Mai Manau ida Mamoe Naria Taudia Badinaia
“Umui idia hakaua taudia do umui kamonai henia, bona edia hereva do umui badinaia.”—HEBERU 13:17.
1, 2. Edena siri ese idia hahedinaraia Iehova bona Iesu be lalokau Mamoe Naria Taudia?
IEHOVA DIRAVA bona iena Natuna, Iesu Keriso, be lalokau Mamoe Naria Taudia. Isaia ia gwau: “Kamonai! Lohiabada Dirava, be mai siahu danu ia mai noho. . . . Ia ese iena mamoe do ia ubua, mamoe naria tauna ia ubua noho bamona. Ia ese mamoe edia natudia do ia haboua, bona iena imana dekenai idia do ia rosia, idia do ia huaia lao. Bona edia sinadia bona rogorogo gaudia, be ia ese metairametaira do ia hakaudia lao.”—Isaia 40:10, 11.
2 Unai peroveta herevana ia guguru negana ginigunana be lagani 537 B.C.E. ai, unai nega ai Iuda taudia be Iuda dekenai idia giroa lou. (2 Sivarai 36:22, 23) Unai peroveta herevana be ma lagani 1919 ai ia guguru lou, unai nega ai Kurese Badana, Iesu Keriso ese horoa orena taudia be “Babulonia badana” amo ia hamauria. (Apokalupo 18:2; Isaia 44:28) Iesu be Iehova totona ia lohia noho, mamoe bamona taudia ia haboua bona mamoe naria tauna bamona mai hebogahisi ida idia ia naria. Iesu ia gwau: “Lau be mamoe naria tauna namona. Lauegu mamoe be lau diba. Lauegu mamoe danu idia diba lau.”—Ioane 10:14.
3. Iehova be edena dala ai iena mamoe idia kara henia dalana dekenai ena lalokau ia hahedinaraia?
3 Isaia 40:10, 11 ena peroveta herevana ese ia hahedinaraia, Iehova be mai hebogahisi ida iena taunimanima ia naria. (Salamo 23:1-6) Iesu be tanobada ai ena hesiai gaukara ia karaia neganai, ena hahediba taudia bona taunimanima ibounai dekenai hebogahisi ia hahedinaraia. (Mataio 11:28-30; Mareko 6:34) Iehova bona Iesu be Israela ena hebogahisi lasi mamoe naria taudia idia inai henidia, badina idia be edia mamoe orea idia naria namonamo lasi. (Esekiela 34:2-10; Mataio 23:3, 4, 15) Iehova ia gwauhamata: “Lau ese egu mamoe do lau hamauria, bona idia dekenai dagedage karana be do lau koua. Lauegu mamoe ta ta ibounai do lau kota henia, bona namodia be kahana do lau atodia, dikadia be kahana do lau atodia. Bona lau ese mamoe naria tauna tamona, egu hesiai tauna Davida bamona, idia dekenai do lau henia. Ia ese idia do ia naria.” (Esekiela 34:22, 23) Inai nega dokona ai, Iehova ese mamoe naria tauna tamona, Davida Badana Iesu Keriso ia abia hidi, tanobada ai horoa Keristani taudia bona “mamoe idaudia” do ia naria.—Ioane 10:16.
Iehova ese Kongrigeisen Dekenai Harihari Gaudia Ia Henia
4, 5. (a) Iehova ese dahaka harihari gaudia be iena taunimanima dekenai ia henia? (b) Iesu be ena kongrigeisen dekenai dahaka harihari gaudia ia henia?
4 Iehova ese tanobada dekenai ena hesiai taudia ia naria totona, mamoe naria tauna tamona—Iesu Keriso—ia henia, unai be Keristani kongrigeisen dekenai harihari gauna namona. Unai Hakaua Tauna be Isaia 55:4 ese ia perovetalaia: “Lau ese Davida lau abia hidi, bona gunalaia tauna, bona bese idauidau edia lohia lau halaoa. Bona Davida dekena amo, egu siahu badana bese idauidau dekenai lau hedinaraia.” Horoa Keristani taudia bona “hutuma bada” taudia be bese, iduhu bona gado idauidau amo idia haboua mai noho. (Apokalupo 5:9, 10; 7:9) Idia be orea tamona ai idia lao, mamoe naria tauna tamona, Iesu Keriso ena hakaua henunai.
