Iehova Ia Gwauhamata Tanobada be Paradaiso ai Do Ia Halaoa

1. Peroveta tauna Isaia be Israela taudia dekenai dahaka hereva ia gwauraia?

PEROVETA TAUNA ISAIA ia gwau, Iehova be “Hereva bona Kara Momokani ena Dirava.” Heberu gado herevana idia hahanaia “momokani” ena anina be “amen.” (Isa. 65:​16, BH) “Amen” anina be “oibe,” eiava “do ia vara momokani.” Baibel lalonai unai hereva “amen” idia gaukaralaia neganai, unai ese ia hahedinaraia Iehova o Iesu ese ia herevalaia o karaia gaudia be momokani. Unai hegeregerena, Isaia ena hereva Israela taudia dekenai be inai: Iehova be gau ta ia perovetalaia neganai, hanaihanai ia hagugurua. Oibe, Iehova be iena gwauhamata iboudiai ia hagugurua.

2. Dahaka dainai Iehova ese vaira nega totona ia gwauhamatalaia gaudia ita abia dae diba, bona edena henanadai do ita herevalaia?

² Ita abia dae Iehova ese vaira nega totona ia gwauhamatalaia gaudia be do idia vara momokani, a? Isaia ena negai, unai be lagani 800 bamona murinai, aposetolo Paulo be Dirava ena gwauhamata ita abidadama henia diba ena badina ia gwauraia. Ia gwau: “Dirava be ia koikoi diba lasi.” (Heb. 6:18) Ranu guri amo ranu namona bona ranu iditana ita abia diba lasi. Unai hegeregerena, Iehova be hereva momokani ena badina, bona do ia koikoi diba lasi. Unai dainai, Iehova ese ia gwauraia gaudia ibounai, iseda vaira nega ena gwauhamata herevadia danu, ita abidadama henidia diba. Inai stadi ai, ita ese inai henanadai do ita herevalaidia: Iehova ia gwauhamata vaira nega ai ita dekenai dahaka do ia henia? Bona edena dala ai ia hamomokania iena gwauhamata be do idia vara momokani?

IEHOVA BE DAHAKA IA GWAUHAMATALAIA?

3. (a) Dirava ena hesiai taudia be edena gwauhamata idia laloa bada? (Apokalupo 21:​3, 4) (b) Haida dekenai Paradaiso ita herevalaia neganai edena bamona idia haere?

³ Do ita herevalaia gwauhamata be tanobada hegegemadai ai Dirava ena hesiai taudia ese idia laloa bada. (Apokalupo 21:​3, 4 duahia.) Iehova ia gwauhamata, nega ta “mase, lalohisihisi, taitai, bona hisihisi be do idia ore.” Haroro gaukara ai ita momo be ma haida dekenai Paradaiso ita herevalaia neganai, unai siri ita gaukaralaia. Unai gwauhamata ita herevalaia neganai, haida be edena bamona idia haere? Reana idia gwau: “Unai be namo herea, to do ia vara lasi.”

4. (a) Iehova ia diba Paradaiso ena gwauhamata be ma haida dekenai ita harorolaia neganai, dahaka do ia vara? (b) Iehova be unai gwauhamata sibona ia gwauraia lasi, to dahaka hereva ma haida ia gwauraia danu?

⁴ Oibe, Iehova ese aposetolo Ioane ia hasiahua Paradaiso ena gwauhamata ia torea neganai, Ia diba hari Basileia harorolaia gaukarana ai ma haida dekenai unai do ita herevalaia. Ma danu Iehova ia diba, taunimanima momo be unai “gau matamatadia” edia gwauhamata do idia abia dae lasi. (Isa. 42:9; 60:2; 2 Kor. 4:​3, 4) Vadaeni, edena dala ai ita ese ma haida bona ita sibona dekenai ita hamomokania diba Apokalupo 21:​3, 4 edia hereva be do idia guguru? Iehova ese unai gwauhamata namona ia gwauraia sibona lasi, to hamomokania herevadia haida ia gwauraia danu, unai amo iena gwauhamata ita abidadama henia diba. Unai hamomokania herevadia be dahaka?

