Iseda Guriguri Ita Hanamoa Dalana

1. Iehova be iena tomadiho taudia ia hamaoroa dahaka idia karaia totona? (Laulau itaia danu.)

DAIKA ita noia diba ita ia durua bona hakaua totona? Unai henanadai ena haere ita diba. Iehova Dirava ita guriguri do ita henia. Ita ia hamaoroa unai ita karaia totona. Baibel ia gwau: “Nega ibounai umui guriguri,” unai dainai ita diba ia ura hanaihanai do ita guriguri. (1 Tes. 5:17) Iseda mauri ibounai lalonai ita ia hakaua totona ita guriguri diba. (Aon. 3:5, 6) Iehova be harihari bada Diravana dainai, ia gwau nega momo ita guriguri diba.

2. Inai atikol ai dahaka do ita herevalaia?

² Guriguri karana be harihari gauna dainai ita laloa bada. To, gaukara idauidau ita karaia dainai, guriguri totona nega ita atoa be auka. Danu, reana ita mamia iseda guriguri ita gwauraia dalana ita hanamoa be namo. Ita moale badina Baibel lalonai heduru bona hakaua herevadia ita davaria diba. Inai stadi lalonai, Iesu ena haheitalai do ita stadilaia bona guriguri totona nega ita atoa karana do ita dibaia. Danu, iseda guriguri gwauraia dalana ita hanamoa totona, mai anina bada gaudia faiv do ita herevalaia.

IESU BE NEGA IA ATOA IA GURIGURI TOTONA

3. Iesu be guriguri dekenai dahaka ia dibaia?

³ Iesu ia laloparara Iehova be guriguri ia laloa bada. Tanobada ai ia do mai lasi neganai, ia itaia ena Tamana be abidadama tatau bona hahine edia guriguri ia haerelaia. Hegeregere, Hana, Davida bona Elia. (1 Sam. 1:10, 11, 20; 1 Kin. 19:4-6; Sal. 32:5) Unai dainai, Iesu ese ena hahediba taudia ia hadibaia, namona be mai abidadama ida hanaihanai do idia guriguri!​—Mat. 7:7-11.

4. Iesu ena guriguri amo dahaka ita dibaia?

⁴ Iesu ese Iehova ia guriguri henia karana amo iena hahediba taudia dekenai haheitalai namona ia hahedinaraia. Iesu ena haroro gaukara lalonai, nega momo ia guriguri. Ia guriguri totona nega ia atoa badina nega momo ia bisi bona hutuma ese idia hagegea. (Mar. 6:31, 45, 46) Daba momokani ai ia noga, badina ia ura sibona do ia noho unai amo ia guriguri diba. (Mar. 1:35) Nega ta ai, mai anina bada abia hidi ta ia do karaia lasi neganai, hanuaboi ibounai ia guriguri. (Luka 6:12, 13) Ena hanuaboi ginigabena ai, tanobada dekenai iena Tamana ena ura hagugurua totona ia guriguri loulou.​—Mat. 26:39, 42, 44.

5. Ita guriguri neganai, edena dala ai Iesu ita tohotohoa diba?

⁵ Iesu ena haheitalai amo ita diba ena be ita bisi, to namona be nega ita atoa ita guriguri totona. Iesu bamona, nega ita atoa be namo hegeregere, daba momokani ita toreisi eiava hanuaboi ai ita noga noho ita guriguri totona. Unai ita karaia neganai, Iehova dekenai ita hahedinaraia unai harihari gauna ita laloa bada. Taihu ta ladana Lynne be guriguri karana ena namo ia moalelaia negana ginigunana ia laloatao. Ia gwau: “Nega idauidau Iehova guriguri henia dalana lau dibaia neganai, lau ia durua ia lau diba namonamo bona lau ura egu guriguri karana lau hanamoa.” Reana, ita momo be unai bamona ita mamia. Unai dainai, mani guriguri lalonai do ita gwauraia mai anina bada gaudia faiv ita herevalaia.

