Deuteronomi

27 Vadaeni Mose be Israela ena tau badadia ida Israela taudia ia oda henia, ia gwau: “Hari dina, lau ese umui dekenai lau gwauraia oda hereva ibounai umui badinaia. 2 Ioridane umui hanaia bona Iehova emui Dirava ese umui dekenai do ia henia tano dekenai umui vareai dinana ai, nadi badadia umui haginia bona raro amo idia karaia sement amo umui koua.+ 3 Bena Ioridane umui hanaia neganai, unai nadi latanai inai Taravatu ena hereva ibounai umui torea, unai amo Iehova emui Dirava ese umui dekenai ia henia tano, milika bona hani amo ia honu tano dekenai umui vareai diba, Iehova, emui sene taudia edia Dirava be umui dekenai ia gwauhamata hegeregerena.+ 4 Ioridane umui hanaia neganai, unai nadi be Ebala Ororo ai do umui haginia+ bona raro amo idia karaia sement amo do umui koua, hari dina umui lau oda henia hegeregerena. 5 Unuseniai Iehova emui Dirava dekenai boubou patana ta be nadi amo do umui haginia danu. Namo lasi idia latanai auri tulu umui gaukaralaia.+ 6 Namona be idia utua lasi nadi amo Iehova emui Dirava dekenai boubou patana ta umui haginia bona ia latanai Iehova emui Dirava dekenai gabua bouboudia umui henia. 7 Umui ese maino karaia bouboudia do umui henia+ bona unuseniai do umui ania,+ bona Iehova emui Dirava vairanai do umui moale.+ 8 Bona inai Taravatu ena hereva ibounai be unai nadi latadiai do umui torea hedinarai goevagoeva.”+

9 Bena Mose bona Levi hahelaga taudia be Israela taudia ibounai dekenai idia gwau: “Israela taudia e, umui regerege lasi bona umui kamonai, hari dina umui be Iehova emui Dirava ena taunimanima ai umui lao.+ 10 Namona be Iehova emui Dirava umui kamonai henia bona ena oda herevadia bona taravatu umui badinaia,+ hari dina umui lau oda henia herevadia unai.”

11 Unai dina ai Mose ese taunimanima ia oda henia, ia gwau: 12 “Ioridane umui hanaia neganai, Gerisima Ororo ai do idia gini+ bona taunimanima ese do idia abia hahenamo idia gwauraia iduhu be inai: Simeona, Levi, Iuda, Isakara, Iosepa, bona Beniamina. 13 Bona Ebala Ororo ai hadikaia hereva gwauraia totona idia gini iduhu be inai:+ Rubena, Gado, Asere, Sebuluno, Dano, bona Napatali. 14 Bona Levi taudia be mai gado bada ida Israela taudia ibounai do idia hereva henia, do idia gwau:+

15 “‘Laulau ta eiava auri kaivakuku ta ia koroa tauna be dika do ia davaria,+ unai kaivakuku be ena imana amo ia karaia bona ia hunia. Iehova dekenai unai be gau dika rohoroho.’+ (Bona taunimanima ibounai do idia haere, idia gwau, ‘Amen!’*)

16 “‘Hemataurai lasi ida ena tamana eiava sinana ia kara henia tauna ese dika do ia davaria.’+ (Bona taunimanima ibounai do idia gwau, ‘Amen!’)

17 “‘Ena dekena tauna ena tano hetoana ena maka ia kokia tauna ese dika do ia davaria.’+ (Bona taunimanima ibounai do idia gwau, ‘Amen!’)

18 “‘Tau ta ese matakepulu tauna ia hakaua kerere bona dala dekenai ia boio, unai tau be dika do ia davaria.’+ (Bona taunimanima ibounai do idia gwau, ‘Amen!’)

19 “‘Idau tauna, tamana lasi natuna* eiava vabu ena hahemaoro ia hagagevaia tauna ese dika do ia davaria.+ (Bona taunimanima ibounai do idia gwau, ‘Amen!’)

20 “‘Ena tamana ena adavana ida ia mahuta hebou tauna ese dika do ia davaria, badina ena tamana ia hahemaraia.’+ (Bona taunimanima ibounai do idia gwau, ‘Amen!’)

21 “‘Animal ta ida ia mahuta hebou tauna ese dika do ia davaria.’+ (Bona taunimanima ibounai do idia gwau, ‘Amen!’)

22 “‘Ena taihuna ida ia mahuta hebou tauna ese dika do ia davaria, badina unai be ena tamana ena natuna kekeni eiava ena sinana ena natuna kekeni.’+ (Bona taunimanima ibounai do idia gwau, ‘Amen!’)

23 “‘Ena ravana hahine ida ia mahuta hebou tauna ese dika do ia davaria.’+ (Bona taunimanima ibounai do idia gwau, ‘Amen!’)

24 “‘Hehuni dekenai ia naria bona ena dekena tauna ia alaia mase tauna ese dika do ia davaria.’+ (Bona taunimanima ibounai do idia gwau, ‘Amen!’)

25 “‘Kerere lasi tauna hamasea totona laloani moni* ia abia tauna ese dika do ia davaria.’+ (Bona taunimanima ibounai do idia gwau, ‘Amen!’)

26 “‘Inai Taravatu ena hereva ia badinaia lasi tauna ese dika do ia davaria.’+ (Bona taunimanima ibounai do idia gwau, ‘Amen!’)