“Umui Do Ia Hagoadaia”—Edena Dala Ai?

1. Idaunegai Dirava ese edena dala ai iena hesiai taudia dekenai goada ia henia?

BAIBEL ia gwau abidadama taudia be goada taudia. To idia goada bada taudia be nega haida idia lalogoada lasi. Hegeregere, King Davida be nega haida ia mamia ia ‘goada bada, ororo bamona,’ to nega haida ia “gari bada” danu. (Sal 30:7) Dirava ena lauma helaga ese Samson dekenai goada bada ia henia, to Samson ia laloparara bema Dirava ese ia hagoadaia lasi, ‘do ia manoka bona taunimanima ibounai bamona do ia lao.’ (Hah. 14:​5, 6; 16:17) Oibe, unai abidadama tatau idia goada, badina Iehova ese idia dekenai goada ia henia.

2. Dahaka dainai aposetolo Paulo ia gwau ia manoka neganai ia goada? (2 Korinto 12:​9, 10)

² Aposetolo Paulo ia laloparara Iehova amo goada ia abia be namo. (2 Korinto 12:​9, 10 duahia.) Ita momo bamona, Paulo danu be mai ena gorere. (Gal. 4:​13, 14) Nega haida, kara maoromaoro ia karaia totona ia hekwarahi. (Roma 7:​18, 19) Bona nega haida ia lalohekwarahi bona ia diba lasi ia dekenai dahaka do ia vara. (2 Kor. 1:​8, 9) To, Paulo ia manoka neganai ia goada. Edena dala ai? Iehova ese Paulo dekenai goada ia henia ena hekwakwanai ia haheaukalaia totona.

3. Inai atikol ai dahaka henanadai do ita haerelaia?

³ Iehova ia gwauhamata ita do ia hagoadaia danu. (1 Pet. 5:10) To, unai goada ita abia totona gau ta ita karaia be namo. Mani inai haheitalai ita laloa. Motuka ena enjin be mai ena goada motuka ia haheaua totona. To, motuka ia heau totona, namona be draiva ese accelerator ia moia. Unai hegeregerena, Iehova be ia hegaegae ita dekenai goada do ia henia, to ena goada ita abia totona namona be kara ta ita karaia. Iehova be dahaka ia hegaegaelaia ita ia hagoadaia totona? Bona dahaka ita karaia diba goada ita abia totona? Baibel lalonai, Iehova ese taunimanima toi ia hagoadaia bona edia sivarai amo unai henanadai edia haere do ita davaria. Idia be peroveta tauna Iona, Iesu ena sinana Maria bona aposetolo Paulo. Danu, hari inai negai Iehova ese ita ia hagoadaia daladia do ita herevalaia.

GURIGURI BONA STADI KARANA AMO GOADA ITA ABIA

4. Edena dala ai Iehova amo goada ita abia diba?

⁴ Iehova amo goada ita abia dalana ta be ia do ita guriguri henia. Iseda guriguri ia haerelaia neganai, Iehova ese ita dekenai ia henia “siahuna” be “taunimanima edia siahu ia hereaia.” (2 Kor. 4:7) Goada ita abia dalana ma ta be iena Hereva ita duahia bona laloa dobu. (Sal. 86:11) Baibel ai Iehova ena hereva ita dekenai be “mai ena siahu.” (Heb. 4:12) Iehova ita guriguri henia bona Baibel ita duahia neganai, goada ita abia, ita haheauka, ita moale eiava iseda asainmen ita hagugurua diba. Mani, Iehova ese peroveta tauna Iona ia hagoadaia dalana ita herevalaia.

5. Dahaka dainai Iona be goada ia abia be namo?

⁵ Peroveta tauna Iona be goada ia abia be namo. Ia be Iehova ese ia henia asainmen amo ia heau boio. Unai dainai, lai gubana lalonai ia bona bouti ai idia gaukara taudia be kahirakahira idia mase. Iona be davara dekenai idia negea diho neganai, gwarume badana ese ia hadonoa. Gwarume ena bogana lalonai ia noho be gari gauna momokani. Iona ena hemami be edena bamona? Reana, ia laloa unuseniai do ia mase. Reana ia laloa Iehova ese ia dadaraia. Momokani, Iona be ia lalohekwarahi bada.

