Sibona hamasea lalohadaina ia abia tauna

Lau Ura Mase—Sibona Hamasea Lalohadaina Lau Abia Neganai, Baibel ese Lau Ia Durua Diba, A?

Baibel ena haere

Oibe! Baibel be “lalometau taudia edia lalona ia hagoadaia Diravana” amo. (2 Korinto 7:6) Ena be Baibel be helt bukana lasi, to sibona hamasea lalohadaina idia abia taudia momo ia durua. Ena sisiba ese oi ia durua diba danu.

Baibel ena sisiba be dahaka?

● Emu hemami gwauraia hedinarai.

Baibel ia gwau: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.”—Aonega Herevadia 17:17.

Anina: Ita lalohekwarahi neganai, ma haida edia heduru ita abia be namo.

Bema emu hemami oi gwauraia hedinarai lasi, oi be sibona oi hametaua noho. To bema emu hemami oi gwauraia hedinarai, emu hemami do ia namo bona lalohadai maorona do oi abia.

Inai tohoa: Hari dina ta oi hereva henia, reana emu famili ta o tura ta.a Danu, pepa ta ai emu hemami oi torea.
● Doketa edia heduru abia.

Baibel ia gwau: “Gorere lasi taudia be doketa idia tahua lasi, to gorere taudia sibona ese idia tahua.”—Mataio 9:12.

Anina: Ita gorere neganai, doketa edia heduru ita tahua be namo.

Sibona hamasea lalohadaina be kwara gorere ena saini ta. Ia be gorere ma haida bamona, unai dainai unai lalohadai ia abia tauna ia hemarai lasi be namo. Kwara gorere be mai ena muramura.

Inai tohoa: Doketa amo heduru tahua haraga.
● Dirava be oi ia laloa bada.

Baibel ia gwau: “Manu maragidia 5 be koini maragidia rua dekenai idia hoihoilaia, ani? To idia ta be Dirava ese ia laloaboio lasi. . . . Umui gari lasi, umui ese manu maragidia ibounai umui hereaia.”—Luka 12:6, 7.

Anina: Dirava dekenai oi be dava bada gauna ta bamona.

Reana oi laloa ta be oi ia laloa lasi, to Dirava be oi mamia noho hisihisina ia itaia. Ia be oi ia laloa bada—ena be oi ura mase. Salamo 22:24 ia gwau: “Ia ese hisihisi ia davaria tauna ia inai henia lasi bona ia dadaraia lasi.” Dirava ia ura oi mauri, badina oi ia lalokau henia.

Inai tohoa: Baibel ai, Dirava ena lalokau idia hamomokania siri oi duahia. Hegeregere, Baibel stadi bukana, Iehova Kahirakahira Oi Lao, ena karoa 24 itaia.
● Dirava guriguri henia.

Baibel ia gwau: “Emui lalohekwarahi ibounai be [Dirava] dekenai umui negea lao.”—1 Petero 5:7.

Anina: Dirava be oi ia boiria ia dekenai emu lalohekwarahi oi gwauraia hedinarai totona.

Dirava be oi dekenai lalomaino bona goada do ia henia oi haheauka totona. (Filipi 4:6, 7, 13) Unai dala amo ia dekenai heduru totona idia boiboi taudia ia durua.—Salamo 55:22.

Inai tohoa: Hari dina Dirava oi guriguri henia. Iena ladana, Iehova, oi gaukaralaia bona ia dekenai emu hemami oi gwauraia. (Salamo 83:18) Oi noia oi do ia durua oi haheauka totona.
● Baibel ena helaro vaira nega totona oi laloa dobu.

Baibel ia gwau: “Ita abia helaro be iseda mauri ena dogo bamona, ia be ia momokani bona ia goada.”—Heberu 6:19.

Anina: Emu hemami be nega haida do ia namo bona nega haida do ia dika, bouti be hurehure dekenai ia daekau diho bamona, to Baibel ena helaro ese oi do ia durua.

