Dubu Ibounai ese Taunimanima be Dirava Dekenai Idia Hakaua Lao, A?

Baibel ena haere

Lasi, dubu ibounai ese taunimanima be Dirava dekenai idia hakaua lao lasi. Baibel be Dirava ese ia ura henidia lasi dubu momo ia herevalaia, bona orea rua dekenai ia hapararadia.

Orea 1: Dirava koikoidia idia tomadiho henia

Baibel ia gwau dirava koikoidia idia tomadiho henia dubu be “gau namona ta idia karaia diba lasi.” (Ieremia 10:​3-5; 16:19, 20) Iehovaa Dirava ese Israela besena ia oda henia: “Namo lasi dirava ma haida umui tomadiho henia.” (Esodo 20:​3, 23; 23:24) Israela taudia be dirava ma haida idia tomadiho henia neganai, “Iehova be idia dekenai ia badu momokani.”​​—Numera 25:3; Levitiko 20:2; Hahemaoro Taudia 2:​13, 14.

Dirava ena lalohadai “dirava koikoidia” dekenai be ia idau lasi. (1 Korinto 8:​5, 6; Galatia 4:8) Dirava ese idia ura ia idia tomadiho henia taudia ia oda henidia, tomadiho koikoi idia lao taudia do idia bamoa lasi. Ia gwau: “Idia amo do umui raka siri, bona idia amo do umui parara.” (2 Korinto 6:​14-​17) Bema dubu ibounai ese taunimanima be Dirava dekenai idia hakaudia lao, vadaeni dahaka dainai Dirava ese unai oda ia henia?

Orea 2: Dirava momokanina be ia abia dae lasi dalana ai idia tomadiho henia

Nega haida, Israela taudia be dirava koikoidia tomadiho henia karadia idia gaukaralaia Iehova idia tomadiho totona, to Iehova ia ura lasi tomadiho momokanina be tomadiho koikoi ida idia mogea. (Esodo 32:8; Deuteronomi 12:​2-4) Iesu ena nega ai, ia ese tomadiho gunalaia taudia edia tomadiho dalana ia gwauraia dika, badina idia helaga koikoi, to idia ese “Taravatu ena hereva badadia [idia] dadaraia, hegeregere hahemaoro goeva, hebogahisi bona abidadama.”​​—Mataio 23:23.

Unai hegeregerena hari inai negai, hereva momokanina idia badinaia tomadiho oreana sibona ese taunimanima be Dirava dekenai ia hakaudia lao. Unai hereva momokani be Baibel lalonai ita davaria diba. (Ioane 4:​24; 17:17; 2 Timoteo 3:​16, 17) Edia hahediba herevadia be Baibel ida idia hegeregere lasi dubudia ese taunimanima be Dirava dekenai idia hakaudia lao lasi. Taunimanima idia laloa Trinity, ia mase diba lasi laumana, bona hel lahina edia hahediba herevadia be Baibel amo idia mai, to unai be koikoi. Idia be dirava koikoidia idia tomadiho henia dubudia amo idia mai. Unai bamona tomadiho be anina lasi, badina Dirava ena taravatu idia dadaraia bona taunimanima edia hahediba herevadia idia abia dae.—Mareko 7:​7, 8.

Dirava be unai bamona tomadiho koikoi dubu ia ura henidia lasi. (Tito 1:​16) Dubu ta ese taunimanima be Dirava kahirakahira ia abidia lao totona, namo lasi tomadiho karadia sibona idia karaia, to gau badana be ia durudia edia mauri dinadia ta ta lalonai Dirava ena hereva do idia badinaia. Hegeregere, Baibel ia gwau: “Bema ta ia laloa ia be Dirava ia tomadiho henia tauna, to ena uduna ia biagua lasi, ia be sibona ena kudouna ia koia noho, bona ena tomadiho karana be anina lasi. Iseda Dirava bona Tamana ena matanai ia goeva bona miro lasi tomadiho dalana be inai: Tama sina idia mase natudia bona vabu be edia hisihisi lalonai do ita naria, bona inai tanobada ena kara mirodia amo do ita noho daudau.”​—Iamesi 1:26, 27.