King Taudia Iharuana

13 Iuda ena king Ahasaia+ ena natuna Iehoasa+ ena lohia lagani namba 23 ai, Iehu+ ena natuna Iehoahasa be Samaria ai Israela ena king ai ia lao, bona lagani 17 lalonai ia lohia. 2 Ia be Iehova ena vairanai ia kara dika noho, bona Nebata ena natuna Ieroboama ese Israela taudia ia hakaua bona idia karaia kara dikadia ia badinaia noho.+ Unai kara dikadia ia rakatania lasi. 3 Unai dainai Iehova be Israela taudia+ dekenai ia badu momokani,+ bona ia ese idia be Suria ena king Hasaele+ bona ena natuna Bene-hadada+ edia imana ai ia atoa, bona Israela taudia edia mauri dinadia ibounai lalonai edia henunai idia noho.

4 Vadaeni Iehoahasa be Iehova dekenai ia noinoi idia ia lalonamo henia totona, bona Iehova be ena guriguri ia kamonai, badina Suria ena king ese Israela taudia dekenai ia havaraia hisihisi ia itaia.+ 5 Vadaeni Iehova ese Suria amo Israela taudia ia ruhaia totona, hamauria tauna ta ia henia,+ bena Israela taudia be maino ai idia noho lou, guna bamona. 6 To, idia be Ieroboama, Israela taudia ia hakaua bona idia kara dika tauna unai, ena bese taudia edia kara dikadia idia badinaia noho.+ Unai kara dikadia idia do karaia noho, bona Samaria ai au helagana*+ idia kokia lasi. 7 Iehoahasa ena tuari taudia be hosi guia taudia 50 sibona, ena kariota be 10, bona aena amo idia raka tuari taudia be 10,000 sibona, badina Suria ena king ese unai haida ia hadikaia momokani,+ witi kwadia negana ai ia noho kahu bamona.+

8 Iehoahasa ena sivarai ibounai, ia karaia gaudia ibounai bona ena siahu, be Israela ena king taudia ia sivarailaia buka lalonai idia torea, ani? 9 Bena Iehoahasa be ia mase,* bona Samaria ai idia guria.+ Bona ena natuna Iehoasa be king ai ia lao.

10 Iuda ena king Iehoasa ena lohia lagani namba 37 ai, Iehoahasa ena natuna Iehoasa+ be Samaria ai Israela ena king ai ia lao, bona lagani 16 lalonai ia lohia. 11 Ia be Iehova ena vairanai ia kara dika noho, bona Nebata ena natuna Ieroboama ese Israela taudia ia hakaua bona idia karaia kara dikadia ia badinaia noho.+ Unai kara dikadia ia rakatania lasi.

12 Iehoasa ena sivarai ibounai, ia karaia gaudia ibounai bona ena siahu, bona Iuda ena king Amasaia+ ia tuari henia ena sivarai, be Israela ena king taudia ia sivarailaia buka lalonai idia torea, ani? 13 Bena Iehoasa be ia mase,* bona Ieroboama*+ be ena terona ai ia helai. Bona Iehoasa be Samaria ai Israela edia king idia guria gabuna ai idia guria.+

14 Vadaeni Elisaia+ be ia do ia hamasea gorerena ia abia neganai, Israela ena king Iehoasa be ia dekenai ia diho mai bona ia tai, ia gwau: “Egu lohia e, egu lohia e!* Israela ena tuari kariota bona ena hosi guia taudia!”+ 15 Vadaeni Elisaia be ia dekenai ia gwau: “Peva bona diba oi abia.” Bena Iehoasa be peva bona diba ia abia. 16 Israela ena king dekenai ia gwau: “Peva oi abia hegaegae.” Vadaeni peva ia abia hegaegae, bena Elisaia ese ena imana ia dogoatao. 17 Elisaia ia gwau: “Ist kahanai ia noho windo oi kehoa.” Vadaeni windo ia kehoa. Elisaia ia gwau: “Oi pidia.” Ma ia gwau: “Unai be Iehova ena kwalimu* dibana, unai diba ese Suria taudia do ia halusia! Oi ese Apeka+ ai Suria taudia do oi tuari henia ela bona ibounai do oi hamasea.”

18 Ma Elisaia ia gwau: “Diba oi abidia,” bona diba ia abidia. Bena Israela ena king dekenai ia gwau: “Tano oi pidia.” Vadaeni nega toi tano ia pidia bona ia doko. 19 Unai dainai Dirava momokanina ena hesiai tauna ia badu bona ia dekenai ia gwau: “Nega 5 o 6 bamona tano oi pidia be namo! Vadaeni oi ese Suria do oi tuari henia ela bona ibounai oi haorea, to hari nega toi sibona Suria taudia do oi halusia.”+

20 Unai murinai Elisaia ia mase bona idia guria. Nega haida Moaba ena dadidadi tuari oreadia+ be lagani ena matamana ai unai gabu dekenai idia loaloa. 21 Tatau haida be mase tauna ta idia guria noho lalonai, idia itaia dadia orea ta ia mai, unai dainai karaharaga unai mase tauna be Elisaia ena mase guri gabuna ai idia negea bona idia heau. Mase tauna be Elisaia ena turia dekenai ia kamokau neganai, ia mauri lou+ bona ia gini.

22 Iehoahasa ena mauri dinadia ibounai lalonai, Suria ena king Hasaele+ ese Israela taudia ia hahisia.+ 23 To, Iehova ese idia ia lalonamo henia bona ia hebogahisi henia+ bona ia naridia, badina ia ese Aberahamo,+ Isako,+ bona Iakobo+ ida gwauhamata ta ia karaia. Ia ura lasi idia do ia haorea momokani, bona ia ese iena bese taudia nega ta ia laloaboio lasi ia mai bona hari. 24 Suria ena king Hasaele ia mase neganai, ena natuna Bene-hadada be king ai ia lao. 25 Iehoahasa ena natuna Iehoasa ese Hasaele ena natuna Bene-hadada amo siti haida ia abia lou, unai siti be tuari ai Hasaele ese Iehoasa ena tamana Iehoahasa amo ia abia. Iehoasa ese Bene-hadada be nega toi ia halusia,+ bona unai Israela siti ia abidia lou.