“Inai Tuari be Iehova Ena”

Lagani 1999 ai, France ena gavamani ia gwau, France ena brens ese lagani 1993 ia lao 1996 lalonai idia abia kontribiusen totona takisi davana idia henia be namo. Kota dekenai ai lao, to ai kwalimu lasi. Unai murinai France ena gavamani ese iseda brens ena bank akaun amo moni ena bada 6,300,000 (U.S.) dola idia abia. To ai laloa ECHR ena kota dekenai ai lao be namo. To ECHR be edia abia hidi idia do karaia lasi neganai, idia ura France gavamani ena loea bona European Court ena registrar ida gau haida ai herevalaia guna. Unai amo do idia itaia bema ai lalotamona.

Ai laloa unai registrar hahine ese ai do ia noia France gavamani dekenai moni ena kahana haida ai henia totona. To, ai laloparara bema moni ena kahana ta ai henia, Baibel ena hakaua herevana do ai utua. Tadikaka taihu ese idia henia kontribusen be Dirava ena Basileia gaukara durua totona, unai dainai unai moni be gavamani ena lasi. (Mat. 22:21) To Europe kota ena hakaua daladia ai matauraia dainai, unai hebou dekenai ai lao.

Kota ena daiutu ta dekenai ai hebou. Registrar hahine ena hereva ia hamatamaia neganai, ia gwau, ‘Iehova ena Witnes taudia ese France gavamani dekenai takisi moni haida idia henia be maoro.’ Bena karaharaga ia ai nanadaia: “Gavamani ese emai bank amo 4 milioni euros idia abia vadaeni, unai oi diba, a?”

Unai ai gwauraia neganai, ai itaia ia hoa bada. Gavamani ena loea taudia ese unai idia hamomokania, unai dainai Registrar hahine be ena lalohadai ia haidaua. Ia ese hebou lalonai idia noho taudia ia gwau henia bona hebou ia koua. Ai abia dae Iehova ese emai hereva ia kamonai, bona ai laloa lasi dalanai ai ia durua ai kwalimu totona. Ia vara gauna dainai ai hoa bona ai moale bada.

June 30, 2011 ai, ECHR be ai totona abia hidi maorona idia karaia. Bona idia gwau, gavamani ese ita amo takisi moni idia abia be kerere. Unai dainai ita amo idia abia vadaeni moni be atoa kau monina ida do idia henia lou! Unai mai anina bada abia hidi ese France dekenai tomadiho goevana ia gimaia noho. Registrar hahine dekenai ai henia henanadai be hegeregere, Goliata ia hamasea nadina bamona, badina unai ese gau ibounai ia haidaua bona ai kwalimu. Dahaka dainai ai kwalimu? Badina Davida ese Goliata ia hamaoroa bamona, ita gwau diba, “inai tuari be Iehova ena.”—1 Sam. 17:45-47.

Unai be kota dekenai ai kwalimu ena nega ginigunana lasi. Ena be gavamani bona tomadiho oreadia idauidau ese ita idia inai henia, to tano 70 ena kota badadia bona tanobada ena kota ai, kota ibounai 1,225 lalonai ai kwalimu. Unai dainai ita be mai iseda maoro eda tomadiho karadia ita karaia totona, pablik gabudia ai ita haroro, bona politikol karadia lalonai do ita vareai lasi, bona rara abia karana ita dadaraia.

Ena be lau be Iehova ena Witnes taudia edia Hedikwota, New York, U.S.A dekenai lau gaukara, to edena dala ai lau be Europe ena kota lalonai lau noho?

EGU TAMA SINA EDIA KARA ESE LAU IA DURUA

Egu tama sina, George bona Lucille, be Gilead klas namba 12 dekenai idia gradueit. Idia be Ethiopia ai misinari gaukara idia karaia, bona lagani 1956 ai unuseniai lau vara. Idaunegai evanelia tauna Philip ena ladana be lau dekenai idia henia. (Kara 21:8) Lagani 1956 murinai, gavamani ese iseda tomadiho karana idia taravatua. Ena be unai neganai lau be natu maragina, to emai ruma bese ese hehuni ai idia karaia tomadiho negadia lau laloatao. Lau be natu maragina sibona, to unai negadia lau moalelaia! To, lagani 1960 ai gavamani taudia ese ai idia hamaoroa Ethiopia do ai rakatania.

