“Umui Laloa Maoromaoro Bona Umui Gima Noho!”

1. Iesu ese ena hahediba taudia dekenai dokona ena nega be edena bamona ia herevalaia, bona dahaka hadibaia herevana ia gwauraia?

IESU ena mase dinana ia kahirakahira neganai, iena hahediba taudia foa ese idia nanadaia: “Inai nega oromana ena dokona ena toana be dahaka?” (Mat. 24:3) Iena hahediba taudia idia henanadai badina Ierusalema bona dubu helaga do ia moru negana idia ura diba. Ia haere neganai, Iesu be Ierusalema bona dubu helaga do idia moru sibona ia herevalaia lasi, to hari ita noho “nega oromana ena dokona” ia herevalaia danu. Iesu ese nega dokona ena nega ia herevalaia, ia gwau: “Unai dina bona hora be tau ta ia diba lasi, guba anerudia idia diba lasi, Natuna danu be ia diba lasi, to Tamana sibona.” Bena ena hahediba taudia ibounai ia hadibadia do idia “noga noho” bona “gima noho.”​—Mar. 13:32-37.

2. Dahaka dainai Keristani ginigunadia idia gima noho be gau badana?

² Iuda Keristani taudia ginigunadia idia mauri totona, idia gima noho be gau badana. Iesu ese ena hahediba taudia dekenai Ierusalema bona dubu helaga do ia moru negana ena toa ia herevalaia. Ia gwau: “Umui itaia Ierusalema be tuari oreadia ese idia hagegea neganai, do umui diba ena hadikaia ore negana be ia kahirakahira vadaeni.” Unai nega ai, idia be Iesu ena hadibaia herevana do idia badinaia bona “ororo dekenai idia heau lao.” (Luka 21:20, 21) Roma tuari taudia ese Ierusalema idia hadikaia neganai, unai hadibaia herevana idia badinaia taudia be idia roho mauri.

3. Inai atikol ai dahaka do ita herevalaia?

³ Inai tanobada dikana be kahirakahira do ia ore negana ai ita noho. Unai dainai, namona be ita danu do ita noga bona gima noho. Inai atikol ai ita ese (1) niusi ita itaia neganai lalohadai maorona ita badinaia dalana, (2) ita sibona ita naria namonamo dalana, bona (3) inai nega orena do ita gaukaralaia namonamo dalana do ita herevalaia.

NIUSI ITA ITAIA NEGANAI LALOHADAI MAORONA ITA BADINAIA

4. Dahaka dainai ita ura diba tanobada ai idia vara gaudia ese Baibel ena peroveta herevadia idia hagugurua?

⁴ Badina namodia dainai, ita ura diba edena dala ai tanobada ai idia vara gaudia ese Baibel ena peroveta herevadia idia hagugurua. Hegeregere, Iesu ese do idia vara gaudia edia lista ia henia, unai amo do ita diba Satani ena tanobada dokona be ia kahirakahira noho. (Mat. 24:3-14) Aposetolo Petero ese ita ia hagoadaia peroveta herevadia idia guguru dalana do ita badinaia namonamo, unai amo iseda abidadama do ia goada noho. (2 Pet. 1:19-21) Baibel ena buka ginigabena be inai hereva amo ia hamatamaia: “Iesu Keriso ese hunia herevana ia hahedinaraia, unai be Dirava ese ia dekenai ia henia gauna, kahirakahira do idia vara gaudia be ena hesiai taudia dekenai ia hahedinaraia totona.” (Apok. 1:1) Unai dainai, ita ura niusi ita itaia bona Baibel ena peroveta herevadia idia hagugurua dalana ita dibaia. Bona reana ita ura ta ta dekenai unai gaudia ita kikilaia.   

5. Dahaka ita dadaraia, to dahaka ita karaia be namo? (Laulau itaia danu.)

⁵ Baibel ena peroveta herevadia ita kikilaia neganai, namo lasi sibona iseda lalohadai ita gwauraia. Dahaka dainai? Badina ita ura lasi ita gwauraia gauna ese kongrigeisen ena lalotamona ia hadikaia. Hegeregere, reana ita kamonai politikol taudia idia gwau hekwakwanai ta do idia hamaoromaoroa bona maino bona noho namo do idia mailaia. Namo lasi ita gwau, unai ese 1 Tesalonika 5:3 ena peroveta herevana ia hagugurua, to namona be Iehova ena orea ese ia halasia diba matamata ita badinaia. Ta ta ida ita kiki neganai, orea ese ia halasia buka bona magasin lalonai idia noho gaudia ita herevalaia be namo, badina unai ese kongrigeisen taudia do ia durua edia ‘ura ia tamona’ totona.​—1 Kor. 1:10; 4:6.   

