1925​—Lagani Handred Gunanai

IDIA LALOA GAUNA IA VARA LASI

Lagani 1925 ai, Bible Student taudia momo idia laloa, unai lagani ai tanobada be Paradaiso ai do ia lao. Dahaka dainai? Tadikaka Albert Schroeder, ia be gabeai Hakaua Oreana ena memba ta ai ia lao, ia gwau: “Idia laloa unai lagani ai Keriso ena horoa taudia be guba ai do idia lao bona Basileia ai do idia lohia. Bona idaunegai abidadama taudia, hegeregere Aberahamo, Davida bona ma haida be do idia toreisi lou bona tanobada ai gunalaia gaukara idia karaia.” To unai ia vara lasi neganai, tadikaka taihu haida idia lalohisihisi.—Aon. 13:12.

Ena be Bible Student taudia idia lalohisihisi, to momo be haroro gaukara idia karaia noho. Idia laloparara Iehova ena ladana idia harorolaia be mai anina bada. Hereva momokani be gabu daudau dekenai idia halasia totona idia karaia gaukara mani oi laloa.

REIDIO BRODKASTIN IA BADA

Lagani 1924 ai, taunimanima momo be WBBR reidio steiseni idia kamonai. Unai dainai lagani 1925 ai Bible Student taudia ese Chicago, Illinois kahirakahira ai reidio steiseni matamata idia haginia. Ena ladana be WORD. Unai gaukara ia durua tauna ta ladana Ralph Leffler ia gwau: “Keru hanuaboidia lalonai, gabu daudau amo unai reidio steiseni idia kamonai diba.” Hegeregere, idia brodkast matamaia neganai, Pilot Station, Alaska dekenai idia noho famili ese unai steiseni idia kamonai. Unai gabu ena daudau be kilomita 5,000 bamona. Idia kamonai murinai, revareva ta amo unai gaukara taudia idia tanikiu henia, badina program namodia idia hegaegaelaia.

December 1, 1925 ena Watch Tower ese unai reidio steiseni ia herevalaia, ia gwau: “WORD be United States ai reidio steiseni badana ta. United States ena Ist bona West kahana ai idia noho taudia, bona Cuba bona Alaska ena not kahana ai idia noho taudia ese idia kamonai diba. Hereva momokani idia do kamonai lasi taudia momo be idia ura unai reidio steiseni idia kamonai.”

Unai nega ai danu, Canada ai Bible Student taudia be reidio amo sivarai namona idia harorolaia. Lagani 1924 ai, reidio steiseni ladana CHUC be Saskatoon, Saskatchewan ai idia haginia. Canada ai unai be tomadiho ena reidio steiseni ginigunana. To lagani 1925 ai, unai reidio steiseni maragina be gabu ma ta dekenai idia abia lao be namo. Unai dainai orea ese Saskatoon ena piksa rumana gunana ta, ladana Regent Building idia hoia bona reidio steiseni ai idia halaoa.

Saskatchewan ai, taunimanima momo idia moale badina unai reidio steiseni dainai nega ginigunana sivarai namona idia kamonai. Hegeregere, taoni ta ladana McKague ai, hahine ta Mrs. Graham be unai steiseni ia kamonai murinai, revareva ta amo Baibel ena buka totona ia noia. Tadikaka George Naish ia gwau: “Unai hahine be unai noinoi ia karaia dainai, Studies in the Scriptures buka be ia dekenai ai siaia.” Gabeai, Mrs. Graham be gabu daudau ai Basileia ena sivarai namona ia harorolaia.

MAI ANINA BADA HEREVA MOMOKANI

March 1, 1925 ena Watch Tower ai, atikol ta (Birth of the Nation) idia halasia. Dahaka dainai inai atikol be mai anina bada? Unai nega ai, Bible Student taudia idia diba Satani ese lauma dikadia, tomadiho koikoi, gavamani bona bisinesi ia gunalaia. To unai atikol amo, “hesiai tauna mai ena kamonai bona mai ena aonega” ese tadikaka oreana dekenai idia hahedinaraia Iehova danu be mai ena orea bona unai orea be Satani ese ia inai henia. (Mat. 24:45) Danu, hesiai tauna oreana ia hahedinaraia, lagani 1914 ai, Dirava ena Basileia ia gini bona unai lagani ai guba ai ia vara tuari dainai Satani bona ena demoni be guba amo idia negea diho bona hari tanobada dekenai idia noho.—Apok. 12:7-9.

Tadikaka taihu haida be unai diba matamata idia abia dae totona be auka. Unai dainai unai atikol ia gwau: “Bema Watch Tower idia duahia taudia be inai atikol ena hereva idia abia dae lasi, vadaeni mai manau bona hemataurai ida Lohiabada do idia naria mai kudouna ibounai ida.”

Britain ai kolpota ta, (hari idia gwauraia painia) Tom Eyre be Bible Student taudia momo ese idia abia hemami ia herevalaia, ia gwau: “Tadikaka momo be atikol ese Apokalupo 12 ia herevalaia dalana dekenai idia moale. Ai laloparara Basileia be guba ai ia gini vadaeni, unai ese ai ia hagoadaia ma haida dekenai sivarai namona do ai harorolaia. Emai hesiai gaukara ai habadaia bona ai itaia Iehova ese ena taunimanima ia durua dainai, gau namodia momo idia karaia.”