Emai famili ida Wichita, Kansas, U.S.A, dekenai ai giroa lou neganai, egu tama sina be edia haroro gaukara idia laloaboio lasi. Unai dainai lau, egu kakana Judy bona tadina Leslie, idia danu be Ethiopia ai idia vara. Emai tama sina ese ai idia hadibaia Iehova do ai lalokau henia bona hesiai henia mai lalona ibounai ida. Egu mauri lagani be 13 neganai, bapatiso lau abia. Lagani toi murinai, egu famili ida pablisa momo lasi gabuna Arequipa dekenai ai lao, unai be Peru ai.

Lagani 1974 ai egu mauri lagani be 18 neganai, Peru brens ese lau bona tadikaka foa idia abia hidi spesel painia gaukara ai karaia totona. Ai be Central Andes ena ororo gabudia ai do ai haroro, unai gabudia ai ta ia do haroro lasi. Danu Quechua gado bona Aymara gado taudia edia hanua ai do ai haroro. Motuka ta amo emai noho gabuna dekenai ai lao. Unai negadia lau laloatao, ai lao gabudia ai, Baibel amo taunimanima ai hadibaia, Iehova ese hitolo, gorere, bona mase do ia haorea. (Apok. 21:3, 4) Momo be Iehova idia tomadiho henia taudia ai idia lao.

HEDIKWOTA AI LAU GAUKARA MATAMAIA

Lagani 1977 ai, Iehova ena Witnes taudia edia Hakaua Oreana tadikaka Albert Schroeder be Peru ia vadivadi henia neganai, ia ese lau ia hagoadaia hedikwota dekenai lau aplai totona. Unai bamona lau karaia. Gabeai, lagani 1977, June 17 ai, Brooklyn Betele dekenai lau gaukara matamaia. Lagani foa lalonai, lau be Klinin bona Meintenens Dipatmen dekenai lau gaukara.

Lagani 1978, June ai, Louisiana, New Orleans ena intanesinol hebouhebou ai, Elizabeth Avallone ida lau hedavari. Egu tama sina hegeregerena, Elizabeth ena tama sina be mai kudouna ibounai ida Iehova idia hesiai henia. Elizabeth be lagani foa lalonai regula painia gaukara ia karaia vadaeni, bona ia ura ena mauri ibounai lalonai Iehova totona ful-taim hesiai gaukara do ia karaia. Bena ta ta ai dibaia heheni. Lagani 1979, October 20 ai, ai headava, bona ai ruaosi be Betele dekenai ai gaukara matamaia.

Emai kongrigeisen ginigunana be Brooklyn Spanish, unuseniai tadikaka taihu ese ai idia lalokau henia bada. Lagani toi lalonai, kongrigeisen toi ai bamoa. Kongrigeisen tadikaka taihu ese ai idia welkam henia bona ai idia hagoadaia Betele gaukara ai karaia noho totona. Edia heduru dainai idia ai tanikiu henia. Bona emai buruka tama sina idia durua turadia bona famili ai tanikiu henia.

EGU GAUKARA LEGAL DEPARTMENT AI

Lagani 1982, January ai, lau idia abia hidi Betele ena Legal Department dekenai lau gaukara totona. Lagani toi murinai, lau idia hamaoroa loea ena kosi lau karaia totona, unai amo loea ena laisen do lau abia. Egu kosi ai lau dibaia gauna ta be United States bona tano ma haida ai, Iehova ena Witnes taudia be kota ena keis haida ai idia kwalimu dainai, taunimanima be mai ura kwalimu ida gau haida idia karaia diba. Unai keis haida be emai kosi lalonai ai herevalaia momo.

Lagani 1986 ai, egu mauri lagani be 30 neganai, Legal Department ena ovasia ai lau lao. Lau be mero matamata sibona bona gaukara ena bada dainai lau laloa unai be hahenamo, to ia be mai ena hekwarahi.

Lagani 1988 ai, loea tauna ai lau lao, to unai kosi lau karaia lalonai egu hetura karana Iehova ida ia manoka ia lao. Sikuli badana ese sibona laloa bada karana ia havaraia diba bona taunimanima vairanai emu diba bada do oi heagilaia. Elizabeth ese lau ia durua lau goada lou totona. Ia ese lau ia durua egu hetura karana Iehova ida lau hagoadaia totona. Gabeai egu hetura karana Iehova ida ia goada lou. Lau gwau diba iseda mauri ai sikuli badana amo ita abia diba bada be anina lasi. To mai anina bada gauna be iseda hetura karana Iehova ida ita hagoadaia, danu Ia bona ena taunimanima ita lalokau henia.

