita abia.

10. Dahaka dainai disasta totona ita hegaegae karana be abidadama karana? (Aonega Herevadia 22:3)

¹⁰ Bema disasta ta totona ita hegaegae vadaeni, bona ia vara neganai do ita gari lasi. To iseda hegaegae karana ese ia hahedinaraia Iehova ita abidadama henia lasi, a? Lasi. Iseda hegaegae karana ese ia hahedinaraia ita abia dae Iehova be ita ia naria diba. Edena dala ai? Dirava ena Hereva ese ita ia hadibaia disasta totona ita hegaegae be namo. (Aonega Herevadia 22:3.) Bona hanaihanai Iehova ena orea ese magasin, kongrigeisen heboudia bona hadibaia herevadia amo ita idia hamaoroa disasta totona do ita hegaegae.c Iehova ita abidadama henia, a? Bema oibe, hari disasta ia do vara lasi neganai, unai sisiba ita badinaia be namo.

11. Margaret ena haheitalai amo dahaka ita diba?

¹¹ Taihu ladana Margaret ena ekspiriens ita laloa. Iena gabu ai lahi badana ese uda ia araia noho, unai dainai gavamani gaukara taudia ese idia hamaoroa iena ruma ia rakatania be namo. Taunimanima momo be nega tamona idia ura gabu idia rakatania haraga dainai, dala be motuka amo ia honu bona heau dalana be lasi. Kwalahu koremana ese gabu ia koua bona Margaret be ena motuka lalonai sibona ia noho. To, ia heau mauri badina ia hegaegae. Iena paosi lalonai mapu ta ia udaia bona unai mapu dekenai dala ma ta ia davaria ia heau totona. Guna unai dala dekenai ia lao dainai, lahi ia araia neganai ia auka lasi unai dala ia badinaia totona. Margaret ia hegaegae dainai, unai lahi amo ia heau mauri.

12. Dika ita davaria lasi totona, dahaka dainai hadibaia herevadia ita badinaia be namo?

¹² Ita bona ma haida gimaia totona, gavamani taudia ese ita do idia hamaoroa kefiu ita badinaia, iseda gabu ita rakatania, eiava hadibaia herevadia ma haida do idia henia ita badinaia totona. Taunimanima haida idia ura lasi kamonai badina idia ura lasi edia kohu idia rakatania. Keristani taudia be dahaka idia karaia? Baibel ia gwau: “Lohiabada dainai siahu taudia ibounai henunai do umui noho, ena be ia be siahu bada king eiava ia ese ia siaia gavana taudia.” (1 Pet. 2:13, 14) Dirava ena orea ese ita ia gimaia totona hadibaia herevadia idia halasia. Hanaihanai ita idia hadibaia iseda telefon namba be elda taudia dekenai do ita henia, unai amo disasta negadiai ita idia rini henia diba. Oi be unai bamona oi karaia vadaeni, a? Reana ita do idia hadibaia ruma lalonai do ita noho, eiava gabu ita rakatania, heduru gaudia abia dalana eiava ma haida ita durua totona. Bema hadibaia herevadia ita badinaia lasi, iseda mauri bona elda taudia edia mauri ita haboioa diba. Laloatao unai abidadama tatau be ita idia naria. (Heb. 13:17) Margaret ia gwau: “Lau abia dae momokani elda taudia bona orea ena hadibaia herevadia lau badinaia dainai lau mauri.”

13. Edia gabu idia rakatania tadikaka taihu momo be dahaka ese ia durudia idia moale bona maino ai idia noho totona?

¹³ Disasta, tuari o heai dainai tadikaka bona taihu momo be edia gabu idia rakatania, to edia mauri matamata idia manadalaia bona tiokratik gaukara dekenai idia bisi. Dagedage dainai edia gabu idia rakatania Keristani ginigunadia hegeregerena, idia danu be “Dirava ena hereva ena sivarai namona idia harorolaia.” (Kara 8:4) Haroro gaukara ese idia ia durua Basileia idia laloa bona idia davaria hekwakwanai idia laloa momo lasi. Unai idia karaia dainai, moale bona maino ai idia noho.

