Diari Dekenai Idia Raka Taudia be Moale Idia Davaria
“Umui mai, Lohiabada ese ita dekenai ia henia diari lalonai do ita raka.”—ISAIA 2:5.
1, 2. (a) Diari be mai anina bada gauna, a? (b) Dahaka dainai dibura ese tanobada do ia koua hadibaia herevana be mai anina?
IEHOVA be diari ena Badina. Baibel ia gwau ia “ese dina ia henia noho, diari ia havaraia totona. Bona hua bona hisiu ia henia, hanuaboi neganai diari do idia henia totona.” (Ieremia 31:35; Salamo 8:3) Ia be iseda dina ia havaraia Tauna, bona unai dina lalonai niuklia lahina ia noho bona guba dekenai iena siahu bada bona diari ia halasia. Unai siahu ena kahana maragina ta be tanobada dekenai ia mai, bona ia henia diari ese tanobada ena mauri gaudia ia hagoadaia. Bema dina ena diari be lasi, do ita noho lasi. Tanobada dekenai gau ta do ia mauri diba lasi.
2 Unai ita laloa neganai, peroveta tauna Isaia ia gwauraia gau ena dika ena bada ita lalo-pararalaia diba. Ia gwau: “Bese idauidau be dibura ese do ia koudia.” (Isaia 60:2) To momokani, unai ese dibura korikorina ia herevalaia lasi. Isaia be dina, hua, bona hisiu edia diari do idia doko ia gwauraia lasi. (Salamo 89:36, 37; 136:7-9) Lasi, ia ese lauma dalanai ia vara dibura ia gwauraia. To lauma diburana ese ita ia hamasea diba. Bema lauma diarina be lasi, do ita mauri diba lasi, diari korikorina ia noho lasi neganai do ita mauri diba lasi hegeregerena.—Luka 1:79.
3. Isaia ena hereva dainai, Keristani taudia ese dahaka idia karaia be namo?
3 Unai dainai, Isaia ena hereva ita laloa be namo, badina ena be idaunegai Iuda dekenai idia vara, to edia hagugurua negana badana be hari. Oibe, iseda nega lalonai tanobada be lauma dalanai ia dibura momokani. Inai dika bada negana lalonai ita noho dainai, lauma diarina be mai anina bada gauna. Unai dainai Keristani taudia ese Iesu ena hagoadaia herevana idia kamonai henia be namo: “Umui emui diari taunimanima edia vairana dekenai unai bamona do umui hedinaraia.” (Mataio 5:16) Abidadama Keristani taudia ese manau taudia totona unai dibura idia hadiaria diba, bena mauri abia dalana do ia kehoa.—Ioane 8:12.
Israela Ena Dibura Negadia
4. Isaia ena peroveta herevadia idia guguru negana ginigunana be edena nega, to iena nega lalonai dahaka ia noho vadaeni?
4 Isaia ena hereva, dibura ese tanobada do ia koua, ena hagugurua negana ginigunana be Iuda tanona ia noho kava bona iena taunimanima be Babulonia dekenai idia abia lao neganai idia vara. To, unai ia do vara lasi neganai, Isaia ena nega lalonai unai bese be lauma dalanai ia dibura momokani vadaeni, unai dainai iena tano tamona taudia ia hagoadaia: “Iakobo ena besena e, umui mai, Lohiabada ese ita dekenai ia henia diari lalonai do ita raka”!—Isaia 2:5; 5:20.
5, 6. Edena gaudia ese Isaia ena negai ia noho dibura idia habadaia?
