Stadi amo Gau Matamatadia Dibaia

Stadi totona ita hegaegae neganai, sibona ita nanadaia, ‘Dahaka gaudia do lau dibaia?’ To ita naria namonamo, namo lasi ita ura dibaia gaudia sibona ita stadilaia, bona Iehova ese ita ia hadibaia gau matamatadia ita laloa lasi. Edena dala ai Iehova ese ia hadibaia gaudia ita kamonai henia diba?

Aonega totona guriguri. Iehova ita noia ita do ia durua, ia ura ita dibaia gauna ita lalopararalaia totona. (Iam. 1:5) Namo lasi ita dibaia vadaeni gaudia dekenai ita tabekau.—Aon. 3:5, 6.

Baibel ena hereva ese oi ia hakaua be namo. “Dirava ena hereva be ia mauri noho.” (Heb. 4:12) Baibel ita duahia negadia ta ta ai, Dirava ena “hereva” ese ita ia hakaua diba, bema ita ura bada ita duahia gauna amo diba ita abia.

Iehova ese ita ia hadibaia daladia ita laloa bada. Iena orea ese ia halasia gaudia be “aniani namo hereadia mai edia digara ena aria” bamona. (Isa. 25:6) Iehova ese ita ia hadibaia totona ia henia gaudia ibounai ita laloa bada. Unai amo namo do oi abia sibona lasi, to Dirava ese ia henia gaudia do oi moalelaia!