6. Petero Iharuana 3:11-13 amo dahaka ita dibaia?

⁶ Petero Iharuana 3:11-13 duahia. Aposetolo Petero ese ita ia durua mai lalohadai maorona ida Baibel ena peroveta herevadia do ita laloa. Ita ia hagoadaia ‘Iehova ena dina ena mai negana do ita naria bona ita laloa noho.’ Dahaka dainai? Ita ura lasi tahua edena “dina bona hora” ai Iehova ese Aramagedono do ia mailaia, to ita ura inai nega orena do ita gaukaralaia ‘helaga karadia bona Dirava badinaia karadia’ do ita karaia. (Mat. 24:36; Luka 12:40) Ita gwau diba, ita ura kara maoromaoro ita badinaia bona iseda hesiai gaukara amo ita hahedinaraia Iehova ita lalokau henia bada. Unai ita karaia noho totona, namona be sibona ita naria namonamo.

SIBONA ITA NARIA NAMONAMO ENA ANINA

7. Edena dala ai ita hahedinaraia sibona ita naria namonamo? (Luka 21:34)

⁷ Iesu ese ena hahediba taudia ia hamaoroa tanobada ai idia vara gaudia sibona do idia laloa lasi, to idia sibona do idia naria namonamo. Unai hadibaia herevana be Luka 21:34 ai ia noho. (Duahia.) Unai siri lalonai, hegeregere Iesu be ia gwau: “Sibona do umui naria namonamo.” Sibona ia naria namonamo tauna be iena hetura karana Iehova ida idia hadikaia diba gaudia ia itaia, bona ia dadaraia. Unai dala amo, Dirava ena lalokau lalonai do ia noho.​—Aon. 22:3; Iuda 20, 21.

8. Aposetolo Paulo ese Keristani taudia dekenai dahaka sisiba ia henia?

⁸ Aposetolo Paulo ese Keristani taudia ia sisiba henidia sibona do idia naria namonamo. Hegeregere, Efeso ai idia noho Keristani taudia ia hamaoroa, ia gwau: “Emui raka dalana do umui naria namonamo, kavakava taudia bamona do umui raka lasi, to aonega taudia bamona do umui raka.” (Efe. 5:15, 16) Satani ia ura iseda hetura karana Iehova ida ia hadikaia, unai dainai Baibel ena sisiba be ‘Iehova ena ura ita lalopararalaia noho be namo,’ unai amo Satani ena hahetoho idauidau amo sibona ita gimaia diba.​—Efe. 5:17.

9. Iehova ena ura be edena bamona do ita diba?

⁹ Baibel ese iseda hetura karana Iehova ida do idia hadikaia gaudia ibounai ia hahedinaraia lasi. Nega momo Baibel ese ia herevalaia lasi gaudia dekenai abia hidi ita karaia be namo. Abia hidi maorodia ita karaia totona, “Iehova ena ura” ita lalopararalaia be namo. Unai ita karaia totona, hanaihanai Dirava ena Hereva do ita stadilaia bona laloa dobu. Bona ena be iseda kara ia biagua taravatu ta ia noho lasi, to Iehova ena ura ita lalopararalaia bona “Keriso ena lalohadai” ita abia neganai, “aonega taudia bamona do [ita] raka.” (1 Kor. 2:14-16) Hadikaia gaudia haida be ita itaia diba, to haida be ita itaia lasi, idia hunia.

10. Edena hadikaia gaudia ita dadaraia be namo?

¹⁰ Namona be inai hadikaia gaudia ita dadaraia: hegahusi (flirting) karana, inuinu kekero, aniani momo, ta hadikaia herevadia, dagedage bona ponografi itaia karana, bona unai bamona gaudia. (Sal. 101:3) Iseda inai tauna, Diabolo be hanaihanai dala ia tahua iseda hetura karana Iehova ida ia hadikaia totona. (1 Pet. 5:8) Bema ita gima lasi, Satani ese iseda lalohadai bona kudouna ai mama, koikoi, mataganigani, inai heheni, hekokoroku bona badu ia havaraia diba. (Gal. 5:19-21) Matamanai, unai gaudia be do idia goada lasi. To bema karaharaga unai gaudia ita kokia lasi, idia be poisini ava ta bamona do idia tubu bona dika idia havaraia diba.​—Iam. 1:14, 15.