ITA GURIGURILAIA MAI ANINA BADA GAUDIA FAIV

6. Apokalupo 4:10, 11 hegeregerena, Iehova be ia hegeregere momokani dahaka ia abia totona?

⁶ Iehova ita hanamoa. Matahanai ta lalonai, aposetolo Ioane ia itaia guba ai tau badadia 24 be Iehova idia tomadiho henia noho. Ia idia hanamoa, idia gwau, ia be hegeregere momokani ‘hairai, hemataurai, bona siahu ia abia totona.’ (Apokalupo 4:10, 11 duahia.) Abidadama aneru danu be badina momo dainai Iehova idia hanamoa. Idia be guba ai ia ida idia noho dainai, ia idia diba namonamo. Ia karaia karadia amo iena kara namodia idia itaia. Iehova ena kara idia itaia neganai, idia ura ia idia hanamoa.​—Iobu 38:4-7.

7. Dahaka gaudia dainai Iehova ita hanamoa diba?

⁷ Ita danu ita ura iseda guriguri lalonai Iehova ita hanamoa, bona ia ita lalokau henia bona matauraia ena badina ita gwauraia hedinarai. Baibel oi duahia bona stadilaia neganai, oi tahua edena kara namodia Iehova amo moalelaia. (Iobu 37:23; Roma 11:33) Bena unai kara namodia dainai emu hemami be Iehova dekenai oi gwauraia hedinarai. Danu, Iehova do ita hanamoa badina ita bona iseda Keristani tadikaka taihu ibounai ia durua. Ia be hanaihanai ita ia naria bona gimaia.​—1 Sam. 1:27; 2:1, 2.

8. Dahaka badina haida dainai Iehova ita tanikiu henia? (1 Tesalonika 5:18)

⁸ Iehova ita tanikiu henia. Badina momo dainai, iseda guriguri lalonai Iehova ita tanikiu henia. (1 Tesalonika 5:18 duahia.) Gau namodia dainai ia ita tanikiu henia badina harihari gaudia namodia ibounai be ia amo idia mai. (Iam. 1:17) Hegeregere, tanobada hairaina bona ia karaia gau namodia idauidau, iseda mauri, iseda famili, iseda turadia bona iseda helaro dainai, ia ita tanikiu henia diba. Bona ita ura Iehova ita tanikiu badina ia ida hetura karana namona ita moalelaia.

9. Dahaka dainai Iehova tanikiu henia karana ita habadaia be namo?

⁹ Namona be Iehova ese ita ta ta totona ia karaia gaudia dainai, ia ita tanikiu henia. Hari inai negai, taunimanima momo be tanikiu karana idia diba lasi. Momo be idia ura abia gaudia sibona idia laloa bada, to idia dekenai idia noho gaudia dainai Dirava idia tanikiu henia lasi. Bema unai kara ita tohotohoa, iseda guriguri be noinoi ena lista ta bamona. Unai ita karaia lasi totona, namona be Iehova ese ita totona ia karaia gaudia ita laloa bada, bona ia ita tanikiu henia.​—Luka 6:45.   

10. Edena dala ai Iehova tanikiu henia karana ese taihu ta ia durua ia haheauka totona? (Laulau itaia danu.)

¹⁰ Tanikiu karana ita hahedinaraia neganai, ita ia durua nega aukadia ita haheaukalaia totona. January 15, 2015 ena Gima Kohorona ai ia hedinarai taihu Kyung-sook ena sivarai mani ita laloa. Doketa ese ena baragi ai kensa gorere idia davaria. Ia gwau: “Egu gorere lau laloa momo dainai lau lalometau, bona lau mamia gau ibounai lau haboioa bamona bona lau gari.” Dahaka ese Kyung-sook ia durua ia haheauka totona? Ia gwau: “Hanuaboi ibounai ia do mahuta lasi neganai, ia be ena ruma ena guhi dekenai ia daekau bona unai dina ai ia moalelaia gau namodia faiv ia gurigurilaia. Unai kara ese ia hagoadaia bona Iehova dekenai ena lalokau ia gwauraia hedinarai. Ia itaia Iehova ese hekwakwanai idauidau amo iena hesiai taudia ia durua, bona ia laloparara iseda mauri lalonai ita davaria hahenamo ese eda hekwakwanai idia hanaia. Kyung-sook bamona, ena be hahetoho idauidau ita davaria noho, to gau momo dainai Iehova ita tanikiu henia diba. Guriguri amo iseda tanikiu herevana ita gwauraia neganai, ita ia durua diba ita haheauka, ita gari lasi bona ita moale noho totona.

