“Umui Dekenai Do Ia Raka Kahirakahira Mai”
“Dirava be daudau lasi ita ta ta dekenai.”—KARA 17:27.
1, 2. (a) Guba mai ena hisiu momo ita itaia neganai, Havaraia Tauna dainai edena bamona ita henanadai diba? (b) Baibel ese edena bamona ita ia hadibaia Iehova ena matana ai taunimanima be mai anina bada?
HANUABOI ta ai ori be lasi neganai, guba oi itaia bona oi hoa bada, a? Hisiu edia momo bona guba ena bada ita hoalaia bada. Inai unives bada hereana lalonai, tanobada be miri ena anina maragina tamona sibona bamona. To unai ena anina be Havaraia Tauna, “Ataiai Momokani Diravana,” be tanobada ataiai momokani dainai taunimanima do ia laloa lasi, eiava ia be daudau momokani bona do ita tahua diba lasi dainai ia do ita dibaia diba lasi, a?—Salamo 83:18.
2 Baibel ese ita ia hadibaia Iehova ena matana ai taunimanima be mai anina bada momokani. Oibe, Dirava ena Hereva ese ita ia hagoadaia ia do ita tahua, ia gwau: “Dirava be daudau lasi ita ta ta dekenai.” (Kara 17:27; 1 Sivarai 28:9) Momokani, bema ita be kara haida ita karaia ia kahirakahira ita lao totona, ia danu be kara ta do ia karaia. Edena dala ai? Lagani 2003 ena siri badana ese inai haere ia henia: “Ia ese umui dekenai do ia raka kahirakahira mai.” (Iamesi 4:8) Iehova ese ia kahirakahira idia noho taudia dekenai ia henia hahenamo namodia haida mani ita herevalaia.
Harihari Gauna ta Iehova Amo
3. Iehova ese ia kahirakahira idia lao taudia dekenai edena harihari gauna ia henia?
3 Iehova ese ena hesiai taudia dekenai harihari gauna ta ia henia. Unai harihari gauna be inai tanobada ena siahu, kohu, bona edukeisen dainai do ita abia lasi. Unai be ia ese ia henia harihari gauna, Iehova ese ia kahirakahira idia noho taudia sibona dekenai ia henia gauna. Unai gauna be dahaka? Dirava ena Hereva ia gwau: “Bema laloa kehoa totona oi boiboi goada, bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai Lohiabada gari henia kara do oi diba, bona Dirava do oi diba. Badina be Lohiabada ese aonega, be oi dekenai ia henia noho.” (Aonega Herevadia 2:3-6) Mani oi laloa, goevadae lasi taudia be idia hegeregere “Dirava do [idia] diba”! Unai harihari gauna—Dirava ena Hereva lalonai ia noho dibana—be “kohu momo, idia hunia gaudia,” ida idia hahegeregerea. Dahaka dainai?
4, 5. Dahaka dainai Dirava ena diba be “kohu momo, idia hunia gaudia” bamona? Haheitalai gwauraia.
4 Badina ta be, Dirava ena diba be mai anina bada gauna. Unai diba ena hahenamo namona ta be mauri hanaihanai do ita abia diba. (Ioane 17:3) To unai diba ese hari inai negai iseda mauri ia hanamoa danu. Hegeregere, Dirava ena Hereva ita stadilaia namonamo dainai, inai bamona henanadai badadia edia haere ita dibaia: Dirava ena ladana be daika? (Salamo 83:18) Mase taudia dekenai dahaka ia vara? (Hadibaia Tauna 9:5, 10) Dirava ena ura inai tanobada bona taunimanima dekenai be dahaka? (Isaia 45:18) Danu, ita diba mauri dalana hereadaena be Baibel ena aonega sisiba ita badinaia karana amo ita abia. (Isaia 30:20, 21; 48:17, 18) Unai dainai, ita dekenai heduru hereva namodia idia noho, ita do idia durua mauri ena lalo-hekwarahi ita haheaukalaia totona bona moale korikori ia havaraia dalana ita badinaia totona. Mai anina bada gauna be, Dirava ena Hereva ita stadilaia dainai Iehova ena kara namo hereadia ita dibaia bona ia kahirakahira ita lao. ‘Dirava ita diba’ dainai ia ita tura henia namonamo be davana bada gauna, ma gau ta ese ia hereaia diba lasi, ani?