IEHOVA IA HAHEDINARAIA ENA GWAUHAMATA DO IDIA GUGURU

5. Dahaka dainai Dirava ena gwauhamata ita abidadama henia diba, bona edena siri ese unai idia hamomokania?

⁵ Iehova ese Paradaiso ena gwauhamata ita abidadama henia totona, siri 5 bona 6 ai hamomokania herevadia ia gwauraia. Unuseniai ia gwau: “Terona latanai ia helai Diravana ia gwau: ‘Itaia! (NWT) Lau ese gau ibounai lau hamatamataia noho.’ Danu ia gwau: ‘Inai hereva oi torea, badina idia be taunimanima ese idia abia dae diba bona idia be momokani.’ Bona ia be lau dekenai ia gwau: ‘Unai hereva be idia guguru vadaeni! Lau be Alepa bona Omega, matamana bona dokona.’”—Apok. 21:​5, 6a

6. Dahaka dainai Apokalupo 21:5, 6 ena hereva ese ita ia hagoadaia?

⁶ Dahaka dainai inai siri ese iseda abidadama Dirava ena gwauhamata dekenai ia hagoadaia? Apokalupo Ena Hagugurua Negana bukana ese unai siri be inai bamona ia herevalaidia: “Unai be hegeregere Iehova ese kamonai taudia totona gwauhamata pepana ia sainia, nega vairai unai hahenamo do idia abia totona.”b Apokalupo 21:​3, 4 ai Dirava ena gwauhamata ia noho. To, siri 5 bona 6 dekenai ita gwau diba, Iehova ese unai gwauhamata ia sainia bona ia hamomokania do ia hagugurua. Mani ita itaia edena dala ai unai gwauhamata do ita abidadama henia.

7. Siri 5 ai daika ia hereva matamaia, bona dahaka dainai unai be mai anina bada?

⁷ Dirava ena hereva be inai bamona ia hamatamaia: “Terona latanai ia helai Diravana ia gwau.” (Apok. 21:5a) Unai hereva amo aneru ese ia hahedinaraia Iehova be nega ginigunana do ia hereva. Apokalupo bukana lalonai Iehova be nega toi sibona ia hereva. Unai ese ia hamomokania aneru goadana ta eiava ia toreisi lou vadaeni tauna Iesu ese unai hereva idia gwauraia lasi, to unai be Iehova sibona ese ia gwauraia! Unai dainai, gabeai ia gwauraia herevadia ita abidadama henia diba. Dahaka dainai? Badina Iehova “be ia koikoi diba lasi.” (Tito 1:2) Unai hereva dainai Apokalupo 21:​5, 6 ai idia noho herevadia be do idia vara momokani.

“ITAIA! LAU ESE GAU IBOUNAI LAU HAMATAMATAIA NOHO”

8. Iehova be dahaka ia gwau unai amo ia hamomokania ena gwauhamata do ia guguru momokani? (Isaia 46:10)

⁸ Mani Apokalupo 21:5 ai Iehova ena hereva ita laloa. Grik gado ai ena hereva idia hahanaia neganai, hereva ta idia atoa guna, unai be “Itaia!” o “Kamonai!” Unai hereva be Apokalupo bukana lalonai idia gaukaralaia momo. Referens buka ta ia gwau, unai hereva idia gaukaralaia badina “idia ura duahia tauna ena lalona idia veria gabeai do idia herevalaia gauna ia kamonai namonamo totona.” Gabeai Dirava be dahaka ia hereva? Ia gwau: “Lau ese gau ibounai lau hamatamataia noho.” Momokani, Iehova ese vaira nega ai unai gaudia do ia karaia. To ia diba iena gwauhamata be do ia hagugurua momokani dainai, iena hereva dalana amo ia hahedinaraia ia be unai gaudia ia karaia noho.—Isaia 46:10 duahia.

