Iosua

5 Ioridane ena west kahana* ai idia noho Amoro taudia edia king+ bona davara badinai idia noho Kanana taudia edia king ibounai+ be Israela taudia dainai edia kudouna ai idia gari dikadika* bona edia lalona ia manoka,+ badina idia kamonai Iehova ese Israela taudia vairanai Ioridane sinavai ranudia ia hakaukaua, unai amo idia hanaia diba.+

2 Unai nega ai Iehova be Iosua dekenai ia gwau: “Umui sibona totona nadi kaia haida umui karaia bona nega iharuana Israela tatau edia kopina umui utua.”*+ 3 Vadaeni Iosua ese nadi kaia ia karaia bona Gibeata-haraloto* ai Israela tatau edia kopina ia utua.+ 4 Iosua ese edia kopina ia utua ena badina be inai: Aigupito idia rakatania kopina utua tatau ibounai, tuari tatau unai, be taunimanima lasi gabuna ai idia laolao neganai idia mase ore.+ 5 Aigupito idia rakatania tatau ibounai be kopina utua taudia, to Aigupito idia rakatania murinai, taunimanima lasi gabuna ai idia vara taudia ibounai be edia kopina idia utua lasi. 6 Israela taudia be lagani 40 taunimanima lasi gabuna ai idia laolao+ ela bona unai bese ibounai, tuari tatau ibounai unai, idia mase ore, idia be Aigupito idia rakatania neganai Iehova idia kamonai henia lasi.+ Iehova be idia dekenai ia gwauhamata idia be unai tano do idia itaia lasi.+ Unai tano be Iehova ese edia sene taudia dekenai ia gwauhamatalaia,+ ia be milika bona hani amo ia honu tanona.+ 7 Vadaeni edia natudia ese edia gabu idia abia.+ Iosua ese unai natudia edia kopina ia utua. Badina edia laolao negana lalonai, idia ese edia kopina idia utua lasi.

8 Israela bese ibounai edia kopina idia utua haorea murinai, idia be kamepa lalonai idia laga-ani ela bona idia namo lou.

9 Bena Iehova be Iosua dekenai ia gwau: “Hari dina lau ese Aigupito ena hemarai be umui amo lau abia siri.” Unai dainai unai gabu ena ladana idia hatoa Gilegala*+ ema bona hari.

10 Israela taudia be Gilegala dekenai idia kamepa noho bona hua ena dina namba 14+ ena adorahi momokani ai, Ieriko ena tano kaukau palakana dekenai Pasova idia karaia. 11 Bona Pasova ena murina dinana ai, tano ena aniani idia ania matamaia, unai be isti lasi paraoa+ bona lahi dekenai idia gabua witi. 12 Bona Israela taudia ese tano ena aniani idia ania dinana murinai, mana ia hedinarai lou lasi,+ to idia ese unai lagani ai Kanana tano ena aniani idia ania matamaia.+

13 Iosua be Ieriko kahirakahira ia noho neganai, ia itaia tau ta+ be mai ena tuari kaia ida ia vairanai ia gini.+ Bena Iosua be ia dekenai ia raka lao bona ia nanadaia: “Oi be emai kahana ai eiava emai inai taudia edia kahana ai?” 14 Unai neganai ia gwau: “Lasi, lau be Iehova ena tuari oreana ena lohia tauna,* hari lau mai inai.”+ Vadaeni Iosua ia goru diho bona ena vairana be tano dekenai ia atoa diho bona ia gwau: “Egu lohia e, lau be emu hesiai tauna, lau dekenai dahaka do oi gwauraia?” 15 Iehova ena tuari orea ena lohia tauna be Iosua dekenai ia gwau: “Emu aena amo emu sandolo oi kokia, badina oi gini gabuna be helaga.” Iosua be maoromaoro unai bamona ia karaia.+