Iehova ese Iseda Guriguri Ia Haerelaia Dalana

1-2. Guriguri karana dekenai dahaka daradara ia vara diba?

NEGA haida do oi daradara bema Iehova ese emu guriguri ia haerelaia eiava lasi. Bema oibe, oi sibona lasi. Tadikaka taihu momo be hekwakwanai ta idia davaria neganai unai bamona lalohadai idia abia danu. Ita danu be hekwakwanai ita davaria neganai, reana do ia auka Iehova ese iseda guriguri ia haerelaia dalana ita lalopararalaia totona.

² Inai stadi lalonai do ita itaia dahaka dainai ita diba momokani Iehova be ia idia tomadiho henia taudia edia guriguri ia haerelaia. (1 Ioa. 5:15) Inai henanadai do ita herevalaia danu: Dahaka dainai nega haida Iehova be iseda guriguri ia haerelaia lasi? Hari inai negai, edena dala idauidau ai Iehova ese iseda guriguri ia haerelaia?

ISEDA URA HEGEREGERENA GURIGURI IA HAERELAIA LASI

3. Dahaka dainai Iehova ia ura ia ita guriguri henia?

³ Baibel amo ita diba Iehova be ita ia laloa bada bona lalokau henia. (Hag. 2:7; 1 Ioa. 4:10) Unai dainai ita ia hadibaia heduru totona ia do ita guriguri henia. (1 Pet. 5:6, 7) Ia ura ia kahirakahira ita noho, unai amo iseda hekwakwanai ita haheaukalaia.

4. Edena dala ai ita diba Iehova be ia idia tomadiho henia taudia edia guriguri ia haerelaia? (Laulau itaia danu.)

⁴ Nega momo Baibel lalonai ita duahia, Iehova be ia idia tomadiho henia taudia edia guriguri ia haerelaia. Daika ena sivarai oi laloatao? Reana King Davida. Iena mauri lalonai ena inai taudia momo idia ura ia idia hamasea neganai, nega momo ia be Iehova ena heduru totona ia guriguri. Nega ta Iehova ia noinoi henia, ia gwau: “Iehova e, mani egu guriguri oi kamonai; heduru totona egu noinoi kamonai. Oi be kara momokani bona kara maoromaoro Dirava dainai, lau oi haere henia.” (Sal. 143:1) Iehova ese Davida ia haere henia. (1 Sam. 19:10, 18-20; 2 Sam. 5:17-25) Unai dainai Davida be mai goada ida ia gwau: “Iehova be ia dekenai idia boiboi taudia kahirakahira ia noho.” Ita totona unai do ia karaia danu.​—Sal. 145:18.

5. Idaunegai Iehova ese ia idia tomadiho henia taudia edia guriguri be edia ura hegeregerena ia haerelaia, a? Haheitalai gwauraia. (Laulau itaia danu.)

⁵ Reana Iehova ese iseda guriguri be ita laloa dalanai do ia haerelaia lasi. Aposetolo Paulo dekenai unai ia vara. Dirava ia noia ena ‘tauanina ia gwadaia ginigini’ ia kokia totona. Paulo be nega toi unai hekwakwanai totona ia guriguri. Iehova be ena guriguri ia haerelaia, a? Oibe, to Paulo ena ura hegeregerena ai ia haerelaia lasi. Iehova be unai hekwakwanai ia kokia lasi, to Paulo dekenai goada ia henia mai haheauka ida ena hesiai gaukara ia karaia noho totona.​—1 Kor. 12:7-10.

6. Dahaka dainai nega haida dala ma ta ai Iehova ese iseda guriguri ia haerelaia?

⁶ Nega haida, reana Dirava ese iseda guriguri be ita laloa lasi dalana ai do ia haerelaia. To, ita diba momokani Iehova be iseda hekwakwanai hanamoa dalana ia diba. Ia ese “ita noia eiava lalohadailaia gaudia sibona lasi, to unai gaudia idia hereaia gaudia ia henia diba.” (Efe. 3:20) Unai dainai ita laloa lasi negana ai, eiava dala ma ta ai iseda guriguri ia haerelaia.   