5 Badina ma ta dainai Dirava ena diba be “kohu momo, idia hunia gaudia” bamona. Davana bada kohu momo hegeregerena, inai tanobada dekenai idia davaria be auka. Tanobada ena taunimanima bilioni siks amo, Iehova ena hesiai taudia milioni siks bamona, eiava taunimanima tausen ta ta amo tau tamona sibona, be ‘Dirava ia diba.’ Mani inai Baibel henanadai tamona sibona amo ita hahedinaraia, dahaka dainai Dirava ena Hereva ena hereva momokani ita diba be hahenamo idauna: Taunimanima idia mase neganai dahaka ia vara? Baibel amo ita diba ta ia mase neganai ia be gau ta ia diba lasi. (Salamo 146:3, 4) To, tanobada ena tomadiho momo herea ese tau ta lalonai gau ta be mase murinai ia mauri noho ena hahediba herevana idia abia dae. Unai be Kerisendom ena hahediba hereva badana ta. Unai hereva be Buddhist tomadiho, Hindu tomadiho, Islam tomadiho, Jain tomadiho, Iuda tomadiho, Shinto tomadiho, Sikh tomadiho, bona Tao tomadiho ese idia abia dae danu. Mani oi laloa—taunimanima bilioni momo be unai hahediba hereva koikoi tamona amo idia koia!
6, 7. (a) Edena bamona taudia sibona ese Dirava ena diba idia davaria diba? (b) Dahaka ese ia hahedinaraia Iehova ese ita dekenai ia henia lalo-parara be “aonega taudia bona diba momo taudia” momo ese idia abia lasi?
6 Dahaka dainai taunimanima momo be ‘Dirava idia diba’ lasi? Badina be ta ese Dirava ena Hereva ena anina do ia lalo-pararalaia diba lasi bema Iena heduru ia abia lasi. Namona be oi laloatao, unai diba be harihari gauna ta. Dirava ese mai momokani bona manau ida iena Hereva idia ura tahua taudia dekenai ia henia. Unai bamona taudia edia diba “inai tanobada ena aonega” dekenai be reana bada lasi. (1 Korinto 1:26) Tanobada ena aonega ida idia hahegeregerea neganai, reana idia momo do idia gwauraia “sikuli bada lasi bona aonega bada lasi taudia.” (Kara 4:13) To, unai be gau badana lasi. Iehova ese ita dekenai iena diba ia henia badina iseda kudouna lalonai idia noho karadia ia itaia.
7 Mani haheitalai ta ita laloa. Kerisendom lalonai, diba bada taudia momo be Baibel idia herevalaia bukadia momo idia torea. Unai buka ese reana histori haida, Heberu gado bona Greek gado herevadia, bona ma gau momo idia herevalaia. Unai diba ibounai lalonai, unai diba bada taudia be Dirava ena diba idia davaria vadaeni, a? Idia ese Baibel ena sinado—Iehova ena guba Basileia amo iena lohia siahuna ena maoro do ia hamomokania vaitani—be idia lalo-pararalaia goevagoeva, a? Idia diba Iehova Dirava be Toi Tamona diravana ta lasi, a? Unai bamona gaudia dekenai, ita be lalo-parara maoromaorona ita abia momokani. Dahaka dainai? Badina be Iehova ese hereva momokani lalo-pararalaia karana amo ita ia hanamoa, unai gauna be “aonega taudia bona diba momo taudia” momo ese idia abia lasi. (Mataio 11:25) Iehova ese ia kahirakahira idia noho taudia ia hanamoa bada herea!
