Samuela Iharuana

20 Nega momo kerere ia karaia tauna ta ia noho, iena ladana be Sieba,+ ia be Beniamina tauna Bikiri ena natuna. Vadaeni ia ese kibi ia hiriria+ bona ia gwau: “Iese ena natuna Davida amo ita be ahuna lasi, ita be ia ida ita gaukara hebou diba lasi.+ Israela taudia e, emui dirava idauidau dekenai umui giroa lou!”+ 2 Unai neganai, Israela taudia ibounai be Davida idia rakatania bona Bikiri ena natuna Sieba murinai idia raka.+ To Iuda taudia be edia king idia badinaia noho, Ioridane amo ela bona Ierusalema dekenai.+

3 Davida be Ierusalema ai ena ruma dekenai ia ginidae neganai,+ ia ese ena adavana ma haida, ruma naria totona ia rakatania hahine ibounai 10 ia abidia,+ bona ruma ta lalonai ia atodia, bona gima taudia ese idia gimadia. Ia ese idia dekenai aniani ia henia, to idia ida ia mahuta hebou lasi.+ Idia be unai ruma ai idia noho ela bona edia mase dinana, idia be vabu hegeregerena idia noho, ena be edia adavana ia do mauri noho.

4 Vadaeni king be Amasa dekenai ia gwau:+ “Dina toi lau henia, Iuda taudia be lau dekenai oi boiridia mai totona, bona oi danu be iniseniai oi noho be namo.” 5 Vadaeni Amasa ia lao bona Iuda taudia ia boiridia, to ia be king ese ia abia hidi negana ai ia mai lasi, to gabeai ia mai. 6 Bena Davida be Abisai dekenai ia gwau:+ “Bikiri ena natuna Sieba+ ese ita dekenai dika do ia havaraia, bona unai ese Abesaloma ia karaia dika do ia hereaia.+ Lauegu hesiai taudia oi abidia, bona ia murinai do oi lao, unai amo siti mai magu aukana lalonai ia vareai lasi bona ita amo ia heau boio.” 7 Unai dainai Ioaba ena tatau,+ Kereti taudia, Pelete taudia,+ bona tatau goadadia ibounai be Abisai ida Ierusalema idia rakatania bona Bikiri ena natuna Sieba idia lulua lao. 8 Idia be Gibeona ena nadi badana kahirakahira idia ginidae neganai,+ Amasa+ ia mai idia ia hedavari henia totona. Ioaba be ena tuari dabua ia atoa, bona tuari kaia ta be gabana ai ia kwatua beleta lalonai ia noho. Ia raka vaira neganai, unai kaia ia moru diho.

9 Ioaba be Amasa dekenai ia gwau: “Egu tadikaka e, oi namo?” Bena ena imana idibana amo Amasa ena aukina huina ia dogoatao, toana be do ia kisi henia. 10 Amasa be Ioaba ena imana dekenai ia noho tuari kaia ia itaia lasi, bona Ioaba ese unai kaia amo Amasa ena bogana ia gwadaia,+ bona ena bogarau be tano dekenai idia moru diho. Ioaba ese ia gwadaia lou lasi, nega tamona sibona be hegeregere ia hamasea totona. Bena Ioaba bona ena tadikaka, Abisai, be Bikiri ena natuna Sieba idia lulua lao.

11 Ioaba ena tatau amo tau ta be Amasa badinai ia gini bona ia hereva noho, ia gwau: “Daika be Ioaba ena kahana dekenai bona daika be Davida ena, namona be Ioaba ena murinai ia lao!” 12 Unai nega lalonai Amasa be dala ena huana dekenai ena rara lalonai ia hekure noho. Taunimanima ibounai be Amasa idia itaia bona idia gini, vadaeni unai tau ese Amasa be dala amo ia abia siri bona dabua amo ia koua. 13 Unai tauna ese Amasa be dala amo ia abia siri murinai, tatau ibounai be Ioaba murinai idia lao, Bikiri ena natuna Sieba+ idia lulua totona.

14 Sieba be Israela ena iduhu ibounai ia hanaia lao ela bona Abela Bete-maka.+ Bikiri taudia danu idia haboua bona Sieba murinai idia lao.

15 Ioaba bona ena tatau idia mai bona Sieba be Abela Bete-maka ai idia koua hagegea bona magu badinai tano idia haboua daekau, badina unai siti be magu aukana lalonai ia noho. Bena Ioaba bona ena tatau ibounai ese siti ena magu badinai tano idia geia, magu idia hamorua totona. 16 Bona aonega hahine ta be unai siti amo ia boiboi, ia gwau: “Tatau e, kamonai, umui kamonai! Mani Ioaba umui hamaoroa, iniseni ia mai bona do lau hereva henia.” 17 Vadaeni Ioaba be unai hahine dekenai ia lao bona hahine ia gwau: “Oi be Ioaba, a?” Ioaba ia gwau: “Oibe.” Unai neganai hahine be ia dekenai ia gwau: “Lau be emu hesiai hahine, mani egu hereva oi kamonai.” Ioaba ia gwau: “Lau kamonai noho.” 18 Ma hahine ia gwau: “Idaunegai, taunimanima idia gwau, ‘Bema taunimanima be mai edia hekwakwanai, namona be Abela siti dekenai idia lao,’ unuseniai edia hekwakwanai do idia hamaoromaoroa. 19 Israela lalonai emai siti taudia be maino bona abidadama taudia. Lau be idia totona lau hereva noho. Oi ura hadikaia gabuna be siti badana Israela lalonai. Dahaka dainai Iehova ena tano oi hadikaia?”+ 20 Ioaba ia gwau: “Unai siti hadikaia ore lalohadaina lau abia lasi. 21 Lasi momokani! To Bikiri ena natuna ladana Sieba+ totona ai mai, ia be Eparaima ena ororo gabudia+ amo, ia ese King Davida ia gwau-edeede henia. Bema umui ese unai tauna be ai dekenai umui henia, inai siti do ai rakatania.” Bena hahine be Ioaba dekenai ia gwau: “Iena kwarana be magu ataiai amo oi dekenai do ai negea hanai!”

22 Vadaeni unai aonega hahine be maoromaoro ia lao bona taunimanima ibounai ia hereva henia, bena idia ese Bikiri ena natuna Sieba ena kwarana idia utua oho bona Ioaba dekenai idia negea lao. Unai neganai Ioaba ese kibi ia hiriria bona idia ese unai siti idia rakatania, ta ta be edia noho gabuna dekenai idia giroa lou+ bona Ioaba be Ierusalema ai king dekenai ia lao.

23 Ioaba ese Israela ena tuari taudia ibounai ia gunalaia.+ Bona Iehoiada+ ena natuna, Benaia,+ ese Kereti taudia bona Pelete taudia ia gunalaia.+ 24 Bona king ese ia oda henidia ia totona do idia gaukara taudia be Adorama+ ese ia gunalaidia bona Ahiluda ena natuna, Iehosapata,+ be edia rekodi torea tauna. 25 Seva be seketere bona Sadoka+ bona Abiatara+ be hahelaga taudia. 26 Bona Iairi tauna, Ira, be Davida ena hesiai tauna badana ai ia lao.*