Oiemu Kudouna Oi Gimaia
“To gau badana momokani, oiemu kudouna . . . do oi naria namonamo, badina be oiemu laloa dekena amo, oiemu mauri be ia heau noho.”—AONEGA HEREVADIA 4:23.
1, 2. Dahaka dainai iseda kudouna ita gimaia be gau badana?
CARIBBEAN motumotu ta ai tau burukana ta be lai badana ta ia toa murinai ena ruma amo ia raka-lasi. Lai ese ia hadikaia gaudia ia itaia lalonai, ia itaia lagani momo lalonai iena geiti badinai ia gini au badana ia moru. Ia laloa, ‘dahaka dainai ia moru, bema unuseniai idia noho au maragidia be idia gini noho?’ Ia moru vadaeni auna ena gabana ia itaia neganai, haere ia abia. Unai au, toana be do ia moru lasi auna, ena lalona be ia bodaga vadaeni, bona lai badana ia toa murinai unai dika ia hedinarai.
2 Toana be Keristani mauri dalana ai ia gini auka tomadiho momokani tauna ta be abidadama tohoa gauna ta dainai ia moru neganai, unai be dika momokani. Baibel ia hereva maoro ia gwau taunimanima “be maragi negana dekena amo, edia laloa [eiava kudouna] be dika.” (Genese 8:21) Unai ena anina be bema ta ia gima noho lasi, iena kudouna namona be gau ta ese ia veria diba kara dika ia karaia totona. Ita goevadae lasi taudia ibounai eda kudouna be dika ia davaria diba dainai, namona be inai sisiba ita laloa namonamo: “To gau badana momokani, oiemu kudouna . . . oi naria namonamo.” (Aonega Herevadia 4:23) Unai dainai, iseda kudouna be edena bamona ita gimaia diba?
Sekea Loulou Karana—Laloaboio Lasi
3, 4. (a) Kudouna korikori ita laloa neganai reana edena henanadai ita gwauraidia? (b) Dahaka ese ita do ia durua eda kudouna ese ia laulaulaia lalona ita tahua totona?
3 Bema doketa ta dekenai oi lao, oi ia itaia totona, oiemu kudouna ena namo do ia tohoa. Oiemu tauanina, emu kudouna danu, ese ia hahedinaraia aniani namodia oi ania, a? Oiemu rara ena goada be edena bamona? Emu kudouna ena heau ia maoro bona goada, a? Tauanina durua eksasais haida oi karaia, a? Lalo-hekwarahi momo ese emu kudouna ia hamanokaia, a?
4 Bema iseda kudouna korikorina ita sekea loulou be namo, kudouna ese ia laulaulaia lalona be edena bamona? Iehova ese unai ia tahua noho. (1 Sivarai 29:17) Namona be ita ese ita tahua danu. Edena dala ai? Inai bamona henanadai amo: Sibona egu stadi hanaihanai bona hebou lao henia hanaihanai karadia amo egu kudouna ese lauma aniani momo ia abia, a? (Salamo 1:1, 2; Heberu 10:24, 25) Egu kudouna lalonai Iehova ena sivarai be “lahi bamona, . . . lauegu turiana dekenai,” unai dainai Basileia harorolaia gaukarana bona hahediba taudia halaoa gaukarana lau karaia, a? (Ieremia 20:9; Mataio 28:19, 20; Roma 1:15, 16) Lau ia hagoadaia dainai lau raka goada, bona dala ia noho neganai ful-taim hesiai gaukarana ta lalonai lau vareai, a? (Luka 13:24) Lauegu kudouna be edena bamona gaudia ia mamia noho? Tomadiho momokani ai edia kudouna ia tamona taudia edia hebamo lau ura henia, a? (Aonega Herevadia 13:20; 1 Korinto 15:33) Namona be idia kerere gaudia ita itaia haraga bona maoromaoro hanamoa karana ita karaia.
