Iseda Tadikaka Bona Taihu Edia Turana Namona ai Ita Lao

1-2. Iehova ese dahaka ia laloa bada bona ia ura dahaka do ita karaia?

TAUNIMANIMA ita kara henia dalana be Iehova ese ia laloa bada. Iesu ese ita ia hadibaia iseda dekenai tauna do ita lalokau henia, ita sibona ita lalokau henia hegeregerena. (Mat. 22:37-39) Anina be Iehova idia hesiai henia lasi taudia dekenai kara namodia ita hahedinaraia danu. Unai bamona kara namodia ita hahedinaraia neganai, ita be Iehova Dirava ita tohotohoa, ia ese kara dika taudia bona kara namo taudia latanai “dina ena diari ia henia. Bona kara maoromaoro taudia bona kara maoromaoro lasi taudia latanai medu ia siaia diho.”—Mat. 5:45.

² Ena be Iehova be taunimanima ibounai ia lalokau henia, to ia idia badinaia taudia ia lalokau henia bada. (Ioa 14:21) Ia ura ena kara ita tohotohoa. Ita ia hagoadaia iseda tadikaka taihu ita “lalokau henia bada” bona idia dekenai “hebogahisi ita hahedinaraia.” (1 Pet. 4:8; Roma 12:10) Unai bamona lalokau be iseda varavara eiava turana namona dekenai ita hahedinaraia lalokauna hegeregerena.

3. Lalokau karana dekenai dahaka ita laloatao be namo?

³ Tubutubu gauna ia tubu totona ranu dekenai ita dairia hegeregerena, ma haida dekenai iseda lalokau ita habadaia totona, gau haida ita karaia be namo. Aposetolo Paulo be Keristani taudia ia sisiba henia: “Namona be tadikaka bamona do umui lalokau heheni noho.” (Heb. 13:1) Iehova ia ura ma haida dekenai ita hahedinaraia lalokauna ita habadaia noho. Inai atikol ai iseda tadikaka bona taihu ita tura henia ena badina bona unai ita karaia noho dalana do ita herevalaia.

TADIKAKA BONA TAIHU ITA TURA HENIA ENA BADINA

4. Salamo 133:1 hegeregerena, edena dala ai tadikaka bona taihu huanai ia noho lalotamona karana ita laloa bada? (Laulau itaia danu.)

⁴ Salamo 133:1 duahia. Salamo torea tauna ena hereva dekenai ita lalotamona, Iehova idia lalokau henia taudia ita tura henia be “namo herea” bona “moale bada gauna.” To nega haida ita be tadikaka bona taihu huanai ia noho lalotamona karana do ita laloa bada lasi, unai be hegeregere tau ta be dina ta ta ai ia itaia ororo badana ena hairai ia laloa lasi. Reana wiki ta lalonai, iseda tadikaka bona taihu be nega momo ita itadia. Edena dala ai ita hahedinaraia diba nega ibounai idia ita laloa bada? Iseda tadikaka bona taihu do ita lalokau henia bada bema nega ita atoa idia ta ta ese kongrigeisen bona ita idia durua dalana ita laloa.

5. Haida be tadikaka taihu huanai ia noho lalokauna idia itaia neganai, dahaka idia karaia?

⁵ Nega ginigunana iseda hebou dekenai idia mai taudia haida be ita huanai ia noho lalokauna idia itaia neganai, idia hoa. Unai kara sibona idia itaia neganai, idia abia dae hereva momokani idia davaria vadaeni. Iesu ia gwau: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.” (Ioa. 13:35) Mani Chaithra ena ekspiriens ita laloa, ia be iunivesiti stiuden ta bona Iehova ena Witnes taudia ida ia stadi. Ia be hebouhebou ena invateisen ta ia abia bona rijinol hebouhebou dekenai ia mai. Hebouhebou ena dina ginigunana dekenai ia lao murinai, iena stadi ia karaia taihu ia hamaoroa: “Lau be egu tama sina ese idia rosia diba lasi. To emui hebouhebou ai, dina tamona lalonai taunimanima 52 ese lau idia rosia! Lau mamia Iehova be ena taunimanima ia gaukaralaia, lau dekenai ena lalokau ia hahedinaraia totona. Lau ura idia be egu ruma bese taudia ai do idia lao. Chaithra ia goada ia lao bona lagani 2024 ai ia bapatiso. Oibe, kamonai matamata taudia be iseda kara namodia bona ita huanai ia noho lalokauna idia itaia neganai, nega momo unai ese idia ia hagoadaia Iehova idia hesiai henia totona.—Mat. 5:16.

