Deuteronomi

9 Israela taudia e, umui kamonai, hari dina umui be Ioridane do umui hanaia+ bona do umui abia tano ai bese badadia bona goadadia idia noho,+ edia siti be bada bona mai edia magu aukadia bona latadia,+ 2 bona edia taunimanima be bada bona lata, idia be Anakima taudia edia natudia.+ Edia sivarai umui kamonai vadaeni, idia gwau, ‘Daika be Anaki taudia vairanai ia gini diba?’ 3 Unai dainai, namona be hari dina umui diba, Iehova emui Dirava be emui vairanai do ia hanaia lao.+ Ia be gau ibounai ia gabua ore lahina bamona,+ idia do ia hadikaia ore. Ia ese idia be emui vairanai do ia halusia, unai amo umui ese idia do umui lulua siri haraga bona idia do umui hadikaia ore, Iehova ese umui ia gwauhamata henia hegeregerena.+

4 “Iehova emui Dirava ese idia be emui vairana amo ia lulua neganai, namo lasi emui kudouna ai umui gwau, ‘Egu kara maoromaoro dainai Iehova ese inai tano dekenai lau ia hakaua vareai, lau noholaia totona.’+ To inai bese taudia edia kara dika dainai,+ Iehova ese idia be emui vairana amo ia lulua lao. 5 Namo lasi umui laloa umui ese inai tano umui abia badina umui kara maoromaoro eiava emui kudouna be maoro. Lasi, to Iehova ese inai bese taudia edia kara dika dainai idia be emui vairana amo ia lulua lao,+ unai amo Iehova ese emui sene taudia, Aberahamo,+ Isako,+ bona Iakobo+ dekenai ia karaia gwauhamata do ia hagugurua. 6 Namona be umui diba, inai be emui kara maoromaoro dainai Iehova emui Dirava ese umui dekenai inai tano namona ia henia lasi, badina umui be gwau-edeede taudia.+

7 “Namona be umui laloatao, umui ese taunimanima lasi gabuna ai Iehova emui Dirava umui habadua.+ Aigupito tanona umui rakatania dinana amo ema bona iniseniai umui ginidae, umui ese Iehova umui gwau-edeede henia.+ 8 Horeba ai danu umui ese Iehova umui habadua bona Iehova be umui dekenai ia badu momokani dainai, ia noho hegaegae umui ia hadikaia ore totona.+ 9 Lau be ororo dekenai nadi palaka rua,+ Iehova ese umui dekenai ia henia taravatu edia nadi palaka rua unai,+ abia totona lau daekau bona unuseniai dina 40 bona hanuaboi 40 lau noho neganai,+ lau aniani lasi bona ranu lau inua lasi. 10 Bena Iehova ese unai nadi palaka rua be lau dekenai ia henia, iena ima kwakikwaki amo ia torea gaudia unai. Bona umui be ororo dekenai umui haboua neganai, Iehova be lahi amo umui dekenai ia gwauraia hereva ibounai be unai nadi palakadia latanai idia noho.+ 11 Dina 40 bona hanuaboi 40 idia ore neganai, Iehova ese lau dekenai unai nadi palaka rua ia henia, taravatu nadi palakadia unai. 12 Bona Iehova be lau ia hamaoroa, ‘Oi toreisi, inai gabu amo oi diho haraga, badina emu taunimanima, Aigupito amo oi hakaua raka-lasi taudia unai, be idia kara gageva.+ Lau ese idia lau oda henia do idia badinaia dalana be idia dadaraia haraga. Idia be sibodia totona auri kaivakuku idia karaia.+ 13 Bena Iehova be lau dekenai ia gwau, ‘Lau be inai taunimanima lau itaia vadaeni, idia be gwau-edeede taudia.+ 14 Lau oi koua lasi, lau ese idia do lau hadikaia ore bona edia ladana be guba henuna amo do lau kokia, bona lau ese oi be bese goadana bona badana ai do lau halaoa, bona oi ese idia do oi hereaia.’+

15 “Bena ororo amo lau diho lalonai, lahi be ororo ai ia araia noho,+ bona taravatu nadi palaka rua be egu imana ai lau dogoatao.+ 16 Bona lau itaia, umui be Iehova emui Dirava dekenai umui kara dika vadaeni! Umui sibona totona boromakau natuna ta be auri amo umui karaia. Iehova ese umui ia oda henia do umui badinaia dalana amo umui raka siri haraga.+ 17 Vadaeni unai nadi palakadia lau abia bona lau negea diho bona emui vairanai idia makohi maragimaragi.+ 18 Bena lau be Iehova vairanai lau goru diho, guna lau karaia bamona, dina 40 bona hanuaboi 40 lalonai. Lau aniani lasi bona ranu lau inua lasi,+ badina Iehova ena vairanai umui be kara dika umui karaia bona ia umui habadua. 19 Iehova be umui dekenai ia badu momokani bona ia noho hegaegae umui ia hadikaia ore totona, unai dainai lau gari dikadika.+ To, unai nega ai danu Iehova ese lau ia kamonai henia.+

20 “Iehova be Arona dekenai ia badu momokani dainai, ia noho hegaegae ia do ia hadikaia ore totona,+ to unai nega ai danu Arona totona lau noinoi. 21 Umui be umui kara dika bona boromakau natuna umui karaia,+ bona unai lau abia bona lahi dekenai lau gabua. Bena lau hamakohia maragimaragi ela bona kahu bamona ai ia lao bona ororo amo ia aru diho sinavai lalonai lau negea.+

22 “Tabera ai,+ Masa ai,+ bona Kibiroto-hatava ai,+ umui ese Iehova umui habadua danu. 23 Iehova ese umui be Kadesi-baranea amo ia siaia raka-lasi+ bona umui dekenai ia gwau, ‘Umui daekau lao bona umui dekenai do lau henia tanona umui abia,’ to umui ese Iehova emui Dirava ena oda herevadia umui badinaia lasi+ bona ia umui abidadama henia lasi+ bona umui kamonai henia lasi. 24 Umui lau dibaia negana amo ema bona hari, umui ese Iehova umui gwau-edeede henia.

25 “Unai dainai Iehova vairanai dina 40 bona hanuaboi 40 lau goru diho noho,+ bona lau be unai bamona lau karaia, badina Iehova ia gwau umui do ia hadikaia ore. 26 Lau ese Iehova lau noinoi henia matamaia bona lau gwau, ‘Siahu Ibounai Lohiabadana Iehova e, namo lasi emu taunimanima oi hadikaia ore. Idia be oiemu taunimanima,*+ oi ese emu siahu amo idia oi ruhaia, bona emu imana goadana amo idia be Aigupito amo oi hakaua raka-lasi.+ 27 Namona be emu hesiai taudia Aberahamo, Isako, bona Iakobo oi laloatao.+ Namo lasi inai bese taudia edia kwara auka bona edia kara dika oi laloa.+ 28 Dika ai oi hakaua raka-lasi tanona ena taunimanima idia gwau: “Iehova be ia hegeregere lasi idia be ia gwauhamatalaia tanona dekenai ia hakaua lao, bona idia ia inai henia dainai, ia ese idia ia hakaua raka-lasi taunimanima lasi gabuna ai idia ia hamasea totona.+ 29 Badina idia be oiemu taunimanima,*+ emu siahu badana bona imana goadana amo idia oi hakaua raka-lasi.’+