Kongrigeisen Lalonai Iehova Hanamoa
“Oiemu kara be lauegu tadina dekenai do lau hamaorolaia, bona hebou [“kongrigeisen,” NW ] lalonai oiemu ladana do lau hanamoa.”—HEBERU 2:12.
1, 2. Dahaka dainai kongrigeisen ia noho bona ena namo be dahaka?
GUNAGUNA amo ema bona hari, momo be edia ruma bese lalonai tura namodia bona noho namo idia moalelaia. To, Baibel ese bese ma ta ia herevalaia, tanobada hegegemadai taunimanima momo be unai bese lalonai tura namodia bona noho namo idia moalelaia. Unai bese be Keristani kongrigeisen.a Herevana oiemu ruma bese lalonai hetura namonamo eiava heduru heheni karana ia noho eiava lasi, to Dirava ese kongrigeisen amo ia hegaegaelaia dalana oi laloa bada diba. To bema oi be Iehova ena Witnes taudia edia kongrigeisen ta oi bamoa noho, do oi hamomokania unuseniai tura namodia bona noho namo oi moalelaia.
2 Kongrigeisen be iseda turadia ida ita moale hebou klab ta lasi. Bona ia be komiuniti taudia idia hebou, hanua tamona taudia, spot eiava edia ura gaudia be hegeregere taudia edia klab ta lasi. To, kongrigeisen ia noho ena badina be Iehova Dirava hanamoa totona. Salamo bukana ese ia hahedinaraia, idaunega amo unai idia karaia. Salamo 35:18 ia gwau: “Hebou [“kongrigeisen,” NW ] badana lalonai, oi do lau tanikiu henia. Taunimanima momo edia vairana dekenai oi do lau hanamoa.” Unai hegeregerena, Salamo 107:31, 32 ese ita ia hagoadaia: “Lohiabada dekenai edia tanikiu idia henia be namo, ia ese iena lalokau bona bogahisihisi bona hoa karadia, taunimanima dekenai ia hedinaraia dainai. Namona be edia guriguri hebou dekenai ia do idia hanamoa.”
3. Paulo ese kongrigeisen ena maduna be edena bamona ia herevalaia?
3 Keristani aposetolo tauna Paulo ese kongrigeisen ena maduna badana ta ia gwauraia, “Dirava ena orea taudia, bona inai orea be mauri Diravana ena ekalesia [“kongrigeisen,” NW ]. Ekalesia be hereva momokani ena du, bona hereva momokani ia gimaia maguna.” (1 Timoteo 3:15) Paulo be edena kongrigeisen ia herevalaia? Baibel be edena dala ai “kongrigeisen” ia gaukaralaia? Bona edena dala ai kongrigeisen ese ita ia durua hari bona vaira negana ai? Haere ita abia totona, mani Dirava ena Hereva ese “kongrigeisen” ia gaukaralaia daladia idauidau ita laloa.
4. Heberu Revarevadia lalonai “kongrigeisen” be edena dala ai idia gaukaralaia?
4 Heberu gado herevana idia hahanaia “kongrigeisen,” ena anina korikorina be “taunimanima idia boiria idia hebou totona.” (Deuteronomi 4:10; 9:10) Salamo torea tauna ese kongrigeisen ia gaukaralaia guba dekenai idia noho aneru bona kara dika taudia edia hebou ia gwauraia totona. (Salamo 26:5; 89:5-7) To, nega momo Heberu Revarevadia lalonai kongrigeisen idia gaukaralaia Israela taudia edia hebou idia herevalaia totona. Dirava ia gwau, Iakobo be ‘bese bada herea do ia halaoa’ bona unai ia vara. (Genese 28:3; 35:11; 48:4) Dirava ese Israela taudia ia boiria eiava abia hidi “Ena orea taudia” ai idia lao totona.—Numera 20:4; Nehemia 13:1; Iosua 8:35; 1 Samuela 17:47; Mika 2:5.