Iehova ese ‘Ia Idia Lalokau Henia Taudia Ia Naria’
8, 9. (a) Davida ese Iehova kahirakahira idia noho taudia edia hahenamo ma ta be edena bamona ia gwauraia? (b) Dahaka dainai Dirava ese Keristani taudia momokanidia ia naridia be gau badana?
8 Iehova kahirakahira idia noho taudia be hahenamo ma ta idia moalelaia—Ia ese Ia naridia. Salamo torea tauna bona nega momo dagedage ia davaria tauna, Davida, ia gwau: “Lohiabada be ia dekenai idia boiboi taudia dekenai ia noho. Idia boiboi henia mai edia momokani danu taudia dekenai, Lohiabada be idia kahirakahira ia noho. Ia dekenai idia gari taudia dekenai, idia ura henia gaudia ia henia noho. Edia taitai ia kamonai, bona ia ese idia ia hamauria noho. Ia idia lalokau henia taudia, be Lohiabada ese ia naridia namonamo.” (Salamo 145:18-20) Oibe, Iehova be ia idia lalokau henia taudia kahirakahira ia noho, unai dainai heduru totona idia taitai neganai kara ta ia karaia haraga diba.
9 Dahaka dainai Dirava ese ita ia naria be namo? Keristani taudia momokanidia be inai “metau dikadia momo” idia vara negana ena hekwarahi idia mamia sibona lasi, to idia be Satani Diabolo, Iehova ena Inai Tauna badana, ese ia tahudia noho danu. (2 Timoteo 3:1) Iseda inai tauna mai ena koikoi ia ura ita “do ia ania ore.” (1 Petero 5:8) Satani ese ita ia dagedage henia, hametaua, bona tohoa. Iseda kudouna bona lalona edia ura idauidau ia tahua, do ia gaukaralaia kerere totona. Iena ura be inai: iseda abidadama do ia hamanokaia bona lauma dalanai ita do ia ania. (Apokalupo 12:12, 17) Ita ia inai henia tauna be mai ena goada dainai, Iehova ese ‘ia idia lalokau henia taudia ia naria’ be hagoadaia hereva namona, ani?
10. (a) Iehova ese ena taunimanima be edena bamona ia gimaia? (b) Edena gimaia karana be mai anina bada, bona dahaka dainai?
10 Iehova ese ena taunimanima be edena bamona ia naridia? Ita do ia naria ena gwauhamata herevana ita laloa neganai, ita laloa lasi inai tanobada lalonai hekwakwanai ta do ita davaria lasi; bona unai ese ia hamomokania lasi ita totona hoa karadia do ia karaia be namo. Lasi, to Iehova ese ena taunimanima be orea ta bamona ia naria namonamo. Ia ese dala do ia kehoa diba lasi Satani ese tanobada amo tomadiho momokani taudia do ia haorea totona! (2 Petero 2:9) Mai anina bada gauna be, lauma dalanai Iehova ese ita ia naria. Hahetoho ita hanaia totona bona iseda hetura karana ia ida ita gimaia totona, ita do idia durua gaudia ia henia. Dokonai, gimaia karana mai anina bada herea be lauma dalanai ita ia naria. Dahaka dainai? Badina be bema Iehova ida ita hetura noho, ma gau ta be hegeregere lasi—mase danu be hegeregere lasi—ita do ia hadikaia ore totona.—Mataio 10:28.
11. Iehova ese lauma dalanai ena taunimanima ia naria totona dahaka gau haida ia henia?
11 Iehova ese ia kahirakahira idia noho taudia be lauma dalanai ia naridia totona gau momo ia henia. Iena Hereva, Baibel, amo ita dekenai aonega ia henia, hahetoho idauidau ita haheaukalaia totona. (Iamesi 1:2-5) Baibel lalonai idia noho sisiba namodia ita badinaia neganai ita idia gimaia. Danu, Iehova ese “Lauma Helaga be idia noinoi taudia dekenai” ia henia. (Luka 11:13) Tanobada bona guba ibounai lalonai unai lauma helaga be siahu bada hereana, unai dainai ita ia durua diba ita dekenai idia vara hahetoho eiava hedibagani idauidau ita hanaia totona. Iehova ese Keriso ena amo tatau haida “harihari gaudia” bamona ia henia. (Efeso 4:8) Unai lauma dalanai idia goada tatau ese edia tadikaka idia durua neganai, idia hekwarahi Iehova ena hebogahisi bada idia hahedinaraia totona.—Iamesi 5:14, 15.