6. Iona 2:​1, 2, 7 hegeregerena, Iona be gwarume ena bogana lalonai ia noho neganai, edena dala amo goada ia abia?

⁶ Iona be gwarume ena bogana lalonai ia noho neganai, goada ia abia totona dahaka ia karaia? Gau ginigunana be, Iehova ia guriguri henia. (Iona 2:​1, 2, 7 duahia.) Ena be guna Iona be Iehova ia kamonai henia lasi, to ia helalo-kerehai bona ia abia dae Iehova be ena guriguri do ia kamonai. Gau iharuana be, Iona ese guna ia duahia siri ia lalodia dobu. Unai ita diba, badina Iona karoa 2 ai ena guriguri lalonai Salamo bukana ai idia noho herevadia ia gaukaralaia. (Iona 2:​2, 5 be Salamo 69:1; 86:7 ida hahegeregerea.) Unai ese ia hahedinaraia Iona be unai siri ia diba namonamo. Unai nega aukana lalonai unai siri ia lalohadailaia karana amo, ia diba momokani Iehova ese do ia durua. Iehova ese Iona ia hamauria, bona gabeai ia hegeregere ena asainmen ia karaia totona.—Iona 2:10–3:4.

7-8. Taiwan ai tadikaka ta be hekwakwanai ia davaria neganai, edena dala ai goada ia abia?

⁷ Hahetoho idauidau ita davaria neganai, Iona ena haheitalai ese ita ia durua diba. Hegeregere, Taiwan ai tadikaka ta ladana Zhimingb be mai ena gorere badana. Danu, Iehova ia tomadiho henia dainai, ena famili ese idia dagedage henia. To, Iehova ia guriguri henia bona sibona ena stadi karana amo goada ia abia. Ia gwau: “Nega haida hekwakwanai idia vara neganai, lau lalohekwarahi dainai sibona egu stadi lau karaia lasi.” To, Iehova dekenai ia tabekau. Ma ia gwau: “Gau ginigunana be Iehova dekenai lau guriguri. Bena, taia gauna (earphones) lau atoa bona Kingdom anedia lau kamonai. Nega haida gadona maragina ai ane lau abia ela bona egu lalona ia goada. Bena egu stadi lau hamatamaia.”

⁸ Zhiming be ena stadi karana amo ia dibaia gaudia ese idia durua nega aukadia ia haheaukalaia totona. Hegeregere, opereisen badana murinai ia namo ia lao lalonai, ena rara sel kakakaka be ia diho, unai dainai nesi ese ia hamaoroa rara ia abia be namo. Opereisen ia do abia lasi hanuaboina ai, Zhiming ese unai bamona opereisen ia abia taihu ta ena sivarai ia duahia. Iena rara sel kakakaka be taina ia namo, to unai taihu ena rara sel kakakaka be ia diho momokani. To, rara ia abia lasi bona ena gorere amo ia namo. Unai ekspiriens ese Zhiming ia durua ia gini goada totona.

9. Bema hekwakwanai ta dainai oi lalohekwarahi bada, dahaka oi karaia diba? (Laulau itaia danu.)

⁹ Hekwakwanai ta oi davaria bona oi lalohekwarahi bada dainai, Iehova oi guriguri henia diba lasi, a? Eiava tauanina ia hesiku dainai oi stadi lasi, a? Namona be oi laloatao, Iehova be emu hekwakwanai ibounai ia lalopararalaia. Unai dainai, ena be guriguri kwadogina oi gwauraia, oi daradara lasi Iehova ese emu dabu gaudia do ia henia. (Ef 3:20) Bema oi gorere, hesiku, eiava oi lalohekwarahi dainai oi stadi diba lasi, Baibel eiava pablikeisen ta ena rekodin oi kamonai diba. Danu jw.org amo, iseda ane oi kamonai eiava vidio ta oi itaia diba. Iehova oi guriguri henia bona Baibel bona pablikeisen ma haida amo heduru oi tahua neganai, dala oi kehoa Iehova ese oi ia hagoadaia totona.

TADIKAKA TAIHU AMO GOADA OI ABIA

10. Iseda Keristani tadikaka bona taihu ese edena dala ai ita idia hagoadaia diba?

¹⁰ Iehova ese iseda tadikaka taihu do ia gaukaralaia diba ita idia hagoadaia totona. Bema hekwakwanai ita davaria eiava asainmen aukana ta ita hagugurua totona ita hekwarahi, idia ese ita idia “durua bona hagoadaia bada” diba. (Kol. 4:​10, 11) “Hekwakwanai negadia ai” ita ura iseda turadia ese ita idia durua. (Aon. 17:17) Ita lalomanoka neganai, iseda tadikaka bona taihu ese iseda dabu gaudia idia henia, iseda lalona idia hagoadaia, bona ita idia durua mai abidadama ida Iehova do ita hesiai henia noho. Mani Iesu ena sinana, Maria, be ma haida amo heduru ia abia dalana ita herevalaia.