9. (a) Inai hereva “gau ibounai lau hamatamataia noho” ena anina be dahaka? (b) Hari idia noho “guba” bona “tanobada” dekenai dahaka do ia vara?

⁹ Mani Apokalupo 21:5 ai ia noho herevana ita itaia, ia gwau: “Gau ibounai lau hamatamataia noho.” Unai ena anina be dahaka? Unai karoa ai, Iehova ese inai tanobada oromana gunana do ia hadikaia ore, bona tanobada oromana matamatana do ia mailaia karana ia herevalaia. Apokalupo 21:1 ia gwau: “Guba gunana bona tanobada gunana be idia boio vadaeni.” “Guba gunana” be Satani bona demoni ese idia biagua gavamani ia herevalaidia. (Mat. 4:​8, 9; 1 Ioa. 5:19) Baibel lalonai “tanobada” idia gaukaralaia neganai, tanobada idia noholaia taudia ia herevalaia. (Gen. 11:1; Sal. 96:1) Unai dainai, “tanobada gunana” be hari idia noho kara dika taudia ia herevalaia. Iehova ese “tanobada” bona “guba” do ia hanamodia lasi, to do ia hadikaia ore. Bona ia ese “guba matamata bona tanobada matamata” do ia mailaia. Unai ena anina be gavamani matamata ta ese tanobada ai kara maoromaoro taudia do ia lohiaia.

10. Iehova ese dahaka do ia hamatamataia?

¹⁰ Apokalupo 21:5 ai Iehova ese do ia hamatamaia gaudia ia herevalaia. Ia gwau lasi: “Lau ese gau matamatadia do lau karaia.” To, ia gwau: “Lau ese gau ibounai lau hamatamataia noho.” Iehova be tanobada bona taunimanima do ia hamatamatadia bona do idia goevadae. Isaia ena peroveta herevana bamona, tanobada ibounai be gabu hairaina ai do ia halaoa, Eden umana hegeregerena. Bona ia ese ita ta ta do hamatamataia. Aena dika, matakepulu bona taia kudima taudia do ia hanamodia, bona mase taudia be do ia hamauria lou.—Isa. 25:8; 35:​1-7.

‘INAI HEREVA BE TAUNIMANIMA ESE IDIA ABIA DAE BONA IDIA BE MOMOKANI BONA IDIA GUGURU VADAENI!’

11. Iehova ese Ioane dekenai dahaka oda herevana ia henia bona dahaka dainai unai bamona ia hereva?

¹¹ Dirava ena hereva ma haida be dahaka? Iehova ese Ioane ia oda henia, ia gwau: “Inai hereva oi torea, badina idia be taunimanima ese idia abia dae diba bona idia be momokani.” (Apok. 21:5) Iehova be Ioane ia hamaoroa unai hereva do ia torea sibona lasi, to ena badina ia gwauraia danu. Ia gwau: “Taunimanima ese idia abia dae diba bona idia be momokani.” Ioane ese Dirava ia kamonai henia bona unai hereva ia “torea” dainai, ita moale. Oibe, hari ita ese Dirava ena gwauhamata Paradaiso totona ita duahia, bona do ita davaria hahenamo idauidau ita laloa dobu diba.

12. Dahaka dainai Iehova ia gwau: “Unai hereva idia guguru vadaeni!”

¹² Dirava be dahaka hereva ma ta ia gwauraia? “Unai hereva idia guguru vadaeni!” (Apok. 21:6) Dahaka dainai Iehova ia gwau iena gwauhamata ibounai be idia guguru vadaeni? Unai bamona ia hereva badina gau ta ese iena ura hagugurua dalana ia koua diba lasi. Iehova ese hamomokania herevana ma ta ia gwauraia. Unai be dahaka?