6. Edena dala ai iseda tadikaka bona taihu ita tura henia karana ese ita ia gimaia?

⁶ Iseda tadikaka bona taihu ita tura henia neganai, unai ese ita ia gimaia. Paulo be Keristani taudia ia hamaoroa: “Dina ibounai umui ta ta umui hagoadaia noho, unai amo kara dika ena koikoi siahuna ese umui ta ena kudouna do ia ha-aukaia lasi.” (Heb. 3:13) Bema ita lalohisihisi bada bona kara maoromaoro dalana ita badinaia be auka, Iehova ese tadikaka ta eiava taihu ta ia gaukaralaia diba ita ia durua totona. (Sal. 73:2, 17, 23) Unai bamona heduru be iseda namo totona.

7. Edena dala ai lalokau dainai lalotamona ia vara? (Kolose 3:13, 14)

⁷ Ita be ta ta dekenai lalokau idia hahedinaraia taudia huanai ita noho, unai dainai hahenamo momo ita moalelaia. (1 Ioa. 4:11) Hegeregere, lalokau dainai ita ese ‘ta ta eda kara ita haheaukalaia.’ Bona unai ese tadikaka bona taihu huanai lalotamona ia havaraia. (Kolose 3:13, 14; duahia; Efe. 4:2-6). Unai dainai, iseda tomadiho karadia lalonai ita moale, tanobada ai orea ta be unai bamona lasi.

TA TA DEKENAI HEMATAURAI HAHEDINARAIA

8. Edena dala ai Iehova ese ita ia durua mai lalotamona ida ita noho totona?

⁸ Tanobada hegegemadai iseda tadikaka bona taihu huanai ia noho lalotamona karana be hoa gauna. Ena be ita be goevadae lasi taudia to Iehova ena heduru dainai unai ia vara. (1 Kor. 12:25) Baibel ia gwau: ‘Dirava ese ita ia hadibaia ita lalokau heheni totona.’ (1 Tes. 4:9) Unai ena anina be, Iehova ese Baibel amo ita ia hadibaia, dahaka do ita karaia ta ta ita tura henia totona. ‘Dirava ese ita ia hadibaia’ diba bema ena hahediba herevadia ita stadilaia namonamo bona ita badinaia. (Heb. 4:12; Iam. 1:25) Bona Iehova ena Witnes taudia be idia gaukara goada unai bamona idia karaia totona.

9. Ta ta dekenai hemataurai hahedinaraia totona, Roma 12:9-13 amo dahaka ita dibaia?

⁹ Edena dala ai Dirava ena hereva ese ita ia hadibaia ta ta ita tura henia totona? Paulo ese unai ia herevalaia dalana mani ita laloa, unai be Roma 12:9-13 ai ia noho. (Duahia.) Unai siri ia gwau: “Umui ta ta dekenai hemataurai hahedinaraia karana do umui gunalaia.” Unai ena anina be dahaka? Namona be dala idauidau ai “ta ta dekenai lalokau” ita hahedinaraia. Hegeregere, ta ena dika ita gwauatao, heabidae karana ita hahedinaraia, bona iseda kohu amo haida ita durua. (Efe. 4:32) Oi naria lasi emu tadikaka ta eiava taihu ta ese unai kara namodia ia hahedinaraia totona. To namona be oi ese unai kara namodia oi hahedinaraia guna. Iesu ia gwau: “Henia kara ena moale be bada, to abia kara ena moale be maragi.”—Kara 20:35.

