Baibel Duahiduahi Ena Namo

1. Dahaka ese ia hahedinaraia Iesu be Toretore Helagadia ia laloa bada?

IESU ena hahediba dalana be namo herea. Nega momo ia be Toretore Helagadia ia laloatao bona ia gwauraia. Ia bapatiso murinai ia gwauraia hereva ginigunana bona kahirakahira do ia mase ia gwauraia hereva dokona be Toretore Helagadia amo ia abia.b (Deu. 8:3; Sal. 31:5; Luka 4:4; 23:46) Lagani toi mai kahanai haroro gaukara ia karaia neganai, Iesu ese Toretore Helagadia ia duahia, eiava siri ia gwauraia bona edia anina ia gwauraia hedinarai.​—Mat. 5:17, 18, 21, 22, 27, 28; Luka 4:16-20.

2. Dahaka ese Iesu ia durua Toretore Helagadia ia diba namonamo totona? (Rau 1 ena laulau itaia.)

² Iesu ena haroro gaukara ia do hamatamaia lasi neganai, nega ibounai Dirava ena Hereva ia duahia bona kamonai. Ruma ai Iesu ia kamonai Maria bona Iosepa be dina ta ta ai edia herevahereva lalonai, Toretore Helagadia idia gaukaralaia.c (Deu. 6:6, 7) Ita diba Iesu bona ena famili be Sabati ibounai Sinagoga ai idia lao. (Luka 4:16) Unuseniai, Toretore Helagadia idia duahia neganai Iesu ia kamonai namonamo. Bena gabeai, ia sibona ese Toretore Helagadia duahia dalana ia dibaia. Unai dainai, Toretore Helagadia ia diba namonamo sibona lasi, to ia ura henia bona ena kara amo unai ia hahedinaraia. Hegeregere, Iesu ena mauri lagani be 12 neganai, dubu helaga ai ia vara gauna mani ita laloa. Mose ena Taravatu idia diba momo hadibaia taudia be Iesu ena laloparara bona haere dekenai idia hoa.​—Luka 2:46, 47, 52.

3. Inai atikol ai dahaka do ita herevalaia?

³ Hanaihanai Baibel ita duahia neganai, ita danu be Dirava ena Hereva do ita dibaia bona ura henia. To, ita duahia gauna be edena dala ai ita do ia durua? Iesu be Taravatu idia diba momo taudia, hegeregere taravatu hadibaia taudia, Farisea taudia bona Sadukea taudia dekenai ia gwauraia herevana amo gau haida do ita dibaia. Dubu gunalaia taudia be nega momo Toretore Helagadia idia duahia, to idia duahia gauna ena namo idia abia lasi. Iesu ese unai tatau idia karaia lasi gaudia toi ia herevalaia. Ena hereva ese ita do ia durua (1) ita duahia gauna do ita lalopararalaia, (2) dava bada kohudia do ita davaria, bona (3) Dirava ena Hereva ese iseda mauri do ia hamaoromaoroa.

ITA DUAHIA GAUNA DO ITA LALOPARARALAIA

4. Luka 10:25-29 amo dahaka ita dibaia?

⁴ Ita ura Baibel ai ita duahia gauna ena anina ita lalopararalaia. Bema ita lalopararalaia lasi, ita do ia durua lasi. Mani Iesu ese Taravatu ia diba momo tauna ia hereva henia ena sivarai ita itaia. (Luka 10:25-29 duahia.) Unai tauna ese Iesu ia nanadaia dahaka ia karaia diba mauri hanaihanai ia abia totona neganai, Iesu ese Dirava ena Hereva ia gwauraia bona ia nanadaia: “Taravatu dekenai dahaka idia torea? Oi duahia gauna oi lalopararalaia, a?” Unai tauna be siri amo haere maorona ia henia, ia gwau Dirava bona dekena tauna do ia lalokau henia. (Lev. 19:18; Deu. 6:5) To gabeai ia gwauraia herevana mani oi itaia, ia gwau: “Egu dekena tauna be daika?” Unai tauna ia hahedinaraia ia duahia gauna ena anina ia diba namonamo lasi. Unai dainai, unai siri be ena mauri lalonai do ia badinaia namonamo dalana ia diba lasi.

