Iehova Ena Dika Gwauatao Karana Abia Dae

1-2. Kara dika taudia be dahaka hemami idia abia diba? (ena laulau itaia danu.)

KING Davida ia diba guna ita karaia kara dika ese edena dala ai iseda hemami ia hadikaia diba. (Sal. 40:12; 51:3; supaskripsen) Ia be ena mauri lalonai kara dika badadia haida ia karaia. To, mai momokani ida ia helalo-kerehai, bona Iehova ese ena dika ia gwauatao. (2 Sam. 12:13) Unai dainai, Iehova ese iseda kara dika ia gwauatao neganai, Davida be ita abia hemami ia diba danu.—Sal. 32:1.

² Davida bamona, Iehova ena hebogahisi dainai iseda dika ia gwauatao neganai, do ita moale bada. Ita diba bema ita helalo-kerehai momokani bona iseda lalona ita hadaia do ita karaia lou lasi, Iehova be mai ura ida iseda dika maragidia bona badadia do ia gwauatao. Unai ese ita do ia hagoadaia bada! (Aon. 28:13; Kara 26:20; 1 Ioa. 1:9) Bona Iehova ese iseda dika ia gwauatao bona laloaboio, unai be hegeregere unai kerere ita karaia lasi. Unai ese ita ia hagoadaia!—Ese. 33:16.

3-4. Taihu be ia bapatiso murinai, dahaka ia laloa, bona inai atikol ai dahaka do ita herevalaia?

³ To, nega haida tadikaka bona taihu haida be Iehova ena dika gwauatao karana idia abia dae be auka. Mani Jennifer ena ekspiriens ita laloa, ia be orea lalonai ia tubu daekau. Ia matamata neganai, kara dika momo ia karaia bona ena tama sina be unai idia diba lasi. Lagani haida murinai, Iehova dekenai ia giroa bona ia bapatiso. Ia gwau: “Egu mauri gunana be kohu momo lau ura henia, matabodaga karadia lau karaia, lau inuinu kekero, bona lau badu momo. Lau diba, Iehova lau noia egu dika ia gwauatao bona lau helalo-kerehai murinai, Keriso ena boubou gauna dainai do lau goeva lou. To egu kudouna ai lau mamia egu dika be Iehova ese do ia gwauatao diba lasi.”

⁴ Nega haida oi laloa emu kara dika gunadia dainai Iehova ese emu dika ia gwauatao diba lasi, a? Iehova ia ura Davida bamona ita laloa bona Iehova ena hebogahisi ita abia dae. Inai atikol ai, Iehova ena dika gwauatao karana ita abia dae ena badina bona ita do ia durua gaudia do ita herevalaia.

DAHAKA DAINAI IEHOVA ENA GWAUATAO KARANA ITA ABIA DAE?

5. Satani ia ura dahaka do ita abia dae? Haheitalai ta gwauraia.

⁵ Iehova ena dika gwauatao karana ita abia dae neganai, Satani ena tarapu ta lalonai do ita moru lasi. Laloatao, Satani be gau ibounai do ia karaia ita ia koua Iehova ita hesiai henia lasi totona. Satani ia ura ita ia koia, unai amo do ita abia dae Dirava ese iseda dika ia gwauatao diba lasi. Korinto ai, matabodaga karana dainai kongrigeisen amo idia kokia tauna ena sivarai ita laloa. (1 Kor. 5:1, 5, 13) Gabeai unai tauna ia helalo-kerehai neganai, Satani ia ura kongrigeisen taudia ese ena dika idia gwauatao lasi—eiava ia idia kara auka henia. Danu, Satani ia ura unai helalo-kerehai tauna do ia mamia Iehova ese ena dika ia gwauatao lasi—unai amo do ia “lalohisihisi” dainai Iehova do ia hesiai henia lasi. Bona hari danu, Satani ia ura Iehova ena hesiai taudia dekenai unai bamona ia karaia. To “ita be iena koikoi karadia ita diba.”—2 Kor. 2:5-11.

