Ma Haida Totona Oi Guriguri

1. Edena dala ai ita diba Iehova dekenai iseda guriguri be mai anina bada?

GURIGURI be hahenamo badana ta. Mani oi laloa: Iehova be ena aneru dekenai gaukara haida ia henia. (Sal. 91:11) Danu ena Natuna dekenai maduna badadia ia henia. (Mat. 28:18) To, guriguri kamonai karana dekenai be edena bamona? Iehova be “guriguri kamonai Diravana” dainai, ia sibona ese iseda guriguri ia kamonai.—Sal. 65:2.

2. Ma haida totona guriguri karana dekenai aposetolo Paulo be dahaka haheitalai namona ia hahedinaraia?

² Iehova dekenai sibona iseda ura gaudia ita herevalaia diba, to ma haida totona ita guriguri danu be namo. Aposetolo Paulo be unai ia karaia. Hegeregere, Efeso kongrigeisen ia tore henia neganai, ia gwau: “Hanaihanai umui totona lau guriguri.” (Efe. 1:16) Paulo be taunimanima ta ta totona ia guriguri danu. Hegeregere, Timoteo ia hamaoroa: “Dirava lau tanikiu henia, badina dina bona hanuaboi ia dekenai lau noinoi goadagoada negadia ai, oi lau laloaboio lasi.” (2 Tim. 1:3) Paulo be ena lalohekwarahi gaudia ia gurigurilaia diba. (2 Kor. 11:23; 12:7, 8) To, nega ia atoa ma haida totona ia guriguri totona.

3. Dahaka dainai nega haida ma haida totona ita guriguri lasi?

³ Nega haida ita laloaboio diba ma haida totona ita guriguri totona. Dahaka dainai? Keristani taihu ta ladana Sabrinaa ese badina ta ia gwauraia. Ia gwau: “Ita bisi bada. Iseda hekwakwanai sibona ita laloa dainai iseda ura gaudia sibona ita gurigurilaia.” Oi dekenai unai bamona ia vara danu, a? Bema oibe, inai atikol amo gau rua do ita dibaia. (1) Ma haida totona ita guriguri be mai anina bada ena badina, bona (2) edena bamona unai ita karaia diba.

DAHAKA DAINAI MA HAIDA TOTONA ITA GURIGURI?

4-5. Edena dala ai ma haida totona ita guriguri karana be “mai ena siahu”? (Iamesi 5:16)

⁴ Ma haida totona ita guriguri karana be “mai ena siahu.” (Iamesi 5:16 duahia.) Ma haida totona ita guriguri neganai, unai ese ma ta ia durua diba, a? Oibe. Mani Iesu oi laloa. Ena be ia diba gabeai aposetolo Petero be haida dekenai do ia gwau Iesu ia diba lasi, to Petero ia hamaoroa: “Oi dainai lau guriguri goadagoada emu abidadama ia manoka lasi totona.” (Luka 22:32) Danu Paulo ia diba guriguri karana ese namo ia havaraia diba. Roma ai ia idia hadiburaia kava neganai, Filemona ia tore henia, ia gwau: “Reana emui guriguri dainai lau do idia ruhaia bona umui do lau vadivadi henia.” (File. 22) Gabeai, Paulo idia ruhaia bona ena haroro gaukara ia matamaia lou.

⁵ Oibe, unai ese ia hahedinaraia lasi iseda guriguri amo Iehova ita doria gau ta ia karaia totona. Ia itaia ena hesiai taudia be idia gurigurilaia gaudia idia laloa bada, bona nega haida edia guriguri hegeregerena idia ia durua. Unai ita diba dainai ita ia hagoadaia iseda mauri ai idia vara gaudia be ia dekenai ita herevalaia totona, bona ita diba momokani dala maorona ai ita do ia durua.—Sal. 37:5; 2 Kor. 1:11.

6. Edena dala ai ma haida totona ita guriguri karana ese ia hahedinaraia idia ita laloa bada? (1 Petero 3:8)

⁶ Haida totona guriguri karana ese ita ia durua ‘ta ta ita hebogahisi henia’ totona. (1 Petero 3:8 duahia.) Ma haida dekenai hebogahisi ita hahedinaraia neganai, ita hahedinaraia edia hisihisi ita laloa bona ita ura idia ita durua. (Mar. 1:40, 41) Elda ta ladana Michael ia gwau: “Haida edia dabu gaudia totona lau guriguri neganai, idia davaria hekwakwanai lau lalopararalaia bona unai dainai idia lau lalokau henia bada. Unai amo idia lau diba namonamo, ena be unai idia diba lasi.” Elda ta ladana Richard ese gau namona ta ia herevalaia. Ia gwau: “Tau ta totona ita guriguri neganai, unai ese iseda lalona do ia veria ia ita durua totona.” Ma ia gwau: “Ita gurigurilaia tauna totona gau ta ita karaia neganai, unai be iseda guriguri ena haere.”