5. Abidadama tohoa gaudia amo dahaka namo ia vara diba?
5 Nega momo abidadama tohoa gaudia ita davaria. Unai ese dala idia kehoa eda kudouna ena toana ita itaia totona. Mose ese Gwauhamata Tanona ai kahirakahira do idia vareai Israela taudia ia hamaoroa, ia gwau: “Lohiabada, emui Dirava, ese lagani 40 lalonai taunimanima noho lasi tano dekenai umui ia hakaua . . . be do umui manau totona, bona umui emui lalona ia tohoa, do ia diba, umui ese iena Taravatu do umui badinaia diba o lasi.” (Deuteronomi 8:2) Ita laloa lasi gaudia eiava hedibagani ita davaria neganai, nega momo hemami, ura, bona kara haida idia hedinarai dainai ita hoa, ani? Iehova ese ia koua lasi hahetoho amo iseda manoka gaudia ita itaia, bona dala ia kehoa eda kara ita hanamoa totona. (Iamesi 1:2-4) Iseda kara hetoho negadiai be hanaihanai mai guriguri danu do ita laloa lou.
Iseda Hereva ese Dahaka Idia Hahedinaraia?
6. Ita herevalaia gaudia ese eda kudouna ai idia noho gaudia be edena bamona idia hahedinaraia diba?
6 Iseda kudouna lalonai ita haboua gaudia be edena bamona ita dibaia diba? Iesu ia gwau: “Tau namona ena lalona dekenai ia laloa gaudia be namo dainai, kara namodia do ia havaraia. Tau dikana ena lalona dekenai ia laloa gaudia be dika dainai, kara dikadia do ia havaraia. Taunimanima ese edia lalona [eiava kudouna] dekenai idia honu gaudia, be do idia gwauraia, edia uduna dekenai.” (Luka 6:45) Nega momo, ita herevalaia gaudia ese iseda kudouna ai ia noho gauna idia hahedinaraia. Nega momo kohu bona tauanina dalanai ita hagugurua gaudia ita herevalaia, a? Eiava iseda herevahereva lalodiai lauma gaudia bona tiokratik tahua gaudia ita herevalaidia momo? Haida edia kerere ita herevalaia noho lasi, to mai lalokau ida ita koua, a? (Aonega Herevadia 10:11, 12) Taunimanima bona edia mauri lalonai idia vara gaudia ita herevalaia momo to hakaua herevadia bona lauma gaudia ita herevalaia momo lasi, a? Unai ese ia hahedinaraia ita ura ma haida sibona edia mauri daladia do ita herevalaia kava, a?—1 Petero 4:15.
7. Iosepa ena kakana 10 edia sivarai amo kudouna gimaia karana dekenai dahaka sisiba ita abia?
7 Ruma bese badana ta lalonai ia vara gauna mani oi laloa. Iakobo ena natuna memero badadia 10 be edia tadina Iosepa dekenai “hereva namona ta idia gwauraia lasi.” Dahaka dainai? Ia be edia tamana ese ia ura henia bada merona dainai idia mama. Gabeai Iosepa be Dirava amo nihi haida ia abia, unai ese idia hamomokania Iehova ena lalo-namo ia abia neganai, ia dekenai “idia badu dikadika.” (Genese 37:4, 5, 11) Idia hebogahisi lasi, bona edia tadina be igui hesiai tauna bamona idia hoihoilaia. Bena, edia kara kerere idia hunia totona edia tamana idia koia, unai dainai ia laloa Iosepa be dagedage animal ta ese ia alaia. Iosepa ena kakana 10 be unai nega ai edia kudouna idia gimaia lasi. Bema karaharaga ma haida ita maumauraia, unai ese ia hahedinaraia eda kudouna lalonai ura dikana eiava mama ia noho, a? Namona be ita gima noho iseda uduna amo ia mai gauna ita tahua namonamo totona bona karaharaga ura kereredia ita kokia.
8. Bema nega ta ita koikoi, dahaka ese ita do ia durua eda kudouna ita tahua namonamo totona?
8 “Dirava ia koikoi diba lasi,” to taunimanima idia koikoi diba. (Heberu 6:18) Salamo torea tauna ia gwau: “Tau ta lau abidadama henia diba lasi.” (Salamo 116:11) Aposetolo Petero danu be nega toi ia koikoi ia gwau Iesu ia diba lasi. (Mataio 26:69-75) Momokani, namona be ita naria namonamo bona koikoi ita dadaraia, badina be Iehova ese “uduna mai ena koikoi” ia inai henia. (Aonega Herevadia 6:16-19) Bema nega ta ita koikoi, namona be unai ia vara ena badina ita laloa namonamo. Taunimanima garina ita gari dainai, a? Panisi ita abia garina ita gari dainai, a? Ena badina korikori be sibona eda ladana do ia dika garina eiava sibona eda namo ita laloa bada dainai, a? Herevana ena badina be dahaka, to unai gauna do ita lalohadailaia, mai manau ida iseda kerere ita abia dae, bona Iehova ita noia eda dika do ia gwauatao, eda manoka gauna ita hanaia totona iena heduru ita tahua be maoro! Reana “ekalesia gunalaia taudia” edia amo heduru do ita abia be namo.—Iamesi 5:14.