7. Dahaka dainai reana ita gurigurilaia gauna ita haidaua be namo? Haheitalai gwauraia.

⁷ Iehova ena ura ita lalopararalaia namonamo neganai, reana ita gurigurilaia gauna ita haidaua. Mani Tadikaka Martin Poetzinger ena haheitalai ita laloa. Tadikaka Poetzinger ia headava bona daudau lasi murinai, Nazi dibura kamepa dekenai idia atoa. Matamanai, Iehova ia noia unai kamepa do ia rakatania, ena adavana ia naria bona haroro gaukara ia karaia lou totona. To wiki rua murinai, ia laloparara kamepa ia rakatania totona Iehova be dala ia kehoa lasi. Unai dainai, ia guriguri ia gwau: “Iehova e, mani oi ura do lau karaia gauna be lau dekenai oi hadibaia.” Bena dibura kamepa lalonai tadikaka ma haida ese idia haheaukalaia hekwakwanai ia laloa matamaia. Idia momo be edia adavadia bona natudia dainai idia lalohekwarahi bada. Vadaeni Tadikaka Poetzinger ia guriguri ia gwau: “Iehova e, tanikiu egu asainmen matamata totona. Lau oi hagoadaia egu tadikaka lau durudia totona.” Lagani 9 lalodiai dibura kamepa dekenai unai ia karaia!   

8. Ita guriguri neganai dahaka mai anina bada gauna ita laloa be namo?

⁸ Namona be ita laloatao Iehova be ia makaia negana ai iena ura do ia hagugurua. Ia ura tanobada ai idia vara hekwakwanai ibounai hegeregere disasta, gorere bona mase do ia haorea vaitani. Iehova ese iena Basileia amo ena ura do ia hagugurua. (Dan. 2:44; Apok. 21:3, 4) To hari inai negai, Iehova ese Satani ia koua lasi tanobada ia lohiaia totona.b (Ioa. 12:31; Apok. 12:9) Bema Iehova ese hari idia vara noho hekwakwanai ia hamaoromaoroa, toana be Satani ena lohia dalana be do ia namo herea. Ena be Iehova ese ena gwauhamata haida do ia hagugurua negana ita do naria noho, ia be ita ia rakatania lasi. Mani Iehova ese ita ia durua daladia haida ita herevalaia.

IEHOVA ESE ISEDA GURIGURI IA HAERELAIA DALADIA

9. Abia hidi ita ura karaia neganai, edena dala ai Iehova ese ita ia durua diba? Haheitalai gwauraia.

⁹ Iehova ese ita dekenai aonega ia henia. Ia gwauhamata ita dekenai aonega do ia henia abia hidi namodia ita karaia totona. Iehova ena aonega ese ita ia durua, iseda mauri lalonai abia hidi badana ta ita ura karaia neganai, hegeregere do ita headava o lasi. (Iam. 1:5) Mani singul taihu ta ladana Maria ena ekspiriens ita laloa.c Mai moale ida painia gaukara ia karaia noho lalonai, tadikaka ta ida ia hedavari. Ia gwau: “Emai hetura karana ia goada neganai, ta ta ai ura henia bada. Lau diba abia hidi ta lau karaia be namo. Unai abia hidi karaia totona lau guriguri goadagoada. Lau diba Iehova ena heduru lau abia be namo, to lau diba danu Iehova be lau totona unai disisen do ia karaia lasi.” Ia mamia Iehova ese ena guriguri ia haerelaia. Edena dala ai? Pablikeisen idauidau lalonai tahua gaukara ia karaia murinai, atikol namodia ia davaria bona unai ese ia durua ia daradaralaia gaudia ia lalopararalaia totona. Danu ena sinana, iseda taihu ta, ena sisiba ia abia dae. Unai sisiba herevadia ese Maria ia durua ena hemami ia laloa namonamo totona, bena abia hidi maorona ia karaia.

