UMUI GIMA NOHO!
Ukraine Dekenai Tomadiho Bona Tuari Karana—Baibel be Dahaka Ia Gwau?
Ukraine ai tomadiho gunalaia taudia bona tuari totona mani inai oi laloa:
“Russia Otodoks tomadiho edia gunalaia tauna, Patriarch Kirill, be Russia ena dagedage karana ia gwauraia dika lasi. . . . Iena dubu taudia be Ukraine totona sivarai koikoi idia halasia noho, bona Putin ese unai sivarai ia gaukaralaia tuari ia karaia totona.”—EUobserver, March 7, 2022.
“Patriarch Kirill . . . be Russia ese mai dagedage ida Ukraine idia tuari henia karana ia abia dae, bona ia gwau unai heiriheiri karana amo dika do ia ore.”—AP News, March 8, 2022.
“Ukraine Otodoks tomadiho edia gunalaia tauna, Metropolitan Epiphanius I of Kyiv, be Monday ai ena taunimanima ia hahelagaia, unai amo ‘Russia ena tuari taudia idia tuari henia diba’ . . . bona danu [Ia] gwau Russia ena soldia alaia karana be kara dikana lasi.”—Jerusalem Post, March 16, 2022.
“Ai [UCCRO] be Ukraine ena tuari oreana ai durua bona emai taunimanima ibounai be emai tano totona idia tuari noho. Idia ese Ukraine be ena inai taudia amo idia gimaia dainai, edia hekwarahi ai hanamoa, bona idia totona ai guriguri.”—UCCROa Ena Hereva, February 24, 2022.
Dahaka oi laloa? Bema tomadiho oreadia idia gwau Iesu Keriso ena murinai idia raka, edia memba taudia do idia hagoadaia tuari lalonai idia vareai totona, a? Baibel be dahaka ia gwau?
Histori ia hahedinaraia tomadiho oreadia be tuari idia durua
Histori ese ia hahedinaraia, nega momo tomadiho oreadia idia gwau ena be maino karaia totona idia gaukara noho, to tuari lalonai idia vareai be namo. Lagani momo lalonai, Iehova ena Witnes taudia ese tomadiho oreadia edia koikoi karadia idia gwauraia hedinarai. Iseda pablikeisen ai idia noho haheitalai haida mani ita laloa.
Inai atikol, “The Crusades—A ‘Tragic Illusion’” ese ia hahedinaraia, Roman Katolik Dubu idia gwau taunimanima momo idia alaia mase karana amo idia be Dirava bona Keriso edia hesiai gaukara idia karaia.
Inai atikol “The Catholic Church in Africa” ai, tomadiho ese iduhu ta ta tuari heheni karana o iduhu tamona taudia hamasea karana idia koua lasi dalana ia hahedinaraia.
Inai atikol “Is Religion to Blame?,” “Religion’s Role in Man’s Wars,” bona “Religion Takes Sides” ese Katolik, Otodoks, bona Protestan tomadiho oreadia edia dubu gunalaia taudia be tuari dekenai heduru idia henia dalana ia hahedinaraia.
Keristani tomadiho ese tuari idia durua, a?
Iesu ia gwau: “Namona be emu dekena tauna oi lalokau henia, oi sibona oi lalokau henia hegeregerena.” (Mataio 22:39) “Emui inai taudia do umui lalokau henia noho.”—Mataio 5:44-47.
Inai oi laloa: Bema tomadiho oreana ta ia gwau Iesu ena oda herevana lalokau karana dekenai ia badinaia, to ena taunimanima ia hagoadaia tuari dekenai ma haida idia alaia be edena bamona? Haere dibaia totona, inai atikol oi duahia, “True Christians and War” bona “Is It Possible to Love One’s Enemies?”
Iesu ia gwau: “Lauegu Basileia be inai tanobada ena lasi. Bema egu Basileia be inai tanobada ena, egu hesiai taudia be do idia tuari, unai amo lau . . . do idia henia lasi.” (Ioane 18:36) “Tuari kaia idia gaukaralaia taudia ibounai be tuari kaia amo do idia mase.”—Mataio 26:47-52.
Inai oi laloa: Bema Keristani taudia be Iesu gimaia totona idia tuari lasi, dala ma haida dekenai tuari kohudia idia gaukaralaia diba, a? Inai atikol, “Keristani Taudia ese Tuari Idia Durua be Maoro, A?” oi duahia, unai amo Keristani taudia ginigunadia ese Iesu ena haheitalai idia tohotohoa bona ena hahediba herevadia idia badinaia dalana do oi itaia.
Tuari idia durua tomadiho oreadia dekenai dahaka do ia vara?
Baibel ese ia hahedinaraia, bema tomadiho oreana ta ia gwau ia be Iesu ia tohotohoa, to iena hahediba herevadia idia badinaia lasi, Dirava ese unai tomadiho ia dadaraia.—Mataio 7:21-23; Tito 1:16.
Apokalupo bukana ese ia hahedinaraia, “tanobada ai idia alaia mase taudia ibounai” edia mase karana dekenai tomadiho be mai edia kerere, unai dainai Dirava ese edia kara dika davana do ia henia. (Apokalupo 18:21, 24) Unai ena badina oi dibaia totona, inai atikol, “Babulonia Badana be Dahaka?” oi duahia.
Iesu ia gwau Dirava ese ia dadaraia tomadiho oreadia be edia kara dikadia dainai do idia ore, unai be hegeregere ia dika au be huahua dikadia ia havaraia dainai “idia utua bona lahi dekenai idia negea.” (Mataio 7:15-20) Unai do ia vara dalana oi dibaia totona, inai atikol, “Tomadiho Koikoi be Kahirakahira Do Ia Ore!” oi duahia.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a UCCRO, eiava Ukrainian Council of Churches and Religious Organizations, be mai ena tomadiho oreadia 15, hegeregere Otodoks, Greek bona Roman Katolik, Protestan, bona Evangelical edia grup maragidia, bona danu Jews bona Muslim.