10. “Ta ta dekenai hemataurai hahedinaraia” totona, dahaka ita karaia be namo? (Laulau itaia danu.)

¹⁰ Paulo ese inai hereva “umui ta ta dekenai hemataurai hahedinaraia karana do umui gunalaia,” ia gwauraia murinai, ia gwau, “umui gaukara goada, umui lahedo lasi.” Ia gaukara goada tauna be mai ura ida iena gaukara ia karaia. Ia dekenai gaukara ta idia henia neganai, ia karaia namonamo. Aonega Herevadia 3:27, 28 be ita ia hagoadaia: “Bema oi be hegeregere, idia dabu taudia dekenai heduru oi henia, vadaeni idia dekenai kara namo oi hahedinaraia noho.” Unai dainai bema ita itaia ta be gau ta dekenai ia dabu, namona be gau ta ita karaia haraga ia ita durua totona. Ita daradara lasi, eiava ita laloa lasi ta ese unai tauna do ia durua.—1 Ioa. 3:17, 18.

11. Edena kara ese ita ia durua diba ma haida ita tura henia totona?

¹¹ Ta ta dekenai hemataurai ita hahedinaraia dalana ta be bema ta ese iseda lalona ia hahisia, namona be ena kerere ita gwauatao haraga. Efeso 4:26 ia gwau: “Bona dina ia do diho lasi neganai, emui badu ia ore be namo.” Dahaka dainai? Badina siri 27 ese ia hahedinaraia bema unai bamona ita karaia, Diabolo ena dala do ita kehoa lasi. Iehova be Baibel amo ita ia hadibaia loulou ma ta ena dika ita gwauatao totona. Kolose 3:13 ese ita ia hagoadaia, ‘mai kudouna ibounai ida do ita gwauatao heheni’ totona. Haida edia dika ita gwauatao karana be dala namona idia ita tura henia namonamo totona. Unai bamona ita karaia neganai, ‘lauma helaga ese ia henia lalotamona karana ita badinaia, bona maino ese ita do ia hatamonaia.’ (Efe. 4:3) Ta ena dika gwauatao karana ese lalotamona bona maino ia havaraia.

12. Edena dala ai Iehova ese ita ia durua ta ena dika ita gwauatao totona?

¹² Momokani, iseda lalona idia hahisia eiava ita idia gwauraia dika taudia edia dika ita gwauatao be ia auka. To Dirava ena lauma helaga ese ita ia durua diba, ta ena dika ita gwauatao totona. Baibel ia gwau ta ta “do umui hebogahisi henia bona lalokau henia” bona do umui “gaukara goada.” Unai murinai ia gwau: “Dirava ena lauma amo umui hururuhururu.” Ia “hururuhururu” tauna be lauma helaga ena heduru dainai mai ura bada ida ia gaukara. (Roma 12:11) Unai dainai Dirava ena lauma helaga ese ita ia durua diba hebogahisi bona lalokau karana ita hahedinaraia bona ma ta ena dika ita gwauatao. Unai dainai mai momokani ida Iehova ita noia ita do ia durua totona.—Luka 11:13.

“NAMO LASI UMUI PARARA”

13. Dahaka ese ita ia hapararaia diba?

¹³ Kongrigeisen ai “taunimanima idauidau” idia noho bona edia mauri daladia be idauidau. (1 Tim. 2:3, 4) Unai dainai iseda dabua, toana, helt daladia eiava moale karadia dekenai abia hidi ita karaia neganai, iseda abia hidi be ma haida amo do ia idau. Bema ita naria namonamo lasi, unai ese ita do ia hapararaia. (Roma 14:4; 1 Kor. 1:10) ‘Dirava ese ita ia hadibaia ita lalokau heheni totona,’ unai dainai namo lasi ita laloa ita abia hidi gaudia be ma haida edia ia hereaia.—Fili. 2:3.