5. Edena dala ai guriguri bona metairametaira ita duahiduahi karana ese ita do ia durua?

⁵ Iseda duahiduahi karana ita hanamoa neganai, iseda laloparara Dirava ena Hereva dekenai do ita habadaia. Heduru daladia haida be inai: Baibel oi duahia totona namona be oi guriguri guna. Iehova ena heduru ita noia be namo, unai amo ena lauma helaga ese ita do ia durua ita duahia gauna sibona ita laloa totona. Bena metairametaira oi duahiduahi. Unai ese oi do ia durua oi duahia gauna oi lalopararalaia totona. Oi durua totona, Baibel oi duahia badabada eiava, idia rekodia Baibel duahiduahi oi kamonai bona badinaia diba. Idia rekodia herevadia oi kamonai, bona emu Baibel amo oi badinaia neganai, unai ese oi do ia durua Dirava ena Hereva oi lalopararalaia, oi laloatao bona gau matamatadia do oi dibaia. (Ios. 1:8) Emu Baibel duahiduahi oi haorea neganai, Iehova oi guriguri henia lou. Iena hereva dainai oi tanikiu henia bona oi noia oi do ia durua oi duahia gaudia oi badinaia totona.

6. Edena dala ai sibona oi nanadaia bona point haida oi torea karana ese oi do ia durua? (Laulau itaia danu.)

⁶ Baibel oi lalopararalaia namonamo totona, heduru daladia rua be inai: (1) Baibel ena sivarai ta oi duahia neganai sibona oi nanadaia: ‘Daidia ia herevalaia? Daika ia hereva noho? Daika ia hereva henia bona dahaka dainai? Edeseni bona edena negai unai gauna ia vara? Unai henanadai ese oi do idia durua oi duahia gauna oi lalopararalaia totona. (2) Baibel oi duahia neganai point haida oi torea. Unai oi karaia neganai, oi do ia durua unai sivarai oi laloa dobu bona do oi lalopararalaia. Hegeregere, henanadai haida bona emu tahua gaukara amo oi davaria gaudia oi torea, Baibel amo oi duahia gauna ena point badadia, oi badinaia daladia bona emu hemami oi torea diba danu. Unai oi karaia neganai, do oi mamia Dirava ena Hereva be oi dekenai ia siaia revareva ta bamona.

7. Baibel ita duahia neganai, dahaka kara be mai anina bada, bona dahaka dainai? (Mataio 24:15)

⁷ Iesu ia hahedinaraia Dirava ena Hereva ita lalopararalaia totona, laloa namonamo karana be mai anina bada. (Mataio 24:15 duahia.) Laloa namonamo karana be dahaka? Laloa namonamo karana ia hahedinaraia tauna ese lalohadai ta be lalohadai ma ta ida ia hegeregere eiava ia idau dalana ia lalopararalaia, bona idia hedinarai lasi point ia itaia diba. Ma danu, Iesu ia hahedinaraia Baibel ena peroveta herevadia idia hagugurua gaudia ita lalopararalaia totona, laloa namonamo karana be mai anina bada. Danu, unai ese ita do ia durua Baibel duahiduahi karana amo namo ita davaria totona.

8. Edena dala ai mai laloa namonamo ida Baibel ita duahia diba?

⁸ Iehova ese ena hesiai taudia dekenai laloa namonamo karana ia henia. Unai dainai, ia do ita noia ita ia durua unai kara ita hahedinaraia totona. (Aon. 2:6) Edena dala ai emu guriguri oi badinaia diba? Oi duahia gauna oi laloa namonamo, bona oi itaia edena dala ai oi dibaia vadaeni gaudia ida ia hegeregere. Oi durua totona heduru bukadia haida, hegeregere Research Guide for Jehovah’s Witnesses oi gaukaralaia diba. Unai bamona buka idauidau ese oi do idia durua Baibel siri ena anina oi lalopararalaia, bona emu mauri lalonai oi badinaia dalana do oi dibaia. (Heb. 5:14) Mai laloa namonamo ida Baibel oi duahia neganai, emu laloparara do ia bada.