5. Edena Greek herevana ena anina be “kongrigeisen,” bona edena dala ai idia gaukaralaia?
5 Greek gado herevana ek·kle·siʹa be hereva rua, “lao” bona “boiria mai” amo idia abia. Ekalesia be taunimanima edia orea ia herevalaia diba danu, Efeso dekenai Demetrio ese Paulo samania totona ia karaia “hebou” hegeregerena. (Kara 19:32, 39, 41) To Baibel be nega momo Keristani kongrigeisen ia herevalaia neganai, ekalesia ia gaukaralaia. Hahanaia taudia haida be ekalesia idia hahanaia neganai, inai hereva “dubu” idia gaukaralaia, to buka ta [The Imperial Bible-Dictionary] ia gwau “unai hereva ese . . . Keristani taudia be tomadiho totona idia hebou rumana ta ia herevalaia lasi.” To, Keristani Greek Revarevadia lalonai, inai hereva “kongrigeisen” be dala idauidau 4 ai idia gaukaralaia.
Dirava Ena Horoa Ekalesia Taudia
6. Davida bona Iesu be kongrigeisen lalonai dahaka idia karaia?
6 Salamo 22:22 ai, Davida ese Iesu ia herevalaia dalana be aposetolo Paulo ese ia gwauraia lou, ia gwau: “ ‘Oiemu kara be lauegu tadina dekenai do lau hamaorolaia, bona hebou [“kongrigeisen,” NW ] lalonai oiemu ladana do lau hanamoa.’ Unai dainai Iesu be kara ibounai dekenai, iena tadina taudia hegeregerena momokani ia lao. Badina unai dala dekena amo Iesu be Hahelagaia Tauna Badana do ia lao, bona Dirava ena hesiai gaukara, mai momokani bona mai bogahisihisi danu do ia karaia.” (Heberu 2:12, 17) Davida ese idaunegai Israela taudia edia vairanai Dirava ia hanamoa. (Salamo 40:9) To, Paulo ia gwau Iesu ese “kongrigeisen lalonai” Dirava ia hanamoa neganai, ia be dahaka ia herevalaia? Edena kongrigeisen ia herevalaia?
7. Keristani Greek Revarevadia lalonai inai hereva “kongrigeisen” ena anina badana be dahaka?
7 Heberu 2:12, 17 ena hereva be mai anina bada. Unai siri ia gwau Keriso be unai hebou lalonai ia noho bona ena tadina dekenai Dirava ena ladana ia gwauraia hedinarai. Iesu ena tadina be daidia? Idia be “Aberahamo ena natuna” taudia, “Dirava ese ia abia hidi” guba dekenai Keriso ida idia lohia totona. (Heberu 2:16–3:1; Mataio 25:40) Oibe, Keristani Greek Revarevadia lalonai inai hereva “kongrigeisen” ena anina badana be Keriso murinai idia raka horoa taudia edia orea. Unai 144,000 horoa taudia be “Dirava ena vara guna natuna taudia edia hebou gabuna dekenai [idia] ginidae vadaeni. Unai natuna taudia edia ladana be guba dekenai idia torea vadaeni.”—Heberu 12:23.
8. Iesu ese Keristani kongrigeisen ia matamaia dalana be edena bamona ia gwauraia?
8 Iesu ia gwau unai Keristani “kongrigeisen” be do idia hamatamaia. Lagani ta ia do noho bena Iesu do ia mase neganai, ia ese Petero ia hamaoroa: “Inai nadi latanai lauegu ekalesia do lau haginia, bona hel ena siahu danu ese ekalesia do ia halusia diba lasi.” (Mataio 16:18) Petero bona Paulo idia diba momokani Iesu be unai nadi. Petero ia gwau, unai “mauri nadidia” be nadi, Keriso unai, latanai idia haginia lauma rumana ai idia lao, idia be ‘Dirava ena orea korikori taudia. Dirava ese ia abia hidi, iena hoa kara badadia do idia gwauraia hedinarai’ totona.—1 Petero 2:4-9; Salamo 118:22; Isaia 8:14; 1 Korinto 10:1-4.