5 Iesu ese tanobada ai idia noho kongrigeisen dekenai harihari gaudia ia henia. Iesu henunai idia gaukara mamoe naria taudia be Iehova bona Iesu edia kara idia tohotohoa, mamoe orea be mai hebogahisi ida idia naria. Aposetolo Paulo be Efeso Keristani taudia ia tore henia neganai, unai harihari gauna ia herevalaia. Ia gwau: “ ‘Atai dekenai ia daekau lao neganai, abia mauri mai guia taudia momo ia danu ia abia lao. Bona harihari gaudia taunimanima dekenai ia henia.’ . . . Haida dekenai be aposetolo dagi ia henia, haida dekenai be peroveta dagi ia henia, haida be evanelia gaukara taudia, haida be haroro taudia, haida be hadibaia taudia. Inai bamona harihari gaudia ia henia, be Dirava ena taudia ibounai do ia durua totona. Inai be Dirava ena hesiai gaukara do idia karaia namonamo, bona Keriso ena tauanina do ia gini goada totona.’ ”—Efeso 4:8, 11, 12.
6. Apokalupo 1:16, 20 ese horoa elda taudia be edena bamona ia gwauraia, bona mamoe idaudia amo idia abia hidi elda taudia be edena bamona?
6 Unai “harihari gaudia” be Iehova bona iena Natuna ese lauma helaga amo idia abia hidi elda taudia, idia be mai hebogahisi ida mamoe idia naria. (Kara 20:28, 29) Matamanai, elda taudia ibounai be horoa Keristani taudia. Unai horoa kongrigeisen lalonai idia gaukara horoa elda taudia be Apokalupo 1:16, 20 ese ia gwauraia “hisiu” eiava “aneru,” bona idia be Keriso ena imana idibana lalonai, anina be idia be Keriso henunai idia gaukara. To hari, horoa elda taudia edia namba ia maragi ia lao dainai, kongrigeisen momo dekenai elda taudia momo be mamoe idaudia taudia. Unai taudia be Hakaua Oreana ese lauma helaga ena hakaua amo idia abia hidi dainai, ita gwau diba idia be Mamoe Naria Tauna namona, Iesu Keriso henunai idia gaukara. (Isaia 61:5, 6) Kongrigeisen ai elda taudia be Keriso, kongrigeisen ena Kwarana, idia badinaia dainai, idia danu ita gaukara hebou be gau badana.—Kolose 1:18.
Kamonai Bona Badinaia
7. Aposetolo Paulo be ita dekenai dahaka sisiba ia henia?
7 Guba ai idia noho Mamoe Naria Taudia, Iehova Dirava bona Iesu Keriso, idia ura kongrigeisen lalonai idia gaukara mamoe naria taudia ita kamonai henia bona ita badinadia. (1 Petero 5:5) Lauma helaga ena siahu amo aposetolo Paulo ia gwau: “Umui emui hakaua taudia gunadia do umui laloatao. Idia ese Dirava ena hereva umui dekenai idia hadibaia. Edia mauri dalana do umui laloa lou, bona edia abidadama kara hegeregerena do umui badinaia. Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. . . . Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.”—Heberu 13:7, 17.
8. Paulo ese ita ia hagoadaia dahaka ita “laloa” totona, bona edena dala ai ita “kamonai” henidia diba?
8 Paulo ese ita ia hagoadaia elda taudia edia kara namodia ita “laloa” totona, bona edia haheitalai namona ita badinaia. Danu, ita ia sisiba henia elda taudia edia hakaua dalana do ita badinaia totona. Baibel ia diba bada tauna R. T. France ia gwau, Greek gado herevana idia hahanaia “kamonai,” be kamonai karana totona hanaihanai idia gaukaralaia herevana lasi, to ena anina korikori be ‘ena lalona idia veria,’ anina be ta be mai ena ura ida hakaua dalana ia abia dae. Elda taudia ita kamonai henia badina Baibel ese ita ia hagania, bona ita abia dae idia ese Basileia idia atoa guna bona iseda namo idia laloa. Do ita moale bema edia hakaua dalana ita badinaia.
9. Dahaka dainai elda taudia ita kamonai henidia sibona lasi, to ita “badinaia” be gau badana?
9 Bema elda taudia be gau ta dekenai abia hidi idia karaia, bona unai ita abia dae lasi, dahaka do ita karaia? Unai nega ai badinaia karana ita hahedinaraia be namo. Bema idia abia hidi gaudia ena badina ita lalopararalaia bona ita lalotamona, do ia auka lasi idia ita badinaia totona, to bema edia hakaua dalana ita lalopararalaia lasi, namona be unai badinaia karana ita hahedinaraia noho. Petero, gabeai aposetolo tauna ai ia lao tauna, be unai bamona badinaia karana ia hahedinaraia.—Luka 5:4, 5.