DAVA BADA KOHUDIA ITA TAHUA

9. Sadukea taudia be edena mai anina bada hereva momokanina idia abia dae lasi?

⁹ Sadukea taudia be Heberu Toretoredia ena buka ginigunadia faiv idia diba momo, to ia lalonai idia noho mai anina bada hereva momokanidia idia abia dae lasi. Hegeregere, toreisi lou herevana dainai Iesu ida idia hepapahuahu neganai, mani Iesu ena haere ita laloa. Ia gwau: “Mose ena buka lalonai, au ginigini ena sivarai umui duahia lasi, a? Dirava be ia dekenai ia gwau: ‘Lau be Aberahamo ena Dirava, Isako ena Dirava, bona Iakobo ena Dirava.’” (Mar. 12:18, 26) Iesu ena henanadai ese ia hahedinaraia, ena be Sadukea taudia ese nega momo unai sivarai idia duahia, to idia be mai anina bada hereva momokanina, toreisi lou herevana unai, idia abia dae lasi.​—Mar. 12:27; Luka 20:38.d

10. Baibel ita duahia neganai, dahaka gaudia ita dibaia be namo?

¹⁰ Sadukea taudia edia sivarai amo dahaka ita dibaia? Baibel ena sivarai eiava siri ta ita duahia neganai, ita ura ia hadibaia gaudia ibounai ita lalopararalaia. Namona be Baibel ena hereva badadia sibona ita lalopararalaia lasi, to siri lalonai idia hunia hereva momokani dobudia bona hakaua herevadia ita dibaia danu.

11. Timoteo Iharuana 3:16, 17 hegeregerena, edena dala ai dava bada kohudia oi davaria diba?

¹¹ Baibel oi duahia neganai, edena dala ai dava bada kohudia oi davaria diba? Mani 2 Timoteo 3:16, 17 ena hereva ita itaia. (Duahia.) Ia gwau, “Toretore Helagadia be . . . mai ena namo” (1) hadibaia, (2) sisiba henia, (3) hamaoromaoroa, bona (4) matahakani henia totona. Ita duahia momo lasi Baibel bukadia dekenai unai point foa ita gaukaralaia diba. Baibel ena sivarai ta oi duahia neganai, oi itaia edena dala ai Iehova, iena ura bona hakaua herevadia be oi dekenai ia hadibaia. Ena sisiba ese oi ia durua dalana oi laloa. Do oi itaia edena dala ai unai siri ese oi do idia durua, ura o kara dikadia oi dadaraia bona Iehova oi badinaia noho totona. Oi tahua edena dala ai unai siri ese oi do idia durua haroro gaukara ai ta ena lalohadai kererena oi hamaoromaoroa totona. Danu do oi itaia, edena dala ai unai siri ese oi ia matahakani henia Iehova ena lalohadai oi badinaia totona. Emu Baibel duahiduahi lalonai unai point foa oi gaukaralaia neganai, unai dava bada kohudia do oi davaria.

BAIBEL ESE OI IA HAMAOROMAOROA BE NAMO

12. Dahaka dainai Iesu ese Farisea taudia ia nanadaia, “Umui duahia lasi, a?”

¹² Iesu ese Farisea taudia edia lalohadai kererena Baibel dekenai ia hahedinaraia totona, idia ia nanadaia, “Umui duahia lasi, a?” (Mat. 12:1-7)e Unai nega ai, Farisea taudia idia gwau Iesu ena hahediba taudia ese Sabati ena Taravatu idia utua. Iesu ia haere neganai, ia be Baibel ena haheitalai rua ia gaukaralaia bona Hosea bukana ena siri ta ia herevalaia. Ia hahedinaraia Farisea taudia ese Sabati taravatu ena anina idia lalopararalaia lasi bona unai dainai hebogahisi idia hahedinaraia lasi. Dahaka dainai unai tatau ese Dirava ena Hereva idia duahia, to edia lalohadai idia hamaoromaoroa lasi? Badina Dirava ena Hereva be mai hekokoroku ida idia duahia bona idia gwauraia dika, unai dainai idia lalopararalaia lasi.​—Mat. 23:23; Ioa. 5:39, 40.