IEHOVA IDIA HAROROLAIA

Lagani 1925 do lasi neganai, iseda pablikeisen be Isaia 43:10 bona 12 be idia herevalaia momo lasi. To lagani 1925 lalonai, Watch Tower ena magasin 11 dekenai unai siri idia herevalaia! Hari inai nega ai, Iehova ena Witnes taudia be nega momo Isaia 43:10 ena hereva idia herevalaia. Unai siri ia gwau: “Iehova ia gwau: ‘Umui be egu hereva hamomokania taudia, oibe, lau abia hidi hesiai taudia unai.’”

Lagani 1925 August ai, Bible Student taudia be Indianapolis, Indiana ai hebouhebou ta idia abia. Hebouhebou ena program ai idia torea welkam herevana be tadikaka, Joseph F. Rutherford ese ia gwauraia, ia gwau: “Ita be inai hebouhebou dekenai ita mai . . . unai amo Lohiabada ese ita ia hagoadaia bona ena ladana do ita harorolaia.” Unai hebouhebou ena dina 8 lalonai, kamonai taudia idia hagoadaia, nega idauidau ai Iehova ena ladana idia herevalaia totona.

August 29, Saturday ai, Tadikaka Rutherford be tok ladana “A Call to Action” ia henia. Unai tok lalonai, ia hahedinaraia haroro gaukara be mai anina bada. Ia gwau: “Iehova ia gwau, ‘Umui be egu hereva hamomokania taudia, bona lau be Dirava.’ Bena ia ese inai hereva amo idia ia hagania: ‘Taunimanima totona dala umui karaia.’ Inai tanobada ai ta ese unai gaukara do ia karaia lasi, to ena taunimanima, Dirava ena lauma helaga idia abia taudia sibona ese unai gaukara idia karaia diba, idia be ena ladana gwauraia taudia.”—Isa. 43:12; 62:10.

Tadikaka Rutherford ena tok murinai, gwaubou herevana, ena sinado be “Message of Hope” ia duahia. Idia hebou taudia ese unai hereva idia abia dae. Unai gwaubou herevana ia hahedinaraia, taunimanima edia helaro be Dirava ena Basileia ese “maino, noho namona, gorere lasi maurina, bona moale hanaihanai do ia havaraia.” Unai gwaubou herevana be gabeai gado ma haida dekenai idia hahanaia, bona pepapepa ibounai 40 milioni bamona idia hariharilaia.

Lagani haida lalonai Bible Student taudia ese inai ladana Iehova ena Witnes taudia idia do abia lasi. To, edia maduna idia lalopararalaia, unai be Dirava ena ladana do idia harorolaia noho.

KAMONAI TAUDIA IDIA LOU HENIA

Tanobada ibounai ai Bible Student taudia edia namba ia bada ia lao, unai dainai orea ese idia hagoadaia sivarai namona idia abia dae taudia idia lou henia totona. Pepapepa ladana Message of Hope ena kempein murinai, Bulletina ai hagoadaia herevana idia torea, ia gwau: “Umui giroa lou bona inai Message of Hope pepapepana umui rakatania taudia umui vadivadi henia lou.”

January 1925 ena Bulletin ta ai, Plano Texas ai ia noho Bible Student ta ena ripoti ai ia gwau: “Ai moale bada, badina ai itaia nega momo ai karaia teritori ai anina namona ai davaria, teritori matamatadia be unai bamona lasi. Emai taoni maragina ai, lagani 10 lalonai teritori be nega 5 bamona ai karaia. . . . Vanegai sibona, Taihu Hendrix bona egu sinana be unai teritori idia karaia lou bona buka momo herea idia hariharilaia.”

Bona Panama ai, kolpota ta ena ripoti ai ia gwau: “Edia ruma amo lau idia lulua taudia momo be nega iharuana eiava ihatoina ai lau vadivadi henia neganai, sivarai namona idia abia dae. Unai dainai inai lagani ai nega bada lau henia lau haroro henia taudia lau lou henia totona, bona ekspiriens namodia lau davaria.”

VAIRA LAGANIDIA AI

Tadikaka Rutherford be revareva amo kolpota taudia ia tore henia neganai, lagani ai idia karaia gaukara bona vaira laganidia ai do idia karaia gaudia ia herevalaia. Ia gwau: “Lagani gunanai, umui ese idia lalohisihisi taudia momo umui hagoadaia. Bona umui karaia gaukara ese umui dekenai moale ia havaraia . . . Hari lagani ai umui ese dala momo ai taunimanima dekenai Dirava bona ena Basileia do umui harorolaia, bona do umui hahedinaraia umui be Dirava tomadiho henia taudia momokanidia. . . . Namona be ita ibounai be nega tamona iseda Dirava bona iseda King totona hanamoa ane ita abia.”

Lagani 1925 ena dokonai, tadikaka be palani idia karaia Brooklyn ena bildin idia habadaia totona. Lagani 1926 ai, orea ese konstraksen gaukara badana ta idia hamatamaia.