6. Bema guna ita karaia kara dika dainai ita lalohisihisi noho, dahaka ese ita ia durua diba?

⁶ Iehova ena dika gwauatao karana ita abia dae neganai, unai ese ita ia hamoalea. Ita kara dika neganai, ita lalohisihisi. (Sal. 51:17) Unai be namo. Badina unai amo iseda lalomamina ese ita ia hadibaia dahaka ita karaia be namo bona dala maorona ai ita raka lou diba. (2 Kor. 7:10, 11) Bema iseda kerere amo ita helalo-kerehai vadaeni, to guna ita karaia kara dika dainai ita lalohisihisi noho, unai ese ita ia koua diba Iehova ita hesiai henia lasi totona. Iehova ena dika gwauatao karana ita abia dae neganai, do ita lalohisihisi lou lasi. Bena Iehova ena ura hegeregerena, mai lalomamina goevana bona moale ida ia ita hesiai henia diba. (Kol. 1:10, 11; 2 Tim. 1:3) To, edena dala ai Dirava ena dika gwauatao karana ita abia dae diba?

DAHAKA ESE ITA IA DURUA DIBA IEHOVA ENA DIKA GWAUATAO KARANA ITA ABIA DAE TOTONA?

7-8. Edena dala ai Iehova be Mose dekenai sibona ia gwauraia hedinarai, bona unai hereva amo dahaka ita diba momokani? (Esodo 34:6, 7)

⁷ Iehova ese sibona ia gwauraia hedinarai dalana oi laloa. Hegeregere, Sinai Ororona ai Iehova ese Mose dekenai ia gwauraia hereva ita laloa.a (Esodo 34:6, 7 duahia.) Ena be Iehova be mai ena kara namodia momo, to sibona ia gwauraia “hebogahisi Diravana.” Unai dainai bema Dirava ia tomadiho henia tauna be ena kara dika amo ia helalo-kerehai, Dirava ese ena dika do ia gwauatao lasi, a? Lasi! Badina Iehova be kara auka Diravana lasi, bona ia ura hebogahisi ia hahedinaraia.

⁸ Ita diba momokani, bema Iehova ia gwau ia be hebogahisi Diravana, unai be hereva momokani. (Sal. 31:5) Unai dainai ena hereva ita abia dae diba. Bema guna oi karaia kara dika oi laloaboio diba lasi, sibona oi nanadaia: ‘Lau abia dae momokani Iehova be hebogahisi Diravana bona ta be ia helalo-kerehai neganai, ena kara dika do ia gwauatao, a? Unai dainai lau abia dae diba ia ese egu kara dika ia gwauatao vadaeni, a?’

9. Kara dika ia gwauatao ena anina be dahaka? (Salamo 32:5)

⁹ Baibel ese Iehova ena dika ia gwauatao karana ia herevalaia dalana oi laloa dobu. Hegeregere, Baibel torea tauna Davida ese Iehova ena dika gwauatao karana ia herevalaia dalana ita laloa. (Salamo 32:5 duahia.) Davida ia gwau: “Oi ese egu kara dika oi gwauatao.” Inai hereva “gwauatao” ena Heberu herevana ena anina be “abia isi,” “kokia,” eiava “huaia.” Iehova ese Davida ena dika ia gwauatao neganai, unai be hegeregere, ia abia isi bona ia huaia lao. Unai dainai Davida ia huaia noho metau amo ia laga-ani diba. (Sal. 32:2-4) Ita danu be unai hemami ita abia diba. Iseda kara dika amo ita helalo-kerehai momokani neganai, iseda kara dika ena metau ita huaia noho lasi be namo, badina Iehova ese ita amo ia abia isi bona ia huaia lao vadaeni.

10-11. Inai hereva “noho hegaegae dika gwauatao totona” amo Iehova dekenai dahaka ita diba? (Salamo 86:5)