10. Filipi 4:13 hegeregerena, Iehova be dahaka do ia karaia ena tomadiho taudia ia durua totona. Haheitalai gwauraia. (Laulau itaia danu.)

¹⁰ Ita haheauka totona Iehova ese ita dekenai goada ia henia. Iehova ese aposetolo Paulo ia durua hegeregerena, ita dekenai goada do ia henia hekwakwanai ita haheaukalaia totona. (Filipi 4:13 duahia.) Mani Iehova ese tadikaka ta ladana Benjamin ia durua mauri aukana ia haheaukalaia ena sivarai ita laloa. Benjamin be mero maragi neganai, ia bona ena famili be Africa ena refiuji kamepa ai idia noho. Benjamin ia gwau: “Hanaihanai Iehova lau guriguri henia bona lau noia lau dekenai goada do ia henia Ia hamoalea gaudia lau karaia totona. Iehova ese egu guriguri ia haerelaia, ia ese lau dekenai lalomaino ia henia. Lau haroro noho totona lalogoada ia henia, bona lau gini goada totona pablikeisen idauidau ia henia.” Ma ia gwau: “Tadikaka taihu edia ekspiriens lau duahia bona Iehova ese idia ia durua bona idia haheauka dalana lau dibaia neganai, unai ese lau ia durua abidadama ai lau gini goada totona.”   

11-12. Edena dala ai Iehova ese iseda tadikaka taihu ia gaukaralaia iseda guriguri ia haerelaia totona? (Laulau itaia danu.)

¹¹ Iehova ese iseda tadikaka taihu ia gaukaralaia. Iesu ena hanuaboi ginigabena ai ia guriguri goadagoada. Iehova ia noia, badina taunimanima ese ia be ladana hadikaia tauna bamona idia laloa bona hamasea ena hemarai ia kokia totona. To, Iehova be unai ia karaia lasi, ia ese Iesu ena tadikaka, unai be aneru ta ia siaia Iesu ia hagoadaia totona. (Luka 22:42, 43) Iehova ese iseda tadikaka o taihu ta ia gaukaralaia diba, ita ia rini henia eiava vadivadi totona. Ita ibounai ese eda tadikaka taihu ita hagoadaia totona “hereva namona” ita gwauraia diba.​—Aon. 12:25.   

¹² Mani taihu ta ladana Miriam ena ekspiriens ita laloa. Miriam ena adavana ia mase bona wiki haida murinai, sibona ia noho dainai, ia daradoko bona lalohisihisi. Ena taitai ia hadokoa diba lasi bona ia ura ta ia hereva henia. Ia gwau: “Lau hegeregere lasi ta lau rini henia totona, unai dainai Iehova lau guriguri henia. Lau taitai bona guriguri noho lalonai egu fon ia rini. Unai be egu tura namona ta, ia be elda tauna.” Unai elda bona ena adavana ese Miriam idia hagoadaia. Ia abia dae Iehova ese unai tadikaka ia gaukaralaia ia rini henia totona.

13. Iehova ese Witnes lasi taudia ia gaukaralaia iseda guriguri ia haerelaia dalana ena haheitalai ta mani oi gwauraia.

¹³ Iehova ese Witnes lasi taudia ia gaukaralaia. (Aon. 21:1) Nega haida, Iehova ese iena taunimanima edia guriguri ia haerelaia totona, Witnes lasi taudia ia gaukaralaia. Hegeregere, ia ese King Aratasaseta ia gaukaralaia, unai amo Nehemia dekenai gwaumaoro ia henia Ierusalema dekenai do ia giroa lou, bona siti haginia lou gaukarana ia gunalaia totona. (Neh. 2:3-6) Hari danu, hekwakwanai ita davaria neganai, Iehova ese Witnes lasi taudia ia gaukaralaia ita idia durua totona.   