5 Iuda tanona ai, Isaia be “Iuda tano ena king Usaia, king Iotama, king Ahasa, bona king Hesekaia edia nega” lalonai ia peroveta. (Isaia 1:1) Unai dagedage negana lalonai, politikol heiriheiri, tomadiho koikoi, kota gageva, bona ogogami taudia hametaua karadia idia vara. King namodia edia lohia negana lalodiai danu, hegeregere Iotama ena nega, dirava koikoi edia boubou patadia be ororo latadiai idia noho! Abidadama lasi king taudia henunai, unai kara be bada herea. Haheitalai ta be pavapava dikana, King Ahasa, iena kara dika ia habadaia ela bona ena natuna be Moleka dekenai boubou gauna bamona ia henia. Unai be dibura negana momokanina!—2 King Taudia 15:32-34; 16:2-4.
6 Tano ma haida dainai danu, dibura ia noho. Moaba, Edoma, bona Pilistia taudia be Iuda ena hetoana dekenai idia gini, bona dika idia havaraia diba. Not kahana basileiana, Israela, ena be idia be varavara taudia, to idia be Iuda ena inai besena momokanina. Not kahana momokani dekenai, Suria ese Iuda ena maino ia hadikaia toho. To dika bada herea ia havaraia diba bona hebogahisi lasi besena ta be Asuria, hanaihanai dala ia tahua tano ma haida ia abia totona. Isaia ia peroveta negana lalonai, Asuria ese Israela besena ia halusia bona kahirakahira Iuda ia hadikaia. Nega ta, Asuria ese Iuda ena magu hanuadia ibounai ia halusia, to Ierusalema sibona ia halusia lasi.—Isaia 1:7, 8; 36:1.
7. Israela bona Iuda ese edena dala idia abia hidi, bona Iehova ese dahaka ia karaia?
7 Dirava ena gwauhamata besena be unai bamona dika idia davaria badina Israela bona Iuda ese ia idia gwau-edeede henia. Aonega Herevadia bukana ia herevalaia taudia hegeregerena, idia be “kara maoromaoro daladia idia rakatania, bona dibura daladia lalonai idia raka noho.” (Aonega Herevadia 2:13) Iehova ese ena taunimanima ia badu henia, to ia rakatanidia lasi. Ia ese Isaia bona peroveta taudia ma haida ia siaia unai bese lalonai mai abidadama ida Iehova idia hesiai henia noho taudia dekenai, lauma diari do idia abia totona. Peroveta taudia amo ia henia diari be dava bada gauna bamona! Ia be hamauria gauna.
Dibura Negadia Hari
8, 9. Hari inai negai, edena gaudia ese inai tanobada ena dibura idia habadaia?
8 Isaia ena nega be hari inai nega bamona. Iseda nega lalonai, taunimanima edia gunalaia taudia ese Iehova bona ia lohia noho King, Iesu Keriso, idia dadaraia. (Salamo 2:2, 3) Kerisendom ena tomadiho gunalaia taudia ese edia orea taudia idia hakaua kerere. Unai gunalaia taudia idia gwau Dirava idia hesiai henia, to inai tanobada ena dirava idauidau—bese, tuari, taga, bona ladana bada taudia—tomadiho henia karana idia durua bona tomadiho koikoi hahediba herevadia idia hadibaia danu.
9 Gabu idauidau dekenai, Kerisendom ena tomadiho oreadia idia vareai tuaridia lalonai, bese idauna hamasea ore karana bona dika badadia ma haida idia vara. Danu, Baibel ena kara maoromaoro taravatudia idia badinaia lasi, to dubu momo ese sihari kava karadia bona tatau idia sihari heheni karana idia gwauraia dika lasi, eiava idia gwauraia namo. Baibel ena taravatu idia dadaraia dainai, Kerisendom ena seri be idaunegai salamo tauna ese ia herevalaia taudia bamona: ‘Idia be gau ta idia diba lasi, idia be gau ta ena anina idia davaria lasi. Idia be dibura dekenai idia loaloa kava noho.’ (Salamo 82:5) Momokani, Kerisendom be idaunegai Iuda bamona, dibura bada herea lalonai ia noho.—Apokalupo 8:12.
