Baibel sibona be tomadiho bukadia ibounai ia hereaia. Idaunega amo ema bona hari, Baibel sibona ese taunimanima momo herea edia abidadama ia haidaua. To, haida idia ura Baibel idia maumauraia o tahua namonamo.

Hegeregere, diba bada taudia haida idia laloa hari ita dogoatao Baibel be Baibel ginigunadia edia kopi maoromaorona lasi. Tomadiho ia stadilaia profesa ta ia gwau: “Ita diba lasi, Baibel ginigunadia edia kopi be ita torea lou maoromaoro eiava lasi. Ita dekenai idia noho kopi be kerere amo idia honu, bona unai kopi momo be Baibel ginigunadia idia torea bena lagani handred murinai idia torea. Bona idia be dala idauidau tausen momo amo Baibel ginigunadia amo idia idau.”

Taunimanima haida be edia tomadiho dainai, Baibel ena hereva momokani idia daradaralaia. Hegeregere, tau ta ladana Faizal, ena Keristani lasi famili ese idia hadibaia, Baibel be buka helagana ta, to gabeai idia haidaua. Ia gwau: “Unai dainai, taunimanima ese lau dekenai Baibel idia ura herevalaia neganai, lau daradara. Danu, idia dekenai Baibel korikorina ia noho lasi. Badina Baibel idia haidaua!”

Baibel idia haidaua o lasi ita laloa be gau badana, a? Mani inai henanadai oi laloa: Bema oi diba lasi Baibel ena gwauhamata namodia be toretore ginigunadia ai idia noho eiava lasi, unai gwauhamata namodia do oi abia dae, a? (Roma 15:4) Bema Baibel be taunimanima ese ena kopi kereredia amo idia torea hanai, vadaeni moni gaukara, famili, o tomadiho totona abia hidi oi karaia neganai unai Baibel ena hakaua herevadia do oi gaukaralaia, a?

Ena be Baibel ena toretore gunadia be idia noho lasi, to ita ese idaunegai kopi gunadia​—hegeregere Baibel ena maniuskrip edia kopi tausen momo ita sekea diba. Edena dala ai unai maniuskrip ia dika lasi, taunimanima ese idia hadikaia lasi, bona ena toretore idia haidaua lasi? Edena dala ai unai ese emu abidadama ia hagoadaia bona oi abia dae hari ita gaukaralaia Baibel ena hereva be momokani? Unai henanadai edia haere be inai magasin ai do oi dibaia.

HEKWAKWANAI: Idaunegai, Baibel idia torea taudia be toretore totona papyrus bona parchment idia gaukaralaia momo.a (2 Timoteo 4:13) Edena dala ai unai gaudia dainai Dirava ena hereva ia boio diba?

Papyrus be ia darea, kala ia boio, bona ia manoka haraga diba. Histori torea taudia rua, Richard Parkinson bona Stephen Quirke idia gwau: “Unai lokua gauna ta be daiutu ai idia atoa neganai, kahu o ranu ese idia hadikaia diba eiava idia guria neganai dimairi ese do idia ania.” Idia davaria papyrus haida be dina ena siahu o diari ese idia hadikaia.

Parchment be ia auka, papyrus bamona lasi,, to ia dika diba bema idia naria namonamo lasi o bema dina ena siahu o diari lalonai ia noho daudau.b Danu dimairi ese parchment idia ania. Buka ta (Everyday Writing in the Graeco-Roman East) ia gwau, unai dainai, idaunegai sivaraidia momo be “idia dika o boio.” Bema Baibel be unai dimairi bamona gaudia ese idia hadikaia, ena hereva be idia boio vadaeni.

BAIBEL IA BOIO LASI DALANA: Iuda taudia edia taravatu ese king ibounai ia doria Baibel ena buka ginigunadia faiv o “Dirava ena Taravatu . .  . be ia sibona do ia torea hanai, buka ta dekenai.” (Deuteronomi 17:18) Ma danu, toretore taudia ginigunadia ese unai buka ena kopi momo idia karaia dainai, aposetolo edia negai Israela bona Makedonia ena sinagoga dekenai idia davaria diba. (Luka 4:16, 17; Kara 17:11) Dahaka dainai maniuskrip gunadia haida be idia do noho ema bona hari?