DAGEDAGE NEGADIAI MAINO AI ITA NOHO

14. Edena dala ai dagedage ese iseda maino ia hadikaia diba?

¹⁴ Dagedage ita davaria neganai, unai ese iseda maino ia hadikaia diba. Taravatu idia atoa lasi neganai, hebou dekenai ita lao, ita haroro bona dina ta ta ena gaukara ita karaia neganai ita moale bona gari lasi. To unai gaudia idia taravatua neganai, ita dekenai do idia vara gaudia dainai ita gari bona lalohekwarahi. Vaia, unai bamona do ita mamia. To, namona be ita naria namonamo. Iesu ia gwau, dagedage karadia ese iena murinai idia raka taudia ia hamorua diba. (Ioa. 16:1, 2) Vadaeni, dagedage ita davaria neganai, edena dala ai maino ai ita noho diba?

15. Dahaka dainai dagedage dainai ita gari lasi? (Ioa. 15:20; 16:33)

¹⁵ Baibel ia gwau: “Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.” (2 Tim. 3:12) Tadikaka ta ladana, Andrei, ena tano dekenai Iehova ena gaukara idia taravatua murinai, ia abia dae lasi Iehova ena hesiai taudia ibounai be dagedage do idia davaria. Ia laloa: ‘Witnes taudia be momo herea. Edena bamona idia ese ai ibounai do idia dogoatao?’ To, unai ia vara dainai hanaihanai ia lalohekwarahi. Tadikaka ma haida be Iehova ena imana dekenai unai hekwakwanai idia rakatania, bona pulisi ese idia do idia dogoatao idia laloa momo lasi. Idia be Andrei bamona lasi, idia diba pulisi ese idia do idia dogoatao to idia laloa momo lasi. Unai dainai, Andrei ese edia lalohadai ia abia dae bona Dirava ia abidadama henia. Daudau lasi murinai lalomaino ia abia, bona ena be dagedage idia vara to ia moale. Ita dekenai unai ia vara diba. Ena be Iesu ia gwau dagedage do ita davaria, to ita ia hagoadaia iseda abidadama be do ia goada noho.​—Ioane 15:20; 16:33 duahia.

16. Dagedage ita davaria neganai dahaka hakaua hereva ita badinaia be namo?

¹⁶ Iseda gaukara idia taravatua neganai, brens ofesi bona elda taudia amo hakaua herevadia do ita abia. Idia ura ita do idia gimaia, ita dekenai Dirava ena hereva do idia henia noho, bona ita do idia durua ita haroro noho totona. Ena be idia henia hakaua herevadia edia badina oi lalopararalaia lasi, to namona be oi badinaia noho. (Ias. 3:17) Danu, namona be dagedage taudia dekenai iseda tadikaka bona taihu edia sivarai, eiava kongrigeisen ena gaukara ita hahedinaraia lasi.​—Had. 3:7.   

17. Aposetolo taudia bamona, dahaka ita karaia be namo?

¹⁷ Satani ese Dirava ena taunimanima ia tuari henia ena badina ta be, idia ese “Iesu idia gwauraia hedinarai” noho. (Apok. 12:17) Namo lasi Satani bona ena taunimanima ese oi idia hagaria. Ena be dagedage ita davaria, to haroro bona hadibaia gaukara ese ita dekenai moale ia henia. Aposetolo taudia edia negai, Iuda ena kota biagudia ese aposetolo taudia idia oda henia idia haroro lasi neganai, unai abidadama taudia be Dirava idia kamonai henia. Idia haroro noho bona unai gaukara ese idia ia hamoalea. (Kara 5:27-29, 41, 42) Oibe, iseda gaukara idia taravatua neganai, namona be mai aonega ida ita haroro. (Mat. 10:16) To bema ita gaukara goada, maino ai do ita noho badina Iehova ita hamoalea bona hahemauri sivaraina ita harorolaia.

“MAINO DIRAVANA BE UMUI IDA DO IA NOHO”

18. Maino Diravana be edena bamona ita laloa be namo?

¹⁸ Ita abia dae ena be nega aukadia ai ita noho, to maino ai ita noho diba. Unai bamona negadiai, namona be ita laloatao Iehova Dirava ena maino ita abia be namo, badina ia sibona ese unai ia henia diba. Daihanai gorere, disasta eiava dagedage ta oi davaria neganai, Iehova dekenai oi tabekau be namo. Iena orea oi badinaia noho. Vaira negana sibona oi laloa. Unai bamona oi karaia neganai, “maino Diravana be umui ida do ia noho.” (Fil. 4:9) Stadi atikol 52 ai, ena be iseda Keristani tadikaka taihu be metau idia davaria, to idia ita durua Dirava ena maino do idia abia dalana do ita herevalaia.