10. Hari inai negai ia noho dibura lalonai, edena dala ai diari ia hedinarai noho, bona manau taudia ese edena namo idia abia?
10 Unai dibura lalonai, Iehova ese manau taudia totona diari ia halasia. Unai ia karaia totona, ia horoa hesiai taudia tanobada dekenai, “hesiai tauna mai ena kamonai, bona mai ena kara maoromaoro,” ia gaukaralaia bona idia be “tanobada idia hadiaria.” (Mataio 24:45; Filipi 2:15) Unai hesiai oreana, bona “mamoe idaudia” milioni momo danu, be Dirava ena Hereva, Baibel, ia henia lauma diarina idia hahedinaraia. (Ioane 10:16) Inai dibura tanobadana ai, unai bamona diari ese manau taudia dekenai helaro ia henia, idia ia durua Dirava idia tura henia bona lauma tarapu lalonai do idia moru lasi totona. Unai diari be mai anina, ia be mauri ia henia gauna.
“Oiemu Ladana Do Lau Hanamoa”
11. Isaia ena negai, Iehova ese edena durua herevadia ia henia?
11 Isaia ia noho negana ena dibura dinadia ai, bona unai murinai idia dibura momokani dinadia ai Babulonia ese Iehova ena bese taudia ia abia lao neganai, Iehova ese edena bamona hahekau ia henia? Kara maoromaoro taravatudia ia henia sibona lasi, to iena ura ena taunimanima dekenai do ia hagugurua dalana ia gwauraia hedinarai goevagoeva guna. Hegeregere, Isaia karoa 25 ia lao 27 dekenai idia noho peroveta hereva namodia oi laloa. Edia hereva ese Iehova ena kara unai neganai, bona ena kara hari idia hahedinaraia.
12. Isaia be mai ena kudouna ibounai ida dahaka hereva ia henia?
12 Matamanai, Isaia ia gwau: “Lohiabada e, oi be egu Dirava. Oi do lau matauraia, bona oiemu ladana do lau hanamoa.” Mai ena kudouna ibounai ida ia gwauraia! To dahaka dainai peroveta tauna be unai bamona guriguri ia gwauraia? Unai siri ena dokona ese ena badina badana ia hahedinaraia: “Oi ese hoa kara badadia oi karaia vadaeni. Gunaguna inai gau oi palania, bona mai maoromaoro bona momokani danu oi karadia vadaeni.”—Isaia 25:1.
13. (a) Edena diba ese Isaia ia durua Iehova laloa bada karana ia hagoadaia totona? (b) Edena dala ai ita be Isaia ena haheitalai amo diba ita abia?
13 Isaia ena nega lalonai, Iehova ese gau namodia momo ia karaia vadaeni Israela besena totona, bona edia sivarai idia torea vadaeni danu. Isaia be unai toretore ia diba. Hegeregere, ia diba Iehova ese iena bese be Aigupito dekenai edia igui hesiai gaukara amo ia ruhaia bona Davara Kakakaka dekenai Farao bona ena tuari taudia edia badu amo ia hamauridia. Ia diba Iehova ese ena bese taudia be taunimanima idia noho lasi gabuna ai ia hakaudia bena Gwauhamata Tanona lalonai ia hakaudia vareai. (Salamo 136:1, 10-26) Unai bamona idaunegai sivaraidia idia hahedinaraia Iehova Dirava be mai maoromaoro bona mai momokani ida ia kara. Iena “palani”—ia ura karaia gaudia ibounai—be do idia guguru. Dirava ia henia diba maorona ese Isaia ia hagoadaia diari lalonai ia raka noho totona. Unai dainai, ia ese ita dekenai haheitalai namona ia hahedinaraia. Bema Dirava ena Hereva, idia torea vadaeni gauna, ita stadilaia namonamo bona ita badinaia, ita danu be diari lalonai do ita noho.—Salamo 119:105; 2 Korinto 4:6.