7. Edena dala ai ma haida totona ita guriguri neganai, unai ese ita ia durua iseda hekwakwanai dekenai lalohadai maorona ita abia totona? (Filipi 2:3, 4) (Laulau itaia danu.)

⁷ Ma haida totona ita guriguri karana ese ita ia durua iseda hekwakwanai dekenai lalohadai maorona ita abia totona. (Filipi 2:3, 4 duahia.) Ita be Satani ese ia biagua tanobada ai ita noho dainai, ita ta ta be hekwakwanai idauidau ita haheaukalaia noho. (1 Ioa. 5:19; Apok. 12:12) Bema haida totona ita guriguri neganai, ita diba “[iseda] tadikaka oreana tanobada hegegemadai danu be unai bamona hisihisi idauidau idia davaria noho.” (1 Pet. 5:9) Painia ta ladana Katherine ia gwau: “Ma haida totona lau guriguri dainai, lau laloparara haida danu be hekwakwanai idauidau idia davaria noho. Unai ese lau ia durua egu hekwakwanai dekenai lau laloa momo lasi totona.”

IDIA TOTONA ITA GURIGURI BE NAMO

8. Daidia totona ita guriguri diba?

⁸ Daidia totona ita guriguri diba? Gorere taudia, sikuli ai hahetoho idia davaria matamata taudia, eiava buruka taudia totona ita guriguri diba. Iseda tadikaka taihu momo be famili taudia eiava gavamani taudia ese idia dagedage henia. (Mat. 10:18, 36; Kara 12:5) Tadikaka haida be politikol ena hekwakwanai dainai edia noho gabuna idia rakatania. Haida be disasta idia davaria. Ena be unai tadikaka taihu ita diba lasi, to idia totona ita guriguri neganai, ita hahedinaraia ita be Iesu ena hahegani ita badinaia, ia gwau: “Umui lalokau heheni.”—Ioa. 13:34.

9. Dahaka dainai Iehova ena orea idia hakaua taudia bona edia adavadia totona ita guriguri be namo?

⁹ Iehova ena orea idia hakaua taudia totona ita guriguri diba. Idia be Hakaua Oreana ena memba taudia bona edia durua taudia, Brens Komiti, brens ena ovasia taudia, sekit naria taudia, kongrigeisen elda taudia, bona hesiai taudia. Unai tadikaka momo be mai edia lalohekwarahi gaudia idauidau, to ita totona edia hesiai gaukara idia karaia noho. (2 Kor. 12:15) Hegeregere, sekit naria tauna ladana Mark ia gwau: “Lau lalohekwarahilaia gauna ta be egu buruka tama sina be gabu daudau dekenai idia noho bona idia gorere momo. Ena be egu taihuna bona ena adavana ese idia naria, to idia lau durua diba lasi dainai lau lalohisihisi.” Ena be unai tadikaka momo idia lalohekwarahilaia gaudia be ita diba eiava lasi, to idia totona ita guriguri diba. (1 Tes. 5:12, 13) Danu, unai tadikaka edia adavadia totona ita guriguri, badina edia heduru dainai edia adavadia be edia hesiai gaukara idia karaia noho.

10-11. Ena be iseda guriguri ai tadikaka bona taihu edia ladana ita gwauraia lasi, to Iehova ese unai guriguri ia abia dae, a? Gwauraia hedinarai.

¹⁰ Ita herevalaia bamona, nega momo ita be tadikaka taihu ibounai totona ita guriguri. Hegeregere, tau tamona sibona totona ita guriguri lasi, to dibura ruma ai idia noho tadikaka taihu ibounai eiava edia lalokau tauna ta ia mase taudia ibounai totona Iehova ita noia diba idia ia durua totona. Elda ta ladana Donald ia gwau: “Tadikaka bona taihu momo be hekwakwanai idauidau idia haheaukalaia noho, unai dainai idia totona ita guriguri be namo.”

¹¹ Unai bamona guriguri be Iehova ese ia abia dae, a? Oibe! Ita be iseda tadikaka taihu ibounai edia dabu gaudia ita diba lasi. Unai dainai tadikaka taihu ibounai totona ita guriguri be namo. (Ioa. 17:20; Efe. 6:18) Unai bamona guriguri ese ia hahedinaraia ita be “tadikaka oreana ibounai [ita] lalokau henia.”—1 Pet. 2:17.

TA TOTONA ITA GURIGURI

12. Edena dala ai ta laloa karana ese iseda guriguri karana ia durua diba?

¹² Ta laloa karana. Tadikaka bona taihu ibounai totona ita guriguri sibona lasi, to guriguri lalonai ta ena ladana oi gwauraia diba. Hegeregere, kongrigeisen lalonai ta be gorere badana ta ia haheaukalaia noho, a? Matamata tauna ta be ia lalohisihisi, badina sikuli ai hahetoho ia davaria, a? Eiava sina o tama ta be “Iehova ena matahakani bona sisiba amo” ena natuna ia hadibaia totona ia hekwarahi noho, a? (Efe. 6:4) Unai bamona taudia oi laloa neganai, do oi ura idia dekenai lalokau bona hebogahisi oi hahedinaraia. Unai ese oi do ia hagoadaia idia totona oi guriguri totona.b—Roma 12:15.