9. Dirava ena kongrigeisen be edena negai ia vara?
9 Edena negai “Dirava ena orea korikori taudia” ese Keristani kongrigeisen idia haginia? Pentekoste 33 C.E. ai, Ierusalema dekenai idia hebou taudia latanai Dirava ese lauma helaga ia bubua neganai, Keristani kongrigeisen ia vara. Gabeai, Petero ese Iuda taudia bona Iuda tomadiho idia abia dae taudia dekenai hereva namo herea ta ia henia. Iesu ena mase dainai idia momo idia hebogahisi bada; idia helalo-kerehai bona bapatiso idia abia. Baibel ese ia hahedinaraia taunimanima 3,000 be unai bamona idia karaia, bena Dirava ena kongrigeisen matamata ai idia vareai bona kongrigeisen ena namba ia bada daekau. (Kara 2:1-4, 14, 37-47) Kongrigeisen ia bada badina Iuda bona Iuda tomadiho idia abia dae taudia momo idia laloparara, Israela besena be Dirava ese ia dadaraia. To hari, horoa Keristani taudia, “Dirava ena Israela momokani orea taudia” unai, be Dirava ese ia abia dae bona idia be ena kongrigeisen korikorina ai idia lao.—Galatia 6:16; Kara 20:28.
10. Edena dala ai Iesu be Dirava ena kongrigeisen ida ia gaukara hebou?
10 Nega momo Baibel be Iesu bona horoa taudia edia idau ia hahedinaraia, hegeregere inai hereva “Keriso bona iena ekalesia.” Iesu be horoa Keristani taudia edia Kwarana. Paulo ia gwau, Dirava ese “ekalesia ena kwarana momokani Keriso ia halaoa. Ekalesia be Keriso ena tauanina.” (Efeso 1:22, 23; 5:23, 32; Kolose 1:18, 24) Hari inai negai, horoa taudia edia orea maragina sibona be tanobada dekenai idia do noho. Ita diba momokani, edia Kwarana, Iesu Keriso, ese idia ia lalokau henia. Efeso 5:25 ese iena hemami ia gwauraia hedinarai: “Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” Iesu be idia ia lalokau henia badina idia ese ‘ia ena amo nega ibounai hahenamo herevadia boubouna be Dirava idia henia, ena ladana idia gwauraia hedinarai bibinadia edia huahua be unai.’ Iesu be tanobada dekenai ia noho neganai ia karaia bamona.—Heberu 13:15, NW.
“Kongrigeisen”—Ena Anina Ma Haida
11. Keristani Greek Revarevadia ese edena dala iharuana ai “kongrigeisen” ia gaukaralaia?
11 Nega haida Baibel ese kongrigeisen ia gaukaralaia neganai, ia be orea maragina ta ia herevalaia, to “Dirava ena ekalesia taudia” 144,000 taudia ibounai ia herevalaia lasi. Hegeregere, Paulo ese Keristani taudia haida ia tore henidia, ia gwau: “Do umui noho namonamo, vadaeni Iuda taudia, Iuda lasi taudia, bona Dirava ena ekalesia [“kongrigeisen,” NW ] taudia ese emui kara namo do idia itaia, be do umui hakaudia kerere lasi.” (1 Korinto 10:32) Bema, Korinto dekenai ia noho Keristani tauna ta ena kara ia maoro lasi, unai ese ma ta ia hakaua kerere diba. To, ia karaia karana ese Greek taudia, Iuda taudia eiava unai nega amo ema bona hari idia noho horoa taudia ibounai do ia hakaua kerere, a? Lasi. Unai siri ese ia herevalaia “Dirava ena ekalesia taudia” be unai nega lalonai idia noho Keristani taudia sibona. Unai hegeregerena, herevana Keristani taudia be edeseniai idia noho, to nega korikori ai Iehova ese idia ia hakaua, durua, bona ia hanamodia. Eiava unai siri be hari inai nega lalonai ia noho Keristani tadikaka oreana ibounai—Dirava ena kongrigeisen—ena moale bona maino ia herevalaia.