Hanua ta Idia Hadikaia
14. Peroveta herevana ia gwau hanua ta dekenai dahaka do ia vara, bona reana ia be edena hanua?
14 Isaia 25:2 ai, Iehova ena palani ena haheitalai ta ita itaia, ia gwau: “Oi ese hanua badadia oi hadikaia ore. Edia magu ibounai oi hamakohia ore. Unai idau bese taudia edia king edia ruma be idia boio vadaeni. Do idia haginidia lou lasi ela bona hanaihanai.” Unai be edena hanua? Reana Isaia ese peroveta dalanai Babulonia ia herevalaia. Momokani, nega ia ginidae bona unai hanua badana be idia hadikaia ore.
15. Hari, edena “hanua” badana ia noho, bona dahaka do ia vara ia dekenai?
15 Isaia ia gwauraia hanua ese hari inai nega gauna ta ia laulaulaia, a? Oibe. Apokalupo bukana ese “tanobada ena king ibounai ia ese ia biagua hanuana” ia gwauraia. (Apokalupo 17:18) Unai hanua badana be “Babulonia badana,” tanobada ena tomadiho koikoi ibounai ia laulaulaia. (Apokalupo 17:5) Hari, Babulonia Badana ena kahana badana be Kerisendom, iena dubu gunalaia taudia ese Iehova ena taunimanima edia Basileia harorolaia gaukara dagedage henia karana idia gunalaia. (Mataio 24:14) To, idaunegai Babulonia bamona, nega sisina murinai Babulonia Badana do idia hadikaia ore, bona do ia gini lou lasi.
16, 17. Idaunegai bona hari inai negai, Iehova ena inai taudia ese edena dala ai ia idia hanamoa?
16 Isaia ese unai ‘hanua mai ena magu’ ia herevalaia neganai, dahaka ia perovetalaia? Isaia be Iehova ia hereva henia, ia gwau: “Bese goadadia edia taudia ese oi do idia hanamoa, bona bese dagedagedia edia hanua taudia ese, oi totona do idia gari.” (Isaia 25:3) Edena dala ai unai dagedage hanuana, “bese dagedagedia edia hanua,” ese Iehova do idia hanamoa? Babulonia ena king badana, Nebukanesa, dekenai ia vara gauna mani oi laloatao. Iena lalona ia veria bona iena manoka ia hahedinaraia karana ta ia mamia murinai, unai ese ia doria Iehova bona Iena siahu hereadaena edia namo ia gwauraia hedinarai totona. (Daniela 4:34, 35) Iehova ese ena siahu ia hahedinaraia neganai, ena inai taudia idia ura lasi, to iena siahu karadia idia hakoikoia diba lasi danu.
17 Nega ta kara ta ia vara dainai Babulonia Badana ese Iehova ena siahu karadia ia hakoikoia diba lasi, a? Oibe. Tanobada Ibounai Tuarina Ginigunana lalonai, Iehova ena horoa hesiai taudia idia haroro bona hisihisi idia haheaukalaia. Lagani 1918 ai, Watch Tower Society ena gunalaia taudia idia hadiburaia neganai, lauma dalanai idia guidia danu. Orea ese ia hakaua haroro gaukara be kahirakahira ia ore. Bena, lagani 1919 ai, Iehova ese idia ia hanamoa lou, bona ena lauma amo idia ia hagoadaia, bena idia gaukara tanobada ibounai sivarai namona harorolaia gaukarana idia hagugurua totona. (Mareko 13:10) Apokalupo bukana ese unai ibounai ia perovetalaia, bona edia inai taudia edia hemami ia gwauraia danu. Unai taudia “idia gari dikadika, bona guba ena Dirava ena siahu idia hanamoa bada.” (Apokalupo 11:3, 7, 11-13) Idia ibounai be Iehova idia tomadiho henia matamaia lasi, to ena anina be unai neganai Iena siahu gaukaradia idia itaia bona idia hakoikoia diba lasi, Isaia ese ia perovetalaia hegeregerena.