New Testament ia diba bada tauna, Philip W. Comfort ia gwau: “Nega momo Iuda taudia ese Baibel ena lokua toretore be hodu lalonai idia atoa, unai amo idia gimaia.” Toana be Keristani taudia be unai dala tamona idia badinaia noho. Unai dainai Baibel maniuskrip ginigunadia haida be hodu lalonai sibona lasi, to daiutu o kohua bona tano kaukaudia dekenai idia davaria.

ENA NAMO: Baibel ena kahana haida edia maniuskrip​—haida be lagani 2,000 mai kahana gaudia—​tausen momo be idia do noho ema bona hari. Idaunegai idia torea bukadia momo be idia noho daudau lasi, to Baibel sibona.

HEKWAKWANAI: Politikol bona dubu gunalaia taudia momo idia ura Baibel ena hereva idia haidaua. Nega momo edia siahu o dagi idia gaukaralaia taunimanima idia taravatua Baibel idia abia lasi, halasia lasi, o hahanaia lasi totona. Haheitalai rua ita laloa:

• Lagani 167 B.C.E. bamona: Seleucid ena King Antiochus Epiphanes be Iuda taudia ia doria Greek tomadiho idia abia dae sibona lasi, to oda ia henia Heberu Toretoredia edia kopi ibounai idia hadikaia totona. Histori torea tauna Heinrich Graetz ia gwau, king ena ofesa taudia ese “Taravatu ena lokua toretoredia idia davaria neganai, idia darea bona lahi dekenai idia gabudia. Bona idia ese unai lokua toretore amo goada bona heduru idia abia taudia ibounai idia hamasea.”

• Lagani 800 bamona: Katolik gunalaia taudia haida be idia badu, badina edia dubu taudia be Katolik ena hahediba herevadia lasi to Baibel ena hereva idia harorolaia; edia ladana idia gwauraia lalorua taudia badina idia dekenai be Baibel buka idia noho, to Latin gado ena Salamo bukadia idia dogoatao lasi. Dubu ta ena kaunsolo ese oda idia henia edia tatau be “hanaihanai, mai lalogoada, bona abidadama ida lalorua taudia do idia tahua . . . edia ruma bona Baibel idia hunia gabudia do idia sekea. . . . Ruma ta ai unai lalorua taudia idia davaria neganai, idia hadikaia ore be namo.”

Bema Baibel idia inai henia taudia idia kwalimu, reana Baibel ena sivarai do ia boio.

BAIBEL IA BOIO LASI DALANA: King Antiochus ia ura Israela ia hadikaia, to Iuda taudia be tano ma haida ai idia noho danu. Unai dainai, diba bada tauna ta ia gwau, Keristani taudia ginigunadia edia negai, Iuda taudia 60 pesen mai kahana be Israela ai idia noho lasi. Unai idau gabu ai, Iuda taudia ese Baibel​—vaira negana ai idia vara taudia, Keristani taudia danu, ese idia gaukaralaia Baibel​—be sinagoga ai idia atoa.​—Kara 15:21.

Lagani 800 lalodiai, Baibel idia laloa bada taudia be dagedage taudia dekenai idia gari lasi to Baibel be gado ma haida ai idia hahanaia noho bona ena kopi idia karaia. Lagani 1500 C.E. bamona ai, printa masini idia do karaia lasi neganai, Baibel ena kahana haida be reana gado 33 mai kahana ai ia noho vadaeni. Unai dainai, Baibel hahanaia bona halasia gaukarana be ia haraga momokani.

