Vain Umana Ai Idia Gaukara Taudia Ena Parabole

Iesu ese Perea ai idia kamonai taudia ia hamaoroa, “idia guna taudia momo be do idia gabeai bona gabeai taudia be do idia guna.” (Mataio 19:30) Unai hahedinaraia totona, Iesu ese vain uma ai idia gaukara taudia ena parabole ia gwauraia:

“Guba Basileia be tano biaguna ta bamona, daba momokani ai ia lao ena vain umana ai do idia gaukara taudia ia tahua. Gaukara taudia ida ia lalotamona dina tamona idia gaukara ena davana be denario tamona do ia henidia. Unai murinai ena vain umana dekenai idia ia siaia lao. Daba 9 oklok bamona maketi gabuna dekenai ia lao lou neganai, ia itaia gaukara lasi taudia ma haida idia gini noho, bona idia dekenai ia gwau, ‘Umui danu, vain umana dekenai umui lao, bona umui dekenai davana maorona do lau henia.’ Bena idia lao. Danu dina tubu ai bona adorahi 3 oklok bamona ai ia giroa lao, bona gaukara taudia ma haida ia abidia. Dokonai, adorahi 5 oklok bamona ai ia giroa lao, bona ia itaia ma haida idia gini noho, bona idia dekenai ia gwau, ‘Dahaka dainai dina ibounai iniseniai umui gini kava bona umui gaukara lasi?’ Idia haere, ‘Badina ta ese ai dekenai gaukara ia henia lasi.’ Idia dekenai ia gwau, ‘Umui danu vain umana dekenai umui lao.’”​—Mataio 20:1-7.

Iesu ese “Guba Basileia” bona “tano biaguna ta” ia herevalaia neganai, kamonai taudia be Iehova Dirava idia laloa. Baibel ia gwau Iehova be vain uma biaguna bamona, vain uma be Israela besena ia laulaulaia. (Salamo 80:8, 9; Isaia 5:3, 4) Taravatu kontrakana lalonai idia noho taudia be vain uma ai idia gaukara taudia ida ia hahegeregerea. To Iesu be idaunega Israela besena ia herevalaia lasi. Ia be iena nega ai ia vara gauna ia herevalaia.

Tomadiho gunalaia taudia, hegeregere Farisea taudia be nega ibounai Dirava ena hesiai gaukara idia karaia be namo. To idia ura Iesu idia tohoa dainai, divos karana idia henanadailaia. Idia be vain uma ai dina ibounai idia gaukara taudia bamona, bona idia laloa davana badana do idia abia, dina tamona ena gaukara davana unai.

Hahelaga taudia bona tomadiho gunalaia taudia haida ese Dirava ena hesiai gaukara idia karaia Iuda taudia idia laloa maragi, idia be Dirava ena vain uma ai hora haida sibona idia gaukara taudia bamona. Iesu ena parabole ai, unai taudia be “daba 9 oklok bamona” eiava adorahi kahanai—dina tubu, 3 oklok, bona 5 oklok ai ia abidia.

Idia laloa Iesu ena murinai idia raka tatau bona hahine be “Dirava ena lalonamo do idia abia lasi.” (Ioane 7:49) Edia mauri lalonai idia be haoda gaukara o ima gaukara ma haida idia karaia. Bena, lagani 29 C.E. ai, “vain uma ena biaguna” ese Iesu ia siaia, unai ladana maragi taudia do ia boiria Dirava ena gaukara idia karaia totona, idia be Iesu ena hahediba taudia ai do idia lao. Idia be Iesu ia gwau bamona, “adorahi 5 oklok” ai gaukara idia matamaia taudia.

Iena parabole dokonai, ia ese dina ena dokonai ia vara gauna ia gwauraia: “Adorahi ai, vain uma ena biaguna be uma naria tauna dekenai ia gwau, ‘Gaukara taudia oi boiria bona edia davana oi henia. Adorahi 5 oklok ai idia mai taudia edia davana oi henia guna. Bena gabeai daba maragi ai idia mai taudia edia davana oi henia.’ Adorahi 5 oklok ai idia gaukara taudia idia mai neganai, idia ta ta be denario tamona idia abia. Unai dainai dina ibounai idia gaukara taudia idia mai neganai, idia laloa idia be davana badana do idia abia, to idia dekenai danu denario tamona idia henia. Unai idia abia neganai, tano biaguna dekenai idia maumau matamaia, idia gwau, ‘Gabeai idia mai taudia be hora tamona sibona idia gaukara. Ai be dina ibounai lalonai dina ena siahu dekenai ai gaukara goada, to edia davana be aiemai davana hegeregerena!’ To idia ta dekenai ia haere, ‘Egu turana e, oi dekenai kerere ta lau karaia lasi. Ita lalotamona oi be denario tamona do oi abia, ani? Emu davana oi abia bona oi lao. Lau ura oi dekenai lau henia hegeregerena be inai gabeai idia mai taudia dekenai do lau henia danu. Unai be egu moni dainai, lau be mai egu maoro lau ura dalanai lau gaukaralaia totona, ani? Sedira, lau kara namo dainai oi mama, a?’ Unai dala amo, gabeai taudia be do idia guna, bona guna taudia be do idia gabeai.”​—Mataio 20:8-16.

Iesu ena hahediba taudia be reana parabole ena dokona kahana dainai idia daradara. Edena dala ai Iuda tomadiho gunalaia taudia, sibona idia gwauraia “guna taudia” be “gabeai taudia” ai do idia lao? Bona edena dala ai Iesu ena hahediba taudia be do idia “guna”?

Farisea taudia bona ma haida idia laloa Iesu ena hahediba taudia be “gabeai taudia,” to idia be do idia mai “guna” gaukara davana abia totona. Iesu ena mase amo, Israela bese korikorina ia dadaraia, bona Dirava ese bese matamatana ia abia hidi, “Dirava ena Israela” unai. (Galatia 6:16; Mataio 23:38) Ioane Bapatiso be lauma helaga amo bapatiso abia karana ia herevalaia neganai, unai ia gwauraia. “Gabeai taudia” be unai bapatiso do idia abia guna bona “tanobada ena daudau momokani gabudia dekenai” Iesu do idia gwauraia hedinarai. (Kara 1:5, 8; Mataio 3:11) Iesu ena hahediba taudia be vaira nega ai do ia vara senisi idia lalopararalaia, idia itaia tomadiho gunalaia taudia be idia badu, badina idia be “gabeai taudia” ai idia lao.