Elda ida Gaukara Hebou Ena Badina Foa
10, 11. Aposetolo edia negai bona hari inai negai, elda taudia be edena dala ai edia Keristani varavara dekenai “Dirava ena hereva” idia gwauraia?
10 Heberu 13:7, 17 ai, aposetolo Paulo be badina foa ia henia dahaka dainai Keristani elda taudia ita kamonai henia bona ita badinaia be namo. Ginigunana be, ita dekenai “Dirava ena hereva” idia gwauraia. Laloatao, Iesu ese kongrigeisen dekenai unai “harihari gaudia” ia henia ‘Dirava ena taudia ibounai do idia durua totona.’ (Efeso 4:11, 12) Ia ese unai mamoe naria taudia ia gaukaralaia Keristani taudia ginigunadia edia lalohadai bona kara ia hamaoromaoroa totona. Unai mamoe naria taudia haida be lauma helaga ena siahu amo kongrigeisen dekenai revareva idia siaia. Ia ese unai taudia ia gaukaralaia Keristani taudia ginigunadia idia hakaua bona hagoadaia totona.—1 Korinto 16:15-18; 2 Timoteo 2:2; Tito 1:5.
11 Hari, Iesu be ‘hesiai tauna mai ena kamonai bona kara maoromaoro’ ena Hakaua Oreana bona elda amo ita ia hakaua. (Mataio 24:45) “Mamoe naria tauna badana,” Iesu Keriso ita matauraia dainai, Paulo ena sisiba ita badinaia be namo, ia gwau: “Keriso ena dala umui dekenai idia hadibaia noho taudia, be mai mataurai danu do umui kamonai henidia.”—1 Petero 5:4; 1 Tesalonika 5:12; 1 Timoteo 5:17.
12. Elda taudia be edena dala ai iseda “lauma idia naria noho”?
12 Keristani elda taudia ida ita gaukara ena badina iharuana be, “idia ese [iseda] lauma idia naria noho.” Bema idia itaia iseda kara be ia namo lasi bona unai ese iseda hetura karana Iehova ida do ia hadikaia, karaharaga sisiba do idia henia ita idia durua totona. (Galatia 6:1) Greek herevana idia hahanaia “naria noho,” ena anina korikori be “mahuta lasi.” Baibel ia diba momo tauna ta ia gwau, unai ese ia hahedinaraia “mamoe naria tauna be hanaihanai ia gima noho.” Elda taudia be lauma dalanai idia noga noho bona iseda namo idia laloa bada dainai hanuaboi haida idia mahuta lasi. Namona be Iesu henunai idia gaukara mamoe naria taudia be idia hekwarahi Iesu, “mamoe naria tauna badana,” ena hebogahisi karana idia tohotohoa totona, ani?—Heberu 13:20.
13. Elda taudia bona Keristani taudia ibounai be daika vairanai edia kara ena badina do idia gwauraia hedinarai? Bona edena dala ai unai do idia karaia?
13 Elda taudia ida ita gaukara hebou ena badina ihatoina be, “Dirava ena vairanai, edia gaukara ibounai ena anina do idia gwauraia hedinarai.” Elda taudia idia diba idia be guba ai idia noho Mamoe Naria Taudia, Iehova Dirava bona Iesu Keriso henunai idia gaukara. (Esekiela 34:22-24) Iehova be mamoe edia Biaguna, bona unai mamoe be “iena lalokau Natuna ena rarana dekena amo ia hoia,” unai dainai elda taudia ese ena mamoe idia naria dalana dekenai idia do ia kota henidia. (Kara 20:28, 29) Danu, ita ibounai be Iehova vairanai iseda kara ibounai do ita gwauraia hedinarai. (Roma 14:10-12) Bema elda taudia ita kamonai henia, unai ese ia hahedinaraia ita be Keriso, kongrigeisen ena Kwarana, ita badinaia.—Kolose 2:19.
14. Dahaka ese elda taudia dekenai lalohisihisi ia havaraia diba, bona unai dainai dahaka ia vara?
14 Paulo ese badina ihahanina ia henia dahaka dainai Keristani elda taudia ita badinaia be gau badana. Ia gwau: “Edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” (Heberu 13:17) Kongrigeisen elda taudia idia huaia maduna badadia be hadibaia gaukara, mamoe naria gaukara, haroro gaukara idia gunalaia, ruma bese idia naria, bona kongrigeisen lalonai hekwakwanai idia hamaoromaoroa. (2 Korinto 11:28, 29) Bema ita be idia ida ita gaukara hebou lasi, edia maduna do ita hametaua. Bona edia gaukara be mai lalohisihisi ida do idia karaia. Bema ita gaukara hebou lasi Iehova do ia moale lasi bona unai ese ita ia hadikaia diba. To, bema elda taudia ita matauraia bona idia ida ita gaukara hebou, mai moale ida edia maduna do idia huaia, bona mai lalotamona bona moale ida Basileia ena sivarai namona do ita harorolaia.—Roma 15:5, 6.