12. Baibel ese edena dala ihatoina ai “kongrigeisen” ia gaukaralaia?
12 Dala ihatoina be, Baibel ese “kongrigeisen” ia gaukaralaia tano ta dekenai idia noho Keristani taudia ibounai ia herevalaia totona. Ia gwau: “Iudea tano ibounai, bona Galilea bona Samaria dekenai danu, ekalesia orea [“kongrigeisen,” NW ] ibounai ese maino idia abia.” (Kara 9:31) Ena be unai gabu badana dekenai Keristani orea momo idia noho, to idia ibounai Iudea, Galilea, bona Samaria dekenai be Baibel ese ia gwauraia “ekalesia orea.” Pentekoste 33 C.E. ai bona unai murinai bapatiso idia abia taudia edia namba ia bada daekau dainai, kongrigeisen momo be hanaihanai Ierusalema dekenai idia hebou. (Kara 2:41, 46, 47; 4:4; 6:1, 7) Heroda Agripa I be Iudea ia lohiaia ela bona 44 C.E. ai ia mase. Tesalonika Ginigunana 2:14 ese ia hahedinaraia bamona lagani 50 C.E. lalonai, Iudea dekenai kongrigeisen momo idia noho. Unai dainai, inai hereva Heroda ese “ekalesia taudia haida ia dogoatao, hadikaia totona,” ena anina be kongrigeisen tamona lasi, to Ierusalema dekenai idia noho kongrigeisen ibounai dekenai unai ia karaia.—Kara 12:1.
13. Edena dala namba foa ai Baibel ese “kongrigeisen” ia gaukaralaia?
13 Dala namba foa be, Baibel ese “kongrigeisen” ia gaukaralaia Keristani taudia kongrigeisen ta lalonai ia herevalaia totona. Paulo ese “Galatia ekalesia orea” eiava kongrigeisen ia herevalaia neganai, ia be kongrigeisen tamona sibona ia herevalaia lasi, to unai Roma hanua badana dekenai idia noho kongrigeisen idauidau hegeregere, Antioka, Derebe, Lusitera, bona Ikonio ia herevalaia danu. Unai kongrigeisen ta ta dekenai kwarana taudia, eiava elda taudia idia abia hidi. (1 Korinto 16:1; Galatia 1:2; Kara 14:19-23) Baibel ese unai kongrigeisen ibounai ia gwauraia “Dirava ena ekalesia.”—1 Korinto 11:16; 2 Tesalonika 1:4.
14. Baibel ena siri haida ese “kongrigeisen” be edena bamona idia gaukaralaia?
14 Gabu haida dekenai, reana Keristani heboudia ai taunimanima be momo lasi dainai, tadikaka ta ena ruma dekenai idia hebou. To, unai grup maragidia ta ta idia gwauraia “kongrigeisen.” Unai kongrigeisen haida be Prisikila bona Akwila, Numupa, bona Filemona edia ruma dekenai idia hebou. (Roma 16:3-5; Kolose 4:15; Filemona 2) Unai ese hari inai negai, kongrigeisen maragidia, tadikaka edia ruma dekenai idia hebou taudia ia hagoadaia diba. Aposetolo edia negai Iehova ese unai kongrigeisen maragidia ia laloa bada, bona hari inai nega danu unai bamona ia karaia—ena lauma helaga amo ia durudia.
Kongrigeisen Taudia ese Iehova Idia Hanamoa
15. Aposetolo edia negai, lauma helaga be kongrigeisen lalonai edena bamona ia gaukara?
15 Iesu ese Salamo 22:22 ena hereva ia hagugurua, badina ia ese hebou lalonai Dirava ena ladana ia hanamoa. (Heberu 2:12) Iena murinai idia raka taudia danu be unai bamona do idia karaia. Aposetolo edia negai, lauma helaga ese Keristani taudia ia horoa, Dirava ena natudia bona Keriso ena tadikaka ai idia lao neganai, idia haida be hoa kara haida idia karaia diba. Hegeregere, idia haida be mai aonega ida idia hereva, ma haida be gorere idia hanamoa eiava peroveta herevadia idia gwauraia, eiava idau momokani gado dekenai idia hereva diba.—1 Korinto 12:4-11.