ENA NAMO: Herevana king bona dubu gunalaia taudia ese hagaria hereva idia gwauraia, to Baibel sibona be tanobada ibounai dekenai ia lao bona gado momo dekenai idia hahanaia vadaeni. Baibel dainai, tano haida ai taunimanima ese edia taravatu bona gado idia hamaoromaoroa. Bona unai buka ese taunimanima milioni momo edia mauri ia hanamoa.

HEKWAKWANAI: Dagedage taudia o dimairi bamona gaudia ese Baibel idia hadikaia diba lasi. To, Baibel idia torea bona hahanaia taudia haida ese Baibel ena sivarai idia haidaua toho. Nega haida, idia ura lasi Baibel ena hereva idia badinaia to idia ura edia lalohadai be Baibel lalonai idia torea. Haheitalai haida ita laloa:

• Tomadiho gabudia eiava dubu: Lagani 300 ia lao 100 B.C.E. edia huanai, Samaritan Pentateuch idia torea taudia ese Esodo 20:17 ai inai hereva idia torea, “Gerisima ororona ai. Bona unuseniai oi ese boubou patana oi haginia be namo.” Badina Samaria taudia idia ura Baibel ese do ia hamomokania herevana be, dubu be “Gerisima ororona” ai do idia haginia.

• Toi tamona herevana: Baibel idia torea ore bona lagani 300 murinai, Toi Tamona sivaraina ia torea tauna ta ese 1 Ioane 5:7 dekenai ia atoa kau herevana be, “guba ai, Tamana, Hereva, bona Lauma helaga: bona idia toi be tamona.” Unai hereva be toretore ginigunadia ai idia noho lasi. Baibel ia diba bada tauna Bruce Metzger ia gwau: “Lagani 600 amo” unai hereva be “Latin gado gunana bona [Latin] Vulgate gado edia maniuskrip ai idia hedinarai momo.”

• Dirava ena ladana: Baibel hahanaia taudia momo be Iuda edia sene taudia edia hereva dainai Dirava ena ladana be Baibel amo idia kokia. Unai ladana ena gabunai be dagi ladadia hegeregere, “Dirava”o “Lohiabada” idia torea, to Baibel lalonai unai dagi ladadia be Havaraia tauna sibona lasi, to danu taunimanima, kaivakuku, bona Diabolo idia herevalaia.​—Ioane 10:34, 35; 1 Korinto 8:5, 6; 2 Korinto 4:4.a

BAIBEL IA BOIO LASI DALANA: Ginigunana: Ena be Baibel idia torea taudia haida be edia gaukara idia laloa bada lasi bona idia koikoi, to momo be mai edia aonega bona edia gaukara idia karaia namonamo. Lagani 600 C.E. ia lao lagani 1000 C.E. edia huanai, Masorete taudia ese Heberu Toretoredia idia torea hanai bona Masorete Toretoredia idia halasia. Idia ese hereva o leta ta ta edia namba idia duahia, unai amo kerere ta be lasi. Toretore ginigunana dekenai kerere haida idia davaria neganai, buka ena saidi dekenai idia torea. Masorete taudia idia ura lasi Baibel ena hereva idia haidaua. Profesa ta ladana, Moshe Goshen-Gottstein ia gwau, “idia ura lasi Baibel ena hereva idia haidaua badina idia dekenai unai be kara dika rohorohona.”

Iharuana: Hari, Baibel idia diba bada taudia be maniuskrip edia heduru dainai kerere idia davaria. Hegeregere, lagani momo lalonai dubu gunalaia taudia ese taunimanima idia hadibaia edia Latin gado Baibel ai be hereva maorodia idia noho. To, idia ese unai Baibel ena 1 Ioane 5:7 dekenai hereva kereredia haida idia torea, inai atikol ena matamanai ita herevalaia bamona. Unai hereva be English gado Baibel King James Version dekenai idia torea danu! To, idia davaria maniuskrip ma haida ese dahaka idia hahedinaraia? Bruce Metzger ia gwau: “Unai hereva [1 Ioane 5:7 ai] be idaunegai maniuskrip (Syriac, Coptic, Armenian, Ethiopic, Arabic, Slavonic) dekenai ia noho lasi, to Latin gado gauna sibona ai ia noho.” Unai dainai, idia hamatamataia lou King James Version bona Baibel ma haida amo unai hereva kererena idia kokia.