¹⁰ Salamo 86:5 duahia. Davida ia hahedinaraia Iehova be ia “noho hegaegae dika gwauatao totona.” Buka ta be Iehova totona unai hereva ia gwauraia neganai, ia gwau: “[Ia] be ‘dika gwauatao tauna’—unai be ena ‘kara badana ta.’” Dahaka dainai dika gwauatao karana be Iehova ena kara badana ta? Siri ena kahana ta ia gwau: “Emu ladana ai idia boiboi taudia dekenai emu lalokau be bada herea.” Atikol 33 ai ita herevalaia bamona, Iehova be lalokau dainai ia ura ena kamonai hesiai taudia ia tura henia namonamo. Iena noho hanaihanai lalokauna dainai, ia ura idia helalo-kerehai kara dika taudia ibounai edia kara dika ia gwauatao momokani. (Isa. 55:7.) Bema ia auka Dirava ena dika gwauatao karana oi abia dae, sibona oi nanadaia: ‘Lau abia dae momokani Iehova be dika gwauatao Diravana, a? Bona lau abia dae ia ese idia helalo-kerehai taudia ibounai edia dika ia gwauatao bona ia hebogahisi henia, a? Mai tai ida egu dika gwauatao totona lau noinoi neganai, ia ese lau do ia hebogahisi henia, a?’

¹¹ Ita diba Iehova ia laloparara ita be kara dika taudia, unai ese ita ia hagoadaia. (Sal. 139:1, 2) Davida ena ane ta lalonai unai ia hahedinaraia, unai ese ita do ia durua Iehova ena dika gwauatao karana ita abia dae totona.

IEHOVA IA LALOABOIO GAUNA OI LALOATAO NOHO LASI

12-13. Salamo 103:14 hegeregerena, Iehova be ita dekenai dahaka ia laloatao, bona unai dainai ia ura dahaka ia karaia?

¹² Salamo 103:14 duahia. Davida ese Iehova ia herevalaia neganai, ia gwau, “ia laloatao ita be kahu sibona.” Unai hereva amo Davida ese ia hahedinaraia Iehova ia noho hegaegae helalo-kerehai taudia edia dika ia gwauatao totona: Bona unai ena badina be Ia diba ita be kara dika tauna. Unai ita lalopararalaia totona, Davida ena hereva do ita herevalaia.

¹³ Davida ia gwau Iehova be iseda “vara dalana ia diba namonamo.” Ia ese Adamu be ‘tano ena kahu amo ia karaia’ bona ia diba namonamo taunimanima be aniani idia ania, idia mahuta, bona laga idia abia be namo. (Gen. 2:7) To Adamu bona Heva idia kara dika neganai, kahu ena anina ma ta ia hedinarai. Unai be ita be edia natudia dainai, goevadae lasi taudia ai ita lao, bona ita kara dika. Iehova be ita ia diba namonamo. To, Davida ia gwau Iehova ese ia “laloatao” ita be kahu neganai, ena anina ma ta be Iehova ia diba ita be goevadae lasi taudia dainai, nega ibounai mai hebogahisi ida ita do ia kara henia. Iehova ia diba kara dika ita karaia badina ita be goevadae lasi taudia, to iseda kara dika amo ita helalo-kerehai neganai, ia ura hebogahisi ia hahedinaraia bona iseda dika ia gwauatao.—Sal. 78:38, 39.

14. (a) Davida ese edena dala ai Iehova ena dika gwauatao karana ia herevalaia? (Salamo 103:12) (b) Edena dala ai Davida ena haheitalai ese Iehova ena dika gwauatao karana ena bada ia hahedinaraia? (Maua ladana “Iehova ese Dika Ia Gwauatao Bona Laloaboio” itaia.)

¹⁴ Iehova ena dika gwauatao karana dekenai dahaka gau ma ta ita dibaia? (Salamo 103:12 duahia.) Davida ia gwau Iehova ese dika ia gwauatao neganai, iseda kara dika be gabu daudau ai ia atoa, “dina daekau kahana [ist] be dina diho kahana [west] amo ia daudau hegeregerena.” Ist kahana be west kahana amo ia daudau momokani; idia ruaosi idia hedavari diba lasi. Unai amo Iehova ese iseda dika ia gwauatao karana dekenai dahaka ita dibaia? Buka ta ese inai bamona ia haheitalaia: “Bema kara dika be gabu daudau dekenai idia abia lao, ena bonana do ita abia lasi, maka ta do ita itaia lasi, eiava ena toana do ita laloatao diba lasi.” Mani oi laloa, gau ta ena bonana ita bonaia neganai, unai gauna do ita laloa lou. To Iehova ese dika ia gwauatao neganai, ena bonana bona maka be do idia boio momokani, bona unai dika dainai ita do ia panisia lasi.—Ese. 18:21, 22; Kara 3:19.