14. Namona be hanaihanai dahaka do ita karaia, bona dahaka dainai?

¹⁴ Nega ibounai ma haida ita hagoadaia neganai, kongrigeisen lalonai ma haida amo do ita parara lasi. (1 Tes. 5:11) Idia manoka taudia eiava kongrigeisen amo idia kokia taudia momo be hari kongrigeisen dekenai idia giroa mai. Namona be mai moale ida idia ita welkam henia! (2 Kor. 2:8) Lagani 10 lalonai ia manoka taihu ta be Kingdom Hall dekenai ia giroa lou neganai, ia vara gauna mani ita laloa. Ia gwau: “Momo be mai moale ida lau idia hedavari henia bona egu imana idia udeudea.” (Kara 3:19) Taihu be unai kara namodia ia itaia dainai, ia gwau: “Lau mamia Iehova be ena imana amo lau ia hakaua mai bona lau moale.” Bema ta ta ita hagoadaia noho, Iesu ese ita ia gaukaralaia diba, ‘idia hesiku bona metau bada idia huaia taudia’ ita hagoadaia totona.—Mat. 11:28, 29.

15. Edena dala ma ta ai tadikaka taihu huanai lalotamona ita havaraia diba? (Laulau itaia danu.)

¹⁵ Dala ma ta be iseda hereva dalana amo tadikaka taihu huanai lalotamona ita havaraia diba. Iobu 12:11 ia gwau: “Malana ese aniani ia mamia hegeregerena, taiana ese hereva ena mamina ia tohoa.” Aniani ia nadua tauna ese ma haida dekenai aniani ia do henia lasi neganai, aniani ena mamina do ia tohoa guna, bena gabeai taunimanima dekenai do ia henia. Unai hegeregerena, hereva ta ita do gwauraia lasi neganai, ita ura gwauraia gaudia ita laloa namonamo guna. (Sal. 141:3) Ita ura nega ibounai ita gwauraia herevadia ese ‘kamonai taudia do ia hagoadaia.’—Efe. 4:29

16. Daidia be edia hereva amo ma haida idia hagoadaia be namo?

¹⁶ Namona be headava tatau bona tama sina be edia hereva amo ma haida idia hagoadaia. (Kol. 3:19, 21; Tito 2:4) Danu elda taudia be Iehova ena mamoe idia naria dainai, namona be edia hereva amo ma haida idia hagoadaia. (Isa. 32:1, 2; Gal. 6:1) Baibel ia gwau: “Nega maorona ai ia gwauraia herevana ese namo bada ia havaraia!”—Aon. 15:23.

LALOKAU BE “MAI MOMOKANI IDA ISEDA KARA AMO ITA HAHEDINARAIA”

17. Edena dala ai ita hahedinaraia diba mai momokani ida iseda tadikaka bona taihu ita lalokau henia?

¹⁷ Aposetolo Ioane ia gwau: “Namo lasi iseda lalokau be iseda hereva eiava uduna sibona amo, to mai momokani ida iseda kara amo ita hahedinaraia.” (1 Ioa. 3:18) Ita ura mai kudouna ibounai ida iseda tadikaka bona taihu ita lalokau henia. Edena bamona unai ita karaia diba? Bema hanaihanai iseda tadikaka bona taihu ita bamoa, idia ida iseda hetura karana do ia goada ia lao bona idia do ita lalokau henia bada. Unai dainai iseda hebou bona haroro gaukara ai iseda tadikaka ita bamoa be namo. Nega oi atoa ma haida oi vadivadi henia totona. Unai ita karaia neganai, ita hahedinaraia ‘Dirava ese ita ia hadibaia ma haida ita lalokau henia totona.’ (1 Tes. 4:9) Unai bamona kara namodia ita itaia neganai, do ita gwau diba “tadikaka be lalotamona ai idia noho hebou, unai be namo herea bona moale bada gauna!”—Sal. 133:1.