9. Iseda guriguri ese iseda kudouna ai idia noho gaudia be edena bamona idia hahedinaraia diba?
9 Iehova ese King Solomona ena noinoi, aonega bona diba totona, ia haerelaia neganai, ia gwau: “Oiemu ura bona oiemu laloa be maoro momokani. Oi ese kohu, o taunimanima edia mataurai . . . oi noia lasi. . . . Unai dainai aonega bona diba bada be oi dekenai do lau henia. Ma danu lau ese kohu momo, bona taunimanima edia mataurai be oi dekenai do lau henia.” (2 Sivarai 1:11, 12) Solomona ia noia gaudia bona ia noia lasi gaudia amo, Iehova be Solomona ena ura korikori ia diba. Iehova ita hereva henia karana ese edena bamona iseda kudouna lalonai idia noho gaudia be ia hahedinaraia? Iseda guriguri lalonai diba, aonega, bona lalo-parara abia urana ita hahedinaraia, a? (Aonega Herevadia 2:1-6; Mataio 5:3) Basileia gaudia ita laloa bada, a? (Mataio 6:9, 10) Bema guriguri dalana tamona sibona ita karaia loulou, reana unai ese ia hahedinaraia namona be nega ita atoa Iehova ena kara ita lalohadailaidia totona. (Salamo 103:2) Namona be Keristani taudia ibounai idia gima noho, edia guriguri ese ia hahedinaraia gaudia idia diba totona.
Iseda Kara ese Dahaka Idia Hahedinaraia?
10, 11. (a) Heudahanai bona sihari kava be edeseniai idia hamatamaia? (b) Dahaka ese ita do ia durua ‘eda kudouna dekenai ita heudahanai’ lasi totona?
10 Momo idia gwau iseda hereva ese ita ia herevalaia sisina, to eda kara ese ita ia herevalaia badabada. Iseda kara ese iseda kudouna ai idia noho gaudia idia hahedinaraia badabada. Hegeregere, kara maoromaoro badinaia lalonai, kudouna ita gimaia ena anina be sihari kava eiava heudahanai dadaraia karana sibona lasi. Iesu ena Haroro Herevana Badana lalonai, ia gwau: “Bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” (Mataio 5:28) Edena dala ai eda kudouna ai heudahanai karana ita dadaraia diba?
11 Abidadama bese kwarana Iobu ese haheitalai namona headava tatau bona hahine dekenai ia hahedinaraia. Iobu be matamata hahine ida dina ta ta gaukaradia idia karaia bona mai hebogahisi ida ia durudia bema heduru idia ura. To ura goadana ese ia veria lasi idia ia ura henia totona bona unai ia laloa lasi momokani. Dahaka dainai? Badina be ena lalona ia hadaia auka, hahine do ia raraia lasi mai ena ura kererena ida. Ia gwau: “Lauegu matana dekenai taravatu lau atoa vadaeni, nega ta kekeni do lau itaia noho lasi, matabodaga kara totona.” (Iobu 31:1) Namona be ita danu be eda matana dekenai unai bamona taravatu ita atoa bona eda kudouna ita gimaia.
12. Luka 16:10 be edena bamona do oi badinaia emu kudouna oi gimaia totona?
12 Dirava ena Natuna ia gwau: “Gau maragina ia karaia maoro tauna ese gau badadia do ia karaia maoro, to gau maragina ia karaia kerere tauna ese gau badadia do ia karaia kerere danu.” (Luka 16:10) Oibe, namona be dina ta ta lalodiai, toana be gau maragidia dekenai iseda kara ita tahua namonamo, iseda ruma lalonai idia vara gaudia danu. (Salamo 101:2) Iseda ruma ai ita helai bona televisen ita itaia, eiava Internet ita gaukaralaia neganai, ita naria namonamo bona inai Baibel sisiba, ita badinaia, a? Ia gwau: “Umui be Dirava ena taudia dainai, heudahanai, sihari kava karadia, bona matabodaga, bona kohu ura dikadika kara, be do umui karaia lasi momokani. Lebulebu hereva, hereva kavakava, hevaseha hereva mai miro danu be namo lasi.” (Efeso 5:3, 4) Bona televisen bona vidio gadara gaudia amo idia halasia dagedage karadia be edena bamona? Salamo torea tauna ia gwau: “Taunimanima namodia bona dikadia edia kara, be Dirava ese ia tahua, maka tamona dekenai. Taravatu utua taudia be, Lohiabada ese ia badu henidia noho.”—Salamo 11:5.