Inai helaro be nihi ta sibona lasi, badina Dirava ia gwauhamata ita idia hahisia gaudia ibounai do ia haorea.—Apokalupo 21:4.

Inai tohoa: Baibel ena helaro dekenai diba ma haida oi abia totona, inai atikol ladana “Helaro Korikorina Vaira Nega totona” oi duahia
● Oi moalelaia gauna ta karaia.

Baibel ia gwau: “Ia moale kudouna be muramura namona.”—Aonega Herevadia 17:22.

Anina: Ita ia hamoalea gauna ta ita karaia neganai, iseda hemami do ia namo.

Inai tohoa: Oi moalelaia gauna ta karaia. Hegeregere, miusiki namodia oi kamonai, oi ia hagoadaia sivaraina oi duahia, o oi ura henia gauna ta karaia. Danu, do oi moale bada bema ma haida oi durua, herevana ia be kara maragina sibona.—Kara 20:35.
● Emu helt oi naria.

Baibel ia gwau: “Tauanina treinia karana be mai ena namo.”—1 Timoteo 4:8.

Anina: Ita eksasais, mahuta bona aniani namonamo neganai, do ita gorere lasi.

Inai tohoa: Oi raka loaloa, reana miniti 15 lalonai.
● Laloatao, iseda hemami bona gau ma haida idia idau diba.

Baibel ia gwau: “Kerukeru umui dekenai dahaka do ia vara be umui diba lasi.”—Iamesi 4:14.

Anina: Hekwakwanai badana ta—reana oi laloa hamaoromaoroa dalana be lasi—be do ia ore.

Herevana hari emu hekwakwanai be bada, to kerukeru unai ia idau diba. Unai dainai hekwakwanai haheaukalaia dalana sibona oi laloa. (2 Korinto 4:8) Nega ia hanaia lalonai, emu hekwakwanai do ia ore, to bema sibona oi hamasea, unai oi haidaua diba lasi.

Inai tohoa: Baibel ese ia sivarailaia taudia haida be idia lalohisihisi bada dainai idia ura mase, edia mauri ai ia vara senisi namodia oi duahia—idia laloa lasi dalanai unai senisi idia vara. Haheitalai haida mani ita laloa.

Idia ura mase taudia edia sivarai be Baibel ese ia gwauraia, a?

Oibe. Baibel ese ia sivarailaia taudia haida idia gwau, “Lau ura lau mase.” Dirava ese ia gwau henidia lasi, to ia durudia. Oi do ia durua danu.

Elia

● Ia be daika? Elia be ia gari lasi peroveta tauna ta. To nega haida ia lalomanoka. Iamesi 5:17 ia gwau: “Elia be mai ena hemami ita hegeregerena.”
● Dahaka dainai ia ura mase? Nega ta, Elia ia mamia ia be sibona, ia gari, bona ia be anina lasi. Unai dainai ia noinoi: “Iehova e, egu mauri oi kokia.”—1 King Taudia 19:4.
● Dahaka ese ia durua? Elia ese ena hemami be Dirava dekenai ia gwauraia. Dirava ese edena dala ai ia hagoadaia? Dirava ia hahedinaraia ia be Elia ia laloa bada bona ia dekenai Iena siahu ia hahedinaraia. Danu, Elia dekenai gaukara ia henia bona Elia ia durua.
▸ Elia ena sivarai duahia: 1 King Taudia 19:2-18.

