Deuteronomi

11 “Namona be Iehova emui Dirava umui lalokau henia+ bona nega ibounai emui maduna ia dekenai umui hagugurua. Bona ena taravatu, ena hahemaoro herevadia, bona ena oda herevadia umui badinaia. 2 Umui diba hari dina lau be umui lau hereva henia noho, to emui natudia lasi. Idia be Iehova emui Dirava ese umui ia matahakani henia dalana idia diba lasi,+ bona ena siahu,+ bona ena imana goadana+ idia itaia lasi. 3 Aigupito ai, Dirava ese king Farao bona ena tano ibounai dekenai ia karaia karadia bona toa idauidau be emui natudia ese idia itaia lasi.+ 4 Eiava idia ese Aigupito ena tuari orea bona Farao ena hosi bona tuari kariota dekenai ia karaia karadia be idia itaia lasi. Aigupito taudia be emui murinai idia heau lao neganai, Davara Kakakaka ena ranu ese ia koudia, bona Iehova ese idia ia hadikaia ore momokani.+ 5 Bona ia ese taunimanima lasi gabuna ai umui ia naria dalana be emui natudia ese idia itaia lasi, ela bona inai gabu dekenai umui mai, 6 eiava ia ese Rubena ena bese tauna Eliaba ena natudia memero, Datana bona Abirama dekenai ia karaia karana idia itaia lasi. Tano ia kehoa bona idia, edia ruma bese, edia palai rumadia, bona edia taunimanima bona animal ibounai ia hadonoa, Israela taudia ibounai edia matana ai.+ 7 To umui be emui matana amo Iehova ese ia karaia kara badadia ibounai umui itaia vadaeni.

8 “Namona be hari dina umui dekenai lau henia oda hereva ibounai umui badinaia, unai amo goada do umui abia bona do umui abia tano dekenai do umui hanaia lao, 9 bona unuseniai do umui noho daudau.+ Unai tano be Iehova ese emui sene taudia bona edia bese dekenai ia gwauhamatalaia,+ milika bona hani amo ia honu tanona.+

10 “Do umui abia tano be Aigupito tano bamona lasi, umui rakatania tanona unai, unuseniai umui be umui gaukara goada emui uhe umui hadoa bona tano umui dairia totona, uma gabu umui dairia hegeregerena. 11 To do umui hanaia lao bona abia tano be mai ena ororo gabudia bona tano palakadia.+ Bona ranu gabuna namona.+ 12 Unai tano be Iehova emui Dirava ese ia naria noho. Iehova emui Dirava ena matana be hanaihanai inai tano ia itaia, lagani ena matamana amo ela bona lagani ena dokona.

13 “Bona bema hari dina umui dekenai lau gwauraia oda herevadia umui badinaia namonamo bona Iehova emui Dirava umui lalokau henia bona ia umui hesiai henia mai emui kudouna ibounai bona mauri* ibounai ida,+ 14 Dirava ese emui tano totona medu be nega korikori ai do ia henia, keru matamaia negana ena medu bona siahu matamaia negana ena medu, bona umui ese emui witi bona emui wain matamata bona emui oela do umui haboua.+ 15 Bona ia ese emui tano ai tubutubu gaudia do ia havaraia emui animal totona, bona umui be do umui aniani bona do umui bogakunu.+ 16 To umui naria namonamo, namo lasi emui kudouna ese umui ia hakaua kerere, bena dirava ma haida umui tomadiho henia bona idia dekenai umui tui diho.+ 17 Dika Iehova ena badu mai siahuna be umui latanai do ia diho, bona ia ese guba do ia koua, unai amo medu do ia diho lasi+ bona tano be anina do ia havaraia lasi bona Iehova ese umui dekenai ia henia tano namona ai do umui mase ore haraga.+

18 “Namona be lauegu hereva be emui kudouna dekenai umui atoa bona emui mauri* ibounai lalonai umui badinaia, bona emui imana dekenai umui kwatua umui laloatao totona, bona kwara gauna bamona emui baguna dekenai umui atoa be namo.+ 19 Bona emui natudia dekenai do umui hadibaia, bona emui ruma ai umui helai neganai, dala dekenai umui raka neganai, umui hekure neganai, bona umui toreisi neganai, unai do umui herevalaia.+ 20 Emui ruma ena du ai bona emui siti edia geiti ai do umui torea, 21 unai amo umui bona emui natudia be Iehova ese emui sene taudia dekenai ia gwauhamatalaia tano ai umui noho daudau diba,+ guba be tanobada ena ataiai ia noho dinadia ibounai hegeregerena.

22 “Bema umui dekenai lau henia oda hereva umui kamonai namonamo bona umui badinaia, bona bema Iehova emui Dirava umui lalokau henia,+ iena dala ibounai dekenai umui raka, bona ia umui badinaia momokani,+ 23 Iehova ese inai bese ibounai be emui vairana amo do ia lulua,+ bona umui idia hereaia bese goadadia bona badadia edia tano do umui abia.+ 24 Emui aena umui atoa gabudia ibounai be do umui abia.+ Tano kaukau amo ela bona Lebanona, bona Euperate sinavai amo ela bona west kahana ena davara,* unai be emui tano hetoana.+ 25 Tau ta be umui do ia koua lasi.+ Bona umui raka lao tanodia ai idia noho taudia dekenai Iehova emui Dirava ese gari do ia havaraia,+ umui dekenai ia gwauhamata hegeregerena.

26 “Kamonai, hari dina lau ese emui vairanai namo bona dika lau atoa.+ 27 Bema Iehova emui Dirava ena oda herevadia, hari dina umui dekenai lau gwauraia herevadia unai, umui badinaia, hahenamo do umui abia,+ 28 to bema Iehova emui Dirava ena oda herevadia umui badinaia lasi,+ bona hari do umui badinaia totona lau gwauraia dalana amo umui raka siri, bona umui diba lasi diravadia umui badinaia, dika do umui davaria.

29 “Iehova emui Dirava ese do umui noholaia tano dekenai umui ia hakaua vareai neganai, Gerisima Ororo ai Dirava ena hahenamo do umui gwauraidia, bona Ebala Ororo ai iena hadikaia herevadia do umui gwauraia.+ 30 Unai ororo rua be Ioridane ena west kahana* dekenai idia noho, Arabaha ai idia noho Kanana taudia edia tano ai. Unai tano ena kahanai Gilegala ia noho, ia be More au badadia kahirakahira ai.+ 31 Badina umui be Ioridane umui hanaia lao noho, Iehova emui Dirava ese umui dekenai ia henia tano umui vareai bona abia totona.+ Unai tano umui abia bona umui noholaia neganai, 32 namona be hari dina umui vairanai lau gwauraia taravatu bona hahemaoro hereva ibounai umui badinaia namonamo.+