“LAU BE ALEPA BONA OMEGA”

13. Dahaka dainai Iehova ia gwau: “Lau be Alepa bona Omega”?

¹³ Matamanai ita herevalaia bamona, Iehova sibona ese matahanai amo nega toi Ioane ia hereva henia. (Apok. 1:8; 21:​5, 6; 22:13) Unai negadia ta ta ai, Iehova ia gwau: “Lau be Alepa bona Omega.” Grik gado ena alfabet ai Alepa be leta ginigunana, bona Omega be leta ginigabena. Iehova ia gwau ia be “Alepa bona Omega,” unai amo Ia hahedinaraia ia ese gau ta ia hamatamaia neganai, unai gauna do ia hagugurua momokani.

14. (a) Edena nega ai Iehova be sibona ia gwauraia “Alepa” bona edena nega ai do ia gwau, “Omega”? (b) Genese 2:​1-3 ese edena hamomokania herevana ia gwauraia?

¹⁴ Iehova be Adamu bona Heva ia karaia murinai, idia dekenai Iena ura taunimanima bona tanobada totona ia gwauraia. Baibel ia gwau: “Dirava ese idia ia hanamoa, bona idia dekenai ia gwau: ‘Natudia umui havaraia bona do umui momo herea bona tanobada umui hahonua bona umui biagua.’” (Gen. 1:28) Unai nega ai Iehova ia gwau, “Alepa.” Iena ura ia gwauraia hedinarai: Nega ta do ia mai Adamu bona Heva edia goevadae natudia ese tanobada do idia noholaia bona paradaiso ai do idia halaoa. Unai nega ai, Iehova be do ia gwau “Omega.” Iehova ese “guba bona tanobada bona idia lalonai idia noho gaudia ibounai ia karaia haorea” murinai, iena ura do ia hagugurua herevana ta ia gwauraia, unai be Genese 2:​1-3 ai ia noho. (Duahia.) Iehova ia gwau dina namba 7 be helaga. Unai ena anina be dahaka? Iehova ia gwauhamata iena ura taunimanima bona tanobada totona be do ia hagugurua momokani. Bona unai be dina namba 7 dokonai do ia vara.

15. Dahaka dainai Satani ia laloa ia ese Iehova ena ura hagugurua dalana ia koua diba?

¹⁵ Adamu bona Heva idia gwau-edeede murinai, kara dika taudia ai idia lao bona edia natudia dekenai kara dika bona mase idia henia hanai. (Roma 5:12) Unai ia vara dainai, Satani ia laloa tanobada ai goevadae taudia do idia noho lasi Iehova idia badinaia totona. Satani be Iehova ena ura do ia hagugurua dalana ia koua, a? Reana ia laloa Iehova be dala lasi iena gwauhamata ia hagugurua totona. Reana Satani ia laloa Dirava ese Adamu bona Heva do ia hamasea bona goevadae tau bona hahine matamata do ia havaraia iena ura ia hagugurua totona. To bema Dirava be unai ia karaia, Diabolo do ia gwau ia be koikoi tauna. Dahaka dainai? Badina Genese 1:28 ai, Iehova be Adamu bona Heva ia hamaorodia edia natudia ese tanobada do idia hahonua.

16. Dahaka dainai Satani, ia laloa Iehova be do ia kwalimu lasi?

¹⁶ Reana Satani be ia laloa, Dirava be edena dala ma ta do ia abia hidi? Reana Satani ia laloa Dirava ese Adamu bona Heva do ia rakatania natudia idia havaraia totona, to do idia goevadae diba lasi. (Had. 7:20; Roma 3:23) Bema unai ia vara, Diabolo do ia gwau Iehova be ia kwalimu lasi. Dahaka dainai? Badina unai dala ese Dirava ena ura do ia hagugurua lasi, iena ura be tanobada Paradaisona be Adamu bona Heva edia goevadae natudia ese do idia hahonua.