13. Kudouna amo ia hedinarai gauna ita laloa neganai, dahaka sisiba ita laloa namonamo?
13 Ieremia ia gwau: “Kudouna be mai koikoi bada, bona mai dika rohoroho danu.” (Ieremia 17:9) Unai koikoi ia hedinarai diba bema iseda kerere dainai ekskius idauidau ita gwauraia, eda kerere ena dika ita hamaragia, ita laloa eda manoka gaudia dikadia be mai edia badina maorodia, eiava ita hagugurua gaudia ita habadaia koikoi. Ena kudouna ia koikoi tauna be toana rua ia hahedinaraia diba—uduna amo gau ta ia gwauraia, to kara amo gau idauna ta ia hahedinaraia. (Salamo 12:2; Aonega Herevadia 23:7) Mai momokani ida iseda kudouna amo ia hedinarai gauna ita tahua namonamo be mai anina bada!
Iseda Matana Ia Namo, A?
14, 15. (a) Matana ‘namona’ be dahaka? (b) Matana ia namo noho ese edena bamona ita ia durua eda kudouna ita gimaia totona?
14 Iesu ia gwau: “Tauanina ena lamepa be matana.” Bena, ma ia gwau: “Unai dainai bema oiemu matana ia namo, oiemu tauanina ibounai do ia mai diari danu.” (Mataio 6:22) Matana namona be tahua gauna, eiava ura, tamona do ia itaia, bona gau ta ese do ia veria siri lasi. Oibe, iseda matana be “Dirava ena Basileia bona iena kara maoromaoro” ia raraia noho be namo. (Mataio 6:33) Bema iseda matana ia namo lasi iseda kudouna ese ia laulaulaia lalona dekenai dahaka do ia vara diba?
15 Moni gaukara mani ita laloa. Ruma bese dekenai durua gaudia henia be Keristani maduna ta. (1 Timoteo 5:8) To bema hari idia halasia gaudia, gau namo hereana, iboudiai ese idia tahua aniani, dabua, ruma, bona ma kohu haida dekenai hahetoho ia abia be edena bamona? Unai ese kudouna bona lalona idia guia diba, bona iseda tomadiho karana ai do ita lalo-rua, ani? (Salamo 119:113; Roma 16:18) Iseda tauanina durua gaudia ita laloa bada herea dainai ruma bese, bisinesi, bona kohu sibona totona eda mauri ita gaukaralaia be anina lasi, ani? Inai lauma helaga amo ia vara sisiba ita laloatao: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona [eiava kudouna] do idia guia garina, vadaeni Lohiabada ena Dina do ia mai haraga, umui hegaegae lasi garina. Badina be unai Dina be tanobada latanai idia noho taunimanima ibounai dekenai do ia ginidae.”—Luka 21:34, 35.
16. Iesu ese matana ia herevalaia neganai dahaka sisiba ia henia, bona dahaka dainai?
16 Matana be lalona bona kudouna dekenai lalohadai ia henia gauna badana ta. Ia itaia noho gauna ese iseda lalohadai, hemami, bona kara ia biagua auka diba. Laulau dalanai, Iesu ese matana ena veria siahuna ia herevalaia bona ia gwau: “Oiemu matana idiba kahana ese bema kerere ia havaraia oi dekenai, oiemu imana dekenai oi kokia, oi negea momokani, badina oiemu tauanina ena kahana ta bema ia boio be ia dika sisina, to oiemu tauanina ibounai lahi ia araia gabuna dekenai do idia negea vareai, be ia dika herea momokani.” (Mataio 5:29) Matana ita biagua, gau kereredia do ia itaia lasi totona. Hegeregere, namona be iseda matana ese hemami bona ura kereredia idia havaraia gaudia ia itaia lasi.