Iobu

● Ia be daika? Iobu be taga tauna, mai ena ruma bese, bona Dirava momokanina ia tomadiho henia.
● Dahaka dainai ia ura mase? Iobu dekenai gau dikadia momo idia vara. Iena kohu ibounai ia haboioa. Dika badana ta lalonai iena natudia ibounai idia mase. Gorere badana ta ia abia. Gabeai, ia idia samania koikoi idia gwau ia be unai hekwakwanai edia badina. Iobu ia gwau: “Egu mauri lau ura henia lasi momokani. Lau ura lasi lau mauri noho.”—Iobu 7:16.
● Dahaka ese ia durua? Iobu ese Dirava ia guriguri henia bona ma haida ia hereva henia. (Iobu 10:1-3) Iena turana namona, Elihu, ese ia hagoadaia bona lalohadai maorona ia abia. Mai anina bada gauna be, Iobu ese Dirava ena sisiba bona heduru ia abia dae.
▸ Iobu ena sivarai duahia: Iobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

● Ia be daika? Mose be Israela taudia ia hakaua tauna bona peroveta tauna.
● Dahaka dainai ia ura mase? Mose ena maduna be bada, nega momo idia gwauraia dika, bona ia mamia ena goada ia ore. Unai dainai Dirava dekenai ia gwau: “Mani harihari lau oi hamasea.”—Numera 11:11, 15.
● Dahaka ese ia durua? Mose ese Dirava dekenai ena hemami ia gwauraia. Bona Dirava ese ia durua ena maduna metauna ia hamaragia totona.
▸ Mose ena sivarai duahia: Numera 11:4-6, 10-17.

Edena Baibel siridia ese oi ia durua diba sibona hamasea lalohadaina oi dadaraia totona?

Inai siri ese idia hahedinaraia Dirava be oi ia laloa bada:

“Iehova be lalometau taudia kahirakahira ia noho. Ia ese daradoko taudia ia hamauria noho.”—Salamo 34:18.
“Lau lalohekwarahi bada neganai, oi ese lau oi hagoadaia bona egu lalona oi hanamoa.”—Salamo 94:19.

(Salamo 27:10; 103:12-14; 2 Korinto 1:3, 4 itaia danu.)

Inai siri ese idia hahedinaraia Dirava be emu hisihisi ia lalopararalaia:

“Oi ese egu hisihisi oi itaia vadaeni, bona egu lalometau oi diba.”—Salamo 31:7.
“Edia lalometau negadia ibounai lalonai, ia danu ia lalometau. . . . Iena lalokau bona hebogahisi dainai . . . , idia ia abia isi.”—Isaia 63:9.

Inai siri ese idia hahedinaraia Dirava ia ura ia kahirakahira oi lao bona guriguri amo emu hemami oi gwauraia:

“Namo lasi gau ta umui lalohekwarahilaia, to gau ibounai lalonai do umui guriguri bona . . . emui noinoi herevadia be Dirava dekenai do umui gwauraia hedinarai. Bona Dirava ena maino, laloparara ibounai ia hereaia gauna . . . ese emui kudouna bona lalona do ia gimaia.”—Filipi 4:6, 7.
“Dirava kahirakahira umui lao, bona ia be umui kahirakahira do ia mai.”—Iamesi 4:8.

(Salamo 34:4, 15; 55:22 itaia danu.)

Inai siri ese idia hahedinaraia Dirava be oi dekenai goada ia henia diba:

“Badina lau dekenai siahu ia henia tauna amo goada lau abia gau ibounai lau karaia totona.”—Filipi 4:13.
“Oi gari lasi, badina lau be oi ida. Oi laloa momo lasi, badina lau be emu Dirava. Lau ese oi do lau hagoadaia, oibe, oi do lau durua.”—Isaia 41:10.

(Salamo 138:3; Isaia 40:29-31 itaia danu.)

Bema turana ta ia gwau, “lau ura mase” be edena bamona?