“Ogogami Taudia Edia Hunia Gabuna”
18, 19. (a) Dahaka dainai Iehova ena taunimanima be idia inai henia taudia ese edia kara maoromaoro badinaia karana idia hadikaia diba lasi? (b) Edena dala ai ‘dagedage taudia edia boiboi do ia hadokoa’?
18 Isaia ese Iehova ena hebogahisi diari lalonai idia raka taudia dekenai ia herevalaia, bona Iehova dekenai ia gwau: “Oi be ogogami taudia edia hunia gabuna. Oi be gau lasi taudia edia durua dalana, idia hisihisi neganai. Oi ese lai guba dekena amo oi naridia noho, bona oi be edia keruma gabuna, dina ena siahu bada dekena amo. Badina be mai edia bogahisihisi lasi taudia edia badu be, lai guba ena dagedage bamona, bona siahu bada, tano kaukau ena latanai bamona. To Lohiabada e, oi ese, ai idia hadikaia gwauraia taudia oi koua vadaeni. Oi ese dagedage taudia edia boiboi oi hadokoa noho, ori ese dina ena siahu ia hakerua noho bamona.”—Isaia 25:4, 5.
19 Lagani 1919 amo, dagedage taudia idia hekwarahi bada tomadiho momokani taudia edia kara maoromaoro badinaia karana hadikaia totona, to idia kwalimu lasi. Dahaka dainai? Badina Iehova be ena taunimanima edia hunia gabuna bona durua dalana. Mai ena siahu bada dagedage lalonai ia be keruma gabuna ia henia bona lai gubana bamona dagedage lalonai ia be haba bamona idia ia naria. Ita Dirava ena diari lalonai ita raka taudia ese ‘dagedage taudia edia boiboi do ia hadokoa’ negana ita naria noho mai eda abidadama ida. Oibe, mai eda ura bada ida Iehova ena inai taudia do idia noho lasi negana ita naria noho.
20, 21. Hari, Iehova ese edena bamona aria ia karaia, bona tanobada matamatana lalonai edena bamona aniani do ia noho danu?
20 Iehova ese ena hesiai taudia ia gimaia sibona lasi. Ia be edia lalokau Tamana dainai, idia ia ubua danu. Lagani 1919 ai, Babulonia Badana amo ena taunimanima ia ruhaia murinai, ia ese idia dekenai kwalimu ariana ia karaia, lauma aniani bada herea unai. Isaia 25:6 ese unai ia perovetalaia, ia gwau: “Siona Ororo ena latanai, Siahu Ibounai Lohiabada ese tanobada ena bese idauidau ibounai totona aria do ia karaia. Unai aria dekenai be aniani namodia momokani, bona uaina danu namo herea.” Unai bamona aria lalonai ita vareai be hahenamo badana! (Mataio 4:4) ‘Iehova ena pata dekenai’ be aniani namodia momo. (1 Korinto 10:21) Lauma dalanai do ita dabu lasi totona, “hesiai tauna mai ena kamonai, bona mai ena kara maoromaoro” oreana amo gau ibounai ita abia.
21 Bona Dirava ese ia karaia aria ena anina be unai sibona lasi. Hari ita moalelaia lauma ariana dainai, Dirava ia gwauhamatalaia tanobada matamatana lalonai do ia noho aniani korikori ita laloa. Unai neganai, “aria dekenai be aniani namodia momokani” ena anina be aniani korikori danu be momo herea. Ta be lauma dalanai eiava tauanina dalanai do ia hitolo lasi. Hari, Iesu ena noho ena “toana” ta, “hitolo bada,” ia guguru dainai abidadama tadikakadia ese hisihisi idia davaria, to unai nega do idia moalelaia bada! (Mataio 24:3, 7) Salamo torea tauna ena hereva ese idia ia hagoadaia momokani. Ia gwau: “Namona be koni momo herea, be tano dekenai do ia vara namonamo. . . . Ororo gabudia danu dekenai, uiti bona aniani avadia do idia tubu namonamo.”—Salamo 72:16.
