Deuteronomi

23 “Bema tau ta ena abona idia hadikaia eiava ena usina idia utua, ia be Iehova ena bese taudia ida do ia noho hebou lasi.+

2 “Ariara natuna be Iehova ena bese taudia ida do ia noho hebou lasi.+ Iena bese taudia ta be Iehova ena bese taudia ida do ia noho hebou lasi ela bona uru namba 10.

3 “Amono eiava Moaba tauna ta be Iehova ena bese taudia ida do ia noho hebou lasi.+ Edia bese taudia ta be Iehova ena bese taudia ida do ia noho hebou lasi ela bona uru namba 10, 4 badina Aigupito amo umui raka-lasi neganai, idia ese umui dekenai aniani bona ranu idia henia lasi+ bona idia ese Beoro ena natuna Balama idia hoia, umui dekenai hadikaia hereva ia gwauraia totona. Ia be Petoro amo, Mesopotamia hanua ta.+ 5 Iehova emui Dirava ese Balama ia kamonai henia lasi.+ To, Iehova emui Dirava ese umui totona hadikaia herevana be hanamoa herevana ai ia halaoa,+ badina Iehova emui Dirava ese umui ia lalokau henia.+ 6 Emui mauri dinadia ibounai lalonai, idia umui durua lasi edia noho ia namo totona.+

7 “Edoma tauna umui inai henia lasi, badina ia be emui tadikaka.+

“Aigupito tauna umui inai henia lasi, badina guna umui be iena tano ai idau taudia bamona umui noho.+ 8 Edia uru namba 3 lalonai idia vara natudia be Iehova ena bese taudia ida idia noho hebou diba.

9 “Emui inai taudia tuari henia totona umui kamepa neganai, umui naria namonamo, sibona umui hamiroa* lasi.+ 10 Bema hanuaboi ai tau ta amo vesi ia raka-lasi dainai ia miro,+ namona be kamepa murimuri ai ia lao bona kamepa lalonai ia vareai lou lasi. 11 Adorahi ai, ranu dekenai ia digu be namo, bena dina ia diho neganai kamepa dekenai ia giroa lou diba.+ 12 Kamepa murimuri ai gabu ta umui abia hidi, bona unuseni do umui lao umui kukuri totona. 13 Speidi* ta umui abia lao be namo. Murimuri ai umui kukuri neganai, unai speidi amo guri umui geia bona emui kukuri umui koua. 14 Badina Iehova emui Dirava be emui kamepa lalonai ia loaloa noho,+ umui ia hamauria bona emui inai taudia be umui dekenai ia henia totona. Bona emui kamepa ia helaga be namo,+ unai amo ia ese umui dekenai dika ta do ia itaia lasi bona umui amo do ia daudau.

15 “Igui hesiai tauna be ena biaguna amo ia heau bona oi dekenai ia mai neganai, namo lasi ia be ena biaguna dekenai oi henia lou. 16 Namona be emui siti ta ai ia ura henia gabuna ta ia abia hidi bona emui huanai ia noho diba. Namo lasi ia umui kara auka henia.+

17 “Namo lasi Israela taudia edia natudia kekeni be dubu lalonai ariara kekenidia ai idia lao,+ eiava namo lasi Israela taudia edia natudia memero be dubu lalonai ariara memero ai idia lao.+ 18 Namo lasi ariara hahine dekenai idia henia davana eiava ariara tauna* dekenai idia henia davana be Iehova emui Dirava ena ruma lalonai umui mailaia, gwauhamata ta umui hagugurua totona. Badina Iehova emui Dirava dekenai unai gaudia be gau dika rohoroho.

19 “Emui tadikaka dekenai moni, aniani, eiava gau ta umui henitorehai neganai, namo lasi atoa kau moni umui noia.+ 20 Idau tauna dekenai atoa kau moni umui noia diba,+ to emui tadikaka dekenai atoa kau moni umui noia lasi,+ unai amo do umui abia tano dekenai umui karaia gaukara ibounai be Iehova emui Dirava ese do ia hanamoa.+

21 “Bema Iehova emui Dirava dekenai gwauhamata ta umui karaia,+ namona be umui badinaia haraga.+ Badina Iehova emui Dirava ia ura unai umui karaia, bema lasi, umui be umui kara dika.+ 22 To bema gwauhamata umui karaia lasi, umui be do umui kara dika lasi.+ 23 Emu uduna ena hereva oi badinaia be namo,+ bona emu uduna ena gwauhamata herevadia do oi hamomokania, unai be harihari boubou bamona Iehova emu Dirava dekenai.+

24 “Bema emu dekena tauna ena vain uma lalonai oi vareai, greips oi ania diba ela bona emu ura ia hegeregere, to namo lasi emu konteina lalonai haida oi udaia.+

25 “Bema emu dekena tauna ena witi uma lalonai oi vareai, namona be emu imana amo idia mage gaudia oi kokia, to namo lasi kaia amo iena witi oi utua.+