13. Ita diba lasi taudia totona edena bamona ita guriguri diba?

¹³ Iseda guriguri ai edia ladana ita gwauraia. Unai ita karaia diba herevana unai taudia ita hedavari henia lasi. Hegeregere, Crimea, Eritrea, Russia, bona Singapore ai, dibura ruma ai idia noho tadikaka bona taihu ita laloa. Iseda websait ai, dibura ruma ai idia noho tadikaka taihu edia ladana oi sekea diba.c Sekit naria tauna ladana Brian ia gwau: “Dibura ruma ai idia noho tadikaka taihu edia ladana lau torea bona edia ladana lau gwauraia ese lau ia durua unai taudia lau laloa totona. Bona egu guriguri ai edia ladana lau gwauraia.”

14-15. Bema ta totona ita guriguri, dahaka gau haida ita herevalaia diba?

¹⁴ Oi gurigurilaia diba gaudia haida. Ita herevalaia elda tauna Michael ia gwau: “Iseda websait ai, idia hadiburaia tadikaka taihu edia sivarai lau duahia neganai, lau laloa bema lau dekenai unai ia vara edena bamona do lau mamia. Lau be egu adavana totona do lau laloa momo, bona do lau ura ia dabu lasi. Unai dainai egu guriguri ai dibura ruma ai idia noho headava tadikaka totona lau guriguri.”—Heb. 13:3, ftn.

¹⁵ Dibura ai idia noho tadikaka edia dina ta ta maurina ita laloa neganai, idia totona gau haida ita gurigurilaia diba. Hegeregere, dibura ruma naria taudia ese iseda tadikaka do idia kara namo henia eiava iseda tadikaka edia tomadiho karana do idia koua lasi. (1 Tim. 2:1, 2) Danu, dibura ai idia noho abidadama tadikaka taihu edia haheitalai namona ese edia kongrigeisen do ia hagoadaia totona ita guriguri. Bona Witnes lasi taudia ese edia kara namodia idia itaia dainai, hereva momokani do idia abia dae totona ita guriguri diba. (1 Pet. 2:12) Oibe, iseda tadikaka bona taihu ese idia davaria hahetoho ma haida hegeregerena, unai bamona guriguri ita gwauraia diba. Ta ita laloa karana, edia ladana ita gwauraia, bona idia do ia durua gauna totona ita noinoi neganai, ita hahedinaraia idia ita “lalokau henia bada.”—1 Tes. 3:12.

MAI LALOHADAI MAORONA IDA ITA GURIGURI

16. Edena dala ai mai lalohadai maorona ida ita guriguri? (Mataio 6:8)

¹⁶ Ita herevalaia bamona guriguri ese ta dekenai namo ia havaraia diba. To mai lalohadai maorona ida ita guriguri be namo. Iehova be idia vara gaudia ia diba, unai dainai ita gurigurilaia gaudia be ia ita hadibaia totona lasi. Bona ita hamaoroa lasi edena dala ai unai do ia hamaoromaoroa. Badina Iehova ena hesiai taudia idia do noinoi lasi neganai, ia diba vadaeni idia be dahaka heduru idia abia be namo. (Mataio 6:8 duahia.) To dahaka dainai idia ibounai totona ita guriguri be namo? Idia ita lalokau henia dainai, ita ura idia totona ita guriguri. Bona Iehova ia moale bema ia itaia ita be unai dala ai lalokau ita hahedinaraia.

17-18. Tadikaka bona taihu totona ita guriguri karana be edena dala ai ita haheitalaia diba?

¹⁷ Ena be iseda guriguri karana ese ia havaraia namo ita itaia lasi, to unai kara ese ia hahedinaraia iseda tadikaka bona taihu ita lalokau henia, bona Iehova be unai ia laloa bada. Inai haheitalai ita laloa: Famili lalonai natuna mero bona kekeni idia noho. Mero be ia gorere bona bedi ai ia hekure. Bona ena taihuna ese tamana ia noia, ia gwau: “Mani gau ta oi karaia, ia oi durua totona. Ia gorere bada!” Tamana be unai ia diba bona gau haida ia karaia noho unai mero ia durua totona, badina tamana be ena natuna mero ia lalokau henia. To ia moale bada badina ia itaia ena natuna kekeni be ena tadina ia laloa bada bona ia noia ia durua totona.

¹⁸ Iehova ia ura unai ita karaia dainai, ita ia hagoadaia ma haida ita laloa bona idia totona ita guriguri. Unai ita karaia neganai, ita hahedinaraia ita sibona ita laloa lasi to ma haida ita lalokau henia bona Iehova ese unai ia itaia. (2 Tes. 1:3; Heb. 6:10) Danu ita herevalaia bamona, nega haida iseda guriguri ese namo ia havaraia. Unai dainai namona be hanaihanai ma haida totona ita guriguri.