Deuteronomi

19 “Iehova emui Dirava ese do ia hadikaia besedia edia tano, Iehova emui Dirava ese umui dekenai do ia henia tano unai, bona umui ese do umui luludia bona edia siti bona edia ruma do umui noholaia neganai,+ 2 Iehova emui Dirava ese umui noholaia totona umui dekenai ia henia tano ai siti toi do umui abia hidi.+ 3 Iehova emui Dirava ese umui noholaia totona umui dekenai ia henia tano be kahana toi dekenai umui haria, bona unai kahana ta ta dekenai unai siti idia noho be namo, bona edia dala umui karaia, unai amo ala-ala tauna be unai siti ta dekenai ia heau lao diba.

4 “Unai siti dekenai ala-ala tauna ia heau lao diba ia mauri totona, bema ena varavara ia alaia to unai ia palanilaia lasi, bona guna ia inai henia lasi,+ 5 hegeregere bema ena varavara ida uda dekenai idia lao au gogoa totona, bona ira ia abia isi au ia utua totona, to ira be hendol amo ia siri bona ena varavara ia botaia bona ia mase, namona be ala-ala tauna be unai siti ta dekenai ia heau lao, ia mauri totona.+ 6 Dika rara davana haloua tauna be mai badu bada ida ala-ala tauna murinai ia heau lao,+ ia dogoatao bona ia alaia, badina unai siti ena dala be daudau herea. To, ala-ala tauna ia mase be maoro lasi, badina guna ena varavara ia inai henia lasi.+ 7 Unai dainai umui lau oda henia: ‘Siti toi umui abia hidi.’

8 “Bema Iehova emui Dirava ese emui tano ena hetoana ia habadaia, emui sene taudia dekenai ia gwauhamata hegeregerena,+ bona idia dekenai ia gwauhamatalaia tano ibounai be umui dekenai ia henia,+ 9 vadaeni inai siti toi sibona lasi, to siti ma toi umui abia hidi diba.+ Unai do ia vara bema hari dina lau henia oda hereva ibounai umui badinaia, anina be Iehova emui Dirava umui lalokau henia bona hanaihanai ena dala dekenai umui raka.+ 10 Unai amo Iehova emui Dirava ese umui dekenai ia henia tano, emui ahuna unai, latanai kerere lasi taudia edia rara do ia bubua lasi,+ bona umui be rara dekenai do umui kerere lasi.+

11 “To bema tau ta ese ena varavara ia inai henia+ bona ia naria noho ia alaia totona, bena ia botaia bona ia mase, bona ala-ala tauna be unai siti ta dekenai ia heau lao, 12 namona be iena siti ena tau badadia ese unuseni amo ia idia boiria bona rara davana haloua tauna ena imana dekenai ia do idia atoa, bona ia mase be namo.+ 13 Ia dekenai umui hebogahisi lasi be namo. Umui ese Israela amo kerere lasi tauna ena rara ia bubua tauna umui kokia,+ unai amo do umui noho namonamo.

14 “Iehova emui Dirava ese umui dekenai ia henia tano ai emui gabu ia henia neganai, namo lasi emui dekena tauna ena gabu hetoana ena maka umui kokia,+ emui sene taudia ese idia atoa gauna unai.

15 “Bema tau ta ia kerere eiava kara dika ta ia karaia, namo lasi hereva hamomokania tauna tamona ese ena kerere ia hamomokania.+ To hereva hamomokania taudia rua eiava toi edia hereva amo do umui diba bema unai samania hereva be momokani.+ 16 Bema hereva hamomokania tauna ta be ma ta ia lalodika henia bona ia samania ia gwau unai tau be ia kerere,+ 17 unai hekwakwanai idia davaria tatau rua be Iehova vairanai do idia gini, bona unai nega ai idia gaukara hahelaga taudia bona hahemaoro taudia vairanai danu.+ 18 Hahemaoro taudia ese do idia tahua namonamo,+ bona bema hereva hamomokania tauna be ia koikoi bona ena tadikaka ia samania koikoi, 19 namona be ena tadikaka dekenai ia ura karaia karana be ia dekenai umui karaia.+ Bona namona be dika gauna be emui huana amo umui kokia.+ 20 Idia noho taudia be unai do idia kamonai bona do idia gari, bona umui huanai unai bamona kara dika ta do idia karaia lou lasi.+ 21 Namo lasi ia umui hebogahisi henia:+ Mauri ena davana be mauri, matana ena davana be matana, isena ena davana be isena, imana ena davana be imana, bona aena ena davana be aena.+