12, 13. (a) Edena dala ai Iehova ese ita dekenai nega korikori ai lauma aniani ia henia? (b) Iehova ese iseda namo lauma dalanai ia laloa dainai ia henia gaudia be edena bamona oi laloa?
12 Iehova ese ita ia gimaia totona ma gau ta ia henia: lauma aniani, nega korikori ai. (Mataio 24:45) Idia printaia gaudia, hegeregere Gima Kohorona bona Awake! magasin, bona kongregesen heboudia, sekit hebouhebou, bona distrik hebouhebou amo Iehova ese nega korikori ai ita idia durua gaudia ia henia. Kongregesen hebouna ta, sekit hebouhebou ta, eiava distrik hebouhebou ta dekenai oiemu kudouna ia hamarerea eiava emu lalona ia hagoadaia gauna ta oi laloatao, a? Nega ta ataiai ai gwauraia magasin ta lalonai sivarai ta oi duahia bena oi laloa unai be oi totona idia torea, a?
13 Satani ena tuari kohu namona ta be lalo-manoka, bona unai gauna ese ita ia hadikaia diba danu. Ia diba lalo-metau daudau karana ese iseda goada ia haorea diba, eda moru dalana ia kehoa danu. (Aonega Herevadia 24:10) Satani ia ura iseda lalona idia hamanokaia gaudia idauidau ia gaukaralaia dainai, heduru ita abia be namo. Gima Kohorona bona Awake! magasin dekenai idia halasia sivarai haida be ita idia durua lalo-manoka ita hanaia totona. Keristani taihu ta be unai sivarai ta dainai inai hereva ia torea: “Inai sivarai be kahirakahira dina iboudiai lau duahia, bona egu mata ranudia idia diho noho. Egu bedi badinai lau atoa, unai amo bema lau lalohisihisi neganai, lau itaia diba. Inai bamona sivarai dainai lau mamia, Iehova ena imana goadana ese lau ia rosia.”a Iehova ita tanikiu henia bada badina nega korikori ai ita dekenai lauma aniani ia henia, ani? Namona be ita laloatao, lauma dalanai iseda namo ia laloa dainai ia henia gaudia ese idia hamomokania ia be ita kahirakahira ia noho bona ia ese ita ia gimaia noho.
‘Guriguri Ia Kamonai’ Diravana Hereva Henia
14, 15. (a) Iehova ese dahaka hahenamo be ia kahirakahira idia noho taudia dekenai ia henia? (b) Dahaka dainai Iehova ita hereva henia be hahenamo namo hereana ta?
14 Reana oi itaia vadaeni, taunimanima be dagi bona siahu idia abia neganai, idia henunai idia noho taudia ese nega momo idia hereva henia be auka, ani? To, Iehova Dirava be edena bamona? Taunimanima edia hereva do ia kamonai be ia laloa bada lasi badina Ia be daudau herea, a? Lasi! Guriguri be Iehova ese ia kahirakahira dekenai idia noho taudia dekenai ia henia harihari gauna namona ma ta. ‘Guriguri ia kamonai’ Diravana ita hereva henia be hahenamo namo hereana ta. (Salamo 65:2) Dahaka dainai?