16. Dahaka dainai lauma helaga ena harihari gaudia idia abia?
16 Paulo ese idau gado momokani hereva karana ia herevalaia, ia gwau: “Ane danu lau abia neganai, be egu lauma bona egu lalona dekenai danu nega tamona do lau abia.” (1 Korinto 14:15) Ia laloa ma haida ese ena hereva idia lalopararalaia be namo, unai amo diba do idia abia. Paulo ia ura bada kongrigeisen lalonai Iehova ia hanamoa. Lauma helaga ena harihari gaudia idia abia taudia ia hamaoroa: “Ekalesia ena taudia do idia hagoadaia harihari gaudia do umui tahua goadagoada, be gau badana,” anina be idia ta ta edia kongrigeisen taudia do idia hagoadaia. (1 Korinto 14:4, 5, 12, 23) Ia hahedinaraia goevagoeva, Paulo ese kongrigeisen ia laloa bada, ia diba kongrigeisen ta ta lalonai, Keristani taudia be mai edia dala Dirava idia hanamoa totona.
17. Iehova ese edena dala ai kongrigeisen ta ta ia hanamoa?
17 Iehova ese ena kongrigeisen ia gaukaralaia bona durua noho. Hari inai negai, Ia ese tanobada dekenai idia noho horoa Keristani taudia ia hanamodia noho. Unai ita diba badina hari inai negai Dirava ena taunimanima be Baibel ena hereva amo diba bada idia abia noho. (Luka 12:42) Iehova ese tanobada hegegemadai idia noho tadikaka oreana ia hanamoa noho. Ia ese kongrigeisen ta ta ia hanamoa noho, unuseniai ita ese iseda kara bona haere namodia amo iseda Havaraia Tauna ita hanamoa. Kongrigeisen heboudia amo diba ita abia unai amo iseda kongrigeisen ida ita noho lasi neganai, Dirava ita hanamoa diba.
18, 19. Kongrigeisen idauidau lalonai Keristani taudia idia ura dahaka idia karaia?
18 Ita laloa lou, aposetolo Paulo ese Makedonia dekenai Filipi kongrigeisen taudia ia hamaoroa ia gwau: “Dirava lau noia noho inai bamona: . . . Umui emui kara ibounai be do idia namodia momokani. Iesu Keriso sibona ese inai bamona kara ia havaraia diba, Dirava ese hanamoa bona hairai do ia abia totona.” Anina be edia abidadama Iesu dekenai bona edia helaro namona be murimuri taudia dekenai idia gwauraia be namo. (Filipi 1:9-11; 3:8-11) Unai dainai, Paulo ese Keristani taudia ia hagoadaia: “Namona be Dirava do ita hanamoa, Iesu ena ladana dainai. Bona inai hanamoa Dirava dekenai do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.”—Heberu 13:15.
19 Iesu ia karaia bamona, oi ese “hebou lalonai” Dirava oi hanamoa bona Dirava idia do diba lasi taudia vairanai emu udu bibina amo Iehova hanamoa karana oi moalelaia, a? (Heberu 2:12; Roma 15:9-11) Iseda lalohadai kongrigeisen ena maduna, Dirava ena ura hagugurua karana dekenai ese ita do ia durua unai henanadai ita haerelaia totona. Stadi gabena ai, Iehova ese hari inai negai kongrigeisen ia hakaua bona gaukaralaia dalana bona ena maduna iseda mauri lalonai do ita herevalaia.
[Footnote]
a Buka Helaga lalonai, Heberu bona Greek herevadia kongrigeisen totona be dala idauidau ai idia hahanaia, hegeregere, “hebou,” “ekalesia,” “bese,” bona “orea.” To inai stadi ese ia gaukaralaia momo herevana ena anina be taunimanima idia hebou kara ta idia karaia totona.
Oi Laloatao, A?
• “Dirava ena ekalesia taudia,” horoa Keristani taudia edia orea unai, be edena bamona ia vara?
• Baibel ese edena dala toi ai inai hereva “kongrigeisen” ia gaukaralaia?
• Davida, Iesu bona aposetolo taudia edia negai, idia noho taudia be idia ura kongrigeisen lalonai dahaka idia karaia, bona unai ese edena bamona ita ia durua?
[Picture on page 5]
Iesu be edena kongrigeisen ena du?
[Picture on page 7]
Hebou totona idia haboua Keristani taudia be “Dirava ena ekalesia taudia”
[Picture on page 8]
Benin dekenai idia noho Keristani taudia bamona, kongrigeisen lalonai Iehova ita hanamoa diba