15. Bema guna ita karaia kara dika dainai ita lalohisihisi noho, dahaka ita karaia diba?

¹⁵ Salamo 103 ai, edena dala ai Davida ena hereva ese oi ia durua diba Iehova ena dika gwauatao karana oi abia dae totona? Bema guna ita karaia kara dika dainai ita lalohisihisi, sibona ita nanadaia diba: ‘Lau laloaboio Iehova ia diba lau be goevadae lasi bona ia helalo-kerehai tauna ena dika do ia gwauatao, a? Lau laloaboio Iehova ese egu dika ia gwauatao bona unai dika do ia gaukaralaia lasi lau ia panisia totona, a?’ Iehova ese iseda kara dika gunadia ia laloa noho lasi. Ita danu unai bamona ita karaia be namo. (Sal. 130:3) Iehova ena dika gwauatao karana ita abia dae neganai, sibona iseda dika do ita gwauatao bona mai moale ida iseda hesiai gaukara do ita karaia noho.

16. Guna ita karaia kara dika laloa momo karana ena dika mani oi haheitalaia. (Laulau itaia danu.)

¹⁶ Mani haheitalai ta ita laloa. Guna ita karaia kara dika laloa noho karana be hegeregere motuka ita taria, to murina kahana ita itaia noho. Nega ta ta ai murina kahana ita itaia diba, to murina kahana sibona ita itaia neganai, dika ita davaria diba. To motuka ita taria namonamo totona, vaira kahana ita itaia noho be namo. Unai hegeregerena, nega ta ta ai iseda kara dika gunadia ita laloatao karana ese ita ia durua diba, diba ita abia bona iseda lalona ita hadaia unai ita karaia lou lasi totona. To bema iseda kara dika gunadia ita laloa momo, ita lalohisihisi dainai unai ese ita ia koua diba Dirava ita hesiai henia lasi totona. Namona be dala ena vaira kahana ita itaia noho. Ita be Dirava ese ia gwauhamatalaia tanobada matamata ia lao henia dalana dekenai ita raka noho, unuseniai ‘gau gunadia do ita laloatao lou lasi.’—Isa. 65:17; Aon. 4:25.

MAI KUDOUNA IBOUNAI IDA ITA ABIA DAE NOHO

17. Dahaka dainai mai kudouna ibounai ida ita abia dae be namo Iehova ese ita ia lalokau henia bona iseda dika ia gwauatao?

¹⁷ Namona be Iehova ena lalokau bona dika gwauatao karana be mai kudouna ibounai ida ita abia dae. (1 Ioa. 3:19.) Dahaka dainai? Badina Satani do ia gaukara noho ita ia koia totona, unai amo do ita laloa Iehova ese ita ia lalokau henia lasi eiava iseda dika ia gwauatao lasi. Iena ura gauna be ita do ia koua Iehova ita hesiai henia lasi totona. Ita diba Satani be do ia hekwarahi bada badina ia diba ena nega be ia kwadogi. (Apok. 12:12) Satani ena dala do ita kehoa lasi!

18. Dahaka oi karaia diba, unai amo Iehova ena lalokau bona dika gwauatao karana oi abia dae totona?

¹⁸ Iehova ese ita ia lalokau henia ita abia dae totona, stadi atikol 33 ai ita stadilaia gaudia ita badinaia. Iehova ese sibona ia gwauraia hedinarai dalana oi laloa, unai amo Iehova ena dika gwauatao karana oi abia dae. Baibel ese Iehova ena dika gwauatao karana ia herevalaia dalana oi laloa dobu. Laloatao, Iehova ia diba oi be goevadae lasi bona mai hebogahisi ida oi do ia kara henia. Bona laloatao, emu dika ia gwauatao neganai, ia laloaboio momokani. Davida ese Iehova ena hebogahisi karana ia laloa dalana hegeregerena, oi gwau diba, “Tanikiu Jehovah, badina egu kara dika oi gwauatao!”—Sal. 32:5.