“Idaunegai Idia Vara Kara Dika Ia Gwauatao”

Iesu ena rara amo ia henia mauri davana sibona ese iseda kara dika ia gwauatao diba. (Efe. 1:7) To, Baibel ia gwau: “Dirava be ena kara maoromaoro hahedinaraia totona . . . idaunegai idia vara kara dika ia gwauatao” unai be, Iesu ese mauri davana ia do henia lasi lalonai. (Roma 3:25) Edena dala ai Iehova ese idaunegai idia vara kara dika ia gwauatao bona ena kara maoromaoro taravatudia ia badinaia danu?

Iehova bona ena gwauhamata idia abidadama henia taudia dekenai ia gwauhamata “natuna” ta ese idia do ia hamauria. Unai gwauhamata ia karaia neganai, unai be hegeregere mauri davana ia henia vadaeni. (Gen. 3:15; 22:18) Dirava ia diba, ia abia hidi negana ai ena Natuna korikori be mai ura ida mauri davana do ia henia. (Gal. 4:4; Heb. 10:7-10) Iesu be tanobada ai ia noho neganai, Dirava ese siahu ia henia kara dika ia gwauatao totona, ena be unai negai mauri davana ia do henia lasi. Iesu ese abidadama taudia dekenai gabeai do ia henia boubou gauna ena namo ia hahedinaraia, unai be edia dika ia gwauatao.—Mat. 9:2-6.