Bema ta ia gwau ia ura mase, unai oi laloa maragi lasi. Emu turana hagoadaia iena hemami ia gwauraia totona. (Aonega Herevadia 20:5) Sibona hamasea totona idia abia lalohadaina idia herevalaia neganai, unai ese do ia koudia unai kara idia karaia totona.
Kamonai namonamo. “Do idia kamonai haraga, to do idia hereva haraga lasi.” (Iamesi 1:19) Ta ia lalohisihisi o daradoko neganai, “anina lasi herevadia” ia gwauraia diba. (Iobu 6:2, 3) Unai dainai bema emu turana ena hereva ese emu lalona ia hahisia, oi badu haraga lasi.
Hagoadaia herevadia gwauraia. Baibel ia gwau: “Lalometau taudia do umui hagoadaia.” (1 Tesalonika 5:14) Emu turana ena hemami laloa bada. Iena hemami oi matauraia. Emu turana oi hamaoroa oi be ia oi laloa bada.
Emu turana hagoadaia heduru do ia abia. Aonega Herevadia 13:10 ia gwau: “Sisiba idia tahua taudia dekenai aonega ia noho.” Bema emu turana be ia gorere bada, do oi hagoadaia doketa ia itaia totona. Sibona hamasea lalohadaina be kwara gorere ena toa, unai dainai oi hagoadaia doketa edia heduru ia abia totona. Ia ida oi lao diba.
Lalokau hahedinaraia. Baibel ia gwau: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.” (Aonega Herevadia 17:17) Emu turana ena hekwakwanai o sibona hamasea lalohadaina oi kokia diba lasi. To bema oi hahedinaraia ia oi lalokau henia bona oi ura durua, iena hekwakwanai ia haheaukalaia diba—bona murina dinadia do ia moalelaia.

Bema guna sibona lau ura hamasea be edena bamona?

Ia vara gauna dainai oi lalohisihisi o hemarai diba. Reana do oi mamia ta be sibona oi ura hamasea ena badina o oi mamia hisihisina ia lalopararalaia lasi.

Baibel ia gwau ma haida edia hemami do ita lalopararalaia lasi. Ia gwau: “Ta ese ena lalona ai ia noho hisihisi be ia sibona ia diba.” (Aonega Herevadia 14:10; 1 King Taudia 8:38) Unai dainai ena be lalokau taudia ese oi idia durua, to unai be hegeregere lasi. To laloatao, oi be sibona lasi.

Dirava be iseda kudouna ia diba. (2 Sivarai 6:30) Iehova ia diba dahaka dainai oi laloa sibona hamasea karana be emu hekwakwanai hamaoromaoroa dalana tamona. Emu hemami ia lalopararalaia danu, ia diba oi karaia karana dainai oi lalohisihisi o hemarai.—Salamo 139:1.

Ena be Dirava be mauri ia laloa bada, to ia noho hegaegae sibona hamasea lalohadaina idia abia taudia ia gwauatao totona. (Salamo 86:5) Ia diba sibona idia ura hamasea taudia be idia ura lasi mase—to idia ura hisihisi ia ore. Iehova be oi ia durua diba, ena be “iseda kudouna ese ita ia kota henia, namona be ita laloatao Dirava be iseda kudouna ia hereaia bona gau ibounai ia diba.” (1 Ioane 3:19, 20) Oibe, ia ura oi dekenai “ia be hebogahisi Tamana bona lalogoada ibounai ia henia Diravana.”—2 Korinto 1:3.

a Bema sibona hamasea lalohadaina be ia goada bona emu famili o tura namona ta ia noho lasi, Emergency namba oi rini diba.

Lau Ura Mase—Sibona Hamasea Lalohadaina Lau Abia Neganai, Baibel ese Lau Ia Durua Diba, A?

Baibel ena haere

Baibel ena sisiba be dahaka?

● Emu hemami gwauraia hedinarai.

● Doketa edia heduru abia.

● Dirava be oi ia laloa bada.

● Dirava guriguri henia.

● Baibel ena helaro vaira nega totona oi laloa dobu.

● Oi moalelaia gauna ta karaia.

● Emu helt oi naria.

● Laloatao, iseda hemami bona gau ma haida idia idau diba.

Idia ura mase taudia edia sivarai be Baibel ese ia gwauraia, a?

Elia

Iobu

Mose