15 Haheitalai ta ita laloa: Kampani badana ta ena biaguna badana be mai ena maduna idauidau. Dahaka be ia sibona ese do ia naria bona dahaka be ma haida dekenai do ia henia ia abia hidi. Unai hegeregerena, tanobada bona guba ena Siahu Ibounai Lohiana be ia sibona ese dahaka gaukara do ia naria bona ma haida dekenai dahaka maduna do ia henia ia abia hidi. Iehova ese ena Natuna lalokauna, Iesu, dekenai ia henia maduna mani oi laloa. Iena Natuna dekenai ‘siahu ia henia vadaeni, kota gaukara ia karaia’ totona. (Ioane 5:27) Aneru “be Keriso henunai idia noho.” (1 Petero 3:22) Iehova ena lauma helaga mai siahuna be Iesu dekenai ia henia, ena hahediba taudia tanobada dekenai ia hakaudia totona. (Ioane 15:26; 16:7) Unai dainai, Iesu be ia gwau diba: “Siahu ibounai guba dekenai bona tanobada dekenai be lau dekenai ia henia vadaeni.” (Mataio 28:18) To, iseda guriguri ita laloa neganai, unai gauna kamonai henia karana be Iehova sibona ese ia naria! Unai dainai Baibel ese ita ia hamaoroa, Iehova sibona dekenai iseda guriguri do ita gwauraia, Iesu ena ladana ai.—Salamo 69:13; Ioane 14:6, 13.
16. Dahaka dainai ita abia dae momokani diba Iehova ese iseda guriguri ia kamonai?
16 Iehova be iseda guriguri ia kamonai momokani, a? Bema ia be ia ura lasi ia kamonai, ita do ia hagoadaia lasi ‘nega ibounai guriguri ita goadalaia’ totona eiava ia dekenai iseda metau bona lalo-hekwarahi ita atoa totona. (Roma 12:12; Salamo 55:22; 1 Petero 5:7) Baibel negadiai idia noho kamonai hesiai taudia idia diba momokani Iehova ese edia guriguri ia kamonai. (1 Ioane 5:14) Unai dainai salamo torea tauna Davida ia gwau: “[Iehova] ese egu gadona do ia kamonai henia.” (Salamo 55:17) Ita danu be badina idauidau dainai ita abia dae momokani diba, Iehova be ita kahirakahira ia noho, ia ura bada iseda lalohadai bona lalo-hekwarahi ibounai ia kamonai.
Iehova ese Ena Hesiai Taudia Edia Davana Ia Henia
17, 18. (a) Iehova ese ia havaraia taudia edia kamonai hesiai gaukarana be edena bamona ia laloa? (b) Aonega Herevadia 19:17 dekenai Iehova ese iseda hebogahisi karadia ia itaia dalana mani oi herevalaia.
17 Taunimanima ese idia karaia gaudia eiava idia karaia lasi gaudia ese Iehova ena dagi, Guba bona Tanobada edia Lohia Badana, idia haidaua lasi. To, Iehova be ita ia laloa bada Diravana. Ia ese ia havaraia taudia edia kamonai hesiai gaukarana ia laloa bada—oibe, ia moalelaia bada. (Salamo 147:11) Vadaeni, Iehova kahirakahira idia noho taudia ese idia moalelaia hahenamo ma ta be inai: Ia ese ena hesiai taudia edia davana namona ia henia.—Heberu 11:6.
18 Baibel ese ia hahedinaraia goevagoeva Iehova ese ena hesiai taudia idia karaia gaudia ia laloa bada. Hegeregere, Baibel ia gwau: “Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” (Aonega Herevadia 19:17) Iehova ese ogogami taudia ia hebogahisi henia karana be Mose ena taravatu lalonai ia hedinarai. (Levitiko 14:21; 19:15) Ogogami taudia ita kara henidia lalonai Iehova ena hebogahisi ita tohotohoa neganai, ia be edena bamona ia laloa? Bema ogogami tauna dekenai gau ta ita henia, bona davana ta ita tahua lasi, Iehova ia laloa unai be Ia dekenai ita heniatorehai bamona. Iehova ia gwauhamata, iena lalo-namo bona hahenamo amo unai abitorehai ena davana do ia henia. (Aonega Herevadia 10:22; Mataio 6:3, 4; Luka 14:12-14) Oibe, iseda tomadiho tamona tadikaka ta be ia dabu dainai ita hebogahisi henia neganai, unai kara ese Iehova ena kudouna ia hamarerea. Ita moale bada badina ita diba iseda hebogahisi karadia be iseda guba Tamana ese ia itadia noho!—Mataio 5:7.