11. Iesu be guba dekenai ia giroa lou murinai dahaka dainai ena hahediba taudia idia gari lasi be namo?

¹¹ Haroro gaukara ai ita gari lasi totona, Iehova ita guriguri henia. Iesu be guba dekenai ia do giroa lasi neganai, ena hahediba taudia ia hamaoroa idia ese “Ierusalema, Iudea ibounai, Samaria, bona tanobada ena daudau momokani gabudia dekenai” iena sivarai do idia harorolaia. (Kara 1:8; Luka 24:46-48) Daudau lasi murinai, Iuda tomadiho ena gunalaia taudia ese aposetolo Petero bona Ioane idia dogoatao bona idia abia lao Sanhedrin vairanai, idia hagaridia bona idia oda henidia do idia haroro lasi. (Kara 4:18, 21) Petero bona Ioane be dahaka idia karaia?   

12. Kara 4:29, 31 hegeregerena, hahediba taudia be dahaka idia karaia?

¹² Petero bona Ioane be Iuda tomadiho gunalaia taudia idia haere henidia, idia gwau: “Bema umui laloa Dirava vairanai umui ai kamonai henia to Dirava ai kamonai henia lasi be maoro, unai be umui sibona. To ai be ai itaia bona kamonai gaudia herevalaia karana do ai hadokoa lasi.” (Kara 4:19, 20) Petero bona Ioane idia ruhaia neganai, hahediba taudia be Iehova idia guriguri henia, iena ura idia badinaia totona. Idia gwau: “Emu hesiai taudia oi durua, mai gari lasi ida emu hereva idia harorolaia totona.” Iehova ese edia guriguri ia haerelaia.​—Kara 4:29, 31 duahia.   

13. Jin-hyuk ena sivarai amo dahaka ita dibaia?

¹³ Gavamani taudia idia ura ita idia koua neganai, hahediba taudia ita tohotohoa diba, bona haroro gaukara ita karaia noho. Jin-hyuk ena sivarai mani ita laloa, inai tadikaka be ami lalonai ia vareai lasi dainai, dibura ruma dekenai idia atoa. Dibura ruma lalonai, gaukara idia henia daiutu ta lalonai sibona idia lokaia taudia ia naria totona. To, idia dekenai gau ma haida bona Baibel do ia herevalaia lasi. Aonega bona gari lasi totona ia guriguri, unai amo nega idauidau ai ia haroro totona. (Kara 5:29) Ia gwau: “Iehova ese egu guriguri ia haerelaia bona lau dekenai goada bona aonega ia henia, unai amo edia daiutu ena iduara dekenai, miniti faiv Baibel stadi lau hamatamaia. Bena, hanuaboi ai, revareva lau toredia bona dabai dibura taudia dekenai do lau henia.” Ita danu ita diba momokani Iehova ese ita do ia durua iseda haroro gaukara ita hagugurua totona. Jin-hyuk bamona, gari lasi karana bona aonega totona ita guriguri diba.

14. Hekwakwanai ita davaria neganai, dahaka ese ita ia durua diba? (Salamo 37:3, 5)

¹⁴ Hekwakwanai negadiai ita haheauka totona, Iehova ena heduru ita noia. Ita momo be gorere, lalohisihisi, iseda lalokau tauna ta ia mase, famili ena hekwakwanai, dagedage eiava hekwakwanai ma haida ita haheaukalaia noho. Unai sibona lasi, to daihanai gorere bona tuari dainai, ia auka ita haheauka totona. Emu lalohisihisi gaudia ibounai be Iehova dekenai do oi gwauraia, emu turana namona bamona oi hereva henia. Iehova oi abidadama henia badina ia ese “oi totona kara ta do ia karaia.”​—Salamo 37:3, 5 duahia.

15. ‘Hisihisi ita haheaukalaia’ totona, edena dala ai guriguri karana ese ita do ia durua? Haheitalai gwauraia.   