Maniuskrip gunadia ese idia hamomokania Baibel ena sivarai be idia gimaia namonamo, a? Lagani 1947 ai, Mase Davara Lokua Toretoredia idia davaria neganai, diba bada taudia ese unai lagani tausen gunanai idia torea gauna be Heberu Masorete ai idia noho hereva ida idia hahegeregerea diba. Unai lokua toretorena idia hanamoa oreana ena memba ta ia gwau, lokua toretorena ta ese ia “hamomokania lagani tausen momo lalonai Iuda toretore taudia ese Baibel ena hereva be idia torea maoromaoro bona goevagoeva.”

Dublin, Ireland ai, Chester Beatty Library dekenai be papyri gunadia idia atoa. Kahirakahira Keristani Grik Toretoredia ibounai bona lagani 300 C.E. ai idia torea maniuskrip​—Baibel idia torea ore bena lagani 100 bamona murinai idia torea maniuskrip unai​—be unai papyri ese ia laulaulaia bamona. Diksenari ta (The Anchor Bible Dictionary) ia gwau “ena be papyri ai hereva matamatadia momo ai davaria, to danu, idia ese idia hahedinaraia Baibel ena hereva be idia torea maoromaoro ema bona hari.”

ENA NAMO: Baibel ena maniuskrip ginigunadia momo ese Baibel ena hereva idia hagagevaia lasi, to idia hanamoa. Sir Frederic Kenyon be Keristani Grik Toretoredia ia herevalaia neganai, ia gwau: “Idaunegai maniuskrip momo herea ese Baibel ena hereva idia hamomokania, buka ma ta be unai bamona lasi, bona diba bada taudia ibounai idia gwau diba Baibel ena hereva ibounai be momokani.” Bona diba bada tauna William Henry Green be Heberu Toretoredia ia herevalaia neganai, ia gwau: “Reana ita gwau, Baibel sibona be idia torea maoromaoro.”

Baibel be ia boio lasi. Unai dainai, hari oi ese ta oi hoia bena oi duahia diba. Idia hahanaia namonamo Baibel oi duahia neganai, oi gwau diba oi be toretore ginigunadia ena kopi maoromaorona ta oi duahia.a To, dahaka dainai Baibel ia boio lasi be hoa gauna, ena be dimairi o gau ma haida ese idia hadikaia, dagedage taudia idia noho, bona haida ese ena sivarai idia haidaua toho? Dahaka dainai Baibel be hereadae?

Baibel idia duahia taudia momo edia hereva be aposetolo Paulo ena hereva hegeregerena, ia gwau: “Toretore Helagadia be Dirava ena hahekau henunai idia torea.” (2 Timoteo 3:16) Idia gwau unai buka ia boio lasi badina ia be Dirava ena hereva hereadaena bona Dirava ese ia gimaia ema bona hari. Faizal (rau 3 ai ita herevalaia tauna) be gabeai Baibel ia stadilaia, ia ura diba ena turadia edia hereva be momokani o lasi. Ia dibaia gaudia dekenai ia hoa. Ia itaia Kerisendom edia hadibaia hereva momo be Baibel ai idia noho lasi. Danu, ia moalelaia gauna badana be inai: Dirava ena ura tanobada totona be Baibel ai ia davaria.

Ia gwau: “Lau diba egu Baibel be Dirava ena harihari gauna. Bema Dirava ese iunives ia karaia, ita gwau diba Ia be mai ena siahu buka ta ita dekenai ia henia bena do ia gimaia, ani? Oibe, Dirava ena siahu be bada. Lau ese Siahu ibounai Diravana ena siahu lau laloa maragi be maoro lasi.”​—Isaia 40:8.