11. Dahaka dainai ta ese Maria ia hagoadaia be namo?

¹¹ Mani oi laloa, aneru Gabriela ese Maria ia hamaoroa do ia rogorogo, unai neganai reana Maria ia lalohekwarahi bada badina ia do headava lasi. Ia be natudia naria gaukarana ia diba lasi, to Mesia ai do ia lao merona do ia naria. Bona ia be tau ta ida ia mahuta hebou lasi dainai, edena bamona iena maoheni tauna Iosepa dekenai unai sivarai do ia gwauraia?—Luka 1:​26-33.

12. Luka 1:​39-45 hegeregerena, edena dala ai Maria ese goada ia abia?

¹² Edena dala ai Maria ese goada ia abia unai asainmen aukana ia hagugurua totona? Haida amo heduru ia tahua. Hegeregere, unai asainmen ia diba namonamo totona Gabriela ia nanadaia. (Luka 1:34) Unai murinai, Iuda ena “ororo momo gabuna ai” ia lao ena varavara Elisabeta ia vadivadi henia totona. Unai laolao be mai anina bada. Elisabeta be Maria ia hanamoa bona Iehova ena siahu amo Maria ena bogana lalonai ia noho beibi ia perovetalaia. (Luka 1:​39-45 duahia.) Maria ia gwau, Iehova be iena “imana amo siahu karadia ia karaia.” (Luka 1:​46-51) Iehova ese Gabriela bona Elisabeta amo Maria ia hagoadaia.

13. Bolivia ai taihu ta be ena tadikaka taihu amo heduru ia noia neganai, dahaka ia vara?

¹³ Maria bamona, oi danu be emu tadikaka taihu amo goada oi abia diba. Bolivia ai, taihu ta ladana Dasuri be unai bamona heduru ia ura abia. Ena tamana be ia gorere bada bona hospital dekenai ia noho neganai, ia ese tamana ia naria. (1 Tim. 5:4) Unai be maduna metauna. Ia gwau: “Nega momo lau mamia egu goada ia ore.” Matamanai, haida dekenai heduru totona ia noinoi lasi. Ma ia gwau: “Lau ura lasi tadikaka taihu idia hekwarahi. Lau laloa, ‘Iehova ese lau dekenai heduru do ia henia.’ Bena lau laloparara haida edia heduru lau tahua lasi karana be hegeregere, lau ura lau sibona ese egu hekwakwanai lau huaia.” (Aon. 18:1) Unai dainai, Dasuri ese ena turadia haida dekenai revareva ia siaia bona ena hekwakwanai ia herevalaia. Ia gwau: “Lau hoa bada badina egu Keristani turadia ese lau idia hagoadaia bada. Hospital dekenai aniani idia mailaia bona Baibel siridia amo lau idia hagoadaia. Ita moale badina ita diba sibona ita noho lasi. Ita be Iehova ena ruma bese badana lalonai ita noho. Bona idia ura ita idia durua, ita danu idia tai, bona ita idia hagoadaia Iehova ita hesiai henia noho totona.”

14. Dahaka dainai elda taudia amo heduru ita abia dae be namo?

¹⁴ Iehova ese ita dekenai goada ia henia dalana ta be elda taudia amo. Idia be harihari gaudia bamona, Iehova ese ia gaukaralaia ita dekenai goada idia henia totona. (Isa. 32:​1, 2) Unai dainai, emu lalohekwarahi gaudia be elda taudia dekenai oi gwauraia diba. Bona mai moale ida edia heduru oi abia dae. Idia amo Iehova ese oi do ia hagoadaia.

EMU HELARO ESE OI DO IA HAGOADAIA

15. Keristani taudia ese dahaka helaro idia laloa bada?

¹⁵ Baibel ena gwauhamata herevadia ese ita idia hagoadaia diba. (Roma 4:​3, 18-20) Keristani taudia haida edia helaro be guba ai mauri hanaihanai do idia abia, bona ma haida edia helaro be tanobada paradaisona ai do idia mauri hanaihanai. Iseda helaro ese ita ia hagoadaia dainai hekwakwanai ita haheaukalaia, sivarai namona ita harorolaia bona kongrigeisen lalonai asainmen idauidau ita karaia. (1 Tes. 1:3) Unai helaro ese aposetolo Paulo ia hagoadaia danu.

