Iosua

21 Levi taudia edia bese kwarana taudia be hahelaga tauna Eleasara,+ Nunu ena natuna Iosua, bona Israela ena bese kwarana taudia dekenai idia lao. 2 Bona Kanana tano Silo ai idia hereva henidia,+ idia gwau: “Iehova be Mose amo ia gwau, ai dekenai siti haida do umui henia, ai noholaia totona, bona emai animal totona rei gabudia danu do umui henia.”+ 3 Vadaeni Iehova ena oda hegeregerena, Israela taudia ese idia abia tanodia amo Levi taudia dekenai siti+ bona edia rei gabudia idia henia.+

4 Idia karaia gadara* be Kohata taudia edia famili totona,+ bona unai Levi taudia, hahelaga tauna Arona ena bese taudia unai, ese Iuda, Simeona,+ bona Beniamina iduhu+ amo siti ibounai 13 idia abia.+

5 Bona Kohata ena bese taudia oredia totona, Eparaima iduhu,+ Dano iduhu, bona Manase iduhu kahana+ ese idia dekenai siti ibounai 10 idia henia.

6 Bona Geresone taudia totona,+ Isakara iduhu, Asere iduhu, Napatali iduhu, bona Basana ai ia noho Manase iduhu kahana ese idia dekenai siti ibounai 13 idia henia.+

7 Merari taudia+ edia famili ta ta totona, Rubena iduhu, Gado iduhu, bona Sebuluno iduhu ese idia dekenai siti ibounai 12 idia henia.+

8 Israela taudia ese gadara ta* amo Levi taudia dekenai siti bona edia rei gabudia idia henia, Iehova ese Mose ia oda henia hegeregerena.+

9 Unai dainai Iuda iduhu bona Simeona iduhu ese idia dekenai idia henia siti edia ladadia be iniseniai idia hedinarai,+ 10 bona unai siti be Arona ena natudia dekenai idia henia, idia be Levi iduhu amo idia mai Kohata besena, badina idia ese ahuna ginigunana idia abia. 11 Idia dekenai Kiriata-araba idia henia+ (Araba be Anaki ena tamana), unai be Heberona,+ ia be Iuda ena ororo gabudiai ia noho, bona ena rei gabudia danu. 12 To siti ena tano bona ena hanua maragidia be Iepune ena natuna, Kaleba dekenai idia henia.+

13 Bona hahelaga tauna Arona ena natudia dekenai Heberona+ bona ena rei gabudia idia henia, unai be ala-ala tauna ia heau mauri siti,+ danu Libina bona ena rei gabudia,+ 14 Iatiri+ bona ena rei gabudia, Esetemoa+ bona ena rei gabudia, 15 Holona+ bona ena rei gabudia, Debiri+ bona ena rei gabudia, 16 Aina+ bona ena rei gabudia, Iuta+ bona ena rei gabudia, Bete-semese bona ena rei gabudia, inai iduhu rua ese idia dekenai siti ibounai 9 idia henia.

17 Bona Beniamina iduhuna amo be, Gibeona+ bona ena rei gabudia, Geba bona ena rei gabudia,+ 18 Anatoto+ bona ena rei gabudia, bona Alamono bona ena rei gabudia, siti ibounai be 4.

19 Arona ena bese taudia, hahelaga taudia unai, dekenai siti ibounai 13 idia henia, bona edia rei gabudia danu.+

20 Bona Levi iduhu huanai idia noho Kohata bese taudia oredia totona, Eparaima iduhu ese idia dekenai siti haida idia henia. 21 Idia dekenai Sekema+ bona ena rei gabudia idia henia, unai be ala-ala tauna ia heau mauri siti,+ ia be Eparaima ena ororo gabudia ai ia noho, bona Gesere+ bona ena rei gabudia, 22 Kibesaimi bona ena rei gabudia, Bete-horono+ bona ena rei gabudia, siti ibounai be 4.

23 Bona Dano iduhu amo be, Eliteke bona ena rei gabudia, Gibetona bona ena rei gabudia, 24 Aialono+ bona ena rei gabudia, Gata-rimono bona ena rei gabudia, siti ibounai be 4.

25 Bona Manase iduhu kahana amo be, Tanaka+ bona ena rei gabudia, Gata-rimono bona ena rei gabudia, siti be rua.

26 Kohata bese taudia oredia ese idia abia siti ibounai bona edia rei gabudia be 10.

27 Bona Levi iduhu amo idia mai Geresone taudia+ ese Manase iduhu kahana amo Golana+ bona ena rei gabudia idia abia, unai be ala-ala tauna ia heau mauri siti, ia be Basana ai ia noho, bona Be-esitera bona ena rei gabudia, siti be rua.

28 Bona Isakara iduhu amo+ be, Kisiono bona ena rei gabudia, Daberata+ bona ena rei gabudia, 29 Iaramutu bona ena rei gabudia, bona Ene-ganima bona ena rei gabudia, siti ibounai be 4.

30 Bona Asere iduhu amo+ be, Misala bona ena rei gabudia, Abidona bona ena rei gabudia, 31 Helekata+ bona ena rei gabudia, bona Rehoba+ bona ena rei gabudia, siti ibounai be 4.

32 Bona Napatali iduhu amo be, Kedesi+ bona ena rei gabudia, unai be ala-ala tauna ia heau mauri siti,+ ia be Galilea ai ia noho, danu Hamoto-doro bona ena rei gabudia, bona Karatana bona ena rei gabudia, siti be toi.

33 Geresone taudia be edia famili ta ta hegeregerena idia abia siti ibounai be 13, mai edia rei gabudia danu.

34 Bona Merari ena bese,+ idia be Levi taudia oredia, ese Sebuluno iduhu amo inai idia abia:+ Iokoneama+ bona ena rei gabudia, Karata bona ena rei gabudia, 35 Dimina bona ena rei gabudia, bona Nahalala+ bona ena rei gabudia, siti ibounai be 4.

36 Bona Rubena iduhu amo be, Besere+ bona ena rei gabudia, Iahasa bona ena rei gabudia,+ 37 Kedemoto bona ena rei gabudia, bona Mepata bona ena rei gabudia, siti ibounai be 4.

38 Bona Gado iduhu amo be,+ Ramoto bona ena rei gabudia, ala-ala tauna ia heau mauri siti unai, ia be Gileada ai,+ danu Mahanaimi+ bona ena rei gabudia, 39 Hesebona+ bona ena rei gabudia, bona Iasera+ bona ena rei gabudia, siti ibounai be 4.

40 Bona Merari taudia ese edia famili ta ta hegeregerena idia abia siti ibounai be 12, idia be Levi taudia oredia.

41 Levi taudia ese Israela taudia amo idia abia siti ibounai be 48, bona edia rei gabudia danu.+ 42 Inai siti ta ta ibounai be mai edia rei gabudia.

43 Vadaeni Iehova ese Israela taudia dekenai tano ibounai ia henia, edia sene taudia dekenai ia gwauhamatalaia tanodia unai,+ bona idia abidia bona noholaia.+ 44 Danu, Iehova ese edia inai taudia amo idia dekenai laga-ani ia henia, edia sene taudia dekenai ia gwauhamata hegeregerena,+ bona edia inai taudia ese idia tuari henidia lasi.+ Iehova ese edia inai taudia ibounai be idia edia imana dekenai ia atoa.+ 45 Iehova ese Israela taudia dekenai ia karaia gwauhamata* namodia ibounai amo, ta ia moru lasi. Oibe, unai gwauhamata ibounai idia guguru.+