11. Ia hunia hadikaia gauna ta be dahaka, bona dahaka dainai ita dadaraia be namo?

¹¹ Hunia dalana ai ita ia hadikaia diba gauna ta be hebamo dikadia. Mani inai haheitalai ita laloa. Oiemu gaukara turana ta be Iehova ena Witnes tauna lasi. Oi ura ia be Iehova ena Witnes taudia do ia lalonamo henia, unai dainai oi kara namo henia. Bona nega ta ta ai ia ida oi aniani hebou. Bena daudau lasi murinai, ia oi bamoa momo. Nega haida, matabodaga sivaraidia ia kikilaia, bona matamanai oi dadaraia, to gabeai oi ura kamonai. Bena nega ta, oi ia boiria alkahol umui inua hebou totona, bona oi abia dae. Metairametaira, emu gaukara turana ena lalohadai oi abia dae, bona daudau lasi murinai iena kara oi tohotohoa danu. Momokani, ita be taunimanima ibounai dekenai kara namo bona hemataurai ita hahedinaraia, to namona be ita laloatao ita bamoa taudia ese iseda kara namodia idia hadikaia diba. (1 Kor. 15:33) Bema Iesu ena hereva ita badinaia bona sibona ita naria namonamo, Iehova ena taravatu idia badinaia lasi taudia do ita bamoa lasi. (2 Kor. 6:15) Oibe, ita ia hadikaia gauna do ita itaia bona ita dadaraia.

EMU NEGA OI GAUKARALAIA NAMONAMO

12. Iesu ena hahediba taudia be nega dokona idia naria noho lalonai, dahaka gaukara idia karaia?

¹² Iesu ia ura ena hahediba taudia be nega dokona idia naria noho lalonai do idia noho kava lasi. Iesu be idia dekenai gaukara ta ia henia. Idia ia oda henia “Ierusalema, Iudea ibounai, Samaria, bona tanobada ena daudau momokani gabudia dekenai” sivarai namona do idia harorolaia. (Kara 1:6-8) Hahediba taudia be gaukara badana idia abia! Unai gaukara idia karaia dainai, edia nega idia gaukaralaia namonamo.

13. Dahaka dainai iseda nega ita gaukaralaia namonamo be gau badana? (Kolose 4:5)

¹³ Kolose 4:5 duahia. Sibona ita naria namonamo totona, iseda nega ita gaukaralaia namonamo dalana do ita laloa. Ita ta ta dekenai “dika be nega idauidau ai idia vara kava” diba. (Had. 9:11) Bona ita diba lasi edena negai do ita mase.

14-15. Edena dala ai iseda nega ita gaukaralaia namonamo diba? (Heberu 6:11, 12) (Laulau itaia danu.)

¹⁴ Iseda nega ita gaukaralaia namonamo totona, namona be Iehova ena ura ita karaia bona iseda hetura karana ia ida ita hagoadaia. (Ioa. 14:21) Namona be ‘ita gini goada, bona do ita marere lasi, nega ibounai Lohiabada ena gaukara idauidau lalonai do ita bisi.” (1 Kor. 15:58) Bena dokona ia mai neganai, herevana ita mase eiava Dirava ese inai tanobada dikana ia hadikaia ore, to do ita lalohisihisi lasi.​—Mat. 24:13; Roma 14:8.   

¹⁵ Hari, Iesu be ena hahediba taudia ia gunalaia noho, Dirava ena Basileia be inai tanobada ibounai dekenai idia harorolaia totona. Iesu ese ena gwauhamata ia hagugurua. Sivarai namona ita harorolaia totona, Iesu be Iehova ena orea amo ita ia hadibaia bona tulu namodia ia henia. (Mat. 28:18-20) Namona be iseda haroro bona hahediba gaukarana do ita karaia goadagoada bona Iehova ese inai nega oromana do ia hadikaia ore negana ita naria noho. Heberu 6:11, 12 ena sisiba ita badinaia neganai, iseda helaro do ita dogoatao noho “ela bona dokona.”​—Duahia.   

16. Iseda lalona ita hadaia dahaka do ita karaia totona?

¹⁶ Iehova ese dina bona hora ia abia hidi vadaeni Satani ena tanobada ia hadikaia ore totona. Iehova ese ia makaia negana ai, Baibel lalonai nega matamata totona ia gwauraia peroveta herevadia do ia hagugurua. Nega haida ita laloa, inai nega dokona be ia mai haraga lasi. To, Iehova ena dina be “do ia leiti lasi!” (Hab. 2:3) Namona be iseda lalona ita hadaia, iseda “hahemauri Diravana totona mai haheauka ida do [ita] naria” noho.​—Mika 7:7.