MEMERO KEKENI EDIA HENANADAI
Lau Bapatiso Murinai Dahaka Do Lau Karaia be Namo?—Kahana 1: Emu Gaukara Habadaia Noho
Dava bada kohudia, hegeregere ruma o motuka oi naria namonamo be namo. Emu hetura karana Dirava ida danu be unai bamona. Edena dala ai emu bapatiso murinai unai hetura karana do oi hagoadaia noho?
Inai atikol ai
Dirava ena Hereva oi stadilaia noho
Siri badana: “Gaukara namodia ibounai lalonai huahua do umui havaraia noho bona emui diba maoromaoro Dirava dekenai do ia bada ia lao.”—Kolose 1:10.
Ena anina: Bapatiso murinai, Baibel oi duahia noho bona oi dibaia gaudia oi laloa dobu.—Salamo 25:4; 119:97.
Do idia vara gaudia: Nega haida, do oi ura lasi oi stadi. Reana do oi laloa stadi karana oi manadalaia lasi.
Oi karaia diba gauna: Oi laloa bada Baibel topik haida dekenai tahua gaukara oi karaia. Sibona emu stadi program ta oi karaia—edena dala ai bona edena negai, Baibel bona Baibel pablikeisen oi stadilaidia totona. Emu tahua gauna be Iehova bona ena Hereva oi lalokau henia bada. Unai bamona stadi karana be mai ena namo bona do oi moalelaia.—Salamo 16:11.
Dala ta: Emu stadi karana amo heduru namona oi abia totona, regerege lasi bona koua gaudia idia noho lasi gabuna ta oi tahua.
Heduru ma haida oi ura?
Duahia:
“Edena Dala ai Baibel ese Lau Ia Durua?—Kahana 2: Emu Baibel Duahiduahi Moalelaia”
Itaia:
Daonloud:
Iehova oi guriguri henia noho
Siri badana: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada mai tanikiu ida, emui noinoi herevadia be Dirava dekenai do umui gwauraia hedinarai.”—Filipi 4:6.
Ena anina: Dirava ida herevahereva karana be dala rua ai ita karaia diba: Iena Hereva oi duahia neganai ia oi kamonai henia; Ia oi guriguri henia neganai ia oi hereva henia. Oi guriguri neganai, Dirava ena heduru totona oi noinoi diba bona oi abia hahenamo idauidau dainai oi tanikiu henia.
Do idia vara gaudia: Nega haida, do oi mamia emu guriguri be anina lasi. Reana do oi daradara bema Iehova be momokani ia kamonai noho eiava ia ura ia oi hereva henia.—Salamo 10:1.
Oi karaia diba gauna: Dina ta lalonai, do oi gurigurilaia gaudia oi laloa. Bema emu noho dalana o ia vara gauna ta dainai guriguri latana oi gwauraia diba lasi, namona be oi laloatao gabeai unai oi gurigurilaia totona. Emu ura gaudia sibona lasi, to ma haida totona oi guriguri danu.—Filipi 2:4.
Dala ta: Bema oi laloa emu guriguri be anina lasi, Iehova dekenai unai oi gurigurilaia. Ia ura oi lalohekwarahilaia gaudia ibounai ia kamonai, emu guriguri karana danu.—1 Ioane 5:14.
Heduru ma haida oi ura?
Duahia:
Daonloud:
Oi abia dae gaudia oi gwauraia noho
Siri badana: “Oi sibona bona emu hadibaia hereva dekenai oi naria namonamo. . . . Unai bamona oi karaia neganai, oi sibona bona oi idia kamonai henia taudia do oi hamauria.”—1 Timoteo 4:16.
Ena anina: Bema haida dekenai oi abia dae gaudia oi gwauraia, sibona emu abidadama oi hagoadaia danu. Unai bamona oi karaia neganai, oi idia kamonai henia taudia bona oi sibona oi hamauria diba.
Do idia vara gaudia: Nega haida, do oi ura lasi oi abia dae gaudia oi gwauraia. Reana oi gari sikuli gabuna ai unai oi karaia totona.
Oi karaia diba gauna: Emu lalona oi hadaia, lalohadai kereredia, hegeregere gari karana ese oi ia biagua lasi totona. Aposetolo Paulo ia gwau: “Herevana bema [sivarai namona lau harorolaia] be egu ura dainai lau karaia lasi, to lau dekenai idia henia maduna lau do karaia noho.”—1 Korinto 9:16, 17.
Dala ta: Emu tama sina amo gwaumaoro oi abia, haroro gaukara ai haheitalai namona bona oi ia durua diba Witnes tura namona ta oi davaria totona.—Aonega Herevadia 27:17.
Heduru ma haida oi ura?
Keristani heboudia dekenai oi lao noho
Siri badana: “Namona be ta ta ita laloa bada bona ita hagoadaia heheni, unai amo ita lalokau heheni bona kara namodia ita karaia. Iseda hebou karana ita rakatania lasi.”—Heberu 10:24, 25.
Ena anina: Hebou dekenai ita lao ena badina be Iehova ita tomadiho henia totona. To hebou ita lao ena namo be rua. Ginigunana, emu abidadama tamona taudia amo hagoadaia herevadia oi abia. Iharuana, hebou oi lao bona haere oi henia karana amo idia oi hagoadaia.—Roma 1:11, 12.
Do idia vara gaudia: Nega haida, hebou lalonai reana oi be gau ma haida oi laloa noho, unai dainai mai anina bada hakaua herevadia oi kamonai lasi. Eiava hebou ibounai lao henia karana oi hadokoa, eiava gau ma haida hegeregere emu sikuli gaukaradia oi laloa momo dainai nega be lasi hebou oi lao totona.
Oi karaia diba gauna: Emu sikuli gaukaradia oi dadaraia lasi, to emu lalona oi hadaia hanaihanai hebou oi lao, bona oi kamonai namonamo totona. Danu haere oi henia. Hebou murinai, tok eiava haere ia henia tadikaka o taihu ta oi hanamoa diba.
Dala ta: Hebou oi do lao lasi neganai oi hegaegae guna. JW Library® app oi daonloud, bona “Meetings” tab oi gaukaralaia hebou ai do idia herevalaia gaudia oi itaia totona.
Heduru ma haida oi ura?