¹⁵ Guriguri hanaihanai karana ese ita do ia durua “hisihisi ita haheaukalaia” totona. (Roma 12:12) Iehova be ena tomadiho taudia ese idia davaria hekwakwanai ia diba bona heduru totona “ia dekenai idia taitai neganai ia kamonai.” (Sal. 145:18, 19) Mauri lagani 29, painia taihu ta ladana Kristie, ia davaria unai hereva be momokani. Ia be goada kekenina, to gorere badana ta ia davaria. Unai dainai ia daradoko bada. Gabeai, ia kamonai ena sinana be gorere badana ta ia davaria bona do ia mase. Kristie ia gwau: “Iehova lau guriguri henia goadagoada, lau dekenai goada do ia henia dina ta ta lau haheauka totona. Lau hekwarahi hebou lau lao hanaihanai, bona sibona egu stadi lau karaia.” Ma ia gwau: “Lalohisihisi negadiai guriguri ese lau ia durua bada. Lau diba Iehova be hanaihanai lau ida ia noho bona unai ese lau ia hagoadaia bada. Ena be egu gorere ia ore haraga lasi, to Iehova ese egu guriguri ia haerelaia bona lau dekenai lalomaino ia henia.” Namona be ita laloaboio lasi “Iehova ese hahetoho amo ia idia badinaia taudia ia hamauria dalana ia diba.”​—2 Pet. 2:9.

16. Dahaka dainai Iehova ena heduru ita abia be namo hedibagani ita dadaraia totona?

¹⁶ Hedibagani ita dadaraia totona, Iehova ena heduru ita totona guriguri. Ita be goevadae lasi dainai, hanaihanai ita hekwarahi dahaka be kerere ita dadaraia totona. Satani be gau idauidau ia karaia noho dainai, ita davaria hedibagani ita dadaraia be auka. Iseda lalohadai ia hadikaia dalana ta be, moale kara mirodia. Unai bamona kara mirodia ese iseda lalohadai ia hamiroa bona unai ese ita ia hakaua kara dika badadia ita karaia totona.​—Mar. 7:21-23; Iam. 1:14, 15.

17. Edena dala ai iseda guriguri hegeregerena hedibagani ita dadaraia diba? (Laulau itaia danu.)

¹⁷ Bema ita ura hedibagani ita dadaraia, Iehova ena heduru ita abia be namo. Iesu ena guriguri lalonai, inai hereva ia gwauraia: “Hedibagani lalonai do ai moru lasi, to Satani amo ai oi hamauria.” (Mat. 6:13) Iehova ia ura ita ia durua, to namona be iena heduru totona ita noinoi bona iseda guriguri hegeregerena ita badinaia. Gau haida ita karaia diba lalohadai dikadia idia havaraia gaudia ita dadaraia totona. (Sal. 97:10) Baibel ita duahia bona stadilaia karana amo iseda lalohadai be gau namodia amo ita hahonua. Danu, hebou ita lao bona haroro gaukara ita karaia ese iseda lalohadai do ia gimaia. Iehova ia gwauhamata, iseda goada ia hereaia hedibagani ita davaria neganai, ita do ia rakatania lasi, to ita do ia durua.​—1 Kor. 10:12, 13.   

18. Guriguri karana dekenai ita ibounai ese dahaka ita karaia be namo?

¹⁸ Inai nega dikadia lalonai, Iehova ita badinaia noho totona, ita ta ta be hanaihanai do ita guriguri. Dina ta ta ai nega ita atoa ita guriguri totona. Iehova ia ura guriguri amo ‘ia dekenai ita laloa gaudia ibounai ita gwauraia’ hedinarai. (Sal. 62:8) Iehova ia karaia gaudia dainai ia ita hanamoa bona tanikiu henia. Ita noia ita dekenai goada ia henia haroro gaukara ita karaia totona. Oi noia oi ia durua hekwakwanai oi haheaukalaia bona hedibagani oi dadaraia totona. Namo lasi gau ta eiava tau ta ese hanaihanai Iehova oi guriguri henia karana ia koua. To, edena dala ai Iehova ese iseda guriguri ia haerelaidia? Atikol 21 ita ese unai henanadai do ita herevalaia.