19. (a) Dahaka dainai ita diba momokani haroro bona hahediba taudia halaoa gaukarana ai ita karaia gaudia be Iehova ese ia laloa bada? (b) Iehova ena Basileia durua totona ita karaia gaukaradia edia davana be edena bamona ia henia?
19 Iehova ena Basileia dainai ita karaia gaudia be ia ese ia lalodia bada. Iehova kahirakahira ita lao neganai, iseda ura be eda nega, goada, bona kohu ita gaukaralaia, Basileia harorolaia bona hahediba taudia halaoa gaukarana ita karaia badabada totona. (Mataio 28:19, 20) Nega haida, do ita laloa anina sisina ita havaraia noho. Iseda goevadae lasi kudouna ai reana ita daradara bema Iehova ese iseda hekwarahi ia abia dae eiava. (1 Ioane 3:19, 20) To iseda kudouna amo mai lalokau ida ita henia harihari gaudia ibounai be Iehova ese ia laloa bada—herevana idia maragi. (Mareko 12:41-44) Baibel ese ita ia hamaoroa, ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia.” (Heberu 6:10) Oibe, Iehova ese iena Basileia durua totona idia karaia gaukara maragidia danu ia laloatao bona davana do ia henia. Ita ese hari lauma dalanai hahenamo momo do ita abia sibona lasi, to do ia vara tanobada matamatana ai do ita moalelaia gaudia ita laloa diba, unuseniai Iehova be mai ena hariharibada ida ena imana do ia kehoa bona ia kahirakahira idia noho taudia edia ura gaudia maorodia ibounai do ia henia!—Salamo 145:16, NW; 2 Petero 3:13.
20. Lagani 2003 lalonai, iseda lagani ena siri badana be edena bamona do ita laloatao, bona dahaka do ia vara?
20 Lagani 2003 lalonai, namona be ita sibona ita nanadaia bema ita be kara haida ita karaia noho, iseda guba Tamana kahirakahira ita lao totona. Bema unai bamona ita karaia, ita daradara lasi Ia be ena gwauhamata hegeregerena do ia karaia danu. Unai ita diba badina “Dirava [ia] koikoi diba lasi.” (Tito 1:2) Bema oi be ia kahirakahira oi lao, ia be oi kahirakahira do ia mai. (Iamesi 4:8) Bona dahaka do ia vara? Hahenamo momo hari inai negai do oi abia bona Iehova kahirakahira momokani do oi noho diba ela bona hanaihanai dalana ia kehoa!
[Footnote]
a May 1, 2000, ena Gima Kohorona, rau 28-31 dekenai inai sivarai, “Iehova be Iseda Kudouna Ia Hereaia,” dainai, unai hereva ia torea.
Oi Laloatao, A?
• Iehova ese ia kahirakahira idia lao taudia dekenai edena harihari gauna ia henia?
• Iehova ese lauma dalanai ena taunimanima ia naria totona dahaka heduru gaudia ia henia?
• Dahaka dainai guriguri amo Iehova ita hereva henia diba be hahenamo namo hereana ta?
• Baibel ese edena bamona ia hahedinaraia Iehova ese ia havaraia taudia edia kamonai hesiai gaukarana ia laloa bada?
[Picture on page 11]
Iehova ese hereva momokani lalo-pararalaia karana amo ita ia hanamoa
[Pictures on page 12, 13]
Lauma dalanai Iehova ese ita ia naria
[Picture on page 14]
Iehova be kahirakahira, ia ura bada iseda guriguri ia kamonai