13. Baibel ita duahia neganai, dahaka lalohadai ita dadaraia be namo, bona dahaka dainai?

¹³ Iesu ena hereva amo ita dibaia gauna be, mai lalohadai maorona ida Baibel ita duahia be namo. Namo lasi Farisea taudia ita tohotohoa, to namona be ita manau bona Baibel amo diba ita abia. Namona be ‘mai manau ida Dirava ese iseda lalona ai ia hadoa herevana ita abia dae.’ (Iam. 1:21) Bema ita manau, Dirava ena Hereva ese iseda mauri do ia haidaua. Bema ita hekokoroku lasi bona Baibel ita gwauraia dika lasi, Baibel amo ita dibaia hebogahisi bona lalokau karadia ese iseda mauri do idia haidaua.

14. Edena dala ai do ita diba Baibel be ita ia hamaoromaoroa noho? (Laulau itaia danu.)

¹⁴ Ma haida ita kara henia dalana ese do ia hahedinaraia bema Dirava ena Hereva ese ita ia hamaoromaoroa noho. Farisea taudia be Dirava ena Hereva idia abia dae lasi, unai dainai idia ese ‘kerere lasi taudia idia gwauraia dika.’ (Mat. 12:7) Unai hegeregerena, ma haida ita laloa bona kara henidia dalana amo do ia hedinarai, bema Dirava ena Hereva be ita ia hamaoromaoroa noho. Namona be sibona ita nanadaia: Ita be haida edia kara namona eiava edia kara kerere ita gwauraia haraga, a? Ita be haida ita hebogahisi bona edia dika ita gwauatao eiava ita gwauraidia dika bona nega daudau lalonai ita badu henidia noho, a? Unai dala ai sibona ita sekea neganai, do ia hedinarai bema Baibel ai ita duahia gauna ese iseda lalohadai, hemami, bona kara ia hamaoromaoroa noho.​—1 Tim. 4:12, 15; Heb. 4:12.

BAIBEL DUAHIA KARANA ESE MOALE IA HAVARAIA

15. Iesu ese Toretore Helagadia be edena bamona ia laloa?

¹⁵ Iesu be Toretore Helagadia ia ura henia bona Salamo 40:8 be ena hemami ia hahedinaraia, ia gwau: “Egu Dirava e, lau ura dikadika emu ura lau karaia, bona emu taravatu be egu kudouna ai ia noho.” Unai dainai, ia be mai moale ida Iehova ia hesiai henia. Bema Dirava ena Hereva be iseda kudouna lalonai ita atoa, ita danu be do ita moale bona do ita kwalimu.​—Sal. 1:1-3.

16. Edena dala ai Baibel duahiduahi karana amo namo bada do ita davaria? (Maua ladana “Iesu Ena Hereva amo Baibel Oi Lalopararalaia Diba” itaia.)

¹⁶ Iesu ena hereva bona haheitalai hegeregerena, namona be iseda Baibel duahiduahi karana ita hanamoa. Baibel ita lalopararalaia totona, namona be ita guriguri, metairametaira ita duahiduahi, henanadai haida ita gaukaralaia, bona point haida ita torea. Ita duahia Baibel siri ita lalopararalaia totona, laloa namonamo karana be mai anina bada. Bona ita durua totona pablikeisen haida ita gaukaralaia diba. Ena be siri haida ita gaukaralaia momo lasi, to dava bada kohudia ita tahua karana amo, iseda Baibel gaukaralaia dalana ita hanamoa diba. Danu mai lalohadai maorona ida Baibel ita duahia neganai, ita do ia hamaoromaoroa. Unai dala idauidau ai Baibel ita duahia neganai, namo bada do ita davaria bona Iehova do ita tura henia namonamo.​—Sal. 119:17, 18; Iam. 4:8.