Deuteronomi

5 Mose ese Israela taudia ibounai ia boiria bona idia dekenai ia gwau: “Israela taudia e, umui kamonai, hari dina lau ese umui dekenai taravatu bona hahemaoro herevadia lau gwauraia, bona umui dibaia bona badinaia namonamo be namo. 2 Iehova iseda Dirava be Horeba ai ita ida gwaubou ta ia karaia.+ 3 Iehova ese inai gwaubou be iseda sene taudia ida ia karaia lasi, to ita ida ia karaia, hari dina iniseniai ita noho taudia unai. 4 Iehova be ororo ai lahi amo umui ia hereva henia, tau ta be ma ta ia hereva henia bamona.+ 5 Unai nega ai lau be umui bona Iehova huanai lau gini,+ umui dekenai Iehova ena hereva lau gwauraia totona, badina umui be lahi dekenai umui gari bona ororo umui daekau lasi.+ Bena Dirava ia gwau:

6 “‘Lau be Iehova emui Dirava, lau ese umui be umui ia guia tanona,* Aigupito amo umui lau hakaua raka-lasi.+ 7 Lau sibona umui tomadiho henia. Namo lasi dirava ma haida umui tomadiho henia.+

8 “‘Namo lasi laulau ta umui koroa+ eiava guba ai eiava tanobada ai eiava ranu lalonai idia noho gauna ta ena laulau umui koroa. 9 Namo lasi idia dekenai umui tui diho eiava idia umui hesiai henia,+ badina lau, Iehova emui Dirava, lau ura lau sibona umui tomadiho henia.+ Lau idia inai henia taudia edia kerere ena panisi be edia natudia, edia uru ihatoina, bona uru namba 4 latanai do lau mailaia,+ 10 to lau idia lalokau henia bona egu oda herevadia idia badinaia taudia edia uru tausen momo dekenai, lalokau* do lau hahedinaraia.

11 “‘Namo lasi Iehova emui Dirava ena ladana umui gaukaralaia kerere,+ badina iena ladana ia gaukaralaia kerere tauna be Iehova ese do ia panisia.+

12 “‘Sabati dinana umui badinaia, unai amo do umui hahelagaia, Iehova emui Dirava ese umui ia oda henia hegeregerena.+ 13 Emui gaukara ibounai be dina 6 lalonai do umui karaia,+ 14 to Iehova emui Dirava dekenai dina namba 7 be sabati.+ Namo lasi gaukara ta umui karaia,+ umui, emui natudia memero, emui natudia kekeni, emui igui hesiai tatau, emui igui hesiai kekenidia, emui boromakau, emui doniki, emui ubua animal, bona emui siti lalonai idia noho idau taudia danu,+ unai amo emui igui hesiai tatau bona emui igui hesiai kekenidia idia laga-ani diba, umui karaia hegeregerena.+ 15 Namona be umui laloatao, umui be Aigupito tano ai igui hesiai taudia ai umui lao, bona Iehova emui Dirava ese ena imana goadana amo umui be unai tano amo ia hakaua raka-lasi.+ Unai dainai, Iehova emui Dirava ese umui ia oda henia Sabati dinana umui badinaia totona.

16 “‘Emui tamana bona sinana umui matauraia,+ Iehova emui Dirava ese umui ia oda henia hegeregerena, unai amo Iehova emui Dirava ese umui dekenai ia henia tano ai do umui mauri daudau bona noho namo.+

17 “‘Namo lasi umui ala-ala.+

18 “‘Namo lasi umui heudahanai.+

19 “‘Namo lasi umui henaohenao.+

20 “‘Namo lasi emui varavara hadikaia totona samania hereva koikoi umui gwauraia.+

21 “‘Namo lasi emui varavara ena adavana umui ura henia.+ Bona namo lasi emui dekena tauna ena ruma, ena uma gabu, ena igui hesiai tauna, ena igui hesiai kekeni, ena boromakau, ena doniki, bona ena gau ma ta umui mataganigani henia.’+

22 “Iehova ese unai taravatu* be ororo ai, emui bese taudia dekenai ia gwauraia. Ia be mai gado regena badana ida lahi, ori, bona dibura masemase amo unai hereva ia gwauraia,+ to gau ma haida ia herevalaia lasi. Bena unai taravatu be nadi palakadia rua latanai ia torea bona lau dekenai ia henia.+

23 “To lahi be ororo ataiai ia araia noho bona dibura amo gado regena umui kamonai neganai,+ emui iduhu kwaradia bona tau badadia ibounai be lau dekenai idia mai. 24 Bena umui gwau, ‘Iehova iseda Dirava ese ena hairai bona siahu be ita dekenai ia hahedinaraia, bona ita ese iena gado regena be lahi lalona amo ita kamonai.+ Hari dina ita itaia, Dirava be taunimanima ida ia herevahereva diba bona idia mauri noho diba.+ 25 Ai ura lasi ai mase, dika inai lahi badana ese ai ia gabua ore. Bema Iehova iseda Dirava ena gado regena ai kamonai noho, ai be momokani do ai mase. 26 Badina taunimanima ibounai amo, daika ese ia mauri noho Diravana ena gado regena be lahi amo ia kamonai, ita kamonai hegeregerena, bona ia mauri noho? 27 Namona be oi sibona oi lao kahirakahira bona Iehova iseda Dirava ese do ia gwauraia hereva ibounai oi kamonai, bena Iehova iseda Dirava ese oi dekenai do ia gwauraia hereva ibounai be ai dekenai do oi gwauraia, bona do ai kamonai bona badinaia.’+

28 “Vadaeni lau dekenai umui gwauraia herevadia be Iehova ese ia kamonai, bona Iehova be lau dekenai ia gwau, ‘Inai taunimanima ese oi dekenai idia gwauraia herevadia lau kamonai vadaeni. Edia hereva ibounai be maoro.+ 29 Bema idia ese nega ibounai edia kudouna ai lau idia gari henia+ bona egu oda hereva ibounai idia badinaia,+ vadaeni idia bona edia natudia edia noho be do ia namo ela bona hanaihanai!+ 30 Oi lao bona idia dekenai oi gwau: “Emui palai rumadia dekenai umui giroa lou.” 31 To namona be oi be lau ida iniseni oi noho, bona lau ese oi dekenai oda herevadia, taravatu, bona hahemaoro herevadia ibounai do lau gwauraia, vadaeni idia do oi hadibaia bona do idia badinaia, idia dekenai do lau henia tanona ai.’ 32 Vadaeni namona be umui naria namonamo, Iehova emui Dirava ese umui ia oda henia hegeregerena do umui karaia.+ Namo lasi idiba eiava lauri kahana dekenai umui lao.+ 33 Namona be Iehova emui Dirava ese umui dekenai ia gwauraia dala ibounai hegeregerena umui raka,+ unai amo do umui abia tano ai do umui mauri bona noho namo, bona do umui noho daudau.+