16. Dahaka dainai aposetolo Paulo be goada ia abia be namo?

¹⁶ Paulo be goada ia abia be namo. Korinto taudia dekenai revareva ia torea neganai, hodu ta ida sibona ia hahegeregerea. Ia be ‘metau idauidau ese idia koua,’ ia “laloa daradara,” idia “dagedage” henia, bona ‘hisihisi idauidau ese idia hametaua.’ Bona kahirakahira iena mauri ia haboioa. (2 Kor. 4:​8-10) Paulo ena misinari laolao ihatoina ai unai hereva ia toredia. Bona unai ia torea murinai, hekwakwanai ma haida ia davaria. Idia dagedage henia, idia arest, kahirakahira davara ai ia maloa mase, bona dibura ruma ai idia atoa.

17. Korinto Iharuana 4:​16-18 hegeregerena, dahaka ese Paulo ia durua hekwakwanai ia haheaukalaia totona?

¹⁷ Paulo be ena helaro ia laloa dainai goada ia abia ia haheauka totona. (2 Korinto 4:​16-18 duahia.) Korinto taudia ia hamaoroa, ena be ena tauanina ia ‘dika ia lao’, to unai ese ena lalona do ia hamanokaia lasi. Paulo be vaira nega ia laloa. Guba ai mauri hanaihanai do ia abia helarona be “hairai hereadaena,” bona ia davaria hekwakwanai ia hereaia. Paulo ese unai helaro ia laloa dobu, bona unai dainai “dina ibounai goada matamata ia abia noho.”

18. Edena dala ai nega matamata ena helaro ese Tihomir bona iena famili ia hagoadaia?

¹⁸ Bulgaria ai tadikaka ta ladana Tihomir be nega matamata ena helaro ese ia hagoadaia. Lagani haida gunanai, ena tadina, Zdravko, be aksiden lalonai ia mase. Unai dainai, Tihomir ia lalohisihisi bada. Ia bona ena famili be idia haheauka totona, toreisi lou do ia vara dalana idia lalohadailaia. Ia gwau: “Palani ai karaia edeseniai Zdravko do ai hedavari henia, ia totona dahaka aniani do ai nadua, iena pati dekenai daika do ai boiria, bona do ai kikilaia dina gabedia edia sivarai ai laloa.” Tihomir ia gwau edia helaro idia laloa karana ese ena famili ia durua idia haheauka, bona Iehova ese nega korikori ai ena tadina do ia hatoreaisi lou negana idia naria.

19. Dahaka oi karaia diba emu helaro oi hagoadaia totona? (Laulau itaia danu.)

¹⁹ Edena dala ai emu helaro oi hagoadaia diba? Hegeregere, bema emu helaro be tanobada ai mauri hanaihanai do oi abia, namona be Baibel ese Paradaiso ia gwauraia ena sivarai oi duahia bona oi laloa dobu. (Isa. 25:8; 32:​16-18) Unai tanobada matamatana ai mauri be edena bamona oi lalohadailaia. Unuseniai oi sibona oi piksaia. Daika oi itaia? Dahaka regena oi kamonai? Emu hemami be edena bamona? Paradaiso ena mauri oi laloa totona, iseda pablikeisen ai idia torea laulau eiava miusiki vidio ta hegeregere, The New World to Come, Just Around the Corner, eiava Imagine the Time oi itaia. Bema hanaihanai tanobada matamata ena helaro ita laloa noho, do ita mamia iseda hekwakwanai be “nega sisina gauna bona [idia] metau lasi.” (2 Kor. 4:17) Iehova ese ia henia helarona amo, oi do ia hagoadaia.

20. Ena be iseda goada ia ore, to edena dala ai ita goada lou diba?

²⁰ Ena be iseda goada ia ore, “Dirava dainai goada do ita abia.” (Sal. 108:13) Iehova amo goada oi abia totona, ia ese gau namodia haida ia hegaegaelaia vadaeni. Unai dainai, bema oi ura asainmen ta oi hagugurua, hekwakwanai ta oi haheaukalaia, eiava oi moale noho totona, namona be Iehova oi guriguri henia goadagoada bona sibona emu stadi karana amo iena heduru oi tahua. Keristani tadikaka bona taihu edia heduru oi abia dae. Bona nega matamata ena helaro oi laloa noho. Bena “Dirava ena siahu hereadaena dainai goada do [oi] abia, unai amo mai boga-auka bona moale ida gau ibounai [oi] haheaukalaia diba.”—Kol. 1:11.