Badinaia Karana Ita Hahedinaraia
15. Edena dala ai kamonai bona badinaia karana ita hahedinaraia diba?
15 Dala momo idia noho elda taudia ida ita gaukara hebou totona. Teritori dekenai taunimanima edia noho dalana ia idau dainai, elda taudia be haroro ena hebou dina bona nega idia haidaua, unai neganai iseda sediual ita haidaua danu, a? Namona be ita hekwarahi unai dala matamata ita durua totona. Bona hahenamo momo ita abia diba. Haroro naria tauna be iseda kongrigeisen buka stadi do ia vadivadi henia, a? Namona be unai pura lalonai iseda haroro gaukara ita habadaia. Tiokratik Haroro Sikuli dekenai kahana ta do ita karaia, a? Namona be unai hebou dekenai ita lao bona iseda kahana ita karaia. Kongrigeisen Buka Stadi naria tauna be ita ia hadibaia vadaeni hari be iseda nega Kingdom Hall ita hagoevaia totona, a? Namona be iseda goada hegeregerena ia ita durua. Unai bona dala ma haida ai, Iehova bona iena Natuna ese idia abia hidi mamoe naria taudia ita badinaia be namo.
16. Bema elda ta be Hakaua Oreana ena hakaua dalana ia badinaia lasi, dahaka dainai do ita gwau-edeede lasi?
16 Nega haida, reana elda tauna ta be hesiai tauna mai ena kamonai bona ena Hakaua Oreana ena hakaua dalana ia badinaia lasi. Bema ia be unai bamona ia karaia noho, Iehova, “Mamoe Naria Tauna” bona iseda mauri ia naria tauna, vairanai ia sibona ese ena kara ena badina do ia gwauraia hedinarai. (1 Petero 2:25) To, bema elda taudia be kerere idia karaia, unai ese maoro ia henia lasi idia ita kamonai henia lasi totona. Iehova ese gwau-edeede karana ia durua lasi.—Numera 12:1, 2, 9-11.
Iehova ese Gaukara Hebou Karana Ia Hanamoa
17. Elda taudia be edena bamona ita kara henia be namo?
17 Iehova Dirava ia diba elda gaukara karaia totona ia abia hidi taudia be goevadae lasi taudia. To, idia ia gaukaralaia, bona lauma helaga ena siahu amo tanobada ai iena taunimanima ia naria. Unai be momokani elda taudia bona ita ibounai dekenai, badina ita abia goada be ‘Dirava sibona dekena amo, ita amo ia mai lasi.’ (2 Korinto 4:7) Unai dainai Iehova ese kamonai elda taudia amo ia karaia gaudia dainai ia ita tanikiu henia be namo, bona idia ida ita gaukara hebou be gau badana.
18. Elda taudia ita badinaia neganai, ita hahedinaraia ita be dahaka ita karaia noho?
18 Elda taudia idia hekwarahi Iehova ese ia gwauraia dalana hegeregerena mamoe oreana idia naria totona. Ieremia 3:15 ia gwau: “Lau ese gunalaia taudia namodia, lau idia kamonai henia noho taudia, be umui dekenai do lau henia. Idia ese umui do idia naria namonamo, mai edia aonega, bona mai edia laloa kehoa danu.” Momokani, elda taudia be Iehova ena mamoe naria gaukara idia karaia namonamo. Unai dainai idia ida ita gaukara hebou, ita kamonai henidia bona ita badinaia amo iseda tanikiu karana ita hahedinaraia. Unai bamona ita karaia neganai, guba dekenai idia noho Mamoe Naria Taudia, Iehova Dirava bona Iesu Keriso dekenai iseda tanikiu karana ita hahedinaraia.
Riviu
• Iehova bona Iesu Keriso be edena dala ai idia hahedinaraia idia be lalokau Mamoe Naria Taudia?
• Kamonai karana sibona lasi, to dahaka dainai ita badinaia be namo?
• Edena dala namodia haida ai iseda badinaia karana ita hahedinaraia diba?
[Picture on page 19]
Keristani elda taudia be Keriso ena hakaua henunai idia gaukara
[Pictures on page 21]
Iehova ese ia abia hidi mamoe naria taudia be dala idauidau ai ita badinaia diba