Dirava ese Evolusen amo Mauri Gaudia Idauidau Ia Havaraia, A?
Baibel ena haere
Lasi. Baibel ia gwau Dirava ese taunimanima ia havaraia bona animal bona tubutubu gaudia “idauidau” danu. (Genese 1:12, 21, 25, 27; Apokalupo 4:11) Ia gwau bese ibounai be iseda tama sina ginigunana, Adamu bona Heva, amo idia vara. (Genese 3:20; 4:1) Danu, Baibel ia gwau lasi Dirava ese evolusen ia gaukaralaia mauri gaudia idauidau ia havaraia totona. Momokani, saiens taudia idia gwau mauri gauna ta ena orea be idauidau, bona Baibel be unai ia hamomokania.
Dirava ese evolusen ia gaukaralaia, a?
Dirava ese evolusen amo mauri gaudia ia havaraia karana idia abia dae taudia edia lalohadai be idauidau. Encyclopædia Britannica ia gwau, “taunimanima haida idia abia dae Dirava ese idia vara kava gaudia amo mauri gaudia idauidau ia havaraia.”
Evolusen dainai idia vara lalohadai ma haida:
Mauri gaudia ibounai be idaunegai idia noho mauri gaudia amo idia vara.
Mauri gauna ta be mauri gauna ma ta ai ia lao diba.
Reana Dirava ese unai dala ia gaukaralaia.
Evolusen be Baibel ida ia hegeregere, a?
Evolusen lalohadaina ese ia hahedinaraia Dirava ese gau ibounai ia havaraia herevana Genese bukana lalonai be maoro lasi. To, Iesu ese ia hamomokania Genese bukana ese ia sivarailaia gaudia be idia vara momokani. (Genese 1:26, 27; 2:18-24; Mataio 19:4-6) Baibel ia gwau, Iesu be tanobada dekenai ia do mai lasi neganai, ia be Dirava ida guba ai ia noho bona Dirava ia durua “gau ibounai” idia havaraia totona. (Ioane 1:3) Unai dainai, Dirava ese evolusen amo mauri gaudia idauidau ia havaraia lalohadaina be Baibel ena hahediba herevadia hegeregerena lasi.
Tubutubu gaudia bona animal idia mauri totona edia toana idia haidaua be edena bamona?
Mauri gauna ta ena orea idauidau edia namba be Baibel ese ia herevalaia lasi. Danu, Dirava ese ia havaraia animal bona tubutubu gaudia idauidau be idia idau diba gabu matamata dekenai idia mauri totona, Baibel be unai lalohadai dekenai ia lalotamona. Haida idia laloa unai be evolusen, to mauri gauna matamata ia vara lasi.