17. Kolose 3:5 badinaia karana ese edena bamona ita ia durua kudouna ita gimaia totona?
17 Matana sibona amo lalohadai eiava hemami ita abia lasi. Hemami havaraia gaudia ma haida, hegeregere dogoatao karana eiava kamonai, be mai edia gaukara, bona namona be unai totona ita gaukaralaia tauanina kahadia ita biagua namonamo. Aposetolo Paulo ia gwau: “Unai dainai tauanina ena ura kara, umui emui lalonai idia gaukara noho, be do umui hamasea. Gaudia be inai: Heudahanai, lebulebu, ura dikadia, matabodaga, bona kohu momo ura dikadika kara. Kohu momo ura dikadika kara be hegeregere kaivakuku tomadiho henia kara bamona.”—Kolose 3:5.
18. Lalohadai kereredia kokia totona dahaka ita karaia be namo?
18 Iseda lalona momokani dekenai, ura kererena ta ia vara matamaia diba. Unai gauna laloa noho karana ese ura kererena ia habadaia, bena kudouna ia veria. ‘Vadaeni unai ura dikana be ia rogorogo bamona, unai murinai kara dika ia havaraia.’ (Iamesi 1:14, 15) Taunimanima momo idia gwau ta sibona ena kopina ia gadaralaia karana be unai dala amo ia vara. Iseda lalona be lauma gaudia amo ita hahonua noho be mai anina bada! (Filipi 4:8) Bona bema lalohadai kererena ta be iseda lalona ai ia vara neganai, ita hekwarahi ita kokia totona.
‘Iehova Ena Hesiai Gaukara Karaia mai Emu Kudouna Ibounai Ida’
19, 20. Edena dala ai mai eda kudouna ibounai ida Iehova ena hesiai gaukara do ita karaia diba?
19 King Davida ia buruka neganai, ena natuna ia hamaoroa, ia gwau: “Egu natuna e, oiemu tamana ena Dirava dekenai do oi manada momokani, bona iena hesiai gaukara do oi karaia mai oiemu kudouna ibounai, bona mai oiemu lalona tamona danu. Dirava ese iseda laloa ibounai bona iseda ura ibounai ia diba.” (1 Sivarai 28:9) Solomona be “aonega [kamonai kudouna, NW ]” totona ia guriguri. (1 King Taudia 3:9) To, ena mauri ibounai lalonai unai bamona kudouna ia naria be mai ena hekwarahi.
20 Bema ita ura unai kara dekenai ita kwalimu, namona be Iehova ese ia ura henia kudouna ita abia sibona lasi to ita gimaia danu. Unai bamona ita karaia totona, namona be Dirava ena Hereva ena hadibaia herevadia be eda kudouna dekenai ita atoa—‘lalonai ita dogoatao noho.’ (Aonega Herevadia 4:20-22) Namona be iseda kudouna tahua karana ita manadalaia, mai guriguri danu iseda hereva bona kara ese idia hahedinaraia gaudia ita laloa lou. Unai bamona laloa lou karana be namo do ia havaraia bema mai eda ura ida Dirava ena heduru ita noia, ita davaria manoka gaudia ita hanamoa totona, ani? Iseda tauanina ena kahana idauidau amo ita abia lalohadai ita naria namonamo be mai anina bada! Unai bamona ita karaia lalonai, ita diba momokani “Dirava ena maino ese taunimanima edia diba ia hanaia momokani. Keriso Iesu [ita] danu ia hakapua tamona dainai, inai maino ese [ita] laloa gaudia, bona [iseda] kudouna idia mamia gaudia ibounai do ia gimaia namonamo.” (Filipi 4:6, 7) Oibe, namona be eda lalona ita hadaia iseda kudouna do ita gimaia namonamo bona Iehova ena hesiai gaukara ita karaia mai eda kudouna ibounai ida.
Oi Laloatao, A?
• Dahaka dainai kudouna ita gimaia be mai anina bada?
• Ita gwauraia herevadia ita laloa karana ese edena bamona ita ia durua iseda kudouna ita gimaia totona?
• Dahaka dainai namona be iseda matana idia “namo” noho?
[Pictures on page 23]
Haroro gaukara, hebou, bona ruma ai dahaka ita herevalaia momo?
[Pictures on page 25]
Matana namona be ma gau ta ese ia veria lasi