Deuteronomi

29 Iehova ese Mose ia oda henia inai taravatu herevadia be Moaba tano ai Israela taudia dekenai ia henia, unai taravatu herevadia be Horeba ai idia dekenai ia henia gauna amo ia idau.+

2 Bena Mose ese Israela taudia ibounai ia boiria bona ia gwau: “Aigupito tano ai Iehova ese Farao bona ena hesiai taudia ibounai bona ena tano ibounai dekenai ia karaia gaudia be emui matana amo umui itaia vadaeni,+ 3 oibe, emui matana amo iena hahemaoro kara badadia, toa bona hoa kara badadia umui itaia.+ 4 To Iehova ese umui dekenai siahu ia henia lasi umui laloparara totona, mai emui matana to umui itaia lasi, bona mai emui taiana to umui kamonai lasi ema bona hari.+ 5 ‘Lagani 40 taunimanima lasi gabuna ai umui lau hakaua noho lalonai,+ emui dabua idia dika lasi bona emui sandolo danu idia dika lasi.+ 6 Umui ese paraoa umui ania lasi, bona wain eiava alkahol gauna ta umui inua lasi. To lau ese umui lau do naria noho, unai amo do umui diba lau be Iehova emui Dirava.’ 7 Bena umui be inai gabu dekenai umui ginidae, bona Hesebona ena king,+ Sihona bona Basana ena king, Oga+ be ita tuari henia totona idia mai, to idia ita halusia.+ 8 Unai murinai edia tano ita abia bona Rubena iduhu taudia, Gado iduhu taudia bona Manase ena iduhu kahana dekenai ita henia, edia ahuna bamona.+ 9 Unai dainai, inai taravatu herevadia umui badinaia bona kamonai henia, unai amo umui karaia gaudia ibounai ese anina namona do idia havaraia.+

10 “Umui ibounai be hari dina Iehova emui Dirava vairanai umui gini, emui iduhu kwaradia, emui tau badadia, emui ofesa taudia, Israela ena tatau ibounai, 11 emui natudia, emui hahine,+ bona emui kamepa huanai idia noho idau taudia,+ emui au ia gogoa tauna bona emui ranu ia utua tauna danu. 12 Umui be Iehova emui Dirava ida gwaubou karaia totona iniseni umui gini, bona hari Iehova emui Dirava ese unai be umui ida do ia karaia,+ 13 unai amo hari dina umui be iena taunimanima ai do ia halaoa+ bona ia be emui Dirava ai do ia lao,+ umui dekenai bona emui sene taudia Aberahamo,+ Isako,+ bona Iakobo+ dekenai ia gwauhamata hegeregerena.

14 “Lau be umui sibona ida inai gwaubou lau karaia lasi, 15 to hari dina ita ida Iehova iseda Dirava vairanai idia gini taudia bona hari dina ita ida idia noho lasi taudia ida lau karaia danu. 16 (Badina umui diba namonamo, ita be edena bamona Aigupito tano ai ita noho, bona eda laolao lalonai bese idauidau taudia edia huanai edena bamona ita hanaia.+ 17 Bona umui ese idia huanai idia noho gau dika rohorohodia bona edia kaivakuku dika rohorohodia* umui itaia,+ au bona nadi, siliva bona golo amo idia karaia gaudia unai.) 18 Umui naria namonamo, namo lasi hari dina umui huanai tau ta eiava hahine ta, ruma bese ta eiava iduhu ta be ena kudouna ese ia hakaua siri Iehova iseda Dirava amo, unai bese taudia edia dirava ia hesiai henia totona.+ Unai bamona tauna be umui huanai do ia noho lasi, ia be au ta ena ramuna bamona, ia tubu bona huahua mai poisini bona iditana ia havaraia.+

19 “To bema tau ta ese inai gwauhamata herevadia ia kamonai bona mai hekokoroku ida ena lalona ai ia gwau, ‘Ena be egu kudouna ena dala hegeregerena ai do lau raka, to dika ta do lau davaria lasi,’ to unai lalohadai ese ibounai* do ia hadikaia, 20 bona Iehova ese ia do ia gwauatao lasi.+ To, Iehova ena badu mai siahuna be unai tauna latanai do ia diho, bona inai buka lalonai idia torea dika ibounai be ia latanai do idia mai,+ bona Iehova ese unai tauna ena ladana be do ia kokia momokani. 21 Iehova ese Israela ena iduhu ibounai amo unai tauna do ia atoa siri bona ia latanai dika do ia mailaia, Taravatu buka lalonai idia torea hereva ese ia gwauraia dika ibounai hegeregerena.

22 “Bona emui uru gabedia, umui murinai do idia vara natudia unai, bona tano daudauna amo do ia mai idau tauna danu be Iehova ese inai tano dekenai ia siaia dika badadia do idia itaia. 23 Ia ese salipa, damena, bona lahi ia siaia, unai amo inai tano ibounai dekenai do idia hadohado lasi eiava aniani do idia tubu lasi eiava ia latanai tubutubu gaudia ta do ia vara lasi, ia be Sodoma bona Gomora,+ Adima bona Seboimi hegeregerena do ia dika,+ idia be Iehova ese mai badu ida ia hadikadia ore. 24 Emui natudia bona idau tauna bona bese ibounai do idia gwau, ‘Dahaka dainai Iehova be inai tano dekenai inai ia karaia?+ Dahaka dainai ia badu momokani?’ 25 Bena taunimanima do idia gwau, ‘Badina idia ese Iehova, edia sene taudia edia Dirava ena gwaubou idia dadaraia,+ ia ese idia be Aigupito amo ia hakaua raka-lasi neganai, idia ida unai gwaubou ia karaia.+ 26 To idia lao bona dirava ma haida idia hesiai henia bona idia dekenai idia tui diho, idia be unai dirava idauidau idia diba lasi bona Dirava ese maoro ia henia lasi idia tomadiho henia totona.+ 27 Bena Iehova ena badu mai siahuna be unai tano latanai ia mai, oibe, taravatu bukana ese ia gwauraia dika ibounai be ia latanai idia mai.+ 28 Unai dainai, Iehova be badu mai siahuna ida idia be edia tano amo ia kokia+ bona tano ma ta dekenai ia siaia lao, hari idia noho gabuna unai.’+

29 “Idia hunia herevadia be Iehova iseda Dirava totona,+ to idia hedinarai gaudia be ita bona iseda bese taudia totona ela bona hanaihanai, unai amo ita ese inai Taravatu ena hereva ibounai ita badinaia diba.+