14. Edena dala ai Soo Hing ena sivarai ese oi ia durua? (Laulau itaia danu.)

¹⁴ Taihu ta ladana Soo Hing ia mamia Iehova ese doketa ta ia gaukaralaia idia ia durua totona. Ena natuna mero be mai ena kwara gorerena. Nega ta ataiai momokani amo ia moru bona bero dikana ia davaria dainai, ia idia naria totona taihu bona ena adavana be edia moni gaukara idia rakatania. Unai dainai, moni ena hekwakwanai idia davaria. Soo Hing ia gwau ia mamia ia haheauka diba lasi. Mai kudouna ibounai ida Iehova ia guriguri henia. Edia doketa ese dala ia tahua bona idia ia durua. Unai amo gavamani edia heduru idia abia bona noho gabuna namona ta idia davaria. Unai murinai, Soo Hing ia gwau: “Iehova ena heduru lau itaia. Momokani, ia be ‘Guriguri kamonai Diravana.’”​—Sal. 65:2.

IEHOVA ENA HAERE OI TAHUA BONA ABIA DAE

15. Dahaka ese taihu ta ia durua unai amo ia laloparara Iehova ese ena guriguri ia haerelaia?

¹⁵ Iehova ese iseda guriguri be hoa dalanai ia haerelaia lasi. To iseda guriguri edia haere ese ita idia durua iseda guba Tamana ita badinaia totona. Unai dainai, Iehova ese emu guriguri ia haerelaia dalana oi tahua be namo. Taihu ta ladana Yoko ia mamia Iehova be ena guriguri ia haerelaia lasi, to gabeai ia gurigurilaia gaudia be noutbuk lalonai ia torea. Nega sisina murinai, noutbuk ai ia torea gaudia ia itaia lou bona ena be gau haida ia laloaboio, to ia laloparara ia gurigurilaia gaudia momo be Iehova ese ia haerelaidia. Namona be dina ta ta ai, nega ita atoa Iehova ese iseda guriguri ia haerelaia dalana ita tahua totona.​—Sal. 66:19, 20.

16. Edena dala ai guriguri karana ita abidadama henia diba? (Heberu 11:6)

¹⁶ Iehova guriguri henia karana dekenai ita abidadama sibona lasi, to dala idauidau ai iseda guriguri ia haerelaia dalana ita abia dae danu. (Heberu 11:6, duahia) Mani Mike bona Chrissy edia ekspiriens ita laloa. Edia tahua gauna be idia ura Betele dekenai idia gaukara. Mike ia gwau: “Aplikeisen momo ai siaia bona emai tahua gauna totona Iehova dekenai ai guriguri loulou, to ai idia abia dae lasi.” Mike bona Chrissy idia abia dae Iehova ese iena hesiai gaukara lalonai idia ia gaukaralaia dalana ia diba. Mai ura ida pablisa momo lasi gabuna dekenai regula painia gaukara idia karaia bona tiokratik konstraksen projek idia durua. Hari idia be sekit gaukara idia karaia noho. Mike ia gwau: “Iehova ese ai laloa lasi dalana ai emai guriguri ia haerelaia, to unai ia haerelaia dalana ese ai laloa gauna ia hereaia.”

17-18. Salamo 86:6, 7 hegeregerena, dahaka ita abia dae momokani diba?

¹⁷ Salamo 86:6, 7, duahia. Salamo torea tauna Davida ia abia dae momokani Iehova be ena guriguri ia kamonai bona haerelaidia. Oi danu be unai oi abia dae diba. Inai atikol ai ita herevalaia ekspiriens ese ita idia hadibaia Iehova ese ita dekenai aonega bona goada ia henia diba ita haheauka totona. Ia ese iseda tadikaka taihu eiava Witnes lasi taudia ia gaukaralaia diba ita idia durua totona.

¹⁸ Ita diba Iehova be iseda guriguri do ia haerelaia, to ita laloa lasi dalana ai do ia haerelaia. Bona ia ese nega maorona ai iseda dabu gaudia do ia henia. Unai dainai mai abidadama ida oi guriguri noho, badina oi diba momokani Iehova be hari oi do ia naria, bona tanobada matamatana ai ia ese ‘mauri gaudia ibounai edia ura gaudia do ia henia.’​—Sal. 145:16.