22, 23. (a) Edena “dabua badana” eiava ‘koua noho gauna’ do idia kokia, bona edena dala ai? (b) Edena dala ai Iehova ese “iena bese taudia edia hemarai” do ia kokia?
22 Hari, gwauhamata namo hereana mani oi kamonai. Isaia ese kara dika bona mase be “dabua badana” eiava ‘koua noho gauna,’ ida ia hahegeregerea neganai, ia gwau: “Inai ororo dekenai, [Iehova] ese, bese idauidau ibounai edia latanai ia noho laloa daradara, idia ia koua noho, dabua badana bamona gauna, do ia kokia, bona inai metau do ia haorea momokani.” (Isaia 25:7) Mani oi laloa! Kara dika bona mase, dabua badana bamona taunimanima idia hametaua gaudia, be do idia ore. Abidadama taudia mai edia kamonai ese Iesu ena mauri davalaia boubouna ena hahenamo do idia abia momokani dinana be mai eda ura bada ida ita naria noho!—Apokalupo 21:3, 4.
23 Peroveta tauna ese unai nega namona ia herevalaia, ia gwau: “[Dirava] ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore. Ia ese danu iena bese taudia edia hemarai, be tanobada ena kahana ibounai dekena amo do ia kokia, badina be Lohiabada be inai bamona ia hereva vadaeni.” (Isaia 25:8) Ta be buruka eiava gorere dainai do ia mase lasi eiava ena lalokau tauna ia mase dainai do ia taitai lasi. Unai nega be idau momokani! Danu, tanobada ena kahana ibounai dekenai, Dirava bona ena hesiai taudia ese nega daudau lalonai idia haheaukalaia hemarai herevadia bona hereva koikoi do idia kamonai lasi. Dahaka dainai? Iehova ese ena badina—koikoi ena tamana, Satani Diabolo, bona Satani ena garana ibounai—do ia hadikaia ore dainai.—Ioane 8:44.
24. Diari lalonai idia raka taudia be Iehova ena siahu bada gaukara idia totona idia itaia neganai, dahaka idia laloa?
24 Iehova ena siahu hahedinaraia daladia ita laloa dainai, ita diari lalonai ita raka taudia ita gwau: “Momokani, inai be iseda Dirava. Ita ese ia ita abidadama henia, bona ia ese ita ia hamauria vadaeni. Inai be Lohiabada! Ita ese ita abidadama henia, bona hari ita moale bada noho, ia ese ita ia hamauria dainai.” (Isaia 25:9) Daudau lasi murinai, badina momo dainai, kara maoromaoro taudia do idia moale. Dibura do ia ore momokani, bona abidadama taudia be Iehova ena diari lalonai do idia noho ela bona hanaihanai. Helaro ma ta ese unai ia hereaia diba, a? Lasi momokani!
Anina Oi Gwauraia Diba, A?
• Hari inai negai, dahaka dainai diari lalonai ita raka be gau badana?
• Dahaka dainai Isaia be Iehova ena ladana ia hanamoa?
• Dahaka dainai Dirava ena taunimanima edia kara maoromaoro be edia inai taudia ese do idia hadikaia diba lasi?
• Diari lalonai idia raka taudia ese edena hahenamo do idia abia?
[Picture on page 12, 13]
Iuda taudia be Moleka dekenai natudia idia bouboulaia
[Pictures on page 15]
Iehova ena kara goadadia ia dibaia dainai, Isaia ese Iehova ena ladana ia hanamoa
[Picture on page 16]
Kara maoromaoro taudia be Iehova ena diari lalonai do idia noho ela bona hanaihanai