17. (a) Iehova ese edena dala ai Satani, Adamu bona Heva edia gwau-edeede karana ia hamaoromaoroa, bona dokonai dahaka do ia vara? (Laulau itaia danu.)

¹⁷ Iehova ese Satani, Adamu bona Heva ese idia karaia gwau-edeede karana be dala idauna amo ia hamaoromaoroa. Unai be Satani ese ia laloa lasi dalana. (Sal. 92:5) Iehova be nega ia henia Adamu bona Heva ese edia natudia idia havaraia totona, unai amo iena hereva ia momokani. Ia be koikoi Diravana lasi. Unai amo Iehova be ia kwalimu. Iena ura be do ia guguru badina ia ese “natuna” ta ia henia, bona unai natuna ese Dirava idia kamonai henia taudia do ia hamauria. (Gen. 3:15; 22:18) Satani ia hoa, badina Iehova ese mauri davalaia boubouna ia hegaegaelaia dalana ia laloa lasi! Dahaka dainai? Badina mauri davalaia boubouna be sibona ena ura dadaraia lalokauna. (Mat. 20:28; Ioa. 3:16) Satani be unai kara ia diba lasi, badina ia be sibona ena ura ia laloa bada tauna. Vadaeni mauri davalaia boubouna dainai dahaka do ia vara? Keriso ena Lagani 1,000 Lohia Negana dokonai, Adamu bona Heva edia goevadae natudia ese tanobada paradaisona do idia noholaia. Unai be Iehova ena ura, matamana ai ia laloa hegeregerena. Unai nega ai, Iehova do ia gwau, “Omega.”

PARADAISO GWAUHAMATANA DEKENAI ISEDA ABIDADAMA ITA HAGOADAIA

18. Dirava ese dahaka hamomokania herevadia toi ia gwauraia? (“Iehova Ena Gwauhamata Ita Abidadama Henia Ena Badina Toi” maua itaia.)

¹⁸ Inai stadi ai ita herevalaia gaudia hegeregerena, ita diba momokani tanobada be paradaiso ai do ia lao. To, edena dala ai daradara taudia dekenai do ita hahedinaraia unai do ia vara momokani? Gau ginigunana be, Iehova sibona ese unai gwauhamata ia gwauraia. Apokalupo bukana ia gwau: “Terona latanai ia helai Diravana ia gwau: ‘Itaia! Lau ese gau ibounai lau hamatamataia noho.’” Ia be mai ena aonega, siahu, bona ia ura iena gwauhamata ia hagugurua. Iharuana be, Iehova ia diba ia gwauhamatalaia gauna be do ia vara momokani. Unai dainai ia gwau: “Unai hereva oi torea, badina idia be taunimanima ese idia abia dae diba bona idia be momokani. . . . Unai hereva be idia guguru vadaeni!” Ihatoina be, Iehova be gau ta ia hamatamaia neganai, unai gauna do ia hagugurua momokani. Inai hereva ese unai ia hamomokania, ia gwau: “Lau be Alepa bona Omega.” Iehova ese do ia hamomokania Satani be koikoi tauna bona ena ura hagugurua dalana do ia koua lasi.

19. Ta be Paradaiso ena gwauhamata dekenai ia daradara neganai, edena bamona do oi durua?

¹⁹ Laloatao, haroro gaukara ai taunimanima dekenai Dirava ena gwauhamata oi herevalaia neganai, oi sibona emu abidadama oi hagoadaia danu. Unai dainai, ta dekenai Apokalupo 21:4 oi duahia bona Paradaiso ena gwauhamata oi herevalaia, to ia gwau: “Unai be do ia vara momokani lasi,” edena bamona do oi haere? Namona be siri 5 bona 6 oi duahia bona edia anina oi gwauraia hedinarai. Oi hadibaia Iehova be unai gwauhamata ia sainia vadaeni, unai dainai do ia guguru momokani.—Isa. 65:16.