Inai Oi Laloatao, A?
Inai lagani ena Gima Kohorona idauidau oi duahia namonamo vadaeni, a? Mani ita itaia bema inai henanadai oi haerelaidia diba:
Bema nega oi atoa Iehova oi hereva henia, kamonai henia bona ia oi laloa, edena dala ai namo do oi davaria?
Abia hidi namodia do ita karaia, hadibaia taudia namodia ai do ita lao, iseda abidadama do ia goada bona iseda lalokau Iehova totona do ia goada ia lao.—w22.01, rau 30-31.
Iehova bona iena gunalaia taudia ita abidadama henidia neganai, edena dala ai ita do ia durua?
Hari be nega namona Iehova ena hakaua dalana ita abia dae momokani bona elda taudia amo idia mai hakaua daladia eiava disisen ita daradaralaia lasi. Hisihisi badana ia vara neganai, ita hegaegae vadaeni idia ita kamonai henia ena be idia henia hakaua daladia haida ita lalopararalaia lasi eiava ita badinaia totona be auka.—w22.02, rau 4-6.
Serubabele [Iuda ena gavana] ena imana ai hahetohoa varona ia noho karana amo aneru ese Sekaraia dekenai dahaka point ia ura hahedinaraia? (Sek. 4:8-10)
Inai matahanai ese Dirava ena taunimanima ia hagoadaia dubu helaga haginia gaukarana do idia hagugurua bona Dirava ena taravatu do idia badinaia.—w22.03, rau 16-17.
Edena dala ai iseda “hereva karana dekenai haheitalai namona ita hahedinaraia”? (1 Tim. 4:12)
Iseda haroro gaukara ai mai manau bona hemataurai ida ita hereva, hebou ai mai kudouna ibounai ida ane abia, hanaihanai haere ita henia, bona hereva momokani gwauraia bona ma haida oi hagoadaia, bona hadikaia herevadia” ita gwauraia lasi.—w22.04, rau 6-9.
Dahaka dainai Daniela karoa 7 ese ia herevalaia dagedage animal foa (basileia) edia toana be Apokalupo 13:1, 2 ese ia herevalaia dagedage animal tamona dekenai idia hedinarai?
Apokalupo 13 ese ia herevalaia dagedage animal ese gavamani eiava basileia tamona, hegeregere Roma ia laulaulaia lasi. To, unai dagedage animal be politikol oreadia ibounai ia laulaulaia, bona idaunega amo ema bona hari idia ese taunimanima idia lohiaia noho.—w22.05, rau. 9.
Dahaka dainai ita abia dae Dirava ese hahemaoro maorona do ia karaia?
Bema ta ese ita ia habadua, hahisia bona kara dika henia, disisen ita karaia diba iena dika ita gwauatao bona ita badu noho lasi, to Iehova ena imana dekenai ita atoa. Ia ese kara dika dainai idia vara dika ibounai do ia kokia.—w22.06, rau 10-11.
Tadikaka be hebou dekenai guriguri ia gwauraia neganai dahaka ia laloatao be namo?
Guriguri karana be kongrigeisen sisiba henia eiava hadibaia herevadia gwauraia totona lasi. Hebou hamatamaia totona tadikaka ese “hereva momo” ia gaukaralaia lasi be namo. (Mat. 6:7)—w22.07, rau. 24-25.
Edena dala ai “kara dika idia karaia taudia” be do idia “toreisi lou hahemaoro abia totona”? (Ioa. 5:29)
Idia be edia mauri gunana dainai hahemaoro dikana do idia abia lasi. To, idia toreisi lou murinai Dirava ese edia kara bona lalohadai do ia tahua namonamo.—w22.09, rau 18.
September 1922 ena hebouhebou ai J. F. Rutherford ese dahaka hagoadaia herevana ia gwauraia?
Cedar Point, Ohio, U.S.A. dekenai idia karaia hebouhebou ai, ia gwau: “Itaia, Pavapava ia lohia! Umui be iena hereva gwauraia taudia. Unai dainai umui haroro, haroro, haroro, Pavapava bona iena Basileia umui harorolaia!”—w22.10, rau 3-5.
Isaia karoa 30 ese ia hahedinaraia edena dala toi amo Dirava ese ita ia durua ita haheauka totona?
Unai karoa ese ia hahedinaraia Dirava be (1) iseda guriguri ia kamonai namonamo bona ia haerelaidia, (2) ita ia hakaua, bona (3) hari bona vaira negana ai ita dekenai hahenamo ia henia.—w22.11, rau 9.
Dahaka dainai ita gwau diba Salamo 37:10, 11, 29 ena hereva be idaunegai ia guguru bona vaira negai do ia guguru danu?
Davida ena hereva ese King Solomona ia lohia negana ai Israela taudia ese idia davaria hahenamo ia herevalaia. Iesu be vaira nega ai Paradaiso ia herevalaia neganai, unai siri 11 ia gaukaralaia. (Mat. 5:5; Luka 23:43)—w22.12, rau 8-10, 14.