KOTA VAIRANAI SIVARAI NAMONA HAMOMOKANIA BONA ENA MAORO GWAURAIA

Loea edia sikuli lau haorea murinai, Betele ena Legal Department lau durua, unai amo Iehova ena orea bona sivarai namona harorolaia ena maoro ai gimaia diba. Egu gaukara lau moalelaia, to mai ena hekwarahi badina iseda orea ai gau momo be karaharaga idia idau ia lao. Hegeregere, guna iseda pablikeisen amo kontribiusen ita abia, to lagani 1991 ai, senisi idia karaia dainai Legal Department idia noia heduru do idia henia unai dala matamata badinaia totona. Hari Iehova ena Witnes taudia be pablikeisen idia hariharilaia davana lasi. Unai ese Betele ena gaukara bona haroro gaukara ai takisi henia karana dekenai hekwakwanai ia havaraia lasi. Haida idia laloa unai senisi dainai moni dalanai bona iseda haroro gaukara ai koua gaudia do idia vara. To unai ia vara lasi. Lagani 1990 amo Iehova idia hesiai henia taudia edia namba ia bada daekau bona hari taunimanima be Baibel bona pablikeisen idauidau amo diba idia abia diba davana lasi. Unai ibounai lau itaia neganai, lau diba Iehova ena heduru bona hakaua orea dekenai ia henia hakaua daladia dainai, orea ese idia karaia senisi ibounai ai hagugurua diba.—Eso. 15:2; Mat. 24:45.

Kota ai ita kwalimu ena badina be loea namodia dainai lasi. Nega momo unai be Iehova ena taunimanima ese idia hahedinaraia kara namodia dainai diadi taudia bona gavamani taudia idia ura ita idia durua. Unai bamona haheitalai ta be lagani 1998 ai lau itaia, unai nega ai Hakaua Oreana ena memba tadikaka toi bona edia adavadia be Cuba dekenai spesel hebouhebou totona idia mai. Idia ese kara namodia bona hemataurai idia hahedinaraia dainai, gavamani taudia idia abia dae ita be edia politikol karadia lalonai ita vareai lasi.

To, bema gau haida dainai ita haroro be auka, dala tamona be ‘kota ai sivarai namona ita hamomokania bona ena maoro ita gwauraia hedinarai.’ (Fili. 1:7) Hegeregere, lagani momo gunanai Europe bona South Korea ena gavamani taudia ese tuari lalonai ita vareai lasi ena maoro idia lalopararalaia lasi. Unai dainai Europe ai tadikaka 18,000 bamona bona South Korea ai tadikaka 19,000 mai kahana be dibura ruma ai idia atoa, badina tuari karadia lalonai idia vareai lasi.

To July 7, 2011 ai, ECHR ese Bayatyan v. Armenia totona abia hidi idia karaia neganai, oda ta idia henia Europe lalonai bema ta be ena tomadiho dainai ami eiava tuari gaukara do ia karaia lasi, namona be gaukara haida idia henia idia karaia totona. South Korea ena kota badana ta ese June 28, 2018 ai, unai bamona oda herevana ta idia halasia. Unai bamona abia hidi idia karaia badina iseda tadikaka matamatadia be idia gini goada.

Tanobada ena kahana ibounai ai, brens ta ta edia legal department be ia gaukara goada noho Basileia ena gaukara durua totona. Gavamani dainai dagedage idia davaria tadikaka taihu ai durua dainai, ia be hahenamo ta. Herevana kota ai ita kwalimu eiava lasi, to ita be gavamani, king taudia bona taunimanima ibounai vairanai sivarai namona ita gwauraia hedinarai. (Mat. 10:18) Diadi taudia, gavamani totona idia gaukara taudia, nius oreadia, bona pablik ibounai ese kota ai emai maoro hamomokania totona ai gaukaralaia siridia idia itaia. Unai amo kudou-maoro taudia be Iehova ena Witnes taudia bona idia abia dae gaudia ena badina idia dibaia. Unai dala amo haida be Witnes taudia ai idia lao.

TANIKIU, IEHOVA!

Lagani 40 lalonai, tanobada ena kahana idauidau ai idia noho brens ofesi ta ta lau durua be hahenamo ta. Danu lau be kota badadia bona dagi bada taudia vairanai lau gini. Hedikwota ena Legal Department bona tano ta ta ai idia noho legal department ai idia gaukara taudia dainai lau moale bada. Egu mauri ai hahenamo momo lau moalelaia.

Lagani 45 lalonai egu lalokau adavana Elizabeth be nega namodia ai bona nega dikadia lalonai lau ia durua. Ena be ia be mai ena gorere bona unai ese ena goada ia haorea, to ena kara namodia lau moalelaia.

Emai mauri lalonai ai itaia, iseda goada dainai ita kwalimu lasi. Davida ia gwau, “Iehova be ena taunimanima edia goada.” (Sal. 28:8) Oibe, “inai tuari be Iehova ena.”